برنامج بلدنا بالمصرى
تقديم ريم ماجد
على قناة ONTV
يوتيوب كاملة
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
ونبدا
برنامج بلدنا بالمصرى تقديم ريم ماجد على قناة ONTV حلقة الاثنين 5 مارس 2012 يوتيوب كاملة
بلدنا بالمصري: يطلع مين أدمن صفحة المجلس العسكري
يسعد مساكم وحلقة جديدة من بلدنا بالمصري هنبدأها بآخر أخبار بلدنا وهنختمها بكل علامات الاستفهام والتعجب حوالين اللي فاضل من المرحلة الانتقالية اللي خدت شكل المتاهة من كتر ما لفينا ودرنا فيها ومن كتر ما طلعنا من حفرة ووقعنا في دحديرة ورا التانية.. بس لحد ما ييجي أوانها وقبل ما نبدأ آخر أخبار بلدنا: عندنا بس علامة استفهام وكذا علامة تعجب على المدعو "أدمن صفحة المجلس العسكري"!!! لحد دلوقتي ومن يوم ما ظهرت صفحته على الفيس بوك في يوم 28 سبتمبر 2011 واحنا مش عارفين مين دة ولا مين دول ولا ايه علاقتهم او علاقة الصفحة رسميا او حتى وديا بالمجلس العسكري.. واللي بيتكتب على الصفحة من آراء او اللي البيانات اللي بتصدر عنها الى اي مدى بتعبر عن وجهة نظر المجلس او ما تعبرش والي اي مدى المجلس العسكري مسؤول او مش مسؤؤل عن اللي بيتنشر عليها؟!!! واذا كانت الصفحة ديه لها صلة بالمجلس العسكري ايه الحكمة من وجودها في حين ان المجلس ليه صفحته الرسمية اللي بيتواصل من خلالها مع "شباب الثورة وشعب مصر العظيم"، حسب الصيغة الشهيرة لكل رسايل المجلس؟!!! واذا المجلس مالوش علاقة بيها ليه ما بينفيش رسمياً الصلة ديه زي ما نفى قبل كدة مثلاً ان يكون الخبراء الاستراتيجيين بيعبروا عن رأي المجلس او مواقفه، بعد واقعة "أفران هتلر الشهيرة"؟!!! وخصوصاً ان الصفحة ديه يا ما خونت حركات وفئات من المجتمع واشخاص والأمثلة الأشهر كانت: الكاتب الأمريكي توماس فريدمان وطلبة الجامعة الأمريكية وحركة 6 ابريل!!!... طيب ايه لزمة علامات الاستفهام والتعجب ديه النهاردة؟!!! لزمتها ان فيه رسالة انتشرت النهاردة على الانترنت عليها لوجو صفحة "أدمن المجلس الأعلى" نصها كالآتي:
طبعاً قامت الدنيا وما قعدتش ونزلت التعليقات ترف ومنين المجلس العسكري حما الثورة ومنين الأدمن بيشكر كل من ساند الرئيس اللي خلعته الثورة اللي حماها المجلس العسكري.. ومين اللي من حقه يوعد ببراءة متهم قدام القضاء.. وأي براءة ديه اللي تظهر بملفات هيتم تقديمها للاعلام_يا ريت للقضاء_ ... وما حدش بقى فاهم حاجة!!! ولكن.. سرعان ما نفت الصفحة الشهيرة بصفحة أدمن المجلس العسكري صحة الرسالة في رسالة تانية سماها "تحذير"
لكن تفضل علامة الاستفهام: مين دول؟!!! وهم ردوا على السؤال دة مع أول ظهور ليهم يوم 28 سبتمبر 2011 بمناسبة نزول المشير طنطاوي بالبدلة المدنية في شوارع وسط البلد وكان نص الرسالة كالآتي:
ومع ذلك تفضل علامة الاستفهام قائمة: مين دول؟ وفوقيها علامة استفهام تانية: وايه علاقتهم بالمجلس العسكري؟!! وتفضل علامة التعجب من عدم اقدام المجلس العسكري في ولا مرة من سبع شهور ولحد النهاردة لتوضيح طبيعة العلاقة والصلة ما بين المجلس الأعلى للقوات المسلحة و"أدمن صفحة المجلس الأعلى للقوات المسلحة"!!!!
بلدنا بالمصري: المجلس العسكري لا يفرض رأيه على القضاء
نروح أحسن لآخر أخبار بلدنا وهنبدأها بالقضية اللي قسمت ضهرنا_بدل ما اقول كسرت مناخيرنا_: النهاردة وفي أول تصريح من مسؤول عسكري عن القضية، اللواء طاهر عبد الله طه رئيس الهيئة الهندسية بالقوات المسلحة، أكد في تصريحات صحفية اثناء جولة ميدانية في مدينة 15 مايو، أنه "لا يمكن للقوات المسلحة أن تفرض رأيها على القضاء المصرى، فيما يخص قضية التمويل الأجنبى.. لكن رجع واكد أنه من الناحية السياسية توجد علاقة بين مصر والولايات المتحدة الأمريكية يجب أن يتم أخذها فى الاعتبار ووضعها فى الحسبان فى مثل هذا الموقف السياسى"..
التفجير الـ ١٣ لخط الغاز المؤدى لإسرائيل والأردن
علامة إستفهام كبيرة و هي أن منذ قليل تم تفجير للمرة الـ ١٣ خط الغاز المؤدى لإسرائيل والأردن و لمزيد من المعلومات إحنا معنا على الهاتف أ/ مصطفى سنجر مراسل جريدة الشروق - شمال سيناء
السيد "لن تركع" يرأس اجتماع المجموعة الأمنية
أما رئيس مجلس الوزرا صاحب المقولة الشهيرة: "مصر لن تركع"، يا دوب كام يوم قبل ما تتمرمغ كرامتها في التراب، كان بيرأس النهاردة اجتماع المجموعة الوزارية الأمنية في حضور 15 وزير.. الاجتماع ناقش موضوعات ياما ليها علاقة اجراءات اعادة الأمن ومجهودات وزارة الداخلية فى هذا الاطار.. واحتياجات وزارة الداخلية من المعدات والدعم الحكومى والدعم الشعبي... أما اجراءات استعادة الكرامة ومحاسبة المسؤول عن مرمغتها في الوحل أو حتى أي كلمة ليها علاقة بالموضوع من قريب أو من بعيد فدة مش واضح بس هنحاول نستوضح من:
النيابة بدأت التحقيق ببلاغات القضاة ضد عبد المعز
في نفس السياق، بس لكن المردة في سياق التحرك الايجابي، وتحديداً تحرك القضاة، النيابة العامة بدأت التحقيق في البلاغ المقدم من رؤساء محاكم الاستئناف ضد المستشار عبد المعز إبراهيم رئيس محكمة الاستئناف بالقاهرة، و كذلك المجلس الأعلى للقضاء، في واقعة سفر المتهمين الأمريكيين في قضية التمويل .. وهنعرف التفاصيل عن آخر التطورات من: المستشار / أشرف ندا رئيس محكمة إستئناف المنيا
بلدنا بالمصري: إتجاه لإسقاط عضوية البلكيمي من البرلمان
هنروح تحت قبة مجلس الشعب.. النيابة العامة اتخذت النهاردة اجراءاتها القانونية لاستئذان المجلس في سماع اقوال النائب أنور البلكيمي، نائب حزب النور فيما ورد في اقوال مجموعة من الاطباء والممرضين في مستشفى لجراحات التجميل في العجوزة على خلفية واقعة الي وصفه في اقواله قدام النيابة بالاعتداء عليه وسرقة 100 الف جنيه.. امبارح الهيئة العليا لحزب النور قررت فصله وهو تقدم باستقالته من المجلس.. لكن البت في الموضوع هيكون خلال جلسة المجلس يوم الحد اللي جاي وربما يكون فيه اتجاه بس لمحاسبته بدون قبول الاستقالة وربما يكون فيه اتجاه تاني لاسقاط عضويته مش قبول استقالته والفرق انه في حالة اسقاط العضوية ما يقدرش يترشح في الدورة اللي جاية.
بلدنا: موظفوا البريد مستمرون في إعتصامهم لليوم الثاني
أما الموظفين في الهيئة القومية للبريد، فعدد منهم لسة مستمر في الاعتصامهم داخل المقر الرئيسى في العتبة لليوم التاني على التوالى. و هانعرف تفاصيل أكتر من أ/ محمد إبراهيم الصفطاوي رئيس النقابة العامة المستقلة للبريد المصري
بلدنا بالمصري: تطورات أزمة مصوري ماسبيرو
تطورات أزمة مديري التصوير في ماسبيرو لسه مستمرة و كان من المفترض لقائهم مع رئيس إتحاد الإذاعة و التليفزيون و هانعرف أيه اللي حصل من أ/ أمير حشاد وهو مدير تصوير بماسبيرو
بلدنا بالمصري: الحمى القلاعية تهدد مواشي الصعيد
من بعد سوهاج امبارح، خلونا نوصل لحد أسيوط والغربية، تعددت المحافظات ومرض الحمى القلاعية واحد. و لمزيد من التفاصيل إحنا معانا أ/ محمد عبد القادر نقيب الفلاحين. و د / جابر عبد الوهاب مدير مديرية الطب البيطري بأسيوط
بلدنا بالمصري: أبطال مصر من رجال الإسعاف
من أهالي المحروسة اللي ليهم نصيب كمان النهاردة في بلدنا بالمصري: أهالي المحروسة من المسعفين اللي رغم المحنة ومر الكاس كل واحد فيهم في مكانه بيلعب في اليوم الواحد أدوار بطولة مطلقة.
بلدنا بالمصري: الأرزاق على حس ميدان التحرير
وقبل الفاصل، هنوصل لحد ميدان التحرير نلف لفة على الجماعة الأرزقية اللي بيسترزقوا على حس الميدان واللي فيه.
بلدنا بالمصري: فك طلاسم متاهة المرحلة الإنتقالية
أما واننا دخلنا في متاهة انتقالية مليانة حفر ومطبات مالهاش اول من آخر وكل ما نطلع من حفرة نقع في دحديرة وبما ان السؤال والحمد لله لسة ما حرمش على الأقل لحد دلوقتي فوجب نطرح كل علامات الاستفهام والتعجب حوالين آخرة المتاهة ديه وهنوصل لها ازاي ومن أي طريق والطريق دة دغري ولا لسة هيلف بينا ويدور وفين المطبات والحفر اللي لسة مستنيانا في السكة وازاي نفاديها؟!!! والأهم من كل دة هي هانت وكلها فركة كعب ونوصل لبر الأمان ولا لسة هنتوه تاني في السكة؟!!!
ومن هنا لحد آخر الحلقة هنحاول على قد ما نقدر نفك طلاسم ما تبقى من المتاهة الانتقالية واحنا على وشك ننتخب أول رئيس بعد الثورة ونكتب دستورنا الجديد.. ومن سخرية القدر ان الدستور الجديد اللي ثبت بالتجربة والخطأ اننا كان لازم نكتبه ونبصم عليه بالعشرة في الأول ادينا هنكتبه في الاخر وكاننا ماشيين بالمقلوب او عكس الاتجاه.. لكن قدر الله وماشاء فعل وآدي الله وآدي حكمته وربنا يقدرنا جميعاً على طلاسم المتاهة.. وهنستعين عليها النهاردة بضيوفنا:
المستشار/ محمد حامد الجمل: رئيس مجلس الدولة الأسبق
د. عبد الله المغازى: عضو مجلس الشعب "مستقل"
النائب/ على فتح الباب: زعيم الأغلبية فى مجلس الشورى
