نشاهد اليوم
برنامج اون تيوب
ON Tube
و الذى يذاع على قناة ONTV
تقديم رامى رضوان
برنامج اون تيوب برنامج يقوم علي الصحافة الشعبية التي بدات في الانتشار حيث اصبحت بديلا هاما للاعلام الرسمي و يساعد علي انتشارها الشبكات الاجتماعية لذلك يهتم اون تيوب بعرض محتويات اللقطات التي يصورها المواطنون بأنفسهم كما يهتم البرنامج بمساعدة المواطنين الراغبين في توثيق لحظات بعينها و نشرها علي الانترنت بل و عرضها علي شاشة اون تي في لايف
شارك الخبر مع اصدقائك على الفيس بوك و تويتر و جوجل +1 من اعلى الصفحة
مع تمنياتى بمشاهدة ممتعة
و لنبداء
برنامج اون تيوب تقديم رامى رضوان و حلقة الاحد 21 اكتوبر 2012 من قناة ONTV يوتيوب كاملة
ONTube: طفلة تصمم على مقابلة الرئيس
اول فيديو معانا من مصر .. تم تصويره في المؤتمر الشعبي اللي عقده الرئيس محمد مرسي في مرسى مطروح. الفيديو بتظهر فيه طفلة من اهالي المدينة .. وهي بتنادي علي عمو مرسي .. زي مابتقول .. و بتحاول بكل الطرق إنها تعدي قوات الحراسة الخاصة عشان توصله.
الفيديو حاز علي نسبة مشاهدة عالية و بيتداوله العديد من مستخدمي المواقع الإجتماعية .. خاصة انه متصور بوضوح من وسط قوات الحراسة .. الى جانب إن ناس كتير أعجبوا بإصرار الطفلة على الوصول للرئيس .. عشان تديله ورقة.
ONTube: لحظة إنفجار السيارة ببيروت
الي بلاد الأرز. طبعا مايغبش على حضراتكم الحدث المؤسف اللي أصاب لبنان يوم الجمعة اللي فات. انفجار سيارة مفخخة في ساحة الاشرفية بالعاصمة بيروت .. واللي توفي على أثره 8 اشخاص .. من بينهم العميد وسام الحسن رئيس فرع المعلومات في جهاز الامن الوطني اللبناني .. الى جانب سقوط أكتر من 80 مصاب.
وطبعا خلال اليومين اللي فاتو .. تناقلت الوسائل الإعلامية العديد من الفيديوهات والصور لما بعد الحادث. لكن الفيديو التالي نزله صاحبه علي موقع يوتيوب من حوالي 4 ساعات فقط .. و ده بيعتبر اول فيديو بيرصد لحظة الانفجار اللي أعقب انفجار السيارة المفخخة.
يذكر ان اليوم اندلعت أعمال عنف فى ساحة الشهداء بالعاصمة بيروت .. بين قوات الأمن اللبنانى وعدد من المشاركين فى تشييع جنازة اللواء وسام الحسن .. وضحايا العملية الإرهابية بحي الأشرفية شرق بيروت.
واستخدمت قوات الأمن قنابل الغاز المسيلة للدموع لتفريق حشود المشيعين .. مما أدى إلى إصابة عدد منهم.
خالص تعازينا لأسر ضحايا الحادث المؤسف .. و نتمنى للمصابين الشفاء العاجل.
ONTube: أول مقاتلة سورية
من لبنان الي سوريا .. اللي استقبلت المبعوث الدولي الاخضر الابراهيمي اليوم بانفجار سيارة ملغومة في دمشق .. انفجرت قرب مركز الشرطة فى حى باب توما بوسط العاصمة دمشق.
إتجهت سيارات الإسعاف إلى مكان الانفجار .. وأغلقت قوات الأمن المنطقة .. وذكر شهود عيان إن عدد من السيارات احترق.
وقع الانفجار فى الوقت اللى بيلتقى فيه الرئيس بشار الأسد بالمبعوث الدولى الى سوريا الأخضر الإبراهيمى .. واللى دعا إلى هدنة مؤقتة و تعليق أعمال العنف فى سوريا .. اثناء عيد الاضحي المبارك.
لكن يبدو ان هذه الامنية لن تتحقق .. خاصة بعد ما اصبح جميع طوائف السوريين مشتركين في هذه الثورة .. والفيديو اللي جاي خير دليل على ذلك. بنشوف فيه مجموعة من عناصر الجيش الحر اثناء تمشيطهم لاحد المناطق الريفية .. وبتظهر معهم سيدة ترتدي الزي العسكري .. وبتحمل رشاش. ولما صاحب الفيديو اتكلم معاها .. إتضح انها بتعمل ممرضة .. وقامت بالدعاء علي بشار الاسد .. وعلى اطباء دير الزور .. اللي اتهمتهم بانهم خايفين ييجوا لمنطقتها الريفية .. خوفا من ان يتعرضوا للموت. واكدت انها الى جانب عملها كممرضة .. فهي منضمة للجيش الحر .. ضاربة مثلا قويا على الاصرار والشجاعة.
ONTube: مسيرة العكر في قلوبنا
الي البحرين .. ومشهد لا يتغير .. مسيرات بالليل والنهار بتجوب شوارع العديد من المدن و القري البحرينية .. بيحمل خلالها المحتجين اعلام البحرين .. وبعض الصور للشهداء والرموز الدينية لثورة الكرامة في البحرين.
الفيديو التالي من منطقة دار كليب بمدينة العكر .. وهو لمسيرة احتجاجية ضد نظام الملك حمد بن عيسي ال خليفة.
اطلق المتظاهرين علي المسيرة (العكر في قلوبنا) .. واكدوا خلالها علي دعمهم للثورة البحرينية .. وعلى ان النظام الحمدي لا يفي بوعوده .. لانه وعد بإصلاحات سياسية .. لكنه لم ينفذ أي من تلك الوعود حتي الان.
ONTube: ضد التقشف في لندن
ونروح الي اوروبا .. وبالتحديد انجلترا .. اللي إنضمت الي البلاد اللي بتشهد موجة احتجاجية ضد سياسات حكوماتها التقشفية. تدفق أمس عشرات الآلاف من المتظاهرين الى شوارع العاصمة البريطانية لندن .. تنديدا بتدابير التقشف اللى هتنتهجها الحكومة البريطانية.
النقابات العمالية والحملات المناهضة للحرب والسياسيين اليساريين والجماعات المحلية وكذلك النشطاء .. كلهم بيأملوا أن تظهر مسيرة السبت عدم شعبية التخفيضات المقررة فى القطاع العام .. واللى بتهدف إلى انهاء العجز فى الميزانية البريطانية.
الفيديو التالي بنشوف فيه اجزاء من المظاهرات وحالة الفوضي اللي اصابت احد المناطق التجارية بوسط العاصمة لندن .. بعد اشتباك المتظاهرين مع قوات الامن.
ومن المقرر أن تنظم مسيرات مماثلة فى (بلفاست) عاصمة أيرلندا الشمالية .. و(جلاسكو) أكبر مدن اسكتلندا.
ONTube: جولة في أخبار تويتر وفيسبوك اليوم 21/10/2012
ده كان أخر فيديو معانا .. قبل مانروح لفاصل .. هنروح لإسلام القاضي عشان نشوف معاه أخر التويتس و الهاش تاجز و الأخبار بصفة عامة اللي إنتشرت على المواقع الإجتماعية خلال اللحظات القليلة الماضية.
مساء الخير إسلام إيه الجديد عندك؟
ONTube: خدعة غريبة بالشمعة
نروح لفيديو تاني حصل على نسبة مشاهدة مرتفعة علي يوتيوب .. وهو عبار عن خدعة.
الخدعة سهلة و بسيطه و أعتقد إن في ناس هتجربها بعد مايشوفوا الفيديو اللي جي .. واللي فيه شخص بيولع شمعة عادية جدا .. وبعدين بيطفيها .. واول ما الدخان بيطلع منها بيولعها تاني بس من بعيد .. من خلال الدخان. الفيديو كمان بيتعاد بالتصوير البطيئ .. عشان يبين ازاي الشمعة ولعت تاني من خلال الدخان.
ONTube: أعظم سباق سيارات في العالم
مطاردات العربيات اللي بنشوفها في الافلام الاجنبية .. دايما بتكون ممتعة ومعمولة بحرفية شديدة جدا .. بتشد إنتباه كل اللي يتفرج عليها .. لكن لما نشوف مطاردة عربيات لعبة .. التحكم فيها بالريموت كنترول ومعمولة بحرفية زي الافلام .. ساعتها الموضوع بيكون مبهر اكتر.
الفيديو اللي جاي بدأ بسباق و تحول الى مطاردة بوليسية. هتشوفوا عربيات وطيارة هليكوبتر كلهم لعب .. لاو اللي يشد اكتر كمان ان المطاردة متصورة بكاميرات عالية الجوده .. تخلي الواحد يحس انه مشهد من فيلم عالمي.
ONTube: مواقف وطرائف
في ناس ساعات بتحب تخاطر وتجازف .. و ينوطوا بحركات بهلوانية .. او يتشقلبوا من فوق سور او علي حيطة.
المهم لما المخاطرة دي بتعدي علي خير .. بيفرحوا و يحسوا بثقة في النفس .. بس لو معدتش علي خير .. بيبقي منظرهم وحششش.
الفيديو اللي جاي في مجموعة من الناس اللي شكلهم وحش دول .. وفيه كمان ناس مخاطراتهم عديت علي خير.
ONTube: تشجير أسطح المنازل بمصر
طول عمرنا في مصر عارفين إن احنا بلد زراعي .. وإن ربنا ادانا نهر النيل واراضي خصبة على جانبيه. وطول عمرنا في تراثنا الشعبي .. الزراعة كانت قيمة كبيرة جدا .. بسبب فوايدها العديدة .. اللي يمكن ابسطها راحة البال وإحساس الراحة اللي بيجيلنا لما بنشوف خضره حوالينا. ولو كنت من سكان مدينة من المدن الصناعية .. أو أي مدينة بتفتقد المساحات الخضرا .. اكيد مش محتاج أشرح إحساس الخانقة اللي بتحس بيه في الشارع كل يوم. وفوق ده كله .. العالم من كذا سنة ابتدى يتكلم عن كارثة بتهدد كوكب الأرض اسمها الاحتباس الحراري .. اللي ادت إلى تَغيير الطبيعة المناخية لكوكبنا. وأكبر دليل على صحة الكلام ده .. هوإننا دلوقت في آواخر شهر أكتوبر .. ولسة لابسين صيفي .. وبنشتكي من الحر.
مجموعة شجرة شافوا إن احنا في أشد الحاجه لخلق مساحات خضرا جديدة .. وإن لو المشروع بتاعهم تم تبنيه على مستوى واسع .. ممكن يبقى الحل لمشاكل كتير. وعشان نوصل للحلول دي .. مش محتاجين أكتر من إننا نستغل اسطح مبانينا.
هيكون معانا حالا على سكايب محمد هدايت من مجموعة شجرة.
ليست هناك تعليقات:
إرسال تعليق