نشاهد اليوم
برنامج اون تيوب
ON Tube
و الذى يذاع على قناة ONTV
تقديم رامى رضوان
برنامج اون تيوب برنامج يقوم علي الصحافة الشعبية التي بدات في الانتشار حيث اصبحت بديلا هاما للاعلام الرسمي و يساعد علي انتشارها الشبكات الاجتماعية لذلك يهتم اون تيوب بعرض محتويات اللقطات التي يصورها المواطنون بأنفسهم كما يهتم البرنامج بمساعدة المواطنين الراغبين في توثيق لحظات بعينها و نشرها علي الانترنت بل و عرضها علي شاشة اون تي في لايف
شارك الخبر مع اصدقائك على الفيس بوك و تويتر و جوجل +1 من اعلى الصفحة
مع تمنياتى بمشاهدة ممتعة
و لنبداء
برنامج اون تيوب تقديم رامى رضوان و حلقة الاربعاء 10 اكتوبر 2012 من قناة ONTV يوتيوب كاملة
ONTube: إحياء ذكرى شهداء ماسبيرو
9 أكتوبر 2011 فقدنا حوالي 33 مواطن مصري كانوا نزلوا وسط الالاف المصريين للدفاع عن حقهم في بلد امن وعادل وحر , النهارده هنتكلم عن الذكرى الاولى لشهداء ماسبيرو .. هيكون معانا أمنية خليل الناشطة السياسية , فرح سعفان الصحفية
ONTube: الإحتجاجات الفئوية
من مصر .. وبالتحديد من أمام نقابة المحامين .. فيديو للمظاهرة اللي نظمها العشرات من موظفى وإداريى نقابة المحامين صباح امس .. للمطالبة بصرف العلاوة الاجتماعية اللى أقرها الرئيس محمد مرسى فى يوليو الماضى .. واللي بتبلغ قيمتها 15% .. مؤكدين إن نقيب المحامين سامح عاشور بيرفض التصديق على منحها لهم.
المتظاهرين رددوا عدة هتافات خلال المظاهرة .. من بينها (يا علاوة فينك فينك النقيب بينا وبينك) .. وأعلنوا دخولهم فى اعتصام مفتوح .. حتى يتم الاستجابة لمطالبهم.
يذكر ان نقابة المحاميين هتحتفل بمئويتها غدا الخميس .. و ده اليوم اللي إختاروه الموظفين لبدء اضرابهم .. عشان يتم الإهتمام بمطالبهم اللي من بينها القضاء علي الفساد داخل النقابة.
ONTube: مظاهرة سرمدا الحاشدة
نروح لسوريا .. وفيديو من مدينة معرة النعمان بمحافظة ادلب .. بيوضح خروج المئات من ابناء البلدة .. احتفالا بسيطرة الجيش السوري الحر عليها .. و الانتهاء من سيطرة الجيش النظامي عليها.
وكالعادة .. لا تهدأ المعارك الدائرة في سوريا بين القوات الموالية للنظام الأسدي و قوات الجيش الحر المعارض. وفي الوقت اللي بيسيطر الجيش الحر علي مناطق في سوريا .. الجيش النظامي فارض سيطرته علي عدد من المناطق اخري. وقالت مصادر ان القوات السورية الموالية للنظام تنوي اليوم .. شن هجوم نهائى على مدينة حمص وسط البلاد .. لإنتزاعها من ايادي الجيش الحر.
وفى الوقت نفسه .. أفاد المرصد السورى لحقوق الإنسان .. عن قصف مكثف على الأحياء اللى بتسيطر عليها المعارضة فى مدينة حمص .. والمحاصرة من أشهر من القوات النظامية. هنروح دلوقتي لمعرة النعمان .. عشان نشوف احتفال اهلها بسيطرة الجيش الحر عليها.
ONTube: الوفاء لشهداء القتال
ومن سوريا الي المملكة العربية السعودية .. و كالعادة منطقة القطيف .. و اللي بتشهد من حوالي سنتين .. سلسلة من المسيرات الاحتجاجية المطالبة باطلاق سراح سجناء الراي .. اللي عدى على اعتقال بعضهم أكتر من 17 عام .. الى جانب المطالبة باجراء اصلاحات سياسية .. ورفع التمييز الطائفي.
وشهدت القطيف خلال تحركات اهلها السلمية حملات اعتقالات .. وأصيب ايضا بعض الشباب بطلقات نارية .. ادت الي مقتل 15 شاب من مختلف مناطق القطيف.. كان اخرهم الناشط خالد اللباد ومحمد المناسف وحسن زاهري.
الفيديو اللي جاي تداوله النشطاء علي المواقع الاجتماعية .. وفيه لقطات مختلفة للمسيرات اللي خرج بيها اهالي المنطقة ليلا ونهارا على مدار الاسبوع الحالي .. وفاءا لشهدائهم.
ONTube: مظاهرة سرت الليبية
من القطيف نروح لاخر اخبار الشأن الليبي .. اللي بيواجه حكامه الجدد تحديات كبيرة فى طريق تحقيق المصالحة .. بين الجماعات اللى فضلوا عدم دعم الثورة الليبية سواء بدافع الخوف أو بسبب دعمهم للقذافى أو الانتفاع من حكمه .. وبين القبائل و المدن الثائرة.
قامت اشتباكات بين ميليشيات في منطقة بني وليد .. (اللي بتعد من اخر معاقل القذافي) .. و ميليشيات ثورية تابعة لوزارة الدفاع الليبية .. ومقاتلين من مدينة مصراتة (إحدي المدن اللي حاصرها القذافي اثناء الثورة) .. و ده بسبب إستمرار وجود بؤر داعمة للنظام القديم في بني وليد.
و ادت الاشتباكات الي قيام ميليشيات مصراتة بقصف منطقة بني وليد .. الامر اللي ادي الي وفاة 3 اشخاص .. من بينهم طفلة.
الفيديو اللي جاي بيوضح خروج العديد من ابناء قبيلة ورفلة (اللي بيتواجد العديد منهم في بني وليد) .. للاحتجاج علي قصف البلدة وحصارها علي يد الميليشيات التابعة لوزارة الدفاع الليبية .. وللمطالبة بعدم قصف بني وليد.
ONTube: مظاهرات ضد ميركل
و الي بعض الشئون الدولية .. ونبداها باليونان .. اللي تحدى الألاف من أبنائها الحظر المفروض على تنظيم أي مسيرة الى مقر البرلمان .. فإتجهوا الي هناك خلال زيارة المستشارة الالمانية انجيلا ميركل .. اللي بتعد الاولى منذ اندلاع أزمة ديون اليونان من 3 سنوات.
الفيديو اللي جاي من اتينا .. وبنشوف فيه فعاليات المظاهرة اللي رفع خلاها اليونانيين لافتات منددة بسياسات التقشف في البلاد .. و تهكموا علي حلول الاتحاد الاوروبي للازمة .. وكمان قاموا بالهتاف ضد ميركل .. والاحتجاج علي زيارتها لليونان.
يذكر ان قوات مكافحة الشغب اليونانية ..استخدمت قنابل صوت ورشاشات الفلفل .. لتفريق المتظاهرين .. مع اقتربهم من مبني البرلمان.
ONTube: إشتباكات مدريد
و الي اسبانيا .. اللي بتشهد ايضا موجة احتجاجات غاضبة من شعبها ضد سياسات التقشف اللي أعلنتها الحكومه .. وسياسات رئيس الحكومة (ماريانو رتخوي) الاقتصادية في البلاد.
و علي مدار الايام اللي فاتت خرجت العديد من المظاهرات في البلاد .. من مختلف الفئات العاملة والمعارضة .. للتنديد بتخفيضات الاجور تطبيقا للتقشف. وشهدت المظاهرات بعض الاشتباكات بين قوات الشرطة و المتظاهرين .. زي ما حنشوف في الفيديو اللي جاي .. اللي بتظهر فيه قوات الامن وهي بتفض المظاهرات بالقوة.
ONTube: جولة في أخبار تويتر وفيسبوك اليوم 10/10/2012
ده كان أخر فيديو معانا .. قبل مانروح لفاصل .. هنروح لأحمد فتحي الصحفي بجريدة الشروق عشان نشوف معاه أخر التويتس و الهاش تاجز و الأخبار بصفة عامة اللي إنتشرت على المواقع الإجتماعية خلال اللحظات القليلة الماضية.
مساء الخير احمد إيه الجديد عندك؟
ONTube: أقوى مشهد قتل في التاريخ
اول فيديو معانا النهاردة .. هو مشهد من احد الافلام العربية من أيام السبعينات .. ويبدو انه كان فيلم اكشن .. بس ما ظبتتش أوي معاهم .. لأن المشهد اللي حنشوفه دلوقت من الفيلم .. المفروض انه من اقوي و اعلى المشاهد فيه. بس واضح إن اللي اتصور غير كده تماما .. و عشان كده اللي نشر المشهد ده .. كتب عليه عنوان بيصفوه صراحتا من وجهة نظره.
ONTube: الرسم على الماء
كل يوم بنشوف طرق و أساليب جديدة في عالم الرسم. والروح و الطاقة الإبداعية اللي موجودة عند فنانين كتير .. بتدفعهم للبحث والقيام بما هو مختلف. فحتي اللوحات المرسومة ما بقتش مجرد ألوان على ورق. ياما شفنا رسومات علي الحيطة و بالاضواء و اشكال مختلفة تانية كتير.
أما الفيديو الي حنشوفه دلوقتي .. فهو لنوع جديد و مختلف من الرسم .. وهو الرسم علي الميه. هنشوف الرسام وهو بيستخدم نوع معين من الالوان .. بتخليه يقدر يثبت اللون علي الميه .. عشان يكمل رسمته وينفذ اللوحة الجميلة .. اللي هتشفوها دلوقت.
ONTube: The Percussion Show
نروح لأخر فيديو معانا إنهاردة .. وهو عبارة عن كليب لفرقة موسيقية مصرية إسمها "بركشن شوو" .. عملوا عرض موسيقة ايقاعية منغير أي ألة موسيقية .. معتمدين على إيديهم و رجليهم فقط.
الفيديو لسه نازل من يومين على يو تيوب .. وبدا ناس كتير يتداولوه من خلال مواقع التواصل الاجتماعي.
ONTube: اليوم العالمي للطفلة ودور المجتمع
لو حد من حضراتكم راح بكرة الأهرامات .. أو قصر السلاملك في الاسكندرية .. أو مبنى الامبايرستايت في امريكا .. و حتى دار الأوبرا في ايطاليا .. حتلاقوهم كلهم متزينيين باللون الوردي. ليه؟ لأن بكرة هيوافق الاحتفال بيوم الطفلة العالمي .. اللي بيقام السنة دي لأول مرة في كل دول العالم .. تحت عنوان "عشان أنا بنت." واليوم ده هيركز السنة دي على محاربة زواج الصغيرات .. واللي بيعتبر انتهاك لحقوق الإنسان الأساسية .. لانه مش بس بيحرم الطفلة من إنها تعيش طفولتها .. إنما كمان بيعطل مسيرتها التعليميه .. وبيزود فرصة تعرضها للعنف .. وبيعرض صحتها للخطر.
هيكون معانا حالا محمد مجاهد .. مساعد برنامج الاعلام ليونيسف مصر .. عشان نعرف منه اكتر عن اليوم العالمي للطفله .. و إيه الدافع وراه .. و الهدف منه.
ليست هناك تعليقات:
إرسال تعليق