برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الثلاثاء 10 يناير 2012 يوتيوب كاملة
بلدنا: معنى قبول الطعن في سجن عمرو البحيري
يسعد مساكم وحلقة جديدة من بلدنا بالمصري هنبدأها بخبر حلو وبشرة خير: أخيراً النهاردة وبعد طول عذاب، المحكمة العسكرية قبلت الطعن على الحكم الصادر ضد عمرو البحيري المقبوض عليه من يوم 26 فبراير والمحكوم عليه بخمس سنين سجن بتهمة خرق حظر التجول والاعتداء على عسكري.. وزي ما كان فيه مسيرة امبارح من ميدان التحرير لدار القضاء العالي للمطالبة باعادة محاكمة عمرو والافراج عنه، النهاردة واثناء نظر الطعن كان فيه وقفة تضامنية معاه قدام مجمع المحاكم العسكرية في مدينة نصر والشهير بس28 اللي واخد مننا راقات.. قبول الطعن
بلدنا بالمصري : مهند بعد طارق .. راح يشهد مرجعش
دلوقتي الظاهر كدة والله أعلم ان فيه حاجة تبدو للبعض مش طبيعية بتحصل في التحقيقات الخاصة باحداث مجلس الوزرا، واتكررت لحد دلوقتي على الأقل تلات مرات وهي ان الشاب من دول يروح برجليه يدلي بشهادته ويقول اللي شافه بعينيه ويسلم اللي لقاه بايديه، يلاقي نفسه رايح في حديد.. الحكاية بدأت بطارق شمس الدين واتكررت بأشكال مختلفة مع عدد اتنين مهند: مهند مصيلحي ودة طالب ومن المصابين في احداث مجلس الوزرا برصاصة في القدم وقطع في الشرايين: استدعوه كشاهد، راح يشهد ما رجعش ومن ساعتها وهو من قسم لمديرية لنيابة لسين وجيم كمتهم مش كشاهد.. ومهند التاني هو مهند عبد المنعم: وديه قصته زي ما حكاها أخوه.
بلدنا بالمصري: شهود مشهدوش بحاجه ويحمدوا ربنا
من عجايب التحقيقات كمان ان فيه شهود من المصابين ومن المصابين بطلق حي في أحداث مجلس الوزرا يروحوا عشان يشهدوا، بس دول الحمد لله بيروحوا بس بيروحوا من غير ما يقولوا شهادتهم وعلى عهدتهم بيتقالهم "روحوا واحمدوا ربنا انها جت على قد كدة"
بلدنا: إتهام نور و حمزة والتحقيق مع مظهر شاهين ونوارة
أما عن آخر التطورات في التحقيقات، فصدق فعلاً اللي قال إن قضاة التحقيق قرروا استدعاء مجموعة من الشخصيات العامة والسياسية للتحقيق معاها في احداث مجلس الوزرا.. ومعظمهم تلقى استدعاءات رسمية ومنهم اللي مثل فعلاً قدام قضاة التحقيق.. نوارة نجم والشيخ مظهر شاهين خطيب مسجد عمر مكرم ، والمحامى طارق الخولى المتحدث الرسمى لحركة 6 إبريل الجبهة الديمقراطية، هيتحقق معاهم بكرة فى البلاغ المقدم ضدهم واللي بيتهمهم بالتحريض بطريق الاتفاق والمساعدة على الاعتداء على أفراد القوات المسلحة خلال أحداث مجلس الوزراء وحرق المجمع العلمى. أما الدكتور أيمن نور رئيس حزب الغد، والمهندس الاستشاري الدكتور ممدوح حمزة، فاتحقق معاهم النهاردة فعلاً وتم اخلاء سبيلهم ومنعهم من السفر، بعد اتهامهم بالتعدي على المنشآت العامة وأفراد الشرطة والجيش، والمساعدة فى تعطيل المرافق العامة وسير المرور.
بلدنا: يوسف بطرس غالي في ندوة عن الثورة المصرية
من باب سخرية القدر بقة والهم اللي يضحك ويبكي في نفس الوقت، إنه في نفس الوقت اللي شيوخنا وشخصياتنا العامة المحسوبة على الثورة_وبئس المصير اليومين دول_ بيتحقق معاهم وبيتمنعوا من السفر على خلفية بلاغات ما يعلم بيها الا ربنا، وفي نفس الوقت اللي فيه المصابين والشهود بيروحوا في حديد، وفي نفس الوقت اللي عندنا شباب بالالافات بيتحاكموا محاكمات عسكرية واستثنائية وبيترموا في السجون الحربية في قضايا رأي أو حتى في قضايا بلطجة، نبص نلاقي خير اللهم اجعله خير متهم هارب من حكم ب30 سنة سجن، قال بيحضر ندوة عن الثورة المصرية في جامعة من جامعات لندن اللي عايش فيها حر وطليق.. ولما تقوم طالبة دكتوراه مصرية وتقول بعلو صوتها ان الراجل دة مجرم ومحكوم عليه ب30 سنة سجن مصر، يقوم امن الجامعة يهربه من الباب الوراني.
بلدنا: الحكم على مبارك وشركاه ليس قبل 25 يناير
النهاردة كانت الجلسة التانية والأخيرة من الجلسات المخصصة لمرافعات المحامين عن أهالي الشهدا والمصابين في محاكمة الرئيس المخلوع وأعوانه.. وعلى عكس كل التوقعات والتكهنات اللي اتنوترت في الكام يوم اللي فاتوا عن احتمال النطق بالحكم قبل يوم 25 يناير، الجدول الزمني اللي حدده رئيس المحكمة، المستشار أحمد رفعت لمرافعات محامين الدفاع عن المتهمين نسف الاحتمال دة من أساسه.
بلدنا: طلب مليار جنيه تعويض من مبارك وشركاه
في أثناء نفس الجلسة، النهاردة المستشار أشرف مختار، رئيس لجنة استرداد الأموال من الخارج في هيئة قضايا الدولة طالب في مرافعته بمبلغ مليار جنيه على سبيل التعويض المدنى المؤقت ضد المتهمين مبارك ونجليه جمال وعلاء ورجل الأعمال الهارب حسين سالم واللواء حبيب العدالى وزير الداخلية الأسبق ومساعديه الستة.
بلدنا: معنى سيل الأحكام على انتخابات المرحلة الثالثة
النهاردة كانت جولة الاعادة في المرحلة التالتة والأخيرة من انتخابات برلمان ما بعد الثورة واللي يمكن تابعتوها حضراتكوا لحظة بلحظة من خلال التغطية المباشرة على أون تي في وأون تي في لايف.. عمليات التصويت انتهت في معادها المحدد وبدأت عمليات الفرز تمهيداً لاعلان النتايج مع الوضع في الاعتبار ان دايرة الساحل وهي دايرة من دواير المرحلة الاولى كانت بتعاد فيها الانتخابات النهاردة تنفيذا لحكم المحكمة.. وان جولة الاعادة كانت بتجرى النهاردة في 8 محافظات مش تسعة بعد حكم محكمة القضاء الاداري وقرار اللجنة العليا للانتخابات بالغاء الانتخابات فردي وقايمة في محافظة جنوب سينا واعادتها ايام 14 و15 يناير.. بس الحقيقة إن كم الأحكام اللي صدرت النهاردة من القضاء الاداري بخصوص عدد من الدواير اللي بتجرى فيها جولة الاعادة النهاردة حاجة تلخبط بس هنحاول
بلدنا: إلزام الدولة بمعاشات استثنائية لمصابي الثورة
"القانون قد أجاز منح معاشات استثنائية في حالات التضحية والفداء، ولكل من قدم خدمات جليلة للبلاد، وأن مصابى ثورة 25 يناير قدموا أنفسهم من أجل تحرير مصر من الفساد والطغيان"، ديه حيثيات حكم محكمة القضاء الإدارى اللي حكمت النهاردة بإلزام رئيس الوزرا ووزراء المالية والتضامن الاجتماعى، بصرف معاشات استثنائية لمصابى الثورة لما قدموه من تضحية وفداء من أجل مصلحة البلاد_حسب نص الحكم_ اللي أكد إن جهة الإدارة قد تقاعست عن منح هذه الفئة العظيمة لمعاشات استثنائية ولم تراعى المصلحة العامة، وبالتالى يكون قرارها قد خالف القانون. (اللهم لا تعليق على أحكام القضاء لكن الثورة عظيمة ومصابين الثورة فئة عظيمة قدموا أنفسهم من أجل تحرير مصر من الفساد والطغيان، بحكم المحكمة ورغم أنف اللي مش عاجبه وراسه وألف سيف يطلعهم على آخر الزمن شوية بلطجية وعملا ومأجورين هم واللي يتشدد لهم)!!!
بلدنا: شباب الإخوان يرفضون أي صفقة مع المجلس العسكري
فى أول تعليق على أنباء وجود صفقة بين المجلس العسكرى وجماعة الإخوان المسلمين، قال بيان صادر عن مجموعة من شباب الجماعة، إن مصر بعد ثورتها المجيدة لن تقبل بأى حال أى صفقة أو اتفاق ينتقص قيد أنملة من سيادة الشعب أو يفرض وصاية أو سياج على حريتنا الكاملة غير المنقوصة.
وأشار البيان إلى أن البعض يتداول حديثا "وهميا" عن صفقة بين الإخوان المسلمين وحزبها الحائز على الأغلبية البرلمانية وبين المجلس العسكرى، مشيرا إلى أن ما وصفته بـ"الافتراءات" تتفاوت بين حديث عن صفقة بالحفاظ على بقاء إرادة للمجلس العسكرى فى إدارة حكم البلاد بعد تسليم السلطة عبر تشكيل مجلس دفاع قومى أو غيره يكون للتمثيل العسكرى فيه مساحة كبيرة تضمن سيطرته على القرارات الإستراتيجية والمصيرية لمصر، فضلا عن "الافتراءات" بالتوافق حول رئيس محدود الصلاحيات قريب من المجلس العسكرى، وانتهاء بادعاءات عن ترتيبه مع المجلس العسكرى لتوزيع للحقائب والمناصب من رئاسة وزراء ومجلس شعب ووزارات.
وأكد البيان أن أبناء جماعة الإخوان المسلمين يعلنون رفضهم الكامل لمثل هكذا صفقات، ويؤكدون تصديقهم لكلام الدكتور محمد بديع مرشد الجماعة عن عدم وجود صفقات إلا مع الله ثم الشعب
بلدنا: جامعة برلين التقنية تفتح أول فروع دولي في مصر
جامعة "برلين التقنية" قررت افتتاح أول فرع دولي لها في مصر في قرية الجونة وبتعتبر من نتايج الاتفاقية الثقافية التعليمية بين مصر وألمانيا.. التفاصيل في التقرير اللي جاي.
بلدنا: توزيع جوائز ساويرس للتنمية الثقافية
وقبل الفاصل هنوصل لحد دار الاوبرا المصر ية نشوف جوايز الابداع الثقافي لمؤسسة ساويرس الاجتماعية كانت من نصيب مين السنة ديه.
وثيقة شيخ الأزهر للحريات الأساسية في بلدنا بالمصري
حرية العقيدة وحرية الرأي والتعبير وحرية البحث العلمي وحرية الفن والإبداع الأدبي: حريات أساسية نصت عليها وثيقة الأزهر اللي أعلنها عنها النهاردة الامام الأكبر الدكتور أحمد الطيب، واللي تم اعدادها بالتعاون مع عدد كبير من المثقفين والمفكرين.. وبمجرد الاعلان عنها، هلت بشاير ردود الأفعال الايجابية والمؤيدة لبنود الوثيقة من التيارات المختلفة بما فيها تيار الاسلام السياسي بمكوناته المختلفة من اخوان مسلمين وسلفيين وجماعة اسلامية.... جميل.. ايه بقة أهمية الوثيقة ديه بالذات دوناً عن غيرها من الوثائق اللي ظهرت في الكام شهر اللي فاتوا بما فيها وثيقة الأزهر الأولى؟! وايه أهميتها في التوقيت دة تحديداً؟! وايه اللي يضمن لها مصير أهم واكثر تاثيرا من غيرها من الوثائق؟!!! كل ديه أسئلة وغيرها هنستعين عليها بضيوفنا النهاردة:
الدكتور/ محمود عزب: مستشار شيخ الأزهر
الأستاذ/ بهي الدين حسن: مدير مركز القاهرة لدراسات حقوق الانسان
الكاتب الصحفي/ نبيل زكي
ليست هناك تعليقات:
إرسال تعليق