بالمفتشر: إيه اللي حصل في مسيرة علاء
يسعد مساكم.. حلقة النهاردة من بلدنا بالمصري، هنبدأها بكلمتين بالمفتشر كدة عن خبر منشور في جريدة المسا بيبصم بالعشرة وبالبنط العريض إن: " أهالي الدرب الأحمر تصدوا لأعضاء 6 إبريل والوطنية للتغيير".. حاولوا اقتحام سجن الاستئناف لإطلاق سراح الناشط علاء عبد الفتاح.. قوات الشرطة منعتهم من الوصول لمديرية أمن القاهرة".. ولما ندقق بقة في الخبر نلاقي عينات من: "وقاموا بقطع الطريق مما تسبب في عرقلة حركة مرور السيارات".. "حدثت مشادات كادت تتطور إلي مشاجرات لولا فرار ناشطي حركة 6 أبريل والجمعية الوطنية للتغيير إلي ميدان التحرير مرددين هتافات معادية ضد المجلس العسكري".. إلا هو إيه اللي حصل بالظبط؟!!
بلدنا بالمصري: تأجيل محاكمة مايكل نبيل إلى ١٣ نوفمبر
مايكل نبيل، وبعد ما خرج من مستشفى العباسية يوم 25 اكتوبر بتقرير بيأكد سلامة صحته النفسية وقواه العقلية وبالتالي مسئوليته الجنائية عن جميع أفعاله، كان النهاردة قدام المحكمة العسكرية في جلسة من جلسات إعادة محاكمته بعد قبول الطعن على الحكم الصادر ضده بتلات سنين سجن بتهمة سب وقذف القوات المسلحة.. المحكمة قررت التأجيل ليوم 13 نوفمبر بناء على طلب الدفاع لسماع شهود النفى.
بلدنا: القبض على سارق رشاش متعدد في أحداث ماسبيرو
على ما يبدو إن المتهمين في أحداث ماسبيرو مش هم بس اللي تم القبض عليهم، وفيه غيرهم لسة التحريات العسكرية وراهم.. حسب اللي وصلنا من مكتب المدعي العام العسكري: إن القوات المسلحة نجحت في إلقاء القبض على متهم بسرقة رشاش متعدد أثناء أحداث ماسبيرو والمتهم هو مايكل عادل نجيب وكان تم الوصول إليه بعد التقاط رقم سيارة التاكسي اللي ركبها بعد الاحداث وبحوذته السلاح وبعد تقنين الاجراءات وتوسيع عملية التحريات تم التوصل لسائق التاكسي اللي افاد بأنه نقل المتهم إلى منطقة الشرابية وبعد جهود البحث تم الوصول إليه والقبض عليه في بيته وبحوذته السلاح.
بلدنا بالمصري: رصاصة ثالثة في أحداث ماسبيرو
لحد امبارح ماكانش عندنا أي معلومات عن مينا نصحي المصاب والمتهم في ساعة واحدة في احداث ماسبيرو، غير إنه مصاب برصاصة ومتكلبش في سريره في مستشفى القبة العسكري.. النهاردة عرفنا من مصدر أمني_رفض ذكر اسمه_ إن مينا اتعملت له عملية في الفك يوم 17 اكتوبر، وتم نقله بعدها لسجن الاستئناف والتقرير الطبي الخاص بحالته هيصدر بكرة من مصلحة السجون.. وغالباً بكرة هيكون عندنا تفاصيل اكتر شوية من تقرير مصلحة السجون، خاصة وإن بالعملية ديه بقى عندنا دلوقتي رصاصة تالتة حرة طليقة لازم نتابع خط سيرها هي كمان هي والرصاصتين اللي لسة موجودين في مكاتب مديرين مستشفى النزهة والمستشفى القبطي في انتظار النيابة العسكرية.
بلدنا بالمصري: طي صفحة الخلاف بين القضاة والمحامين
النهاردة وزي ما كان متوقع فعلاً من امبارح، تم بحمد الله الاجتماع المشترك بين رئيس مجلس القضاء الأعلى المستشار حسام الغرياني ووفد من المحامين بدعوة من رئيس الوزرا وبحضور وزير العدل.. الكل خرج من الاجتماع مستبشر خير.. رئيس الوزرا قال بالحرف الواحد: ""شرف": نجحنا فى طى صفحة الخلاف بين جناحى العدالة"، ورئيس مجلس القضاء الأعلى أكد إن: " أزمة القضاة والمحامين انتهت وسنشرف على الانتخابات".. والأستاذ/ حمدى خليفة، نقيب المحامين السابق أكد هو كمان إنه "لا توجد أزمة بين المحامين والقضاة بعد اليوم".. والأستاذ/ منتصر الزيات المرشح لمنصب نقيب المحامين أكد إن كل اللي حضروا الاجتماع أكدوا على الاحترام المتبادل بين طرفى العدالة. والبيان الصادر عن مجلس الوزرا ما خرجش كتير عن مضمون التصريحات ديه، وزيادة عليها الاتفاق على ضرورة اتخاذ السلطات الأمنية التدابير اللازمة لتأمين المحاكم وضرورة التحقيق فى الأحداث الأخيرة لتحديد أسباب الأزمة والمحرضين عليها ومساءلة المخطئين.. لكن فيه أسئلة لا جاوبت عليها تصريحات الحاضرين ولا بيان مجلس الوزرا هنحاول نلاقي إجاباتها عند:
بلدنا بالمصري: حق تصويت المصريين بالخارج مضاعش
لإن مافيش حق في الدنيا ممكن يضيع طول ما وراه مطالب مهما طال الزمن، فحق المصريين في الخارج في التصويت في أماكنهم معززين مكرمين زي بقية خلق الله، في أي انتخابات واستفتاءات، هتتم من هنا ورايح على أرض مصر بما فيها الانتخابات اللي جاية ما ضاعش ومش هيضيع وهيرجع لاصحابه على داير المليم بحكم المحكمة، وإن كان على الإجراءات الظاهر إنها كانت فعلاً ما فيش أسهل من كدة.. فاكرين حضراتكوا حلقة بلدنا بالمصري يوم ما صدر الحكم.. كان معانا الدكتور حازم عبد العظيم وصوته يومها اتنبح يقول إن الحل بسيط، مجرد تعديل تشريعي بسيط يستثني المصريين في الخارج من التصويت بالرقم القومي ويخليه بالرقم القومي او بجواز السفر.. وقد كان.. اللجنة التشريعية التابعة للجنة العليا للانتخابات قررت النهاردة السمح للمصريين في الخارج بالتصويت بجواز السفر.. وقررت كمان تعديل المادة 39 من الإعلان الدستوري، بحيث يتم استثناء المصريين في الخارج من شرط الإشراف القضائي.. والبديل هو إشراف أعضاء السلك الدبلوماسي في السفارات والقنصليات.
بلدنا بالمصري: اجتماع الحركات والأحزاب و د. علي السلمي
اللي حصل النهاردة في اجتماع الحركات والأحزاب السياسية مع الدكتور على السلمي في غياب القوى والأحزاب الإسلامية الرئيسية.
بلدنا بالمصري: الاحتفال بمولد مارجرجس قلب حريقة
النهاردة كان الاحتفال بمولد مارجرجس في قرية الرزيقات في أرمنت في الأقصر.. بدأ باقبال كبير على الاحتفال بالمولد وانتهى بحريقة لكن الحمد لله من غير أي خساير في الأرواح..
بلدنا بالمصري: تأجيل محاكمة عز لحين نظر طلب الرد
محاكمة أحمد عز قدام محكمة جنايات الجيزة، بتهمة إهدار المال العام اتأجلت النهاردة لحين النظر فى رد هيئة المحكمة. التفاصيل في التقرير اللي جاي
بلدنا: افتتاح مدينة زويل للعلوم والتكنولوجيا رسمياً
خلونا بقة نروح لحد مدينة زويل للعلوم والتكنولوجيا، اللي تم افتتاحها النهاردة بشكل رسمي على إيد رئيس الوزرا الدكتور عصام شرف والدكتور أحمد زويل، وكل واحد فيهم كان ليه كلمة بالمناسبة السعيدة ديه.
بلدنا بالمصري: حكاية الحكومة المستجيبة
"الحكومة المستجيبة" على ما فهمنا_لإننا في البداية فهمنا غلط واتهيألنا إنها الحكومة اللي هتلاقي صرفة تستجيب بيها لمطالب العاملين من كل فج عميق وفقاً لجدول زمني محكم_ فطلع إن الحكاية مش كدة خالص وإن الحكومة المستجيبة_على ما فهمنا بقة_ هي الحكومة اللي بتعمل على الحد من الفساد الإداري وتطوير الخدمات الحكومية.. الحكاية كلها في التقرير اللي جاي.
بلدنا بالمصري: مدونة سلوك وأخلاقيات العمل الشرطي
أنا عايزة بس ارجع افكركوا إننا ولأول مرة في التاريخ بقى عندنا وثيقة اسمها "مدونة سلوك وأخلاقيات العمل الشرطي" أو ميثاق شرف صادر من وزارة الداخلية.. واحنا في بلدنا بالمصري حاولنا على قد ما قدرنا نقراه باللي ليه واللي عليه.. لكن النهاردة، القراءة كانت حقوقية صرفة من خلال ورشة العمل اللي نظمها مركز رفاعة الطهطاوي لدراسات الديمقراطية وحقوق الإنسان.
بلدنا: أحزاب الكتلة المصرية تعلن برنامجها الانتخابي
احزاب الكتلة المصرية أعلنت النهاردة في مؤتمر صحفى عن برنامجها الانتخابى للقائمة وتفاصيل حملة الدعاية اللى هتبداها من بكره.
وثيقة المبادئ الأساسية للدستور .. اللي ليها واللي عليها
وثيقة المبادئ الأساسية للدستور هتاخدنا في خط مستقيم لحد بر الأمان ولا هتاخدنا في متاهات ما يعلم بيها إلا ربنا؟!!! دة اللي هنناقشه مع ضيوفنا النهاردة:
- د. محمد محسوب: عن حزب الوسط
- د. بسام الزرقا: أمين حزب النور في اسكندرية
- د. عمرو الشوبكي: الخبير في مركز الأهرام للدراسات السياسية والاستراتيجية
برنامج الحزب المصري الديمقراطي في الانتخابات المقبلة
الحزب المصري الديمقراطي الاجتماعي، بشعاره: "صوت كل مصري"، بيعرف نفسه كالآتي: "حزبنا مصري ديموقراطي اجتماعي.. نؤمن بالديموقراطية وندافع عن حق جميع المصريين في العدالة الاجتماعية.. يتأسس حزبنا علي كل القيم والمبادئ النبيلة للأديان والعقائد الإنسانية والثورات الكبري.. ونسعى لبناء بلد جديد على أسس الحرية والكرامة الانسانية والعدالة الاجتماعية بالعمل في مواقع الإنتاج كما في السياسة.
أصل وفصل الحزب المصري الديمقراطي الاجتماعي وناوي لنا على إيه بالظبط
د. محمد أبو الغار: رئيس الحزب
د. محمد نور فرحات
باسم كامل
ليست هناك تعليقات:
إرسال تعليق