برنامج بلدنا بالمصرى تقديم ريم ماجد على قناة OTV حلقة الاربعاء 7/9/2011 يوتيوب كاملة
بالمفتشر: مالناش بركة إلا انت يا ريس
يسعد مساكم وحلقة جديدة من بلدنا بالمصري، وبمناسبة ما بنحاكم الرئيس المخلوع وشركاه بتهمة قتل ولادنا خلونا نبتدي بالمفتشر كدة وبصريح العبارة.. إلا السادة الأفاضل المتهمين بحاجة بسيطة يعني وعلى قد ما أوسم، يادوب قتل حاجة كدة بتاعة 1000 وردة مفتحة، معلش يعني ولو فيها رزالة مني، "بأمارة" إيه بيخطوا العتبة داخلين القفص وخارجين من القفص مرحرحين أربعة وعشرين قيراط، وميت فل وارعتاشر، إيد ورا وإيد قدام ولا كإنهم في رحلة مدرسية في الخلا لزيارة القفص؟!!!... دة قفص الاتهام على فكرة لا هو قفص الأسود ولا جبلاية النسانيس والقرود لا سمح الله!!! ثم إنه بأمارة إيه السلامات والتحيات وطيبون "اللي برتبة ديه"، في الداخلة وفي الخارجة ومش ناقص إلا إن حد يسمعنا الرعد في وداننا ويسمعهم هم سلام مربع للجدعان!!! لأ واللي زاد وغطى إنه يشاء السميع العليم إن آخر مرة نشوف فيها بعينينا طلعتهم البهية ورا القضبان، ما يهونش عليهم يتعتعوا من جوة القفص ولا يخطوا برة عتبته من غير ما يودعونا وداع يليق بمقاهم وما كانش ناقص غيرش بس "نشوف وشكوا بخير يا أهل الله"!!! فيقوم الراجل الكبارة_ في غفلة من الزمن أو منه هو الله أعلم بقة_ ومن موقعه هذا جوة القفص، وبكل همة وحماس، قال يرفع إيده ويبعت لنا السلام والتحية إياها اللي شبعنا منها 30 سنة في عين العدو، ولا كإنه خارج بجلالة قدره من قاعة المؤتمرات بعد خطبة طويلة عريضة من إياهم ومش بعيد يكون سمع بينه وبين نفسه "تسقيف حاد واحنا آسفين يا ريس حقك علينا ومالناش بركة إلا انت" ومش بعيد كمان يكون قال في عقل باله " أنا لم أكن انتوي ولا كان يخطر لي على بال يجري لي اللي جرى، لولاش إنكوا زي القطط تاكل وتنكر"!!!.. سبحان الله، مش هو دة برده الراجل اللي قالنا لنا في وشنا كدة بالمفتشر وعلى بلاطة وبراءة الأطفال هتنط من عينيه: "شهداؤكم انتم وجرحاكم انتم" ولا كإنه من البلد ديه وما كانش ناقص غير إنه يقول لنا " وما حدش له عندي حاجة وأعلى ما خيلكوا اركبوه ومترح ما تحطوا راسكوا حطوا رجليكوا"؟!!! أما بقة ولي العهد، اللي نأبه طلع على شونة والحمد لله، فدة ماله دة، هنياله مين قده؟!!! دة بقة جاب من الآخر، وحط صوابعه الاتنين في عينينا قال بعلامة النصر!!! أما عجايب والله، يكونش صدق بصحيح إن الثورة ديه قامت لإن البركة فيه؟!!! ولا ديه بقة "نصر قوية" لسة يا ولداه عشمان فيها وبيتهيأله إنها لسة مستنيه بفارغ الصبر؟!!! على أي حال إحنا مش طالبين من الدنيا غير هي إجابة بصريح العبارة كدة وبالمفتشر على السؤال الاتي: "كووول دة_أمانة عليكوا" بأمارة إيه؟
بلدنا بالمصري: مفاجآت في رابع جلسات محاكمة مبارك
خلص كلامنا اللي بالمفتشر وآن أوان آخر اخبار بلدنا، وأولهم طبعاً الجلسة الرابعة من جلسات محاكمة مبارك وأعوانه بتهمة قتل الثوار.. صحيح إن جلسة النهاردة بدأت كالعادة بشوية مناوشات لكن يمكن الجلسة النهاردة كانت أفضل جلسة من يوم ما بدأت المحاكمة وبشهادة الكل تقريباً سواء داخل قاعة المحكمة أو براها.. الجلسة اللي بدأت بمناوشات انتهت بمفاجآت لا بأس بيهم ابداً.
بلدنا بالمصري: رسالة المجلس العسكري رقم 74
فاضل 48 ساعة ما فيش غيرهم على مليونية " تصحيح المسار" يوم الجمعة اللي جاية.. وبناءاً عليه كانت الرسالة رقم 74 للمجلس العلى للقوات المسلحة ونصها:
بلدنا بالمصري: حافظوا على سلمية جمعة تصحيح المسار
واحنا كلنا كفريق عمل بلدنا بالمصري وقناة أون تي في كلها، أولاً بنضم صوتنا لصوت المجلس وبنقول لكل اللي نازلين يوم الجمعة: احترسوا.. حرصوا بس ما تخونوش وخلوا عينيكوا في وسط راسكوا وخلوا بالكوا من محاولات الصيد في المية العكرة مع سبق الإصرار والترصد.. تاني هام: احنا عندنا مناشدتين أو على الأقل أمنيتين واحدة للمجلس العسكري والتانية للمتظاهرين.. احنا بنرجو المجلس إنه _مشكورا_ ياخد قرار باخلاء الصينية تماماً يوم الجمعة من قوات الأمن المركزي ويدي فرصة للناس تمارس حقها في التظاهر السلمي المكفول "لهذا الشعب العظيم" على حد تعبير البيان الأخير وكل البيانات اللي سبقته من أول البيان رقم واحد.... وإن كان ولابد إن قوات حفظ الأمن يكونوا موجودين أهلاً وسهلاً بيهم حوالين الميدان، ويا حبذا لو المتظاهرين والمنشآت يكونوا في حمياتهم كمان.. لكن مادام المجلس حمل القوى السياسية الداعية للمظاهرة مسؤولية التنظيم والتأمين، فانشاءالله اللجان الشعبية هتقوم بالواجب وزيادة.. أما رجاءنا للمتظاهرين، إن يكون فيه اتفاق بين الجميع على وقت محدد الناس كلها هتاخد بعضها فيه وتروح وتسيب الميدان زي الفل ويشرح القلب كالعادة، ويادار ما دخلك شر.. وعشان كمان ما حدش يقول إن فيه حد واقف قدام عجلة الانتاج ولا دايس لها على طرف!!!
بلدنا بالمصري: ترتيبات جمعة تصحيح المسار
احنا لسة هيكون لنا كلام كتير عن مليونية يوم الجمعة، بس خلونا الأول نتعرف على أهم الترتيبات اللي اتفقت عليها النهاردة القوى السياسية سواء اللي دعت للمليونية أو اللي هتشارك فيها.
بلدنا بالمصري: 13 ائتلافاً ترفض جمعة تصحيح المسار
في المقابل فيه حوالي 13 ائتلاف وحركة سياسية من ضمنهم: حزب ثورة مصر وائتلاف مصر الحرة وائتلاف الوعي المصري والاتحاد العام للثورة ومجلس أمناء الثورة وحزب 11 فبراير وغيرهم، أصدروا بيان مشترك النهاردة أعلنوا فيه رفضهم المشاركة في "مليونية تصحيح المسار" مع التأكيد على تأييدها لبعض مطالب المليونية وأهمها بالنسبة لهم لوقف المحاكمات العسكرية للمدنيين والاستقلال الكامل للقضاء.. أما أسباب رفض المشاركة فنعرفها من أحد الموقعين على البيان:
بلدنا بالمصري: كلنا خالد سعيد ضد التحريض على العنف
موضوع الأيادي الخفية والدعوات التحريضية_وآدي احنا شفنا منها عينة بينة امبارح_ خلونا نبقى صرحا مع بعض حاجة توغوش شوية _صحيح مش لدرجة الرعب والخوف والتخويف_ لكن زي ما قلنا كدة في الأول حرصوا ولا تخونوش.. بس واضح إن من اكتر الصفحات على فيس بوك، اللي اتوغوشت من الموضوع دة، صفحة "كلنا خالد سعيد".. الصفحة أعلنت النهاردة إنها ضد كل محاولات استغلال مليونية الجمعة للترويج لاستخدام العنف ضد أى جهة من الجهات الرسمية أو التصعيد غير المحسوب. وأكدت إن إصلاح مسار الثورة مش هيتحقق إلا بطريقتين: الاتفاق على مطالب توافقية وتوعية الشارع بيها والتاني: الالتزام بأخلاق وسلمية التظاهر. (ودول بصراحة عز الطلب).. بس دة ما يمنعش كمان إن الجهات المسؤولة عن الأمن في بلدنا تحقق في موضوع الدعوات التحريضية اللي مالية الانترنت ديه وتقول لنا كدة "بالمفتشر" مين دول وعايزين مننا إيه ومين اللي وراهم!!!
بلدنا بالمصري: يوميات تحت حكم العسكر
" يوميات تحت حكم العسكر"، دة عنوان التقرير المشترك اللي صدر النهاردة عن مركز هشام مبارك للقانون بالتعاون مع مجموعة "لا للمحاكمات العسكرية للمدنيين" وتم الإعلان عنه في مؤتمر صحفي في مقر المركز.. التفاصيل كلها في التقرير اللي جاي(تقرير)
بلدنا : رأي الشارع في المحاكمات العسكرية للمدنيين
طب دة رأي الجماعة القانونيين والحقوقيين في المحاكمات العسكرية للمدنيين، خلونا بقة نسمع رأي الناس.
بلدنا بالمصري: التحقيقات مع 16 من جمهور الأهلي
في فقرتنا التانية هيكون لنا كلام كتير وشرحه يطول عن اللي حصل امبارح بعد ماتش الأهلي وكيما أسوان في بطولة كاس مصر وهنحاول نعرف على قد ما نقدر إيه اللي بيخلينا كل ما نطلع من حفرة ونقول يا رب خطوة لقدام، نرجع تاني ونقع في الدحديرة.. المهم.. امبارح كان تم القبض على 16 من جماهير النادى الأهلى في مدرجات الدرجة التالتة وبدأت النيابة فعلاً تحقق معاهم وتسمع أقوال المصابين. تفاصيل التحقيقات هنعرفها من:
بلدنا بالمصري: منع الشيخ محمد إبراهيم من الخطابة
دلوقتي الواحد بيتغم لما بيحس إن الثورة بتجيب ورا، أو إن ريمة رجعت لعادتها القديمة.. دلوقتي الشيخ محمد إبراهيم، إمام مسجد الحاج عبد العال في مركز طهطا، قاعد في أمانة الله لا بيه ولا عليه، جات له استدعا من وزارة الأوقاف.. راح يشوف إيه الحكاية فاتفاجئ بإنه ممنوع من هنا ورايح من إنه يخطب في الجامع.. ليه بقة؟!! الشيخ محمد هو اللي هيقول لنا بنفسه
بلدنا بالمصري: أكوام الزبالة واجتماع مجلس الوزراء
امبارح كنا بنتكلم بالمفتشر عن اكوام الزبالة اللي كاتمة على أنفاسنا وهنفضل نتكلم عنها لحد ما نلاقي لها صرفة.. أصل بالذمة مش عيب علينا وعلى المسؤولين في بلدنا، بعد ما عملنا الثورة البيضة اللي زي الفل ديه وقبل ما نروح نضفنا الميادين والشوارع وخليناها انضف من الصيني بعد غسيله، نقوم نيجي بعد يا دوب 7 شهور مافيش غيرهم ترجع الزبالة تكتم تاني على أنفاسنا وما نبقاش عارفين نروح منها فين؟!!!
بلدنا بالمصري: قيود جديدة على الشارع والإعلام
بيان أسامة هيكل وزير الإعلام وقيود جديدة على تراخيص القنوات الفضائية وعلى حركة الشارع
بلدنا بالمصري: انخفاض معدل البطالة في الربع الثاني
بمناسبة بقة عجلة الانتاج اللي واقفة، مش معدل البطالة في بلدنا انخفض في الربع التاني من السنة اللي احنا فيها ديه عن معدلها في الربع الأول منه.. صحيح هو انخفاض بسيط وعلى قد ما اوسم لكن انخفض.. سبحان الله.
بلدنا بالمصري: ما حدث في رابع جلسات محاكمة مبارك
تفاصيل الجلسة الرابعة من محاكمة مبارك وشركاه مع الأستاذ/ أمير سالم المحامي المتطوع بالإدعاء بالحق المدني عن أسر الشهداء ومصابي ثورة 25 يناير
بلدنا : الحقيقة وراء اشتباكات جماهير الأهلي والشرطة
بلدنا : الحقيقة وراء اشتباكات جماهير الأهلي والشرطة
دلوقتي السؤال الأساسي: هو احنا ليه لازم نعرف إيه اللي حصل إمبارح في ماتش الأهلى؟ لإنه ببساطة هيدلنا على حاجات كتير محتاجين نعرفها، حسب أي رواية من الروايات أصح.. وعشان نبقى متفقين، احنا بس هنحاول نعرف، أما الحقيقة فمش ممكن تبان إلا من خلال تحقيق تقوم بيه جهة محايدة ومستقلة لتقصي الحقايق.. لو الحقيقة في رواية الجماهير إن الحكاية كلها أغنية وشوية هتافات ضد حبيب العادلي وعينيهم ما تشوف الا اللي جرى، يبقى لنا هنا وقفة وبالتحديد قدام مدى الولاء للراجل دة المتهم بقتل ولادنا جوة وزارة الداخلية بعد الثورة؟!!! ولو الحقيقة في رواية وزارة الداخلية إن الجماهير هي اللي ابتدت بالهجوم والاستفزاز لمجرد محاولة الأمن منعهم من استخدام الشماريخ باللتي هي أحسن فدة كوم تاني خالص.. ولو الحكاية كلها تار بايت، نبقى احنا في كارثة مش ممكن نخلص منها إلا لو اتصافينا بالفعل مش بالكلام وتطييب الخواطر... فاحنا كل اللي هنحاول نعمله النهاردة، إننا نسمع اكتر من رواية واكتر من تفسير من ضيوفنا:
- ايهاب الفولي: نائب رئيس القسم الرياضي في المصري اليوم
- محمد جاب الله: رئيس تحرير الكورة والملاعب
- محمد جمال بشير: صحفي متخصص في ملف جماهير الكورة
بلدنا بالمصري: مليونية التعليم و إضراب المعلمين
خلونا نتفق من أولها كدة إن التعليم في بلدنا هو الداء وهو الدوا.. ولا يمكن نعالج علة التعليم طول ما المدرس المصري بعافية وحاسس إنه مش واخد حقوقه لا المادية ولا الأدبية.. والظاهر إن المدرس المصري فاض بيه لدرجة إن "روابط المعلمين" على مستوى الجمهورية وافقت تقريباً كلها على المشاركة في "مليونية المعلم" يوم السبت اللي جاي ومنها لإضراب مفتوح عن العمل لحد ما تتحقق مطالبهم.. إيه هي مطالبهم وإيه إمكانية تحقيقها من عدمه.. وماذا لو فعلاً المدرسين نفذوا إضرابهم عن العمل واحنا على وش مدارس؟!!! كل ديه أسئلة هنحاول نجاوب عليها مع ضيوفنا من الطرفين: طرف المعلم وطرف الوزارة.
- الاستاذ/ عبدالناصر اسماعيل: ممثل الاتحاد المستقل للمعلمين المصريين من الجهات الداعية للمليونية
- الأستاذ/ احمد الاشقر: منسق عام روابط التعليم
- الدكتور/ طارق الحصرى: مساعد وزير التربية والتعليم لشئون التطوير الاداري
- الدكتور/ رضا مسعد: رئيس قطاع التعليم العام بوزارة التربية والتعليم
ليست هناك تعليقات:
إرسال تعليق