نشاهد اليوم
برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
ONtv Livestreaming - البث الحي
اتمنى مشاهدة ممتعة
و نبدا
برنامج بلدنا بالمصرى الاحد 17/3/2013 ONTV حلقة يوتيوب كاملة
يسعد مساكم وحلقة جديدة من بلدنا بالمصري.. مش هيبقى لنا فيها سيرة غير سيرة الست المصرية اللي احتفلت امبارح قال بيومها.. اه والله.. مش امبارح كان يوم المرأة المصرية؟!!! قامت عيدت حتة دين عيد.. وكانت العيدية حتة دين كف.. وياريته كف من اللي بيسلم او بيحيي او بيضرب تعظيم سلام او حتى من اللي بيكفي شر الحسد.. بس الحقيقة انه كان كف يخزي العين بصحيح.. يخزي عين صاحب الكف، واللي ورا صاحب الكف واللي منهم صاحب الكف واللي يتشددوا له.... لانه كف نزل على وشنا كلنا كدة بربطة المعلم من اكبر راس فينا لحد اصغر ما فينا وكبيرنا الاول قبل صغيرنا ومافيش حد احسن من حد.. اصلها حصلت يا شعب متدين بطبعه ومحافظ بطبعه وشهم وجدع بطبعه، ان الايد الطويلة تتمد كمان على ستات بلدنا من اللي يسوى واللي ما يسواش.. بس بصراحة اللي يمد ايده على واحدة ست هي بالتاكيد اجدع منه ١٠٠ مرة يبقى اكيد مايسواش.. هيسوى ازاي يعني؟! وهيسوى ايه دة؟!! ما هو اصل لما سبق وحصلت ان الايد الطويلة اتمدت على الست العظيمة شهندة مقلد وكتمت انفاسها عشان ما تحطش منطق ولا يطلع لها صوت لا هي ولا اللي زيها-ودة بعدهم وعشم ابليس في الجنة، ان ماكانش عشم ابليس في الجنة اسهل واقرب- كان لازم نفهم من ساعتها ان الايد ديه سلاح بيطول.. وان الايد اللي استجرت تمد ايدها على بق شهندة مقلد في الاتحادية، ما اسهل انها تتمد على الست العظيمة ماما خديجة ام الثوار وتنزل بالكف على وش الست الجدعة ميرفت موسى في المقطم.. وزي ما طالت قبل كدة في التحرير واتحرشت واغتصبت وهتكت عرض حرائر مصر.. اختلفت الوشوش والكف واحد.. هو هو نفس الكف اللي سبق واتمد على علا شهبة وعلى السفير يحيى نجم وقتل الحسيني ابو ضيف ووضرب وسحل وعذب على باب قصر الرياسة وفي قلب الجامع يا عيب الشوم.. وهو هو نفس الكف اللي طاح قبل كدة في المنصورة وفي المحلة.. وهو هو نفس الكف اللي ياما طاح في صحفيين واعلاميين اثناء تادية عملهم.. وهو هو نفس الكف اللي طاح امبارح في الكل بما فيهم الصحفيين قدام مكتب ارشاد جماعة الاخوان في المقطم.. وهو هو نفس الكف اللي بيتهياله يا ولداه انه يقدر يطيح في مصر بجلالة قدرها.. ومش داريان ان مصر بتكسر الايد اللي تتمد عليها.. ولو بعد حين!!!!!
الاكادة بقة ان ليلة الكف اللي نزل على وش ميرفت امبارح ونزل يرن في مصر كلها، قال كانت مصر بتوقع على وثيقة الامم المتحدة لوقف كل اشكال العنف ضد المراة والفتيات.. لكن زي اي حاجة في نصر ليها علاقة بالته المربوطة في بلدنا وبالذات على اخر الزمن اللي عايشينه دة، الوقيقة ديه قومت الدنيا ولسة ما قعدتش من قبل موافقة مصر وعليها ومن بعدها.. والدنيا قايمة ومش قاعدة بين نقيضين: واحد بيضرب تعظيم سلام للوثيقة باعتبارها خطوة تاريخية على طريق القضاء على العنف ضد المراة والتاني شايفها خطوة كارثية على طريق القضاء على الاسرة المصرية وعلى المجتمع المصري وعلى الدين والشرع والاخلاق والعادات والتقاليد والكل كليلة..
وبناءاً عليه، احنا النهاردة وعلى غير العادة في بلدنا بالمصري هنكتفي بس بعناوين اخر اخبار بلدنا.. وهنختم بمحاولة فك طلاسم نفس الوثيقة اللي طالعة في بلدنا بمنظرين: منظر الملاك حامي حما المراة المصرية ومنظر الشيطان الرجيم والوسواس الخناس.. لكن بعد الفاصل: مع الستات الكمل ميرفت موسى وماما خديجة والخفي الزميل محمد كلعت من حريدة المصري اليوم عن اللي صار واللي كان قدام مكتب ارشاد جماعة الاخوان وما ادرانا باللي صار واللي كان امبارح قدام مكتب ارشاد جماعة الاخوان
ومعنا عبر الهاتف داليا سامي عضو حركة شايفنكوم: أحد أفراد الأمن المركزي كشفنا القناع عن وجهه ووجدناه ملتحي.
ومعنا عبر الهاتف رشا صادق سيدة تم الإعتداء عليها أمام مقر الإخوان اليوم: الستات هما اللى هيخلصوا مصر من الإخوان. الشرطة تعتدي علينا بقنابل الغاز أمام مقر الجماعة. أقول للرئيس مرسي المؤمن ستات مصر يتم ضربهم
ومعنا عبر الهاتف رفيدا ياسين مراسلة محطة سكاي نيوز: أحد عناصر الإخوان سبني بأفظع الشتائم أمام مقر الجماعة أمس. تم تحطيم كاميرا سكاي نيوز والإعتداء على المصور أمام مقر الجماعة. عناصر الإخوان طاردونا في الشارع عقب تحطيم الكاميرا
ومعنا عبر الهاتف اللواء عبدالفتاح مدير الإدارة العامة للإعلام بوزارة الداخلية: بعض قوات الأمن المركزي يرتدون قناع في بعض الحالات. لانعلم من مع من ومن ضد من في هذه المرحلة الملتبسة. أقول لميرفت أنتى صاحبة حق ونأسف لما تعرضتي له. لانستخدم الخرطوش في وجه المتظاهرين. تم إطلاق سراح الصحفي محمد إسماعيل بعد التأكد من شخصيته
ومعنا هاتفياً اللواء مدحت عبدالشافي مشرف غرف عمليات الأمن المركزي بالمقطم: المتظاهرين أعتدوا عليا شخصيا وقاموا بالقاء الملتوف والحجارة وهناك إصابات للعساكر والمتظاهرين هم من يستدعونا إلى إلقاء الملتوف وكذلك تم إشعال النار في الشوارع من قبل المتظاهرين
مصر وافقت يوم الجمعة اللي فاتت على وثيقة الامم المتحدة لوقف العنف ضد المراة والفتيات والوقاية منه، بعد ١٢ يوم من المفاوضات خلال الدورة ال٥٧ للجنة وضع المراة في الامم المتحدة.. وزي اي حاجة في بلدنا ليها علاقة بالته المربوطة من قريب او من بعيد، قامت الدنيا وما قعدتش على الوثيقة وبنود الوثيقة من قبل حتى ما يتم الاعلان عن صيغتها وعن بنودها في صورتها النهائية، وبالتاكيد قبل ما تقرر مصر الموافقة عليها او رفضها.. ما بين الاشادة ببنود الوثيقة على اعتبار انها وثيقة تاريخية بمعايير انسانية عالمية للقضاء على واحدة من ابشع انتهاكات حقوق الانسان وهي العنف ضد المراة والفتيات، وما بين الرفض البات والقاطع للوثيقة على اعتبار انها بتنتهك كل ثوابت الشريعة الاسلامية والمجتمع الاسلامي وبتسعي لهدم الاسرة وتفكيك المجتمع لتكتمل اخر خطوات الغزو الفكري والحضاري والثقافي وتنتفي كل مقومات الخصوصية التي تحفظ مجتمعاتنا الاسلامية وتماسكها، احنا بقة كمجتمع مصري واقعين في حيص بيص واحتارنا واحتار دليلنا.. فهنستعين بضيوفنا النهاردة يمكن يقدروا يرسونا على بر
ديه مجرد عينة من اللي حصل بعبله كدة قدام مكتب الارشاد امبارح.. واللي هنسمع عنه حكايات وحواديت اكتر من اللي داقه مراره تالت ومتلت على عينك يا تاجر واللي ما يشتري يتفرج مش عليهم لكن على اللي مد ايده عليهم ولسة ليه عين يبرر..
بلدنا بالمصري: أهو ده اللي صار وادى اللي كان
ليست هناك تعليقات:
إرسال تعليق