برنامج اون تيوب
ON Tube
و الذى يذاع على قناة ONTV
تقديم رامى رضوان
برنامج اون تيوب برنامج يقوم علي الصحافة الشعبية التي بدات في الانتشار حيث اصبحت بديلا هاما للاعلام الرسمي و يساعد علي انتشارها الشبكات الاجتماعية لذلك يهتم اون تيوب بعرض محتويات اللقطات التي يصورها المواطنون بأنفسهم كما يهتم البرنامج بمساعدة المواطنين الراغبين في توثيق لحظات بعينها و نشرها علي الانترنت بل و عرضها علي شاشة اون تي في لايف
شارك الخبر مع اصدقائك على الفيس بوك و تويتر و جوجل +1 من اعلى الصفحة
مع تمنياتى بمشاهدة ممتعة
و لنبداء
برنامج اون تيوب حلقة الاربعاء 12 ديسمبر 2012 تقديم رامى رضوان من قناة ONTV يوتيوب كاملة
ONTube: تعازينا لأسرة الحسيني أبو ضيف
أولا أحب أتقدم نيابة عن فريق عمل أون تيوب و أون تي في كلها وعن نفسي .. بخالص التعازي لأسرة الشهيد بإذن الله الصحفي بجريدة الفجر الحسيني أبو ضيف .. اللي توفي صباح اليوم. للفقيد الرحمة و للأسرة خالص العزاء.
ONTube: تحطيم سور الإتحادية
نبدا من مصر .. وبالتحديد من محيط قصر الاتحادية. المتظاهرون أمام القصر فى مليونية (لا للاستفتاء .. ولا للغلاء) .. نجحوا فى اجتياز الجدار العازل اللى أقامته قوات الأمن. كانت مسيرات عديدة إنطلقت أمس من مناطق مختلفه في القاهره .. وإتجهت الى محيط الإتحادية .. وهتف المشاركون فيها ضد الرئيس مرسى وجماعة الإخوان.
الفيديو اللي جاي هنشوف فيه المتظاهرين وهم بيقوموا بازالة احجار الجدار العازل .. الحجر تلو الاخر .. لتمكين المشاركين في المظاهره من الاقتراب لقصر الاتحادية.
ONTube: لقاء في حب مصر إتأجل لأجل غير مسمى
إمبارح القوات المسلحة .. متمثلة في قائدها العام .. الفريق اول عبدالفتاح السيسى وزير الدفاع .. أعلنت عن دعوة كل القوى الوطنية والإعلاميين لحوار بالقرية الأوليمبية .. لبحث سبل الخروج من الازمة الراهنة .. وبغرض التواصل الإنسانى والالتحام الوطنى تحت عنوان "فى حب مصر". وأبدا العديد ممن تم توجيه الدعوة لهم ترحيبهم بهذا اللقاء .. منهم جبهة الإنقاذ الوطنى .. اللي أعلنت صباح اليوم عن مشاركتها فى المبادرة. ومن إمبارح .. بدأ مستخدمو المواقع الاجتماعية يتساءلون عن الغرض من هذا اللقاء .. وطلعت تخمينات كتير حوله و حول النتايج اللي ممكن يخرج بيها هذا اللقاء .. اللي قال اللواء محمد العصار .. عضو المجلس الأعلى للقوات المسلحة .. بأنه بيأتى لتصفية الأجواء.
بس يبدو إن في حاجة في الجو اليومين دول. يعني الأول طلع قرار الضرايب و رفع الأسعار من كام يوم .. وتاني يوم الصبح إتلغا .. أو تم وقف تنفيذه عشان أكون أدق. و دلوقتي اللقاء اللي تم الإعلان عنه إمبارح باليل .. طلعت علينا شمس تاني يوم .. اللي هو انهاردة .. وإتلغا .. أو برضو عشان أكون أدق .. اتأجل .. لأجل غير مسمى. اللواء محمد العصار .. كان قال إن سبب إطلاق دعوة اللقاء هو إن "القوات المسلحة ملك للشعب وإحنا وطنيين ونخاف على البلد". شعور جميل جدا ويحترم .. ومصر فعلا في أشد الحاجة لده .. في ظل الأجواء المشتعلة اليومين دول. لكن إعلان مصدر مسئول من رئاسة الجمهورية اليوم تأجيل هذا اللقاء لاجل غير مسمى .. يخلينا نسأل .. لماذا تم إلغاء لقاء "في حب مصر"؟ لقاء تصفية الأجواء؟ لقاء الالتحام الوطني والتواصل الإنساني؟ و إيه قصة إن قرار يطلع باليل و يتلغي تاني يوم الصبح؟ يلا .. عقبال الدستور والإستفتاء مايتعدوا.
ONTube: الصليب الأحمر في دمشق
من مصر الي سوريا. ذكر المرصد السورى لحقوق الإنسان أن أكثر من 130 مواطن سوري .. من بينهم 76 مدني .. قتلوا أمس فى أعمال عنف .. شنت على أنحاء متفرقة من البلاد.
المرصد .. اللى بيتخذ من لندن مقر له .. أوضح فى بيان أصدره ليلة أمس .. أن معظم القتلى سقطوا فى محافظات ريف دمشق وحلب وإدلب. وأضاف أن ما لا يقل عن 51 فرد من القوات النظامية قتلوا .. إثر اشتباكات بينهم و بين قوات الجيش السوري الحر .. فى عدة محافظات.
ورغم العقبات اللي بتضعها الحكومة السورية في طريق عملها .. منظمة الصليب الاحمر بتحاول مواصلة عملها داخل الاراضي السورية .. للتاكد من صحة اعداد الضحايا .. ومحاولة تقديم المساعدات الطبية للمصابين.
في الفيديو التالي هنشوف سيارات الصليب الاحمر لدى دخولها لمنطقة الغوطة بريف دمشق .. والتفاف المواطنين السوريين حولها .. وكانهم يستغيثون بها.
ONTube: أسبانيا ضد تخصيص المستشفيات
من الوطن العربي نروح الى اوروبا. مازالت اسبانيا بتواجه العديد من المظاهرات الاحتجاجية .. اعتراضا على الاجرائات التقشفية اللي أقرتها الحكومة .. لسد العجز في الموازنة العامة للبلاد. واخر هذه الاجرائات كان تخفيض الميزانية الموضوعة للمستشفيات الحكومية .. بالاضافة لخصخصة بعضها.
الفيديو التالي هو لمظاهرة احتجاجية في مدريد .. قام بيها مئات من الموظفين والعاملين بالقطاع الطبي الحكومي للاحتجاج على هذه الاجرائات. وبنشوفهم و هم بيحملوا العديد من اللافتات المنددة بهذا القرار .. و اللي كتبوا عليها (لا لتخفيض الميزانية الطبية في البلاد).
ONTube: هتافات أنصار عبدالله بدر
الفيديو التالي هو لانصار الشيخ عبد الله بدر .. وهم بيهتفوا ضد مقدم برنامج (البرنامج) .. الزميل باسم يوسف .. وبيهددوه بانهم حيجبوه .. لأنه (اتريق) على بعض خطب الشيخ عبدالله.
طبعا ده هجوم حاد على د/ باسم .. والحقيقة إن العديد من الاعلاميين ومقدمي البرامج لم يسلموا من هذا الهجوم .. ولا من التهديد أو التلويح بقتلهم .. واتهموا جميعا بانهم اما فلول وعملاء .. إما انهم بيهاجموا الدين. ومن المنطلق ده .. شرفونا أما مدينة الإنتاج الإعلامي .. زي ماحضراتكم عارفين .. للمطالبه بتطهير الإعلام.
الفيديو التالي هنشوف فيه لقطات من هتافات أنصار الشيخ عبدالله ضد عدد من الإعلاميين.
ONTube: جولة في أخبار تويتر وفيسبوك اليوم 12/12/2012
نروح لمحمد كساب عشان نتابع معاها ردود فعل مستخدمي المواقع الإجتماعية على ما تشهده مصرهذه الأيام.
سلفيو كوستا: معظمنا ضد الدستور وهنصوت بـ لا
معنا المهندس محمد البحراوي .. عضو المكتب الإداري بحركة سلفيو كوستا ورده على الإستفتاء على الدستور
ONTube: موقف سلفيو كوستا من الدستور والإستفتاء
لماذا يجب أن ننزل إلى الإستفتاء يوم السبت ونقول نعم ...عشان نحافظ على بقاء الماده الثانية من الدستور .. التي تنص على أن الإسلام هو دين الدولة. وماذا سيحدث إن لم نذهب؟؟ سوف تصبح مصر دولة بلا دين .. وعليه سيتم منع الأذان كما حدث في سويسرا .. ومنع الحجاب كما في فرنسا .. وإباحة زواج الرجل للرجل والمرأه للمرأة كما في أمريكا. لذلك يجب أن نذهب يوم السبت لنصرة ديننا".
دة مثال من الدعاية إلي كانت موجودة السنة إلي فاتت أيام إستفتاء 19 مارس .. لما "الناس بتوع ربنا" اللي مبيكدبوش ولا بينافقوا .. قالوا لازم الناس تقول نعم .. مش عشان الاستقرار .. لأ .. عشان يدخلوا الجنة. والناس الطيبة إللي متعودة انها تثق في الناس بتوع ربنا .. راحوا وقالوا نعم. وطبعاً مش محتاج أقول لحضراتكم النعم دي عملت إيه في بلدنا. الواقع الحالي بيتكلم عن نفسه.
وقتها كل الناس قالت إن ماينفعش ربط الدين بالسياسة .. وإن المفروض يجرم إستخدام الدعاية الدينية في الإنتخابات أو الإستفتاءات. لكن كان الرد إن احنا لسة في حالة لخبطة .. وإن ده أول إستحقاق شعبي حقيقي بعد الثورة. وإن طبعاً بعد كدة دة مستحيل يحصل .. وإن وقت توجيه الناس في التصويت خلص .. وخصوصاً إن احنا خلاص بقى عندنا رئيس جمهورية مدني منتخب .. مستحيل يسمح باستخدام الدين في توجيه الناخبين .. حتى عشان العملية الديمقراطية تليق بدماء الناس اللي ملت شوارع مصر عشان نشوف يوم زي ده. وفي أول صدام حقيقي بين المعارضة والسلطة المنتخبة .. رجعنا تاني لنفس الخطاب .. انفس الأسلوب .. لإسنخدام الدين في توجيه الناخبين. لكن المرة دي وصلت كمان لاباحة دماء المعارضين .. لأ ويبدو أن البعض بيستعد لمعركة.
معنا المهندس محمد البحراوي .. عضو المكتب الإداري بحركة سلفيو كوستا
ليست هناك تعليقات:
إرسال تعليق