برنامج اون تيوب
ON Tube
و الذى يذاع على قناة ONTV
تقديم رامى رضوان
برنامج اون تيوب برنامج يقوم علي الصحافة الشعبية التي بدات في الانتشار حيث اصبحت بديلا هاما للاعلام الرسمي و يساعد علي انتشارها الشبكات الاجتماعية لذلك يهتم اون تيوب بعرض محتويات اللقطات التي يصورها المواطنون بأنفسهم كما يهتم البرنامج بمساعدة المواطنين الراغبين في توثيق لحظات بعينها و نشرها علي الانترنت بل و عرضها علي شاشة اون تي في لايف
شارك الخبر مع اصدقائك على الفيس بوك و تويتر و جوجل +1 من اعلى الصفحة
مع تمنياتى بمشاهدة ممتعة
و لنبداء
برنامج اون تيوب تقديم رامى رضوان و حلقة الاثنين 15 اكتوبر 2012 من قناة ONTV يوتيوب كاملة
ONTube: المستشار عبد المجيد محمود النائب العام ساخراً
اول فيديو معانا النهاردة من مصر .. وهو اثناء الكلمة اللي كان بيلقيها أمس الدكتور عبد المجيد محمود النائب العام .. امام الجمعية العمومية لنادي القضاة .. و حضر المؤتمر ده اكتر من الفين قاضي.
بيظهر في الفيديو النائب العام .. بعد ما القى كلمته امام القضاة وبيستعد للانصراف .. و بيقول (ساخرا) انه مضطر يمشي لارتباطه ببعض الاعمال الخاصه بعمله في الفاتيكان .. التعليق اللي دفع الحضور للتصفيق.
وكان الدكتور عبد المجيد تقدم بالشكر لجميع القضاة اللي وقفوا بجانبه اثناء الازمة الأخيرة. و اضاف ان الرئيس محمد مرسي كان متفهم جدا للموقف .. وأبدى احترامه للقضاء واستقلاله واحترامه لجميع القضاة .. وأعضاء النيابة العامة .. اللي هم جزء أصيل من السلطة القضائية.
ONTube: إنشقاق أول ضابط أنثى
من مصر الي سوريا .. اللي شوفنا منها فيديوهات كتيرللعديد من الانشقاقت اللي قام بيها ضباط و كتائب من الجيش السوري .. لرفضهم سياسة بشار الاسد في تعامله مع موجة الاحتجاجات اللي قامت ضده بداية من مارس العام الماضي.
الفيديو اللي حنشوفه دلوقتي اتعودنا علي فكرته لكن الجديد هو مضمونه. هو فيديو لانشقاق بعض العناصر التابعة للجيش النظامي .. لكن مضمونه جديد تماما .. لانه لانشقاق اول ضابط إمراءة من الطائفة العلوية في سوريا .. اللي بينتمي اليها الاسد.
العقيد زبيدة الميقي .. هي اول ضابطة سورية من الطائفة العلوية تعلن انشقاقها عن الجيش السوري. وجاء على لسان العقيد زبيدة ابلغ وصف لما يحدث في سوريا .. فقالت ان الصراع في جوهره بين ظالم و مظلوم .. وليس صراع طائفي او بين اقليات .. وبررت ان سبب انشقاقها هو ظلم الاسد لشعبه المعارض ليه ولسياساته.
ONTube: ما يراه العالم في سوريا
مازلنا مع الشأن السوري .. وما تثيره الاحداث علي الاراضي السورية من غضب عالمي تجاه ممارسات النظام الاسدي .. من قتل واعتقال وتعذيب لمعارضيه من ابناء الشعب السوري.
الفيديو اللي جاي ارسله لبرنامجنا أون تيوب (فارس الشواف) من خلال صفحتنا علي فايسبوك .. وهومصور من مدينة تورونتو بكندا. الفيديو لمسيرة صامتة باسم (هذا ما يراه العالم). وقام المتظاهرين خلالها برفع لوحات كتبوا على ظهرها ما يحدث في سوريا .. ومشيوا وهما رافعينها .. و موجهين الجزء الخالي منها .. اللي مش مكتوب عليها اي حاجة .. الى المارة .. في إشارة الى ان العالم شايف صورة ليس لها أي علاقة بما يدور داخل الأراضي السورية .. من اعتقال ومذابح وقتل وتعذيب.
ONTube: إستمرار الإشتباكات في البحرين
الي البحرين .. و تحديدا بلدة المعامير .. وفيديو للاحداث اللي وقعت عقب خروج مسيرة معارضة حملت اسم (عهد بالدم كتبناه). المسيرة نظمتها العناصر المعارضة في البلدة .. كالعادة احتجاجا على سياسة الملك حمد بن عيسي ال خليفة في تعامله مع الفصيل المعارض في البلاد.
وكعادة المسيرات الإحتجاجية اللي بنشوفها من البحرين .. قامت قوات الامن بتفريق المسيرة باستخدام القنابل المسيلة للدموع وطلقات رصاص الشوزن او المطاطي .. مما اشعل الاشتباكات بين المعارضين و قوات الشرطة البحرينية.
ONTube: إحتفالات 14 أكتوبر بجنوب اليمن
نروح لليمن. والحقيقة إن الإخوة اليمنيين دايما بيمدونا في أون تيوب بالعديد من الفيديوهات .. اللي بنقدر من خلالها نتابع أحداث الشأن اليمني والحراك الجنوبي على وجه التحديد. وأحب أشكر المستخدمين (ابو ريماس اليافعي وعدنان حلبوب ومحمد كنبوش وتوفيق حسين ووائل الحريري وامير الامراء ونائف الجهيمي وجحافي الجنوب و ضياء حسن و غريب دلوني وابو شلال السعدي) .. بشكرهم جميعا على إرسال فيدويهات عديدة لفعاليات أمس. الفيدويهات كلها كانت بترصد نفس الحدث لكن من زواية مختلفة .. فإحنا أخدنا واحد من الفيديوهات الأفضل من حيث جودة الصورة والصوت.
اليمن شهدت أمس إحتفالات صاخبة بالذكري ال 49 لثورة 14 اكتوبر .. اللي انطلقت عام 1963 من جبال ردفان في الجنوب .. وكللت نضالات طويلة وشاقة وباسلة .. خاضها الشعب اليمني الجنوبي منذ أن وضع الاستعمار البريطاني أولى خطواته في شواطئ عدن عام 1839 .. وحتي خروج اخر جندي بريطاني من ارضهم.
و احتفلت انحاء اليمن كلها بذكري هذه الثورة .. وخاصة الجنوبيين .. اللي كان ليهم دور نضالي عظيم في طرد المستعمر البريطاني من الاراضي اليمنية وجنوب اليمن.
الفيديو التالي من المدينة الجنوبية عدن .. وبيظهر فيه الاف الجنوبيين اثناء احتفالاتهم .. تمجيدا بما قاموا به من نضال ضد المستعمر. وحملوا خلال الإحتفال اعلام اليمن الجنوبية .. احياء لذكري هذه الثورة .. واحياء لاسم دولة الجنوب .. خاصة انهم بيطالبوا من عدة شهور وحتى يومنا هذا .. بالانفصال عن دولة اليمن.
ONTube: إنتفاضة البرتغال ضد التقشف
من احتفالات اليمن نروح الي موجة الاحتجاجات الاوروبية. شفنا مظاهرات عديدة في إسبانيا .. و اليونان .. و إمبارح شفنا إيطاليا .. إنهاردة هنروح للبرتغال .. وفيديو بيظهر فيه خروج المئات في مظاهرات احتجاجية بالعاصمة ليشبونة .. رفضا وإعتراضا على الموازنات الاقتصادية الجديدة للحكومة .. والإجراءات التقشفية اللي اعلنتها.
وقد وضعت الحكومة البرتغالية اللمسات النهائية على مشروع موازنة العام القادم .. واللى من المتوقع أنها تكون واحدة من أكثر الموازنات تقشفاً فى تاريخ البلاد الحديث.
وكان وزير المالية البرتغالي قال .. إن خطة الإنفاق هتشمل زيادة (هائلة) فى الضرائب .. و خفض جديد فى الخدمات العامة .. وتسريح بعض عمال الخدمات المدنية .. القرارات اللي دفعت بعض البرتغاليين الى الخروج في تظاهرات إحتجاجية.
ONTube: جولة في أخبار تويتر وفيسبوك اليوم 15/10/2012
ده كان أخر فيديو معانا .. قبل مانروح لفاصل .. هنروح لهاجر جميل عشان نشوف معاه أخر التويتس و الهاش تاجز و الأخبار بصفة عامة اللي إنتشرت على المواقع الإجتماعية خلال اللحظات القليلة الماضية.
مساء الخير هاجر إيه الجديد عندك؟
ONTube: خداع بصري
نروح لفيديو تاني .. وهو ليه علاقة بفكرة الخداع البصري. فمع تطور فن الجرافيتي وادخال اساليب جديدة عليه .. بقوا الرساميين بيقوموا ببعض الحيل لخداع العين.
في الفيديو اللي جاي .. بنشوف واحد من فناني الجرافيتي في السويد .. اللي رسم علي الارض رسمة جرافيتي بطريقة ثلاثية الابعاد .. وتفاعل كمان مع الرسمة.
الرسمة دي عبارة عن شكل منحنى صخري .. بيدي إحساس لكل اللي يشوفه من بعيد بان الارض محفورة.
ONTube: أنجح حالات الفشل
ساعات الانسان بيمر بلحظات ضعف في حياته .. بسبب اراء الاخرين فيه او تقييم اساتذته. وممكن الاراء دي او نقض البعض .. يخلوا شخص يصاب بحالة إحباط شديدة. إنما ممكن حد تاني يقدر يتغلب علي الاحباطات دي و يحولها لقوة تحفيزية .. لو هو فعلا مصر على انه ينجح .. وعنده ثقة في قدراته.
واحد الامثلة على الكلام ده .. هو طالب قام المدرس بتاعه من سنين بكتابة تقرير عنه .. بيقول فيه ان الطالب ده غير مهتم بالتعليم .. وانه خسارة الوقت اللي بيضيع في تعليمه. وبعد سنيين .. الطالب ده فاز بأهم جائزة علمية في العالم .. وهي جائزة نوبل في الطب. الطالب او الشخص اللي بنتكلم عنه هو (جون جوردن) .. الحاصل علي جائزة نوبل في الطب لعام 2012.
والحقيقة إن جوردن مش هو المثال الوحيد للتحدي و الإصرار على النجاح .. أنما فيه زيه امثلة كتيير .. لأشخاص ما وقفوش عند بعض الاراء المحبطة .. و لم يصابوا بضعف .. إنما كان عندهم الثقة والعزيمة و الإصرار على النجاح .. اللي خلوهم يبقوا من اعظم الشخصيات في تاريخ العالم.
هنشوف الفيديو اللي جاي عشان نتعرف علي بعض الامثلة دي.
لازم كل واحد يؤمن بقدراته و يكون عنده عزيمة و إصرار على النجاح. فمهما كانت أراء اللي حواليه .. لازم مايستسلمش .. لأن لو رأي شخص هيخلي حد يستسلم .. كانوا الناس اللي شفناهم في الفيديو دول .. بقوا ولا حاجة.
ONTube: موزارت كما لم تسمعه من قبل
الموسيقار العظيم موتزارت .. لاشك طبعا في فنه اللي عاش لقرون .. ومقطوعاته الموسيقية اللي انتشرت في العالم كله. الفيديو اللي جاي هو لواحده من اشهر مقطوعاته .. قامت بعزفها الاوركسترا العالمية لكن بشكل مختلف تماما .. ممزوج بالموسيقي الشرقية .. مستخدمين الطبلة و الرق .. عشان يطلعوا مقطوعة موتزارت الشهيرة في شكل جديد ومختلف.
ONTube: الأطباء .. أزمات وإضرابات وإستقالات
نظراً لعدم استجابة الدولة للمطالب التي رفعها الفريق الطبي، وطالبوا بها بكل السبل، حتى اضطررنا لتنظيم إضراب جزئى مفتوح، اعتباراً من 1 أكتوبر الجارى، نظراً لأن ظروف العمل الحالية أصبحت لا تفي بأقل احتياجاتنا من الحياة الكريمة وتقديم خدمة طبية مقبولة للمريض المصري، أتقدم باستقالتى ضمن الاستقالات الجماعية من الفريق الطبي على مستوى الجمهورية».
ده نص الاستقالة الجماعية للاطباء المشاركين في الإضراب .. واللي اعلنت اللجنة العامة لإضراب الاطباء إنه بدأ جمع توقيعات عليها. وأول ما توصل ل15 ألف توقيع .. هيتم تقديمها في مسيرة ضخمة تجوب شوارع القاهرة. وأكدت اللجنة إن التقدم بالإستقالة قرار شخصي للاطباء .. لانها .. على عكس الإضراب .. لم يتم اقرارها في الجمعيه العمومية اللي عقدت يوم واحد وعشرين من سبتمبر الماضي.
هيكون معانا حالة الدكتور محمد شفيق اخصائي الأمراض العصبية والنفسية بمستشفى منشيه البكري العام وعضو اللجنة الاعلامية لإضراب الاطباء واحد أكتوبر .
وايضاً الدكتور أحمد صديق رئيس الإدارة المركزية للطب العلاجي
ليست هناك تعليقات:
إرسال تعليق