برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الاثنين 26 مارس 2012 يوتيوب كاملة
بلدنا بالمصري: هو في صدام بين الإخوان والمجلس العسكري؟
يسعد مساكم وحلقة جديدة من بلدنا بالمصري.. تقريباً مش هيكون لنا فيها سيرة غير عن أولا: الجمعية التأسيسية لصياغة الدستور وردود الفعل اللي مازالت بتتوالى من كل حدب وصوب وفي معظمها ما بين الرفض القاطع والغضب العارم.. ثانياً: الهاجس من تكرار سيناريو 54 وعلاقته بالتطور اللي حاصل خلال اليومين اللي فاتوا ما بين المجلس العسكري وجماعة الاخوان المسلمين: واللي مازال فيه ربكة ما في تسميته التسمية الدقيقة.. الاتجاه الغالب من امبارح للنهاردة بيسميه بقلب جامد "صدام" أو على الأقل "بداية صدام" ما بين المجلس والجماعة.. لكن فيه اتجاهات لسة مترددة في اعتماد التسمية ديه أو حتى القراءة ديه لإن لسة فيه قراءات تانية خالص، منها اللي بيروح لبعيد اوي لحد ان اللي بيحصل دة مجرد استعراض قوة ما بين الطرفين بهدف الوصول للتوازن بينهم مش بهدف "هذا فراق بيننا".. أو حتى لحد انها محاولة من القوتنين الرئيسيتين في المشهد السياسي النهاردة لالهاء الرأي العام عن تشكيل الجمعية التأسيسية اللي اتضح انه مش هيمر بسهولة، بهدف تمريره والا البديل: سيناريو 54 ونقول يا رحمن يا رحيم على الديمقراطية وعلى الحرية وعلى الدستور وعلى البرلمان وعلى الكل كليلة، فيبقى قضا اخف من قضا.. على اي حال كل القراءات ديه وغيرها ومدى امكانية تكرار سيناريو 54 فعلاً هنناقشها بتفاصيل التفاصيل في فقرتنا اللي جاية.
بلدنا بالمصري: ثورة غضب ضد احتكار التأسيسية
لكن على ما ييجي أوانها، هنبدأ بردود الأفعال على تشكيل الجمعية التأسيسية..
مانشيتات معظم الجرايد النهاردة بالبنط العريض: "تأسيسية الدستور» تخسر «التوافق الوطنى» «ثورة غضب» ضد «احتكار التأسيسية".. حزب الحرية والعدالة: "كان فى استطاعتنا الانفراد بتشكيل الجمعية لكن فضلنا التوافق".. ويمكن تاكيدا للمعنى دة نشر الحزب على صفحته الرسمية على فيس بوك رسم بياني لتوضيح نسبة الاسلاميين وغير الاسلاميين من داخل ومن خارج البرلمان في التأسيسية وتوضيح نسب تمثيل القطاعات المختلفة في المجتمع داخل الجمعية
بلدنا: أحزاب الكتلة الصوفية ترفض اللجنة التأسيسية
لكن ومع ذلك رد الفعل الرافضة والغاضب مازال سيد الموقف من أطراف مختلفة بما فيها بعض الأحزاب المحسوبة على تيار الاسلام السياسي زي حزب الأصالة السلفي جاء من بين الرافضين حزب الأصالة السلفى، اللي أكد أن انتخابات الجمعية كانت شكلية، والأسماء المنتخبة ليست ذات كفاءة.. وأحزاب الكتلة الصوفية ومن بينها تحديدا حزب التحرير ونهضة مصر قرروا تبنى حملة لجمع توقيعات لرفض الدستور الجديد. ولتفاصيل أكتر إحنا معانا د/ إبراهيم زهران رئيس حزب التحريرالمصري
بلدنا بالمصري: إنسحابات بالجملة من اللجنة التأسيسية
في نفس الوقت اعداد المنسحبين من عضوية الجمعية التأسيسية بتزيد بعد اعلان الدكتور عمرو حمزاوي النهاردة قراره النهائي بالانسحاب من عضوية الجمعية التأسيسية.
وانضمت النهاردة كمان لطابور المنسحبين من العضوية الدكتورة منى مكرم عبيد، واعلنت انسحابها على حسابها على تويتر بعبارة مقتضبة: "وقالت ''عبيد''، وفقًا لما ورد على حسابها الشخصي على موقع تويتر ''اعلن انسحبي من لجنة تأسيس الدستور بناء علي طلبات الكثيرين واعتذر لمن رشحوني لعضويتها''. وفيه أخبار غير مؤكدة لسة عن انسحاب الاستاذ سامح عاشور نقيب المحامين من عضوية اللجنة، خاصة وان النهاردة كان فيه اجتماع للنقابات المهنية في مقر نقابة التجاريين لاعلان موقفها من الجمعية التاسيسية. ولمزيد من التفاصيل إحنا معانا د/ شريف قاسم أمين عام نقابة التجاريين
بلدنا بالمصري: 16عضواً ينسحبون من اللجنة التأسيسية
وبكدة يكون وصل عدد المنسحبين من اعضاء البرلمان او من خارج البرلمان لـ 16 بعد انسحاب ... من إمبارح للنهاردة
بلدنا: سلطان والبلتاجي يفاوضان المنسحبين من التأسيسية
لكن على ما يبدو ان فيه نوع ما من المفاوضات بيتم لاقناع بعض المنسحبين بالرجوع في قرارهم، حسب خبر منشور على الصفحة الرسمية لحزب الحرية والعدالة. ويفهم من نص الخبر ان اللي بيجري المفاوضات النائبين: عصام سلطان ومحمد البلتاجي.
بلدنا بالمصري: تأسيس جبهة دستور لكل المصريين
بلدنا بالمصري: تأسيس جبهة دستور لكل المصريين
قايمة الرافضين لتشكيل الجمعية التأسيسية شكلاً ومضموناً طويلة عريضة لدرجة انه بجد وبدون مبالغة صعب حصرها، لكن من ابرز الجهات المعترضة على التشكيل: نادي القضاة، اتحاد كتاب مصر، الكنيسة المصرية وغيرها من الجهات اللي اما لم تمثل اطلاقاً_زي النوبيين مثلاً_ أو تمثيلها ضعيف أو رافضة لغياب الكفاءات والخبرات اللازمة من قانونيين واقتصاديين وعلماء فنانين واعلاميين وغيرهم.
وبالتالي فواضح دلوقتي لحد كبير ان مواجهة الجمعية التأسيسية بتشكيلها الحالي واخدة اكتر من شكل واكتر من وسيلة منها المقاطعة والانسحاب من العضوية.. منها البيانات والتصريحات، منها اللجوء للقضاء ومنها الحشد الشعبي.. والوسيلتين الأخرانيين بتقودهم مجموعة من الأحزاب والقوى الوطنية والحركات الثورية، اللي اعلنت عن تأسيس جبهة (دستور لكل المصريين) للدفاع عن حق الشعب المصري في صياغة دستوره بما يضمن حقوقه الأساسية ويضمن في نفس الوقت تمثيل جميع فئات وقوى المجتمع. ولتفاصيل أكتر إحنا معانا أ / أحمد طه النقر المتحدث بأسم الجمعية الوطنية للتغيير
البلتاجي: يجب كتابة دستور لا أثر لوصاية العسكري عليه
الدكتور/ محمد البلتاجي نائب بمجلس الشعب، وأمين حزب الحرية والعدالة بالقاهرة، فطالب النهاردة على صفحته الشخصية على فيس بوك، طالب جماعة الإخوان بالاعتراف بأخطائها اللي "ساهمت في إبعاد القوى الوطنية الثورية عنها" ورفض اختزال المعادلة السياسية المصرية في صورة معركة بين النظام والإخوان " والا نبقى رجعنا لما قبل 25 يناير حيث قامت الثورة حين صار النظام في مواجهة شعب وليس فصيل أو جماعة" تفاصيل أكتر هانعرفها من د / محمد البلتاجي عضو مجلس الشعب عن حزب الحرية والعدالة
بلدنا - عواض: التيار الإسلامي فرض علينا من لا ينتمون لنا
إحنا معانا على الهاتف المخرج / أحمد عواض وهو من النوبة
بلدنا بالمصري: سيناريو 1954 ريحته هافة علينا
رغم الاختلاف على تسمية التوتر في العلاقة ما بين العسكر والاخوان من بداية صدام، لانتهاء شهر العسل، لحرب تكسير عظام، لاستعراض قوة، لمجرد خلاف في وجهات النظر لا يفسد للود قضية، لمحاولة لالهاء الجميع وتمرير الجمعية التاسيسية، الا ان القاسم المشترك هو ان سيناريو 54 ان ماكانش بيطل علينا فعلى الأقل فيها ريحة منه هفة
بلدنا بالمصري: تاريخ صدام العسكر والإخوان وسيناريو 1954
صحيح انه من فات قديمه تاه بس مش دايماً.. والدليل مثلاً: اننا لو مفتحناش عينينا وفتنا وفوتنا سيناريو مارس 54 على كل اللي بيحاولوا يقتبسوه ويعيدوا انتاجه برخص التراب بقى لهم 15 شهر، هنتوه وبلا رجعة الا بعد عمر طويل وبتمن اغلى بكتير من اللي دفعناه واللي من اللي ممكن ندفعه عشان نفوت قديمنا ونخطي لقدام.
سيناريو 54 اللي احنا حاطين ايدينا على قلبنا منه من ساعة ما تولى المجلس العسكري ادارة شؤون البلاد بتفويض من الرئيس المخلوع حسب نص البيان اللي تلاه علينا اول واخر نائب للرئيس المخلوع _وحالياً المرشح المحتمل لأول انتخابات رئاسية بعد الثورة اللي اتهيا لنا انها نجحت بمجرد ما سمعنا البيان دة واللهم لا اعتراض_ السيناريو دة احنا حاطين ايدينا على قلبنا منه ليه وليه كل الأيام ما تعدي وتفوت وكل ما بنقرب من لحظة تسليم السلطة وبناء حياة ديمقراطية سليمة بعبع 54 يسد علينا عين الشمس؟! هل لاننا لسة مش قادرين نتخلص من العقدة وكلها مسالة وقت والبعبع دة مجرد هلاوس مالهاش اي اساس على ارض الواقع؟! ولا الهواجس ديه في محلها وممكن تبريرها بالدليل والحجة من 11 فبراير ولحد امبارح والنهاردة؟! وايه العلاقة ما بين علاقة الاخوان بالسلطة وما بين امكانية تكرار سيناريو 54؟! وايه اللي يمنع تكراره أو ما يمنعش؟ وفين الشبه وفين الاختلاف ما بين مارس 54 ومارس 2012؟! علما بان بعد سنة واحدة من قيام ثورة 52 كان فيه اصوات في الشارع بتتحسر على الملك اللي طردته الثورة وجابت بداله 13 ملك بالاشارة لأعضاء مجلس قيادة الثورة، ومع ذلك وبعد مرور اقل من سنتين على الثورة وتحديدا في 28 مارس نزلت الناس في الشارع في مظاهرات ليها العجب تنادي بسقوط الحرية والديمقراطية فسقطوا وعاش العسكر يحكم مصر لحد النهاردة.
الأسئلة ديه وغيرها هنحاول نجاوب عليها رايح جاي ما بين مارس من 58 سنة ومارس النهاردة وهنستعين عليها بضيوفنا:
الدكتور/ كمال الهلباوي: القيادي السابق في جماعة الإخوان المسلمون
الدكتور/ خالد فهمي: أستاذ التاريخ بالجامعة الأمريكية
ليست هناك تعليقات:
إرسال تعليق