برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الاثنين 12 مارس 2012 يوتيوب كاملة
بلدنا بالمصري: في سلو بلدنا الأرض عرض
يسعد مساكم وحلقة جديدة من بلدنا بالمصري.. اسمحوا لي ابدأها برسالة كدة بالمفتشر لمن يهمه الأمر: "في سلو بلدنا الأرض عرض" يعني: العرض أغلى علينا من الأرض.. واللي يفرط في العرض مش بعيد ييجي عليه اليوم ويفرط في الأرض!!! ويجعل كلامي خفيف على كل من كان على راسه بطحة.. لكن اللي يطمن البال ويريح القلب رغم المحنة ورغم القهر ان أهالي المحروسة أصحاب الأرض الأصليين لسة نخوتهم بخير ولسة عرضهم غالي ومش ناويين ولا يمكن أبداً هيفرطوا فيه ولا حتى على جثتهم.
بلدنا بالمصري: ردود الفعل على براءة طبيب كشف العذرية
نبدأ بقة آخر أخبار بلدنا.. وآخر خبر من امبارح للنهاردة، كم ردود الأفعال اللي بتتوالى من امبارح من ساعة ما القاضي العسكري نطق بحكم براءة المتهم في قضية هتك عرض سميرة ابراهيم.. هتك العرض هي التهمة الأساسية اللي اشتكت منها سميرة في بلاغها للمدعي العام العسكري، لكن التهمة ديه عند احالة البلاغ للمحكمة اتحولت لخدش حياء ومخالفة الأوامر العسكرية وبالتالي فالمتهم اللي براته المحكمة العسكرية امبارح برئ من خدش حياء سميرة ومخالفة الأوامر العسكرية اللي ما اشتكتش منهم سميرة اصلاً.. سميرة لما اشتكت للمدعي العام العسكري اشتكت من هتك عرضها.. على اي حال دة الشق اللي يبدو قانوني فيما يخص الحكم اللي صدر أما فيما يخص ردود الأفعال على الحكم اللي صدر فاخدت أشكال مختلفة أما المضمون فما بين الغضب وما بين التضامن وغالباً الاتنين مع بعض.. وهناخد مجردات عينات:
بلدنا بالمصري: خالد علي متضامن مع سميرة إبراهيم
أما خالد علي المحامي والمرشح المحتمل للرئاسة فأعلن في بيان ليه عن تضامنه مع سميرة إبراهيم لإعادة المحاكمة، أملاً فى تحقيق العدالة التى تستحقها إنسانة وصفها بال"شجاعة أثبتت للعالم جسارة المرأة المصرية التى لا تتهاون فى الوصول لحقها، بالرغم من كل المواجهات القاسية التى تتعرض لها فتاة فى مثل هذا النوع من القضايا"
بلدنا بالمصري: حكم العسكرية ليس نهاية المطاف
ثانياً: رد فعل بعض الأحزاب السياسية والحركات الشعبية والمنظمات الحقوقية اللي وقعت على بيان المبادرة المصرية للحقوق الشخصية تحت عنوان: "حكم العسكرية في قضية فحص العذرية ليس نهاية المطاف" و لمزيد من التفاصيل إحنا معانا أ/ عادل رمضان - المسئول القانوني للمبادرة المصرية للحقوق والشخصية
بلدنا: بيان المجموعة المصرية عن حكم كشف العذرية
أما المجموعة المصرية للرقابة على الخدمات الصحية فجاءنا منها البيان التالي و لمزيد من التفاصيل إحنا معانا أ / جين فهمي - عضو المحموعة المصرية للرقابة على الخدمات الصحية
بلدنا: الاتحاد النسائي المصري متضامن مع سميرة إبراهيم
اما الاتحاد النسائي، فاعلن في بيان ليه النهاردة عن قراره بعدم الاحتفال بيوم المرأة المصرية يوم 16 مارس اعتراضاً على الحكم وتضامناً مع سميرة.
بلدنا: وقفة نقابة الصحفيين تضامناً مع سميرة إبراهيم
لكن فيه ناس ما قدرتش تستنى ليوم الجمعة وما كدبتش خبر وخير البر عاجله فكانت وقفتها النهاردة قدام نقابة الصحفيين.
بلدنا بالمصري: تأجيل قضية الرائد أحمد شومان ورفاقه
وقبل ما نبعد عن المحكمة العسكرية، المحكمة قررت النهاردة مد أجل الحكم علي الرائد أحمد شومان والنقيب عمرو متولي والرائد عمرو بدر اللي انضموا للمتظاهرين في أحداث محمد محمود في نوفمبر اللي فات باتهامات من ضمنها: " استخدام الانترنت في الدعوة للانقلاب على المجلس العسكري" و "إهمال إطاعة الأوامر والتعليمات العسكرية " و " الظهور بالزى العسكري المموه خارج الوحدة " و " الغياب عن الوحدة العسكرية بدون تصريح".. المحكمة أجلت القضية لجلسة 11إبريل والجبهة الشعبية للدفاع عن مصر دعت لمساندتهم على صفحتها على فيسبوك تحت شعار" ساندوا من ساندوكم "
بلدنا بالمصري: التضامن ونتائج التحقيق مع زياد العليمي
من الوقفة على سلالم نقابة الصحفيين للوقفة على رصيف برلمان الشعب، كان فيه وقفة تانية المرة ديه تضامناً مع النائب زياد العليمي، في نفس الوقت اللي كان بيتحقق فيه معاه للمرة التانية قدام لجنة القيم على خلفية تصريحاته اللي اعتبرتها أغلبية النواب في مجلس الشعب إهانة للمشير حسين طنطاوي، رئيس المجلس الأعلي للقوات المسلحة.
بلدنا بالمصري: الحكومة والبرلمان .. لا لوم ولا عتاب
لسة تحت قبة البرلمان، وعلى ما يبدو ان عفا الله ما سلف امبارح من الحكومة_ولو مؤقتاً_ بحضور خمسة من الوزرا من بينهم وزير الزراعة اللي غاب امبارح عن الجلسة المسائية وكانت النتيجة انها اترفعت بعد دقيقتين اتنين من بدايتها احتجاجاً على غياب الحكومة بقرار من رئيس المجلس اللي هدد باتخاذ موقف حاسم لو غابت الحكومة تاني عن جلسة النهاردة.. فحضرت الحكومة وبدأت الجلسة من غير لا لوم ولا عتاب وما بين الخيرين حساب!!!
بلدنا بالمصري: حدث تاريخي في مجلس الشعب
النهاردة في حدث تاريخي في مجلس الشعب أن لأول مرة يتم طلب قطع العلاقات بين مصر وإسرائيل إحتجاجاً على الأحداث الأخيرة في فلسطين
أشرف بدر: إتفاق بين البرلمان والحكومة لحفظ ماء الوجه
أما رئيس الحكومة اللي غاب امبارح لأسباب شخصية عن جلسة مناقشة مين المسؤول عن "ركوع مصر" اللي وعدنا هو شخصياً وحذر الآعادي من انها "لن تركع"، فكان النهارده بيمارس مهامه كالمعتاد ولم يصدر عنه او عن حكومته اي تصريح ولا حتى تلميح حوالين قرار مجلس الشعب بطرح الثقة في حكومته.. لكن يمكن الكواليس فيها اشارات من اي نوع هنحاول نجس نبضها مع:
بلدنا بالمصري: هي الست بولر جاية مصر تعمل إيه تاني؟
في نفس الوقت اللي حكومتنا لسة عاملة فيه ودن من طين وودن من عجين، وصلت امبارح القاضية الأمريكية ماريان بولر للقاهرة قادمة من ألمانيا في زيارة تستغرق كام يوم!!! ليه بقة؟!!! المعلن والمقرر هو انها هتقابل عدد من المسئولين في وزارة العدل، ومجلس القضاء الأعلى وأعضاء محكمة النقض، ورئيس محكمة الاستئناف المستشار عبد المعز إبراهيم لمناقشة سبل دعم علاقات التعاون القضائى بين مصر والولايات المتحدة.. لكن نظراً لإننا مش فاهمين أوي ممكن يكون التعاون اكتر من كدة ايه فهنحاول نفهم الست القاضية الأمريكانية جاية بلدنا في التوقيت دة تعمل ايه بالظبط؟!!!
بلدنا: قرية صنعاء محاصرة من الخارجين عن القانون
من الوادي الجديد هانبتدي عشان في تطورات حصلت النهاردة من هجوم على بعض القرى هناك من الخارجين عن القانون و هانعرف تفاصيل أكثر من مدير مكتب أون تي في بسوهاج أ/ مصطفى سالم
بلدنا: الأوائل لا اعتصموا ولا قابلوا شيخ الأزهر
هنروح لحد مشيخة الأزهر، نتابع اعتصام أوائل طلبة كليات جامعة الأزهر اللي على ما يبدو ما كانش بالساهل بالنهاردة.. لا الاعتصام ولا مقابلة شيخ الأزهر وهانعرف التفاصيل من أ/ محمد رشدي أحد أوائل خريجي الأزهر
بلدنا بالمصري: حالة الإعلام المصري بعد أول سنة ثورة
اللهم اننا لا نسألك رد القضاء ولكننا نسالك اللطف فيه: بعد سنة بالتمام والكمال على ثورة قامت تنادي بالحرية، لسة حرية الاعلام_زيها زي حريات تانية كتير_ محلك سر ويمكن كمان بترجع لورا وفي كل الحالات حالها لا يسر عدو ولا حبيب، دة تقريباً المعنى اللي أكد عليه التقرير السنوى الأول للائتلاف الوطنى لحرية الإعلام عن حرية التعبير وحالة الإعلام المصرى بعد اول سنة ثورة.
بلدنا بالمصري: أهالي المحروسة عمال الصرف الصحي
أهالي المحروسة اللي مالهمش نصيب لسة في عيشة حرة كريمة في بلدنا، لكن ليهم نصيب على الأقل في بلدنا بالمصري النهاردة هم عمال الصرف الصحي.
بلدنا بالمصري: إنقاذ صناعات مصرية وإيدين تتلف في حرير
وقبل الفاصل خلونا نطل طلة على صناعات في بلدنا صنعة ايدين تتلف في حرير وقربت تنقرض وما يفضلناش منها أثر وازاي ممكن ننقذها من الزوال.
بلدنا: أصل وفصل وباء الحمى القلاعية وإيه آخرتها
صل وفصل وباء الحمى القلاعية اللي وايه آخرته قبل ما يقضي على ثروتنا الحيوانية؟!!! دة باختصار شديد اللي احنا فيه لحد دلوقتي والسؤال اللي هنطرحه هيكون حوالين انقاذ ما يمكن انقاذه لحين ما يكون فيه صرفة لمواجهة الوباء والقضاء عليه ان امكن خاصة اننا يمكن ما يكونش قدامنا اختيار تاني لاننا مش حمل فيروس تاني تحلى له العيشة في بلدنا فيستوطن ويحيب أجل اللي حيليتنا من ثروة حيوانية اصلاً مش مكفيانا. السؤال هنطرحه على:
- د.حاتم فرج: مساعد وزير الزراعة لشئون الطب البيطري
- محمد فرج: نائب رئيس اتحاد الفلاحين في المنوفية
المهندس/ محمود هيبة: رئيس لجنة الزراعة بمجلس الشعب
د. محسن البطران: رئيس مجلس ادارة البنك الرئيسي للتنمية والائتمان الزراعي
ليست هناك تعليقات:
إرسال تعليق