برنامج بلدنا بالمصرى
تقديم ريم ماجد
على قناة ONTV
يوتيوب كاملة
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
ونبدا
برنامج بلدنا بالمصرى تقديم ريم ماجد على قناة ONTV حلقة الاحد 1 يناير 2012 يوتيوب كاملة
بالمفتشر: مواجعنا هانت بلمتنا الحلوة في رأس السنة
يسعد مساكم في أول حلقة من بلدنا بالمصري في أول يوم من أول سنة بعد أول ثورة ماهاش مثيل قبل كدة لا في بلدنا ولا في الدنيا.. كل سنة واحنا وكلنا طيبين وجدعان وولاد بلد، عاشقين تراب رجليها وشايلينها على راسنا من فوق وحالفين لنعدي بيها لبر الأمان مهما كان التمن.. وزي ما في سلو بلدنا، إننا بنلبس اسود لحد الاربعين لما يروح مننا عزيز وغالي، كمان في سلو بلدنا، المواجع بتهون باللمة الحلوة.. عشان كل لمة حلوة اتلمت ليلة امبارح هونت كتير من مواجع السنة اللي ودعناها وادتنا أمل في اننا لسة قادرين نوسع سكة لبكرة الجاي وان بكرة دة لسة فيه أمل كبير يكون على قدنا ويكون شبهنا ويليق بمقامنا.. وآدي العينة.
بلدنا: زيارة مصابي الثورة في استقبال ٢٠١٢
كتير من اهالي الشهدا والمصابين وأهاليهم اختاروا يعدوا للسنة الجديدة في نفس المكان اللي راح منهم فيه أعز الحبايب أو دفعوا فيه نور عينيهم أو حتة منهم، وكإنهم بيبصموا بالعشرة إن طول ما الميدان موجود وبخير عمر الحقوق ما هتروح هدر.. أما المصابين اللي لسة بعافية ولسة صحتهم مش مساعداهم، فزيارتهم لحد عندهم وبربطة المعلم كانت اول خطوة عزيزة في السنة الجديدة.
ان جيتوا للحق، احنا كلنا مصابين ويمكن مش داريانين، حتى اللي قاعدين في البيوت على الكنب وحتى اللي مغمضين عينيهم ومستكفيين بالسمع.. واللي ماانصابش في جسمه بالتأكيد انصاب في روحه.. احنا بقة ايه اللي جرى لنا وعايزين نخف منه ولا لأ وهنخف منه ازاي: دة موضوع شرحه يطول وهنتكلم فيه بالتفصيل في فقرتنا اللي جاية مع الدكتورة/ منال عمر أخصائي الصحة النفسية.. ولإن أول خطوة في العلاج هتدلنا عليها الدكتورة منال هي ان اللي اعتدنا علينا اياً كان نوع الاعتداء ياخد جزاءه، فالفقرة اللي بعدها على طول هتكون محاولة للاجابة على سؤال: "احنا فين والخطوة ديه فين"و هنستعين على الاجابة بالدكتور حسن نافعة والدكتور خالد أبو بكر
بلدنا: احتفالات أحباب الله باستقبال ٢٠١٢
بس بما اننا لسة في موسم الاحتفال بسنة جديدة، فخلونا نحتفل كمان على طريقة أحباب الله اللي مايفرقوش عن الملايكة كتير.
بلدنا: نقل مايكل نبيل لمستشفى سجن طرة
من ضمن الأخبار الحلوة اللي ممكن تكون على سبيل بشرة الخير واحنا على دخلة السنة الجديدة، إن الناشط والمدون مايكل نبيل المحكوم عليه عسكرياً بسنتين سجن والمضرب عن الطعام من اكتر من 130 يوم، النائب العام أمر النهاردة أخيراً بنقله من سجن المرج العمومي لمستشفى سجن مزرعة طرة.. لكن قرار النقل وان كان استجابة سريعة من النيابة العامة لكن ما كانش كدة بالساهل
بلدنا: اختطاف أخت مسئول حملة حازم أبو إسماعيل
من ضمن بقة الأخبار الغريبة والمريبة، خبر اختطاف أخت مسئول الحملة الإلكترونية للشيخ حازم أبو إسماعيل المرشح المحتمل لرئاسة الجمهورية، في إسكندرية.. نغم عندها 16 سنة وعلى حسب ما فهمنا انها اتخطفت من بيتها من عقر دارها.
بلدنا: سنة ومحدش حقق في تفجير كنيسة القديسين
النهاردة بتمر سنة بالتمام والكمال على الاعتداء على كنيسة القديسين في الدقايق الأولى من سنة 2011، ولحد النهاردة مش ما حدش جزاءه، ولا حتى جت على قد اننا لسة مش عارفين مين اللي عمل كدة ومين اللي كان واخدنا في سكة اللي يروح ما يرجعش.. يا ريت.. أصلاً التحقيقات في القضية متوقفة من بعد الثورة ولحد النهاردة ما حدش قالها انتي فين.. النهاردة بس محكمة الأمور المستعجلة في اسكندرية كانت بتنظر في الدعوى المرفوعة من الكنيسة وأسر الشهدا ضد رئيس الوزراء ووزراء الداخلية والعدل والنائب العام لإلزامهم باستكمال ملف التحقيقات.. والمحكمة قررت التأجيل لجلسة 5 فبراير لضم المشير حسين طنطاوى، رئيس المجلس الأعلى للقوات المسلحة، كخصم فى الدعوى بصفته المسئول الأول، اللي ليه سلطات فتح ملف التحقيقات. في نفس الوقت اللي نظم قيه اتحاد شباب ماسبيرو وقفة احتجاجية قدام دار القضاء العالى.
بلدنا: سير جلسات قضية فتنة إمبابة
أما القضية الشهيرة بقضية فتنة امبابة، فمحكمة جنايات امن الدولة العليا في الجيزة، والمنعقدة في التجمع الخامس قررت استكمال نظر القضية في جلسة بكرة.. التفاصيل فى التقرير اللى جاي
بلدنا: ردود فعل عنيفة لاقتحام المنظمات الحقوقية
موضوع اقتحام عدد من منظمات المجتمع المدني في اطار التحقيقات الخاصة بتمويل أجنبي مخالف للقانون، لسة موقف الدنيا على رجل جوة وبرة.. الخارجية الأمريكية بتهدد بإمكانية حجب المساعدات العسكرية لمصر بقيمة ـ١.٥ مليار دولار.. والاتحاد الأوروبي وصف اقتحامات مقرات المنظمات بانه استعراض للقوة.. في حين ان المصادر الامنية بتنفي اي نوع من انوع استعراض القوة وبستعجب من ايه اللي يخللي" هذه المنظمات تخشى من العمل القانوني والتفتيش طالما أنها تدعي عملها بشكل مقنن''. أما المجلس القومي لحقوق الانسان فاصدر بيان جديد بعد اجتماع طارئ للجنته التنفيذية أكد فيه مبدئياً على ان الاجراءات اللي تم اتخاذها ضد المنظمات حتى الآن فيها شبهة عدم قانونية.
بلدنا: إحتفالية دار ميريت تضامنا مع المنظمات الحقوقية
يوم الجمعة اللي فاتت دار ميريت للنشر و مجموعة من الفنانين و الشخصيات العامة نظموا إحتفالية أمام دار النشر كنا أعلنا عنها من هنا و كان من ضمن أهداف الأحتفالية هو التضامن مع عدد من منظمات المجتمع المدني اللي تم أقتحامها على مايبدو بطرق مخالفة للقانون
بلدنا: توقف حركة كوبري السلام ومعديات قناة السويس
النهاردة، تظاهر المئات من أهالي القنطرة شرق قدام مدخل معدية الأفراد والسيارات اللي بتربط بين الضفتين الشرقية والغربية لقناة السويس، ووقفت حركة المعديات تماماً، وغيرهم من الأهالي قطعوا الطريق المؤدي للمدخل الشرقي لكوبري السلام.. ليه دة كله والأمور وصلت لحد فين:
بلدنا: زيادة ١٠٪ لأصحاب المعاشات من يناير
من الأخبار الحلوة بتاعة أول السنة، بشرة خير لأصحاب المعاشات، وزارة التأمينات الاجتماعية، وافقت على زيادة 10% لأصحاب المعاشات من إجمالى المعاش، هيتم احتسابها من بداية يناير 2012.
بلدنا: أحوال أهالي امبابة اللي بيوتهم وقعت
فاكرين كنا من اسبوع عرضنا معاكوا مشكلة مساكن امبابة اللى وقعت واللى بيتوقع واالى هتوقع وكان معانا محافظ الجيزة الدكتور على عبدالرحمن و وعد بحل المشكلة تعالو نشوف بعد اسبوع المشكلة عاملة ازاى هل الدنيا اتحركت ولا لسه تفاصيل اكتر فى التقرير اللى جاي
بلدنا: المشير وتعديل إنتخابات مجلس الشورى
حسب وكالة أهرام الشرق الأوسط أن المشير طنطاوي أصدر قرار بأن تجرى عملية الأنتخاب فيما يخص مجلس الشورى على مرحلتين و في الأعادة سوف تجرى في يوم واحد فقط.
بلدنا: دعوى ضد طنطاوي لمخالفة الإعلان الدستوري
آخر الدعاوى المرفوعة ضد المشير حسين طنطاوي، رئيس المجلس الأعلى للقوات المسلحة بصفته، هي الدعوى المرفوعة من الاستاذ أحمد محمود الشرقاوي، المحامي، وعضو حركة «إحياء التيار الرئيسي».. الدعوى مرفوعة أمام «مجلس الدولة»، للطعن على القرار السلبي بالامتناع عن إجراء الانتخابات الرئاسية، وتأجيلها لحين وضع دستور جديد.. وبتطالب بإجراء الانتخابات الرئاسية بعد البرلمانية مباشرة، وفقا للإعلان الدستوري.
بلدنا: سوزان مبارك تشرف على احتفالات أسيوط
بأمر من وزارة التربية والتعليم، السيدة سوزان مبارك قرينة الرئيس المخلوع تشرف على احتفالات عيد الأسرة بأسيوط
بلدنا بالمصرى : مبادرة إعادة تأهيل مصابي الثورة
بعد مرور سنة تقريباً على ثورة سلمية، بس من طرف واحد، وعنيفة أحياناً ودموية أحياناً تانية من الطرف التاني.. وبعد 30 سنة ويمكن 60 ويمكن اكتر من كدة بكتير من الاعتداءات علينا وعلى حقوقنا على كل شكل ولون: من أول حقنا في مجرد الحياة لحد حقنا في حياة حرة كريمة بتتوفر فيها المواصفات القياسية للحياة اللي تليق بمقامنا كبني آدمين، واجب نسأل سؤال ونرد عليه: بعد كل دة احنا جرى لنا إيه؟!!! وايه نوع العلل النفسية اللي اتربت عندنا طول السنة اللي فاتت وطول السنين اللي فاتت وايه أعراضها وايه خطورتها وهل هي عاهات مستديمة ولا اعراض زايلة وازاي هنواجهها وازاي ممكن نخف منها ونشد حيلنا من بعدها وياحبذا لو نقدر نكون صاغ سليم؟!!! كل ديه اسئلة هتجاوبنا عليها:
الدكتورة/ منال عمر: اخصائي الصحة النفسية
بلدنا بالمصري: احنا بنحاكم مبارك وشركاه ليه أصلاً
ول خطوة في العلاج بالورقة والقلم وزي الكتاب ما بيقول دة لو احنا عايزين نخف ونسترد عافيتنا: إن اللي اعتدى علينا أياً كان نوع الاعتداء ياخد جزاءه، لو ماخطناش الخطوة ديه يا اما هنفضل محلك سر ودة احسن الفروض أو هنتنكس لاقدر الله... احنا فين بقة والخطوة ديه فين؟!!!
هل ممكن تكون آخرتها فعلاً إن كل هذه الاتهامات اللي بينكروها تماماً، تطلع في الآخر كانت مجرد تهيآت وهلاوس واحنا كان بيتهيألنا؟!!! بس الحقيقة انه مش هو دة السؤال.. السؤال ولو احنا عاوزين نربطه بأول خطوة على طريق الشفا وبالتالي البنا، لازم يكون كالآتي: " هي الناس ديه بتتحاكم على ايه بالظبط: على آخر 18 يوم ليهم في الحكم وفيلتين وكنبة وقلة وكباية؟!!! طب واللي فات كله القديم منه والجديد؟!!! والسؤال التاني: هي الناس اللي بتتحاكم ديه بتتحاكم بجد وبحق وحقيقي ولا قال يعني بتتحاكم تصبيرة كدة على ما تفرج ولغرض في نفس كل يعقوب في نفسه غرض؟!!! ولا يمكن يكون الكاتب الصحفي البريطاني الضليع في شؤون الشرق الأوسط بحكم عمله كمراسل لصحيفة الاندبندت في المنطقة، يمكن يكون قالها كلمة حكمة من أول يوم والحكاية كلها بومبوناية كدة على قد ما أوسم.. ( "مازالت موجودة وربما أسوأ")
الراجل كان شايف ساعتها ودة كان اول يوم يدخل فيه المخلوع قفص الاتهام يوم 3 أغسطس ان: "مصر مبارك مازالت موجودة ويمكن أسوأ"!!! النهاردة وبعد مرور حوالي سنة على قيام الثورة وحوالي 5 شهور على بداية محاكمة المخلوع وحوالي 3 إيام على أول حكم في قضية من قضايا القتل المتظاهرين يشاء السميع العليم ان يكون حكم ببراءة كل المتهمين، ضيوفنا بقة شايفين إيه؟!!!
د. حسن نافعة: أستاذ العلوم السياسية
ليست هناك تعليقات:
إرسال تعليق