برنامج بلدنا بالمصرى
تقديم ريم ماجد
على قناة ONTV
يوتيوب كاملة
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
ونبدا
برنامج بلدنا بالمصرى تقديم ريم ماجد على قناة ONTV حلقة الاحد 25 ديسمبر 2011 يوتيوب كاملة
بلدنا: علاء عبدالفتاح .. من السجن لميدان التحرير عدل
يسعد مساكم وحلقة جديدة من بلدنا بالمصري.. هنبدأها بخبر حلو من نفسنا.. أبو خالد الشهير بعلاء عبد الفتاح الناشط والمدون وابن الناس الكمل الدكتورة ليلى سويف والأستاذ/ أحمد سيف الإسلام المحامي الأغنيا عن التعريف هم وبقية العيلة من أخت لخالة لزوجة لحما، ربنا فك حبسه النهاردة، بعد قرار قضاة التحقيق في قضية ماسبيرو باخلاء سبيله بضمان محل اقامته ومنعه من السفر، بعد ما قضى في الحبس شهرين من أول القضية ما كانت تحت نظر القضاء العسكري ومنه لأمن الدولة العليا ثم النيابة العامة وأخيراً لقضاة التحقيق المنتدبين من وزارة العدل.. أول حاجة عملها علاء بعد ما خد ابنه في حضنه، خد بعضه وطلع على ميدان التحرير عدل.
بلدنا: كفارة يا أبو خالد وعقبال البراءة ليك واللي زيك
كفارة يا أبو خالد والف حمد الله على سلامتك وعقبال البراءة انت وكل اللي زيك بالآلافات في السجن الحربي أو محبوسين على ذمة قضايا المتهم الأول فيها_دايماً_ طرف تالت لابس طقية الاخفا ما حدش عارف يلاقي له قرار.
بلدنا بالمصري: اللي قاعدين لسه في التحرير ومحرموش #Dec25
وهنرجع للقضايا ديه اكتر من مرة، بس قبل ما نبعد عن التحرير خلونا نسأل الناس اللي لسة قاعدة هناك، هو انتوا ايه اللي مقعدكم؟!!! هو انت لسة ما حرمتوش؟!!!
بلدنا: محبوسين مجلس الوزرا حالهم يصعب على الكافر
من ضمن القضايا المتهم فيها اللي ما يتسمى الطرف التالت هو واللي يتشدد له، القضية الشهيرة باحداث السفارة الاسرائيلية يوم 9 سبتمبر بعد جمعة تصحيح المسار، يعني قبل ماسبيرو بشهر واحد بالتمام والكمال.. القضية ديه كمان كل المعتقلين فيها تم اخلاء سبيلهم بعد قرار محكمة جنايات محكمة أمن الدولة العليا طوارئ امبارح باخلاء سبيل حوالي 30 منهم كانوا لسة محبوسين على ذمة القضية لانتفاء أسباب الحبس الاحتياطي وتأجيل القضية لجلسة يوم 26 يناير.. ولسة هيكون لنا كلام كتير في القضية ديه وغيرها اللي يمكن يكون على ذمتهم في الحبس كتير من المظاليم في حين ان الفاعل لحد دلوقتي مجهول.. من ضمن القضايا ديه بالتاكيد، قضية الأحداث الأخيرة الشهيرة بأحداث مجلس الوزرا الدامية واللي راح ضحيتها لحد دلوقتي 18 شهيد، أعمارهم ما بين 14 و56 سنة، جريدة التحرير ناشرة النهاردة صورهم وأسماءهم كلهم على صفحتها الأخيرة.
من ساعة ما بدأت التحقيقات في قضية مجلس الوزرا، قضاة التحقيق أصدروا قرارات بحبس وتجديد حبس 40 متهما لمدة 30 يوم وقررت إخلاء سبيل 22 متهم، منهم اتنين تم اخلاء سبيلهم النهاردة.. عدد كبير منهم سواء اللي تم اخلاء سبيلهم أو اللي مازالوا محبوسين، بيعانوا من اصابات مختلفة معظمها خطيرة وحالتهم الصحية اتدهورت او بتتدهور نتيجة للاهمال في علاجهم او للامتناع عن علاجهم من حيث الأصل ولساعات طويلة، حسب محامين الدفاع عنهم.. في فقرتنا الأخيرة، هيكون معانا أمثلة مازالت حية والحمد لله لحد دلوقتي، لكن حالتهم الصحية مش مستقرة وما تطمنش، دة غير إنهم متكلبشين في سراير المستشفى، وحاجة يعني على ما يبدو مالهاش أي علاقة لا بالآدمية ولا بالإنسانية لا من قريب ولا من بعيد.. (دة حتى أسرى الحروب من حقهم معاملة آدمية مكفولة ومتصانة باتفاقيات دولية مخالفتها تعني جرايم حرب)!!!!!!! مع العلم إن الشهيد محمد محيي، واحد من الشهداء ال18، مات في الحجز نتيجة لاصابته اثناء القبض عليه وعدم تلقيه العلاج
الجدل حول مسافة إطلاق النار على شهداء مجلس الوزراء
من ناحية تانية، هيئة التحقيق في القضية استلمت النهاردة من مصلحة الطب الشرعي 12 تقرير خاص بتشريح 12 جثة من جثث الشهداء ال18.... بس فيه حاجة غريبة بقة.. لما بدأ الاعلان عن تقارير مصلحة الطب الشرعي في اليومين اللي فاتوا بعد تشريح جثث الشهداء، خاصة اللي سبب وفاتهم الإصابة بطلق ناري، كان المعلن إن التقارير كشفت إنه تم اطلاق النار من مسافات قريبة ما بين ربع ونص متر، ودة اعطى ايحاء بإن من أطلق الرصاص كان على الأقل موجود بين المتظاهرين.. لكن النهاردة، وعلى صفحات ومواقع معظم الجرايد، الشروق والدستور الأصلي والتحرير، فيه جدل حوالين النقطة ديه بالذات: اللي هي مسافة اطلاق النار وكتير من الأطباء الشرعيين اللي شاركوا في تشريح جثث الشهداء بياكدوا ان مسافة اطلاق النار عليهم جميعاً تجاوزت النص متر.. الحقيقة فين بالظبط وقرب أو بعد مسافة الاطلاق تفرق في إيه، دة اللي هنحاول نعرفه ونفهمه
بلدنا: شهادات أطباء التحرير وما تعرضوا له من اعتداءات
في أحداث مجلس الوزرا الدامية، حتى المستشفيات الميدانية باللي فيها من مصابين وأطباء لم يسلموا من الاعتداءات.. تعالوا نوصل لحد دار الحكمة، نسمع شهادات الأطباء
تنازل جمال تاج الدين عن اتهامه للاشتراكيين الثوريين
قام جمال تاج الدين، أحد المحامين المنتمين لجماعة «الإخوان المسلمين»، وحسن القباني، رئيس قسم الأخبار بموقع الجماعة الرسمي، «إخوان أون لاين»، الأحد، بسحب البلاغ المقدم منهما ضد 3 أعضاء من منظمة «الاشتراكيين الثوريين»، بعد موجة الانتقادات الشديدة التي وجهت لهما من داخل وخارج الجماعة، خاصة من شبابها.
بلدنا: تطورات بلاغ فبركة التليفزيون المصري
تطورات البلاغ المقدم من أ. طارق العوضي ضد وزير الداخلية وضد وزير الإعلام وضد رئيس القناة الأولى لإذاعة برنامج صباح الخير يا مصر وبرامج أخرى فى التليفزيون المصري للفيديو المصور لأعترافات بعض الشباب فى أحداث مجلس الوزراء.
بلدنا: دمج أطفال الشوارع في نظام التأمين الشامل
أما عن أطفال الشوارع وبعد اللي صابهم واللي نابهم في الأحداث الأخيرة، وزير الصحة اعلن النهاردة في مؤتمر صحفي إنه هيتم دمجهم ضمن نظام التأمين الصحى الاجتماعى الشامل.
تعيين المستشار محمد عطية وزير شئون الشعب والشورى
محاولات الخروج الآمن من عنق الزجاجة، على قدم وساق وكلمة السر ومربط الفرس فيها على اختلاف المقترحات هو "تقصير المرحلة الانتقالية وتسليم السلطة للمدنيين باسرع ما يمكن".. وفي فقرتنا اللي جاية هنناقش عدد من المقترحات والمبادرات المختلفة ومن ضمنها اقتراح المجلس الاستشاري باجراء انتخابات مجلس الشورى على مرحلتين بدل تلات مراحل، بحيث تنتهي في 22 فبراير بدل 12 مارس ويكون تاريخ انعقاد الجلسة المشتركة للمجلسين في أواخر فبراير بدل 24 مارس.. في حين ان فيه مقترحات تانية بالغاء مجلس الشورى من بابه.. ومقترحات بانتخابات رئاسية مبكرة قبل انتخابات مجلس الشورى وقبل حتى كتابة الدستور.. وكلها حتى الان مقترحات مرفوضة من المجلس الاستشاري اللي بيرفض من حيث المبدأ تقديم أو تأخير أي مرحلة على التانية من المراحل المنصوص عليها في الاعلان الدستوري.. وعلى أي حال ولحد دلوقتي هي كلها مجرد اقتراحات مطروحة للمناقشة، هنناقشها احنا في بلدنا بالمصري بعد الفاصل.
من ناحية تانية، المجلس الأعلى للقوات المسلحة أصدر قرار بتعيين المستشار محمد عطية وزير الدولة للتنمية المحلية، في منصب وزيرشئون مجلسى الشعب والشورى
بلدنا: تقرير شارك وراقب عن المرحلة الثانية للانتخابات
النهاردة حركة شارك وراقب عملت مرتمر صحفى اعلنت فيه عن تقريرها للمرحلة الثانية من الانتخابات البرلمانية وما شابها من تجاوزات واخطاء تفاصيل اكتر عن ابرز ما رصدته شارك وراقب فى التقرير اللى جاي
بلدنا: حملة أمنية موسعة لضبط شوارع الجيزة
مدير امن الجيزة قاد النهاردة حملة موسعة من اجل اعادة ضبط الامن وفى شوارع القاهرة والجيزة تفاصيل اكتر عن اللى حصل النهاردة فى التقرير اللى جاى
بلدنا: ذكرى إطلاق الإعلان العالمي لحقوق الإنسان
وقبل الفاصل خلونا نشوف الاحتفالية بذكرى اطلاق الاعلان العالمي لحقوق الانسان اللي بيجي في عز الايام المرة اللي بتمر بيها مصر
بلدنا بالمصري: مبادرات تقصير المرحلة الانتقالية
صدق اللي قال إن الشئ اللي يزيد عن حده يتقلب لضده.. ولنا في المرحلة الانتقالية خير دليل.. بعد ما كانت جزء من الحلم، ست شهور في ست شهور اتقلبت لكابوس وآن الأوان نصحى منه، ويا حبذا لو نصحى منه قبل ما يعدي علينا ست شهور تانيين ما يهلم بيهم الا ربنا.. وفيه بدل الصرفة كذا صرفة.
تعددت المقترحات والهدف واحد "تقصير المرحلة الانتقالية وتسليم إدارة البلاد لسلطة تشريعية وتنفيذية منتخبة في أسرع وقت" على اعتبار إنه الحل الأمثل للخروج من ورطة المرحلة الانتقالية اللي أدارها المجلس العسكري منفرداً لمدة 11 شهر، والنتيجة لم ينجح أحد في إنه ياخد بإيد البلد ديه ولا خطوة واحدة للقدام بالعكس، بلدنا للخلف در بعزم ما اداها ربنا في عكس الاتجاه اللي رسموه الشهدا بدم قلبهم لدرجة إن دمهم بقى على وشك يروح هدر لاقدر الله.. وبالتالي مافيش قدامنا غير "خروج آمن وبأسرع وقت وبكفايانا هذا القدر من الخساير، وخاصة الخساير في الأرواح اللي ما تتعوضش على عكس ما البعض بيدعي"!!! الطرق المختلفة للخروج من الورطة هنناقشها مع ضيوفنا النهاردة:
شريف زهران: الأمين المساعد للمجلس الاستشارى
الدكتور/ عمرو الشلقامي: رئيس نادي أعضاء هيئة تدريس جامعة عين شمس
الكاتب الصحفي: عبد الله السناوي
بلدنا بالمصري: كفارة لكل المعتقلين في أحداث السفارة
كفارة لكل اللي المعتقلين في أحداث السفارة الاسرائيلية بعد قرار اخلاء سبيلهم ولو ان دة لسة مش آخر المطاف
توفيق سرحان: واحد من المتهمين المخلى سبيلهم
محمد عبد العزيز: المحامى
بلدنا: عذاب مصابين ومتهمين ومعتقلين أحداث مجلس الوزراء
عينة بينة على اللي اتعرض له واللي بيتعرض له المصابين المعتقلين والمتهمين على ذمة قضية أحداث مجلس الوزرا الأخيرة، وبئس المصير .. ديه كانت شهادة هند بدوي الشهيرة ب"هند قلب الأسد" المعيدة في كلية التربية جامعة بنها وواحدة من البلطجية المتهمين في أحداث مجلس الوزرا.. وغيرها من نفس صنف البلطجية كتير اللي يستاهلوا كل اللي يجرى لهم ومالهمش دية.. هم ايه اللي نزلهم من بيوتهم ووداهم هناك أصلاً.. هم المحقوقين وذنبهم على جنبهم.. من نفس الصنف والعينة: المهندس عبد الرؤوف خطاب، عضو اللجنة المركزية في حزب التجمع، المحبوس حالياً على ذمة نفس القضية والمضرب عن الطعام احتجاجاً على ظروف اعتقاله. الباشمهندس البلطجي بالصدفة البحتة زوج الأستاذة/ نجوي عباس: القيادية في حزب التحالف الشعبي الاشتراكي.
- خالد علي: مدير المركز المصري للحقوق الاقتصادية والاجتماعية
- نجوى عباس
ليست هناك تعليقات:
إرسال تعليق