برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الثلاثاء 20 ديسمبر 2011 يوتيوب كاملة
بلدنا: الثوار هم من أطفأ الحريق يا ل. عمارة
بنمسي عليكوا وحلقة جديدة من بلدنا بالمصري او بالسوري أو بالليبي، اللي تشوفوه بقة وانتوا ضميركم.. هنبدأها بسؤال ورد غطاه.. أما السؤال فكان على لسان اللواء عادل عمارة امبارح في المؤتمر الصحفي، وكان موجه للصحفيين الحاضرين دة أكيد، لكن كمان كان موجه للرأي العام كله.. السؤال كان عن قوات الجيش المسؤولة عن حماية الممتلكات العامة، تعمل إيه لما تتعرض الممتلكات ديه لمحاولات حرق أو تخريب أو تدمير.. فالسؤال كان بالحرف الواحد: "هل كان علينا ترك تدمير مؤسسات الدولة وحرقها؟ فالقانون يسمح لهذه القوات الدفاع عن نفسها وهم يتم ضربهم بالمولوتوف، فى محاولة لحرق المنشآت العامة، فهل نتركها ونقف متفرجين؟"!!! دة السؤال.. أما الجواب فبالصوت والصورة.
بلدنا: ٦ شهداء برصاص حي في اقتحام الميدان #Dec20
نبدأ بقة آخر أخبار بلدنا، وهنبدأها كالعادة من بدري، وزي كل ليلة أو بمعنى اصح على وش الفجر بعد ما البرامج تشطب ووسائل الاعلام اللي زي حالاتنا كدة تروح في سابع نومة، تقتحم قوات الشرطة والجيش ميدان التحرير، وصوت طلق النار يبقى جايب آخر الدنيا، والمستشفى الميداني ما يسلمش من الاعتداء عليه لا هو ولا الدكاترة ولا الأدوية ولا المصابين. البيان الرسمي لوزارة الصحة _مادام الشهدا والمصابين بقوا حيالله أرقام_ 32 مصاب في حداث الفجر.. أما أطباء المستشفى الميداني فبيتكلموا عن 148 مصاب و6 شهداء بالرصاص الحي في الراس والبطن.
وزارة الصحة: ارتفاع عدد الشهداء إلى ١٤ #Dec20
بلدنا: تونس بتقولكوا لو معندكوش رجالة نبعتلكوا
أحد الشباب المتضاهرين فى ميدان التحرير على ماحد من انتهاك للفتيات أثناء فض إعتصام مجلس الوزراء. أن الشباب التونسي يرسل برسالة للشباب المصري وبيقول لو مفيش عندكم رجالة تحمى بنات مصر إحنا نبعتلكم.
بلدنا: عاش نضال الطالب المصري .. اعتصام طلاب عين شمس
بلدنا: القبض على سائق الإعلامي عمرو الليثي
بلدنا: إضراب ضابط لحين محاكمة أحمد مرتضى منصور
بلدنا: جولة وزير الداخلية في الشيخ ريحان
أما المصدر الأمني اللي عمره ما بيقول اسمه، أكد إصابة 120 من قوات الأمن الموجودة ورا الجدار العازل في شارع الشيخ ريحان، منهم 6 ظباط، بعد قيام عدد من المتظاهرين بإزالة جزء من الجدار العازل والقاء الحجارة وزجاجات المولوتوف على الحنود والظباط.. وأكد نفس المصدر بالحرف الواحد على " التزام قوات الشرطة المتواجدة حتى الآن بتنفيذ التوجيهات التى صدرت لها بالالتزام بأقصى درجات ضبط النفس ، وعدم استخدام الغاز المسيل للدموع أو أي أنواع أخرى من الأسلحة رغم الاعتداءات المستمرة عليها من قبل المتجمعين"!!! وحسب وكالة أنباء الشرق الأوسط، الوكالة الرسمية، نفس التعليمات ب"التحلي بأقصى درجات ضبط النفس، واتباع الضوابط القانونية في التعامل مع المتظاهرين، صدرت لقوات الأمن المتواجدة في شارع الشيخ ريحان من وزير الداخلية شخصياً أثناء جولته في شارع الشيخ ريحان، اللي أكد فيها على أهمية المرحلة التى تشهدها مصر حاليا، وضرورة الحفاظ على الامن والاستقرار.
بلدنا: التحقيقات مع سيدة الحواوشي
أما عن الست بتاعة الحواوشي اللي جاب لمعتصمين مجلس الوزرا، حالة من التسمم الجماعي، قبل فض اعتصامهم بالقوة بيادوب كام يوم، فطلعت ست عادية خالص اسمها نيللي عصمت صبري محمد، مقيمة في الجيزة.. دة اللي صرح بيه وزير الداخلية وأكد إنه تم القبض عليها من خلال خط سيرها، ورجع وقال انه تم استدعاءها فأكدت أنها اشترت لحمة عادية وطبختها وراحت وزعتها على المعتصمين، وأكدت إنها ما كانت تعلم حاجة أبداً عن الوجبات فاسدة.. وإن ديه مش أول مرة توزع فيها وجبات على المعتصمين في الميدان وأكدت إنها ما كانتش تقصد اي قصد جنائي.
بلدنا: العسكر كاذبون .. مؤتمرات شباب الثورة
من امبارح، من ساعة ما انتهى المؤتمر الصحفي للمجلس العسكري، ويمكن حتى من ساعة ما ابتدى، وكتير من الشباب سواء مستقلين أو أعضاء في أحزاب أو ائتلافات أو اتحادات، بيلفوا حوالين نفسهم ومش عارفين يعملوا إيه لحد ما قرروا ينظموا هم كمان مؤتمرات صحفية ويعرضوا هم كمان الصور واللقطات اللي عندهم للرد على المؤتمر العسكري.. ومنهم اللي رفعو شعار "العسكر كاذبون"!!!
بلدنا بالمصري: لو هتموتوا ببلاش .. لأ عيشوا
طب وبعدين؟!!! هنفضل كدة لحد امتى؟!!! وإيه آخرة الوقفة اللي واقفها الجيش في وش الشعب ولا الشعب في وش الجيش مش فارقة، المهم اننا وقفنا قدام بعض واللي كان كان وربنا يلطف بينا، وكل واحد واقف للتاني على الصورة واللقطة والأشطر هو اللي يمسك على التاني حاجة ويثبت للرأي العام إنه هو المجني عليه والمفعول به، وكإن الأزمة على الحدود بين دولتين وكإن بقية المصريين دول الرأي العام العالمي ولا المجتمع الدولي، ولا كإننا كلنا في مركب واحدة يا تغرق بينا في بير مالوش قرار يا توصل بينا لبر الأمان.. ومش هينفع نرمي حد في البحر ونخلص منه.. بس ينفع نغير الدفة وينفع نغير الملاح.!!! لكن كل دة كوم ودم القلب اللي بيدفع ببلاش دة كوم تاني خالص.. فيه حاجة تقهر وتوجع القلب والضمير اكتر من شباب زي الورد بيدفعوا عمرهم ببلاش.. انتوا بتموتوا ليه دلوقتي؟!!! لسة المشوار طويل والبلد ديه محتاجة لكم عايشين وحسكم في الدنيا؟!!! بتموتوا ليه.. عشان إيه وعشان مين؟!! للأسف دمكم ماعادش بيفلق الحجر.. ماعادش بيهز جبال.. ماعادش بيهدي العاصي!!! بتموتوا ليه؟!!! الود ودي اقولكم: "روحوا وخلوا بالكم من نفسكم احنا لسة عايزين نشيلكم لوقت عوزة".. لكن ماقدرش، انتو في النهاية أحرار.. بس أمانة عليكم: "عيشوا".. الهدف هو إننا نغير الدفة ونغير الملاح.. لو موتكم هيحقق الحلم، روحوا فدا البلد ديه وأهلها وناسها وجميلكم في رقبتهم ليوم الدين، لكن لو هتموتوا ببلاش: " لأ عيشوا" ومش هنغلب إنشاءالله، وهنلاقي ألف طريقة وطريقة نحقق بيها الحلم من غير ما توجعوا القلوب اللي لسة بتتوجع وتروحوا منها هدر!!!
بلدنا بالمصري: احنا آسفين يا ست البنات
"احنا آسفين يا ست البنات"!!! دة اعتذار واجب لكل بنت ولكل ست مصرية انداس لها على طرف أو اتمدت عليها إيد أو رجل.. الاعتذار دة كان المفروض يكون من اللي بهدلها ومرمطها وداس على شرفها_ودة اضعف الايمان قبل الحساب والعقاب_ لكن سبحان الله الاعتذار كان شعبي ودة أجمل ما فيه.. وانا ما اقصدش بس المسيرة، فيه وسايل كتيرة للاعتذار، من ضمنها الصفحة ديه اللي اتاسست النهاردة على فيس بوك.
بلدنا: مسيرة الستات .. بنات مصر خط أحمر
صحيح إن معظم اللي حاصل اليومين دول يوجع القلب ويجيب الغم.. ومن اكتر الحاجات اللي كانت منغصة على الواحد حياته، إن إزاي العرض والشرف يتهانوا وولاد البلد _المحافظين بطبعهم والمتدينين بطبعهم_ ساكتين والدم ما غليش في عروقهم؟!!! بس اللي حصل النهاردة بصم بالعشرة وللمرة المليون إن "الست المصرية" جدعة وبنت بلد وساعات بميت راجل.
بلدنا: الرسالة رقم 91 للمجلس الأعلى للقوات المسلحة
بلدنا - بالفيديو: طفل شوارع يرد على الجنزوري
حسن .. طفل شوارع في ميدان التحرير يرد على رئيس الوزراء المكلف كمال الجنزوري
بلدنا بالمصري: جمعة رد الشرف ٢٣ ديسمبر
وعايزة اقولكم إن الجمعة اللي جاية، جمعة "رد الشرف" في ميدان التحرير وفي كل ميادين مصر.. المفروض انها جمعة مش محتاجة حد يدعي حد ليها وما كانش لازم تتاخر ليوم الجمعة.. لكن ماشي الحال، وكل شئ بأوان، وفيه 15 حركة وحزب سياسي داعيين الشعب المصرى، لرد الشرف.
بلدنا: المستقيلون من الاستشاري يرفضون لقاء عنان
المستقيلون من المجلس الاستشاري يرفضون حضور اجتماع المجلس الاستشاري أو ما تبقى من أعضائه مع الفريق سامي عنان ويطالبون بتسليم السلطة فوراً
بلدنا: دهس المتظاهرين وكشوف العذرية فين بالضبط
بيانين متناقضين من اللواء عادل المرسي رئيس هيئة القضاء العسكري
بلدنا: اجتماع المجلس العسكري بالمجلس الاستشاري #Dec20
نتائج اجتماع ما تبقى من أعضاء المجلس الاستشاري مع أعضاء المجلس العسكري في حضور الفريق سامي عنان وبرئاسة المشير طنطاوي في مقر وزارة الدفاع والذي دام خمس ساعات
بلدنا - الطب الشرعي: ١٣ رصاصة في الرأس والصدر
رئيس مصلحة الطب الشرعي يؤكد فحص المصلحة ١٤ حالة وفاة في أحداث مجلس الوزراء ١٣ منهم وفاة بطلق ناري في الرأس والصدر والحالة الأخرى إصابة رضية في الرأس .. وأنه لم يستقر سوى مقذوف واحد فقط في جسد إحدى الحالات وأنه مقذوف ٩ مللي
بلدنا: أطفال ميدان التحرير .. جناة أم ثوار
من أول اعتصام يناير وأطفال الشوارع جزء من الميدان، غيرش بس إننا ماخدناش بالنا منهم إلا لما شفناهم بيضربوا وبيضربوا وبينصابوا قبل ما يتحولوا بقدرة قادر على شاشات التلفزيون وفي أحاديث كبارات البلد لأس الفساد ووصمة عار في جبين الثورة والثوار وبقة السؤال اللي طارح نفسه: "هي العيال ديه إيه اللي جايبها هنا"؟! "هي العيال ديه مع مين وعلى مين"؟!! مع إن السؤال مش لازم أبداً يكون: "العيال ديه مع مين ومين اللي وراها؟! السؤال لازم يكون: "العيال ديه مين اللي معاهم ومين اللي في ضهرهم"؟!!! إيه اللي عمل فيهم كدة؟! وقبل ما نستعر منهم لازم نفتكر إنهم لو وصمة عار، فهم وصمة عار في جبيننا كمجتمع.. لكن ماشي الحال مادام احنا في مجتمع مش قادر لسة غير إنه يلوم الضحية، ويشيلها الذنب كله من غير ما يكلف خاطره ويفكر ذنبها هي في رقبة مين؟!!! فحاضر، خلينا نبتدي بالسؤال الأول: "العيال ديه مين وإيه اللي جايبها هنا"؟!!!
نازلي حسين: الاخصائية النفسية والناشطة وصاحبة فكرة "مدرسة التحرير" لأطفال الشوارع اللي كانت في اعتصامات التحرير في الثورة
د.محمد وديد: استاذ الطب النفسي
بلدنا: استخدام ماسبيرو مسجلين لتشويه الثورة
أ. طارق العوضي المحامي وتفاصيل خطيرة عن فبركة التليفزيون المصري بتصويرهم على أنهم من المقبوض عليهم بميدان التحرير لتشويه الثوار .. على الأقل التلات ولاد دول ما لهمش أي بالميدان لا كثوار ولا ك"بلطجية"، لكن دة ما يمنعش إن للميدان أطفاله ومعظمهم من الموصومين بوصمة "أطفال الشوارع"، فيفضل السؤال: هو إيه علاقة "العيال" ديه بالميدان وبالمعمعة اللي احنا فيها ديه؟!
ليست هناك تعليقات:
إرسال تعليق