بالفتشر: عقبال جهاز طرد حيتان الفلول
حلقة النهاردة من بلدنا بالمصري هنبدأها بكلمتين بالمفتشر عن الجهاز اللي ابتكرته القوات المسلحة لمواجهة اسماك القرش في البحر الأحمر بالتعاون مع وزارة السياحة.. ولحد هنا ودة انجاز عظيم وعلى العين والراس لحد بس ما نتأكد إن الجهاز دة بيطفش بس سمك القرش أو بيمنعه من إنه يهوب ناحيتنا من غير ما يجيب أجله أو يقطع نسله ويهدده بالانقراض.. والحقيقة إن الخبر دة بشرة خير والله.. يعني إذا القوات المسلحة ابتكرت جهاز لمواجهة سمك القرش في البحر الأحمر يبقى حتماً ولابد، المجلس العسكري يقدر يلاقي صرفة لمواجهة حيتان الفلول وآيادي الاخطبوط الخفية اللي واخدة مننا راقات ومش راجعة إلا لما تغرقنا في بحر الظلمات وبئس المصير!!!
بلدنا: قانون إفساد الحياة السياسية في مراحله الأخيرة
على أي حال، شكلها كدة هانت، خاصة بعد ما أعلن النهاردة الدكتور علي السلمي، نائب رئيس مجلس الوزرا للتنمية السياسية والتحول الديمقراطي إن قانون إفساد الحياة السياسية أصبح في مراحله الأخيرة وإنه هييتم إصداره خلال الأيام اللي جاية عرضه على مجلس الوزرا في صيغته النهائية بعد التعديلات عله قبل إحالته الى المجلس الاعلى للقوات المسلحة.. القانون اللي كان اسمه ''قانون الغدر'' هيطبق، حسب تصريحات الدكتور علي السلمي على جميع القيادات والاحزاب السياسية والموظفين اللي يثبت تورطهم في إفساد الحياة السياسية وفقا للإجراءات القانونية من حيث تحقيقات النيابة والاحالة الى محكمة الجنايات.
بلدنا: دعوة لمناقشة المبادئ الأساسية للدستورغداً
من ناحية تانية، فيه دعوة موجهة من الدكتور علي السلمي لكل الأحزاب والقوى السياسية للاجتماع بكرة لمناقشة المبادئ الأساسية للدستور ومعايير اختيار أعضاء الجمعية التأسيسية مع التأكيد على إن المبادئ ديه لا هي مبادئ حاكمة ولا هي مبادئ فوق دستورية وإنما مبادئ أساسية ما بتمثلش أي نوع من أنواع الوصاية.. لحد دلوقتي، من بين كل الأحزاب والقوى الوطنية، حزب الحرية والعدالة وحزب النور السلفي والجماعة الإسلامية رفضوا حضور الاجتماع أو مناقشة الموضوع من حيث الأصل على اعتبار إنه "أمر مريب بيمثل افتئات على الإرادة الشعبية واغتصاب لحق الشعب المصري في اختيار من يقومون بوضع الدستور" على حد تعبيرهم.
بلدنا بالمصري: مؤتمر صحفي لإعلان تفعيل وثيقة الأزهر
لكن من ناحية تانية، الأزهر الشريف أعلن النهاردة في مؤتمر صحفي عن تفعيل وثيقة الأزهر، وأصدر بيان لدعم إرادة الشعوب العربية بعيداً عن الفتن الطائفية والعرقية ووفقاً للمبادئ الدستورية ومبادئ الشريعة الإسلامية.
بلدنا - ل. الفنجري: خطة محكمة لتأمين الانتخابات
صحيح إن كل مدى ما بتزيد المؤشرات اللي بتهدد العملية الانتخابية من أول الحالة الأمنية لحد الجدل اللي هيثار مرة تانية على قصة المبادئ الأساسية للدستور مروراً طبعاً باحتمال اعتذار القضاة عن الإشراف على الانتخابات_والنقطة الأخيرة ديه تحديداً هنناقشها في فقرتنا اللي جاية بعد أخبار بلدنا واحنا بنحاول نجاوب على سؤال: أزمة القضاة والمحامين وواخدانا معاها ورايحة على فين؟!!! لكن مع كل المؤشرات ديه، المجلس العسكري وعلى لسان اللوا محسن الفنجري أكد النهاردة إن الانتخابات هتتم في معادها وإن القوات المسلحة عندها خطة محكمة لتأمينها بالتعاون مع وزارة الداخلية.. تصريحات اللوا محسن الفنجري صرح بيها وهو بيرفع علم مصر على أعلى ساري في العالم.
بلدنا: تشديد العقوبات على المخالفات الانتخابية
من ناحية تانية، المجلس الاعلى للقوات المسلحة اصدر النهاردة مرسوم بقانون رقم 124 لسنة 2011، بتعديل احكام القانون رقم 73 لسنة 1956 بشان تنظيم مباشرة الحقوق السياسية وتشديد العقوبات على عدد من المخالفات والجرائم الانتخابية.
بلدنا: ٦ أشهر وإيقاف التنفيذ للمتهمين في أحداث السفارة
المحكمة العسكرية العليا حكمت النهاردة بالحبس لمدة 6 شهور مع إيقاف التنفيذ على 73 متهم وبراءة اتنين، في قضية الاعتداء على عناصر الشرطة العسكرية تاني يوم أحداث السفارة السفارة الاسرائيلية والسعودية ومديرية أمن الجيزة.. ولما سألنا مكتب المدعي العام العسكري عن صدور الأحكام ديه من القضاء العسكري رغم قرار رئيس المجلس الأعلى للقوات المسلحة بوقف المحاكمات العسكرية للمدنيين، كان الرد إن القضية ديه خاصة بالاحداث اللي حصلت يوم السبت مش يوم الجمعة، وإنها مش خاصة باقتحام السفارة لكن بالاعتداء على افراد الشرطة العسكرية وبالتالي فالولاية القضائية فيها للقضاء العسكري.. وبقية الرد كان فيديو لأجواء المحكمة بعد النطق بالحكم.
بلدنا بالمصري: تضامن واسع مع الناشط علاء عبدالفتاح
أما بالنسبة لقرار النيابة العسكرية بحبس الناشط والمدون علاء عبد الفتاح 15 يوم على ذمة التحقيقات في قضية ماسبيرو، فصدر النهاردة بيان من عدد من الحركات والأحزاب السياسية أعلنت فيه عن تضامنها الكامل معاه.
بلدنا بالمصري: قضية مقتل اللواء البطران ضد مجهول
سبحان الله مش عارفة إذا اللي بيحصل دة من سخرية القدر مننا ولا إيه.. يعني في الوقت اللي المحاكمات العسكرية على أشدها لنشطا أو حتى لمسجلين خطر هم في النهاية مدنيين ومحاكمتهم واجبة لكن قدام القضاء المدني، مش بس رموز نظام السابق وسفاحينه بيتحاكموا قدام قاضيهم الطبيعي ولسة كمان فيه منهم أحرار طلقاء، لكن في نفس الوقت دة كمان، قضية قتل الشهيد اللوا محمد البطران، على ما يبدو إنها هتقيد ضد مجهول.
بلدنا بالمصري: أطباء التحرير وتشريح جثمان عصام عطا
جمعية اطباء التحرير، أعلنت النهاردة في مؤتمر صحفى إن تقرير الجمعية عن تشريح جثة عصام عطا ما نفاش شبهة تعذيبه ولا أكدها وإن التقرير دة مجرد شهادة على عملية التشريح مش اكتر من كدة ولا أقل.
بلدنا بالمصري: انضمام فلسطين لمنظمة يونسكو
خلونا نفرح بانضمام فلسطين لمنظمة اليونسكو بإرادة الأغلبية اللي وقفت ضد إرادة واشنطن.
بلدنا بالمصري: اجتماع د. شرف وشيوخ وشباب المحامين
زي ما كنا بنقول في البداية إن أزمة المحامين والقضاة تعتبر من أهم المخاطر اللي بتهدد الانتخابات، حتى إن الدكتور عصام شرف رئيس الوزرا قالها امبارح واضحة وصريحة أثناء اجتماعه مع رئيس المجلس الأعلى للقضاء ورئيس نادي القضاة: "مش عايزين حاجة تعكر الانتخابات المرهون بيها مستقبل مصر".. وزي ما اجتمع رئيس الوزرا امبارح بشيوخ القضاة، اجتمع النهاردة بعدد من شيوخ وشباب المحامين وعدهم فيه بإن لا قانون السلطة القضائية ولا قانون المحاماة هيصدروا من غير ما يتعرضوا على البرلمان.. وانتهى الاجتماع ببيان مقتضب ما قالش اكتر من " إن المشاورات مازالت مستمرة لاحتواء الأزمة" لكن فيه تسريبات غير مؤكدة لحد دلوقتي عن احتمال إنه يكون فيه لقاء توافقي بكرة أو بعده بين القضاة والمحامين... على أي حال كل دة هنناقشه بتفصيل أكتر في فقرتنا اللي جاية.. بس دلوقتي خلونا نوصل لحد نادي المحامين النهري نعرف تفاصيل اكتر عن الاجتماع مع رئيس الوزرا.
بلدنا بالمصري: أزمة القضاة والمحامين واخدانا على فين
لما القضاة والمحامين يختلفوا وخلافهم يتحول لأزمة والأزمة تتفاقم وتاخد أبعاد عواقبها ما تجيش سليمة، يبقى الكل مغلوب والعدالة هي الخسرانة.. وبالتالي ما فيش قدامنا اختيارات كتير ويمكن ما فيش قدامنا غير هو اختيار واحد وهي إن الأزمة تنتهي وتنتهي على خير.. الأزمة ديه وخدانا معاها في الرجلين ورايحة على فين وآخرتها إيه؟!!! دة اللي هنحاول نجاوب عليه مع ضيوفنا النهاردة:
- المستشار/ عاصم عبد الجبار: نائب رئيس محكمة النقض
- الدكتور/ محمود السقا: أستاذ القانون بجامعة القاهرة وأحد شيوخ المحامين
- الاستاذ/ عماد الدين حسين: مدير تحرير جريدة الشروق
بلدنا: برنامج حزب الكرامة في الانتخابات القادمة
حزب الكرامة بشعاره "كرامة الوطن وكرامة المواطن" بيعرف نفسه على إنه "ليس مجرد حزب يضاف، بل حركة تجمَع، تصون ولا تبدد، تعتز بحضارة الأمة ووحدة النسيج الوطنى، وتدرك تواصل الأجيال والمدارس في ملاحم الكفاح والنهضة.. ننطلق من عروبة مصر، ونستند إلى مطامح الأكثرية الساحقة من الشعب.. لا نتوه في دروب وفروع تلهى عن الأهداف الكبرى الجامعة، ولا ندخل في سجال عقيم يفتت تماسك المجتمعات ويذهب بريح الأوطان.. نتقدم بخطى واثقة عارفة لكسر أطواق التخلف والخروج من سجن الهزائم.. نؤمن أنه لا نهضة بدون التغيير، ونثق بقدرة الأمة حين تستيقظ عقولها وتنطلق طاقاتها وتتراص صفوفها.
المهندس/ محمد سامي رئيس حزب الكرامة
الأستاذ/ أمين اسكندر
الأستاذ/ مجدي زعبل
ليست هناك تعليقات:
إرسال تعليق