تقديم ريم ماجد
على قناة OTV
يوتيوب كاملة
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الاثنين 14 نوفمبر 2011 يوتيوب كاملة
بالمفتشر: التطور التكنولوجي .. نهضة مصر في الكتاتيب
يسعد مساكم وحلقة جديدة من بلدنا بالمصري.. هنبدأها بسؤال بالمفتشر أما رد غطاه فأنا راضية فيه ذمة كل مواطن من أهالي المحروسة خطى عتبة القرن ال21 خطوة عزيزة وبألف سلامة.. هو صحيح إن "من فات قديمه تاه"، بس ينفع يتوه لدرجة إنه يفضل يرجع بالذاكرة ويحيب ورا لما يوصل لحد الكتاب؟!!! الحكاية وما فيها منشورة النهاردة في المصري اليوم وعنوانها بالبنط العريض: "مرشحة منتقبة تطالب بفتح الكتاتيب"!!! وبغض النظر عن الاتفاق أو الاختلاف على كونها مرشحة ومنتقبة في نفس ذات الوقت مش هي ديه الحدوتة.. الحدوتة في الكتاتيب وواحب برده نستفهم.. الست المرشحة الفاضلة الظاهر كدة والله أعلم إنها واثقة ومتأكدة إن "الكتاب سره باتع" بأمارة ما وعدت الأهالي ووعد الحر دين عليه إنه لو ربنا كرمها ونجحت في الانتخابات، مش هتكدب خبر وعنها وهتقدم مشروع لفتح "الكتاتيب" من تاني إكمنها فيها "نهضة مصر" بعون الله زي ما قالت كدة بعضمة لسانها في المؤتمر الجماهيري للحزب اللي هي منه؟!!! لأ والأكادة إنه في نفس ذات المؤتمر رئيس الحزب بذات نفسه أدلى بدلوه في تعريفه لمفهوم "العولمة" على إنه " التطور التكنولوجي الذي تقوم به الدول الأجنبية"!!! وبغض النظر عن كينونة العلاقة بين مفهوم العولمة وبين " التطور التكنولوجي الذي تقوم به الدول الأجنبية"، إنما على الأقل دة معناه إن الحزب عنده خبر بإن فيه عالم على وجه البسيطة بيقوموا بالمدعو "التطور التكنولوجي"!!! فالسؤال بقة بالمفتشر كدة: "يعني ينفع بعد العالم ما شاب وكبر اسم الله عليه وبقى لهلوبة في التطور التكنولوجي، نيجي احنا على آخر الزمن ولسة هنروح الكتاب؟!!! اللهم إني لا أسألك رد القضاء ولكني اسألك اللطف فيه!!!
بلدنا بالمصري: إلغاء حكم منع فلول الوطني من الترشح
أما آخر أخبار بلدنا، فهنبدأها بحكم المحكمة الإدارية العليا اللي استانيناه بفارغ الصبر، فحكمت المحكمة النهاردة بإلغاء حكم القضاء الإدارى في المنصورة بمنع أعضاء الحزب الوطني المنحل من ممارسة حقوقهم السياسية على اساس أن السلطة التشريعية مختصة دون غيرها بحرمان من يثبت افساده للحياة السياسية،سواء كان منتميا للحزب الوطنى المنحل أو لغيره من الأحزاب ،ولا اختصاص للقضاء فى هذا الشأن.
بلدنا: لسة لينا عين نتباهى بنجاح الثورة وباللي حماها
أنا والله ما أنا عارفة اللي احنا فيه دة من سخرية القدر ولا من الهم اللي يبكي؟!!! صحيح مصر ديه أم العجايب: تعمل ثورة ينضرب بيها المثل في الدنيا كلها لإسقاط نظام بحاله وتدفع فيها تمن غالي بالروح والدم وبعد تسع شهور: يبقى فلول نفس النظام اللي سقط واخدين حقوقهم تالت وحقوق مصابين الثورة رايحة هدر وهم نايمين على الرصيف في الشارع معتصمين بقى لهم أربعة إيام يمكن يلاقولهم صاحب.. ومع ذلك لسة لينا عين نتباهى ب"نجاح الثورة وباللي حماها"!!!
السفراء والقناصلة يشرفون على الانتخابات بالخارج
ومع ذلك، البلد اللي عملت الثورة ونسيت اللي عملوها واقفة على رجل قال بتستعد لانتخابات برلمان الثورة!!! وعجبي.. اللجنة العليا للانتخابات، أعلنت النهاردة عدد الدواير الانتخابية فى التسع محافظات اللي هتبدأ فيها المرحلة الأولى من انتخابات مجلس الشعب وهم: القاهرة واسكندرية وبورسعيد ودمياط وكفر الشيخ والفيوم وأسيوط والأقصر والبحر الأحمر.. عدد الدواير على مستوى المحافظات التسعة: 16 دائرة للقوايم، و28 للفردى.. عدد المراكز الانتخابية 3294 مركز وعدد المقار الانتخابية حوالي 9841 مقر يتفرع منها منها 18 ألفا و536 لجنة فرعية، وهيشرف عليها حوالي 10 آلاف قاضي.
أما فيما يخص إجراءات تمكين المصريين في الخارج من التصويت، اللجنة التشريعية التابعة لمجلس الوزرا قررت فى اجتماعها امبارح مع اللجنة العليا للانتخابات في مقر وزارة العدل، تعديل المادة 39 من الإعلان الدستورى بحيث إن اللي يقوم بالإشراف على تصويت المصريين في الخارج هم السفرا والقناصلة.. قرار اللجنة هيتعرض على مجلس الوزرا خلال الأسبوع دة قبل عرضه على المجلس العسكرى لإصدار مرسوم بالتعديل
بلدنا: سوريا في بيان المجلس القومي لحقوق الإنسان
المجلس القومى للحقوق الانسان أصدر بيان النهاردة بعد اجتماعة الشهرى برئاسة الدكتور بطرس غالى، وكان للانتخابات نصيب كبير سواء في الاجتماع أو في البيان بالإضافة لموضوعات تانية لها علاقة بالمحاكمات العسكرية والانفلات الأمني والانتهاكات الوحشية اللي بيمارسها النظام السوري ضد شعبه.
مداخلة : حازم منير رئيس وحدة الانتخابات بالمجلس القومي لحقوق الإنسان
بلدنا: منع استخدام دور العبادة في الدعاية الانتخابية
من ضمن النقاط الأساسية اللي أشار ليها بيان المجلس استخدام دورالعبادة فى الدعاية الانتخابية واستخدام الشعارات الدينية.. وعلى ما يبدو إن نتايج المسح العشوائى اللي اجراه المجلس في سوهاج والاسماعلية ،كفر الشيخ ،الغربية ،الاسكندرية، مجرد عينة بينة للي بيحصل في بقية الدواير والمحافظات، بدليل إن وزارة الأوقاف عممت منشور على كل مديريات الأوقاف في المحافظات لإخطار الأئمة بعدم السماح باستخدام المساجد للدعاية الانتخابية.. وتحذير الأئمة من التحويل للشئون القانونية والنقل من محل عمله في حالة مساعدة أي مرشحين على استخدام المساجد في الدعاية.. لكن الأئمة مش بس مطلوب منهم عدم المساعدة لكن مطلوب منهم كمان إنهم يبلغوا مديرية الأوقاف التابعين ليها عن أي مرشحين يحاولوا استخدام المساجد في الدعاية عشان المديرية تبلغ المجلس العسكرى.
مداخلة مع الدكتور سالم عبد الجليل وكيل وزارة الأوقاف لشئون الدعوة
بلدنا بالمصري: ملامح جمعة تسليم السلطة ١٨ نوفمبر
حيث إننا مش هنكون موجودين معاكوا ليلة مظاهرة 18 نوفمبر فاحنا هنحاول النهاردة مقدماً نكتشف ملامحها المبدئية
بلدنا بالمصري: محاكمة قتل المتظاهرين في المرج قلبت بغم
محكمة جنايات الغربية اجلت النهاردة محاكمة مدير امن الغربية و6 من مساعديه المتهمين بقتل المتظاهرين لجلسة 16 نوفمبر لسماع اقوال الشهود وتصوير دفاتر وسجلات اسعاف طنطا.. أما محكمة الجنايات القاهرة فكانت بتنظر النهاردة كمان في قضية قتل المتظاهرين في المرج والحقيقة إن الجلسة قلبت بغم.
بلدنا: آل إيه .. بندور على معلومات سياسية
فيه حاجة في الدنيا أو بمعنى أصح في القانون اسمها إن مواطن يوقفوه في نقطة تفتيش على الطريق فمن ضمن ما يفتشوا يفتشوا في أوراقه ولما يسأل الإجراء دة عبارة عن إيه الظابط يرد عليه بكل ثقة: "بندور على معلومات سياسية"؟!!! فيه كدة ولا ما فيش؟!!! خلونا الول نفهم اللي حصل بالظبط.
بلدنا: تطورات قضية سيد بلال ضحية أمن الدولة
خلونا بقة نوصل لحد نقابة الصحفيين يمكن نعرف تفاصيل اكتر عن قضية الشهيد سيد بلال آخر ضحايا جهاز مباحث أمن الدولة المنحل أو المتنكر الله أعلم.
بلدنا بالمصري: االعيد الأربعين لجلوس البابا شنودة
وقبل الفاصل، هنحضر جزء من حتفال الكنيسة الارثوذكسية بالعيد الاربعين لجلوس البابا شنودة على كرسى مارمرقس الرسول.
حوار بصريح العبارة مع د. السيد البدوي رئيس حزب الوفد
د. السيد البدوي شحاته رئيس حزب الوفد واستعدادات وبرنامج الحزب لأول انتخابات برلمانية بعد ثورة ٢٥ يناير وموقف الحزب من وثيقة السلمي في بلدنا بالمصري مع ريم ماجد
ليست هناك تعليقات:
إرسال تعليق