بلدنا: قتلى ومصابين في ماسبيرو في مسيرة للأقباط
هنبدأها باللي بيحصل من حوالي ساعتين قدام ماسبيرو، اللي حصل إن أقباط مصر مسلمين ومسيحيين اعتبروا النهاردة، يوم "الغضب النبيل" ونظموا مسيرات في 6 محافظات في القاهرة واسكندرية وأسوان وأسيوط والمنيا والسويس. المسيرات كان مشارك فيها جنب المجموعات والائتلافات والاتحادات القبطية، مجموعات من الصوفية وعدد من الأحزاب والقوى والحركات والائتلافات السياسية.. في القاهرة خرجت المسيرة من دوران شبرا وقلبت بغم وفي أخبار عن ضحايا من بين المتظاهرين ومن بين قوات الأمن، دة غير المصابين اللي من ضمنهم الزميل مصور قناة أون تي في أثناء تصوير الحدث.
بلدنا: بلاغ ضد الشرطة العسكرية لاعتدائها على الأقباط
من ضمن المطالب اللي خرج لها النهاردة المصريين كان الاحتجاج على فض اعتصام ماسبيرو يوم التلات بالقوة، وما كانش حد يخطر على باله إن الموقف هيكون أسوأ بكتير.. لكن بخصوص فض اعتصام التلات، القمص متياس نصر، كاهن كنيسة عزبة النخل والأب الروحى لاتحاد شباب ماسبيرو، قدم بلاغ يوم الخميس اللي فات، للنيابة العسكرية ضد اللي وصفها البلاغ بتعديات الشرطة العسكرية على المتظاهرين اللي أدت لإصابة 20 مصاب منهم 5 فى حالة مش مستقرة، حسب البلاغ، المرفق بيه صور وفيديوهات للاعتداءات وسحل بعض المتظاهرين أثناء عملية فض الاعتصام.
بلدنا بالمصري: وقف إحالة المدنيين للمحاكم العسكرية
من ناحية تانية، المشير حسين طنطاوي، رئيس المجلس الأعلى للقوات المسلحة قرر النهاردة وقف إحالة المدنيين للمحاكم العسكرية إلا فيما ينص عليه قانون الأحكام العسكرية، تنفيذاً للي نص عليه البيان الأخير للمجلس العسكري.. قرار المشير تم الإعلان عنه بعد أقل من 24 ساعة من الإعلان عن استدعاء تلات نشطاء هم أسماء محفوظ ونور أيمن نور وأحمد عزام للتحقيق معاهم في شكوى تهمتهم بالإساءة للقوات المسلحة أثناء الوقفة الاحتجاجية المطالبة بالإفراج عن المدون مايكل نبيل.. لكن على ما فهمنا إن ماحدش فيهم حتى الآن تلقى أي استدعاء رسمي، وعلى ما فهمنا برده إن أسماء ونور أصلاً ما كانوش موجودين عند س28 في اليوم دة ولا شاركوا في المظاهرة.
بلدنا بالمصري: د. أبو الغار يسحب توقيعه على وثيقة عنان
بيان المجلس العسكري اللي نص على بند وقف المحاكمات العسكرية ضمن 7 بنود تانية، واللي انتهى بعبارة تأييد صريح ومطلق للمجلس العسكري، كان فتح باب جدل واسع سواء بين الأحزاب اللي وقعت بقية القوى السياسية أو حتى داخل الأحزاب اللي وقعت نفسها.. والخلافات الداخلية في الأحزاب اضطرت بعضهم للتنصل من البيان، أو سحب التوقيع، أو التوقيع بتحفظ وبعدين سحب التوقيع، والحالة الأخيرة ديه تنطبق بالتحديد على الحزب المصري الديمقراطي الاجتماعي اللس سبق ووقع على البيان مع التحفظ على عبارة التأييد وتغيير صيغتها، لكن النهاردة رجع الدكتور أبو الغار وأعلن عن انتهاء توقيعه المشروط على البيان.
بلدنا: شهادة مضحكة وطلب رد محكمة موقعة الجمل
نروح للمحاكم والقضايا، وهنبدا من محكمة جنايات جنوب القاهرة اللي كانت بتحاكم النهاردة المتهمين في موقعة الجمل، واللي زيها زي جلسة امبارح لم تخلو من مفاجآت.
بلدنا بالمصري: رفض دعوى وقف انتخابات نقابة المحامين
محكمة القضاء الادارى اللى نظرت دعوى وقف انتخابات نقابة المحامين اللى من المفروض اجرائها الاسبوع اللى جاى.. المحكمة رفضت الدعوى على أساس ان محكمة القضاء الادارى غير مختصة. لكن احنا عندنا معلومة من داخل اللجنة القضائية المشرفة على انتخابات النقابة بتقول ان الانتخابات من الممكن تاجيلها الى 11 نوفمبر اللى جاى بدل من نصف اكتوبر وده بحجة ان الاوراق الانتخابية لم يتم طبعها حتى الان
بلدنا: الخارجية مستعدة لتصويت 10 مليون مصري بالخارج
النهاردة وفي نفس اليوم اللي قرر فيه المدونين المصريين والنشطاء على الانترنت وعلى مواقع التواصل الاجتماعي، التظار الكترونياً للمطالبة بحق المصريين في الخارج في التصويت، وزارة الخارجية صرحت بإنها مستعدة لتمكين 10 مليون مصرى في الخارج من التصويت.
مظاهرة إلكترونية لحق المصريين بالخارج في التصويت
خلونا نشوف بقة تفاصيل المظاهرة الالكترونية وأهم الهتافات واللي رفعوها المتظاهرين
مايكل منير : الأقباط لم يحملوا السلاح في مسيرة ماسبيرو
المهندس مايكل منير رئيس مؤسسة إيد في إيد ومؤسس حزب الحياة ينفي تماماً حمل الأقباط أسلحة في مسيراتهم المتكررة ويؤكد على سلمية المظاهرات وتعرض الأقباط للاعتداء
بلدنا: مؤامرة من فنانين وإعلاميين وراء أحداث ماسبيرو
الإعلامي ناجي أبو النجا يشرح أبعاد المؤامرة ويكشف خباياها في بلدنا بالمصري
بلدنا: ائتلاف شباب الثورة وبرنامج العدالة الإجتماعية
ائتلاف شباب الثورة عمل النهاردة مؤتمر صحفى اعلن فيه عن بعض مشروعات العدالة الاجتماعية وكمان البرنامج الانتخابى للائتلاف اللى من المفروض يخوض بيه الانتخابات تفاصيل اكتر عن المؤتمر الصحفى فى التقرير اللى جاي
بلدنا بالمصري: ختام رالي الفراعنة
النهاردة كان ختام رالى الفراعنه تفاصيل اكتر فى التقرير اللى جاي
بلدنا بالمصري: التحالف الديمقراطي .. في طريقه للانهيار؟
دلوقتي كلها كام يوم ويفتح باب الترشيح لانتخابات مجلس الشعب والشورى، وبدل ما نشوف قايمة وطنية موحدة، أو نشوف تحالفات انتخابية بتترجم للقوايم مشتركة، بصينا لقينا التحالفات بتنهار وبعد ما كان حزب الوفد وحزب الحرية والعدالة هم الأصل في التحالف الديمقراطي من أجل مصر اللي المفروض وعلى حد علم الجميع إنه بيضم 43 حزب، لقينا الوفد بيفضها سيرة وكل حي بيروح لحاله على الأقل فيما يخص التنسيق الانتخابي.. ومش بعيد يكون الحزب الناصري كمان على وشك يخطي نفس الخطوة برة التحالف.. دة غير إنهم طلعوا يادوب 30 حزب مش 43 ولا حاجة بعد اتضح إن فيه من ضمنهم 13 "حزب وهمي"، على حد وصف الدكتور وحيد عبد المجيد، رئيس لجنة التنسيق الانتخابي في التحالف الديمقراطي من أجل مصر اللي هنحاول نعرف مصيره بعد كل دة، من ضيوفنا النهاردة:
حسام الخولي: سكرتير مساعد حزب الوفد وعضو الهيئة العليا
د. أحمد أبو بركة: القيادي بجماعة الاخوان المسلمين
توحيد البنهاوي: القيادي بالحزب الناصري وعضو لجنة التنسيق الانتخابي
أ؟\. صلاح عيسى رئيس تحرير جريدة القاهرة
ليست هناك تعليقات:
إرسال تعليق