بالمفتشر: معاً على طريق النور
هنبدأها بكلمتين بالمفتشر عن شعار حزب النور السلفي.. الشعار المعلن والمكتوب بالبنط العريض، بصراحة والحق يتقال معديه العيب من وسع وما حدش يقدر يقول عليه تلت التلاتة كام: "حزب النور.. معاً على طريق النور"، وربنا ينور طريقنا جميعاً كمان وكمان ويثبت اقدامنا لما لحد بر الأمان سالمين غانمين بعون الله والمحروسة كلها تنور بأهلها يا قادر يا كريم!!! أما بقة لو خطفنا رجلنا مشوار قصير كدة لحد بركة السبع، هنلاقي حزب النور حداهم "معاً" برده، بس مش على طريق النور بقة.. لااااه.. المشوار من هناك وبالبنط العريض برده بيودي على طريق "الجنة" عدل!!! سبحان الله ولا حول ولا قوة إلا بالله!!! فالسؤال بالمفتشر كدة وعلى بلاطة: إلا هي من امتى الأحزاب السياسية ولا مؤاخذة بتودي الجنة أو بتودي النار أو بتودي في أي حتة ربنا وحده هو القادر يودينا لحد عندها، يوم الدين إنشاءالله وعلينا خير؟!!! فمعلش يعني إيش دخل يوم الدين في أيام الانتخابات؟!!! وإيش دخل الجنة والنار في كام كرسي تحت القبة؟!!! طب معلش برده، هل دة معناته إن اللي مش في حزب النور في بركة السبع، يبقوا "معاً" على أي طريق تانية وبئس المصير؟!!! ثم إنه مين دة أصلاً العبد الفقير لله اللي يقدر كدة بالفلم المليان وبقلب جامد يوعد الإخوة المواطنين بدرجة "ناخبين" بالجنة ونعيمها وبأمارة إيه؟!!! فيا أهل الله في حزب النور، نورونا كدة من أولها الله ينور عليكوا، لإن اللي أوله نور آخره نور برده، أما حكمة ربنا وثوابه وعقابه ورحمته الواسعة، فمالوش فيها شريك ولا وكيل لا في السموات السابعة ولا في سابع أرض!!! يا مثبت العقل والدين يا رب!!!
بلدنا بالمصري: المشير طنطاوي يواصل تصريحاته
فخلونا أحسن نروح لآخر أخبار بلدنا، وآخر خبر إن رئيس المجلس الأعلى للقوات المسلحة، المشير حسين طنطاوي واصل النهاردة لليوم التاني على التوالي مش بس افتتاحه لعدد من المشاريع، لكن كمان تصريحاته فيما يخص أحوال البلاد والعباد.. النهاردة المشير كان بيفتتح طريق الجيش الممتد بين حلوان وأسيوط. وبعد ما كان تركيزه في تصريحات امبارح على شهادته قدام المحكمة في قضية قتل المتظاهرين اللي أكد عليها وفيها إنه " لم يطلب من القوات المسلحة إطلاق النار على المتظاهرين"، النهاردة تصريحات المشير ركزت على حالة الطوارئ، وقال فيها بالحرف الواحد: " لا نرغب فى تطبيق حالة الطوارئ، ولكن الظروف الأمنية التى تشهدها البلاد حاليا دفعتنا إلى اتخاذ قرار تفعيلها... وستنتهى عند استقرار الأوضاع الأمنية وهذا يتطلب تضافر كل الجهود من الأمن والشعب وكافة طوائف المجتمع المصرى"... القادة القدامى في حرب أكتوبر، كان ليهم نصيب كمان من تصريحات القائد العام للقوات المسلحة، تمنى لهم فيها كل الصحة والسعادة، وأكد إن القوات المسلحة "سوف تظل دائماً ترحب بهم وتتواصل معهم وترعى مصالحهم وفاء منها لعطائهم المشرف".
بلدنا: بيان الجمعية الوطنية للتغيير ومرشحوا الرئاسة
عدد لا بأس بيه أبداً من الحركات السياسية وائتلافات الثورة، اعتبروا إعلان التحالف عن المشاركة في الانتخابات اللي جاية بناءاً على الاتفاق الأخير مع المجلس العسكري نوع من الجري ورا مصالح انتخابية ضيقة مالهاش علاقة بمصلحة الثورة وأهدافها.. أما الجمعية الوطنية للتغيير فأصدرت بيان انهاردة، أقرب في مضمونه لمواقف عدد من المرشحين المحتملين للرئاسة وأولهم الدكتور عبد المنعم أبو الفتوح والدكتور سليم العوا والأستاذ حمدين صباحي والدكتور أيمن نور والشيخ حازم صلاح ابو إسماعيل.. وانضم ليهم النهاردة السيد/ عمرو موسى ببيان صحفي نصه كالآتي
أما بيان الجمعية الوطنية للتغيير فاعتبر إن لا اللقاء ولا نتايجه بيستجيبوا للأمانى الوطنية اللي أجمعت على عدد من المطالب لتأكيد مدنية الدولة وبناء مجتمع القانون والحق والمواطنة. وصف البيان موقف الأحزاب اللي حضرت الاجتماع ب"التهافت لإقتناص بعض المكاسب المحدودة التى تخدم أغراضها الذاتية على حساب المصلحة العامة مقابل إعلان الولاء الكامل للمجلس العسكرى والإشادة بجميع إجراءاته فى الفترة الماضية. و تنازلها في المقابل _حسب تعبير البيان_عن حق الشعب والثورة. ليه دة كله دة اللي هنستفسر عنه من:
بلدنا: المحاكمة العسكرية للمتهمين في أحداث السفارة
وعلى الرغم من البند الرابع في بيان المجلس العسكري، اللي بينص على عدم إحالة المدنيين للمحاكم العسكرية إلا في الجرائم المنصوص عليها في قانون القضاء العسكري، إلا إن النهاردة بدأت أول جلسات المحاكمة العسكرية لعدد من المتهمين في القضية الشهيرة بأحداث السفارة الإسرائيلية ومديرية أمن الجيزة يوم جمعة تصحيح المسار ومن ضمنهم متهمين قصر، على عهدة "جبهة الدفاع عن متظاهري مصر" اللي اتقدمت امبارح بالتماس لرئيس هيئة القضاء العسكري لإخلاء سبيلهم.. في نفس الوقت، وأثناء سير الجلسات كان فيه وقفة احتجاجية قدام مجمع المحاكم العسكرية في مدينة نصر للمطالبة بوقف المحاكم العسكرية للمدنيين وفوراً وإعادة محاكمة كل اللي اتحاكموا عسكرياً من ساعة الثورة ما قامت ولحد النهاردة قدام القضاء المدني.
بلدنا: محاكمة المتهمين في قتل الشهداء في الجيزة
محكمة جنايات الجيزة كانت بتنظر النهاردة في قضية قتل الشهدا فى الجيزة وامبابة وكرداسة والمتهم فيها حوالي 14 من امناء وظباط الشرطة.. تفاصيل الجلسة هنعرفها من:
عمر حسانين رئيس قسم الحوادث بالمصري اليوم
بلدنا بالمصري: عمال النقل العام يوقفون إضرابهم
بالنسبة لأزمة إضراب العاملين في هيئة النقل العام، النهاردة، رئيس النقابة العامة للنقل البري،صرح محمد الجبالي صرح بان عمال النقل قرروا وقف الإضراب بعد اجتماعهم مع المهندسة مني مصطفي رئيس مجلس إدارة الهيئة وموافقتها علي تعديل شرط صرف زيادة حافز التميز في الاداء للعاملين في جراجات الهيئة. وأكد إنه تم استئناف العمل فعلاً في اربع جراجات هي المنيب وبدر والجيزة وامبابة غير 4 فروع من شركة القاهرة الكبري واعتبر إن ديه نقطة الانطلاق لكسر الإضراب في باقي جراجات الهيئة.
بلدنا: تغريم الشركة العامة للبترول ٢ مليون جنيه
وزير البيئة، المهندس ماجد جورج قرر النهاردة تغريم الشركة العامة للبترول 2 مليون جنيه قيمة الاضرار اللي اصابت البيئة البحرية والبرية بسبب التسرب البترولي من 5 مواقع في منطقة خليج جمشة علي البحر الاحمر في الغردقة، والمستمر لحد النهاردة من حوالي 13 يوم.. ووافق كمان علي تحريك الدعوي الجنائية ضد رئيس مجلس ادارة الشركة.
بلدنا بالمصري: أمريكا خلف جواسيسها فأين مصر من علمائها
النهاردة فيه عدد من القوى الوطنية إسلامية وغير إسلامية نظموا مؤتمر عنوانه: "أمريكا خلف جواسيسها فأين مصر من علمائها" للمطالبة بالإفراج عن الشيخ عمر عبد الرحمن المعتقل في السجون الأمريكية.. تفاصيل المؤتمر في التقرير اللي جاي.
بلدنا بالمصري: الربيع العربي والتحولات الراهنة
مؤتمر "الربيع العربي والتحولات الراهنة" اللي بينظمه البرنامج العربي لنشطاء حقوق الانسان، بدأ النهاردة في القاهرة وهيستمر لحد يوم الخميس.. تفاصيل الجلسة الافتتاحية في التقرير اللي جاي.
بلدنا بالمصري: صورة مصر الحلوة اللي لسة ولاده
تعالوا بقة نطل طلة على صورة من صور مصر الحلوة اللى لسة ولادة، واللي ولادها لسة ناويين ولسة قادرين يرفعوا راسها فوق في العلالي.
بلدنا بالمصري: الناس فاض بيها من سرقة العربيات
دلوقتي فيه ناس كتير فاض_وعذرهم معاهم_ بيها من قصة سرقة العربيات لدرجة إن فيه ناس خادتها من قاصرها وباعت عربياتها أسلم.. تعالوا نشوف إيه قصة سرقة العربيات ديه.
بلدنا بالمصري: انطلاق رالي الفراعنة
ومع ذلك، عدد المشاركين في رالي الفراعنة السنة ديه أكتر من أي سنة فاتت.. سبحان الله.
بلدنا بالمصري: موقف أبو الغار من بيان المجلس والأحزاب
احنا تابعنا مع حضراتكوا من امبارح وأول بأول ردود الأفعال المختلفة على بيان المجلس العسكري ببنوده التمانية واللي وقع عليه ممثلين عن 13 حزب، بما فيها ردود أفعال الأحزاب نفسها اللي وقع ممثلين عنهم على البيان بخط إيدهم، ومعظمهم تنصل من البيان ومن اللي وقع عليه.. ومعظمهم دعا لاجتماعات طارئة لهيئته العليا امبارح لوضع النقط فوق الحروف وتحديد المواقف بوضوح.. ولحد امبارح بالليل، كان عدم توقيع الدكتور محمد أبو الغار بخط إيده على البيان عن الحزب المصري الديمقراطي الاجتماعي، دوناً عن بقية الأحزاب مع وجود اسم الحزب واسم الدكتور أبو الغار ضمن قائمة الموقعين، كان عامل حالة من اللبس وعدم الوضوح فيما يخص موقف الحزب المصري الديمقراطي من البيان.. النهاردة، فيه كلام تاني عن توقيع مشروط للدكتور أبو الغار.. مشروط بإيه بالظبط وإيه مدى صحة الكلام دة من حيث الأصل، دة اللي هنعرفه من
بلدنا بالمصري: د. أسامة الغزالي حرب .. مغرد خارج السرب
الدكتور/ أسامة الغزالي حرب، الرئيس السابق لحزب الجبهة الديمقراطي، يعتبر واحد ضمن قلة_بس مش مندسة بالتأكيد_ دة إن ما كانش الوحيد اللي لسة بينادي بالدستور أولاً، حتى لو كان التمن فترة انتقالية اطول يستمر فيها المجلس العسكري في إدارة شؤون البلاد _لإنه مش قاعد على نفسنا على حد تعبيره_.. في حين إنه بقة واضح ويسد عين الشمس إن ماعادش فيه ناس كتير في مصر عندها استعداد تدفع التمن ولا حتى المجلس العسكري نفسه.. لكن الدكتور/ أسامة الغزالي حرب، حجته معاه.
ليست هناك تعليقات:
إرسال تعليق