بالمفتشر: سلطات مطار القاهرة عاملتهم كأنهم إرهابيين
يسعد مساكم وحلقة جديدة من بلدنا بالمصري، هنبدأها بخبر منشور النهاردة في الشروق في آخر الصفحة التالتة على اليمين وعنوانه بالبنط العريض عبارة عن شكوى مرة من مجموعة من كبارات رجال الأعمال من كردستان العراق، جايين بربطة المعلم وطاخيين المشوار وقاصدين اتحاد الصناعات.. ليه يا ترى؟!!! لزوم"بحث الاستثمار في مصر".. طيب يا ألف نهار أبيض.. أول هام: يعني مصر أهيه رغم كل اللي هي فيه الاستثمار لا هو مقاطعها ولا مخاصمها ولا بيفوت لها بلاد ولا بيجري قدامها بالمشوار، بالعكس دة جيالها بالمشوار لحد عندها.. وتاني هام: إنه في الحالة ديه، يبقى المفروض يا أهلاً وسهلاً ومرحبتين وخطوة عزيزة.. لكن اللي حصل وليه العجب إن الجماعة رجال الأعمال دول وبعد اربع ساعات من العطلة والمطوحة و"الإجراءات الأمنية المشددة" في مطار القاهرة على ما خدوا تأشيرة الدخول، خرجوا من المطار مكسورين الخاطر وبرج من عقلهم طاير وبيشتكوا من إنهم عملوا اللي عليهم وزيادة وبعتوا من 10 إيام عن طريق السفارة المصرية قايمة بأسماء الوفد لعرضها على الجهات الأمنية إلا إن "سلطات مطار القاهرة عاملتهم ولا كإنهم إرهابيين"!!! يا عيب الشوم!!! واللي زاد وغطى وحازز في نفسيتهم على الآخر، إن طول الأربع ساعات دول ما حدش هان عليه يقولهم"طب اتفضلوا في قاعة كبار الزوار على ما تفرج" مع إنه في نفس الوقت كان فيه زيارة لمجموعة من اللاعبين الأفارقة اتفتحت لهم قاعة كبار الزوار على كفوف الراحة.. وقالوها بالفم المليان: " إن لو الوضع استمر على كدة ما فيش حد هيكلف خاطره وييجي يستثمر في مصر حتى لو نفسه ومنى عينه، لكن بناقص البهدلة ووجع الدماغ"!!! شفتوا الهنا اللي احنا فيه؟!!! وبعدين يرجعوا يقولولنا كله من تحت راس الثورة وعمايلها واللي عملوها واللي يتشددولها!!! أما عجايب والله!!!
بلدنا بالمصري: إخلاء سبيل ١٢ متهم في أحداث السفارة
نيابة أمن الدولة العليا طوارئ قررت النهاردة اخلاء سبيل 12 من المتهمين في أحداث السفارة الإسرائيلية ومديرية أمن الجيزة.. لكن كلهم لسة على ذمة القضية مع إن معظم التقارير الصحفية اللي تناولت الخبر بتأكد إن التحقيقات أثبتت براءتهم من الاتهامات المنسوبة اليهم بإتلاف ممتلكات عامة وخاصة واقتحام مقر السفاررتين الاسرائيلية والسعودية.
بلدنا بالمصري: مش عارفين ولادنا فين
والد فادي مصطفى المتهم في أحداث السفارة الإسرائيلية المخلى سبيله يشكو من عدم تنفيذ قرار الإفراج وأن أهالي المتهمين لا يعرفون مكان أولادهم
بلدنا بالمصري: هو ده اللي ضربني بالنار
جولتنا اليومية بين القضايا والمحاكم هنبدأها النهاردة من محكمة جنايات القاهرة في التجمع الخامس وقضية قتل المتظاهرين في الدرب الأحمر.. في جلسة النهاردة، واحد من المصابين اتعرف على ظابط من المتهمين وصرخ بعلو صوته: "هو دة اللي ضربني بالنار"
بلدنا بالمصري: رصاصة ثانية من أحد مصابي ماسبيرو
خلونا بقة نقول يا هادي يا رب بآخر أخبار بلدنا.. لحد امبارح بالليل، وعلى حد علمنا، ما كانش عندنا لحد دلوقتي غير رصاصة واحدة محرزة من الرصاص اللي تم اطلاقه يوم أحداث ماسبيرو، وهي الرصاصة اللي تم استخراجها من فك المصور علي خالد واللي فضلنا متابعينها من البداية ولحد ما نجيت والحمد لله من محاولات ما يعلم بيها إلا ربنا وتم تحريزها في مكتب مدير المستشفى اللي اتعملت فيها العملية، وهي دلوقتي في انتظار النيابة العسكرية تستلمها بحكم إنها حالياً ولحد دلوقتي هي الجهة المختصة مش النيابة العامة، وفيه بلاغ في النيابة العسكرية من عدد من المحامين والمنظمات الحقوقية بالمعنى دة وفاضل إن النيابة العسكرية تاخد الإجراءات اللازمة لاستلامها وعرضها على الطب الشرعي... بس الكلام دة كله كان لحد امبارح بس، لكن امبارح بعد نص الليل ظهرت رصاصة تانية تم استخراجها من أحد المصابين في المستشفى القبطي في ظروف هنسمعها بالتفصيل
بلدنا بالمصري: تأجيل محاكمة قتل متظاهري الجيزة
أما المتهمين بقتل المتظاهرين في الجيزة، فكانوا بيتحاكموا النهاردة قدام محكمة الجنايات اللي قررت التاجيل لجلسة 19 ديسمبر اللي جاي.
بلدنا بالمصري: قضية بطلان انتخابات الزمالك لنقطة الصفر
بعد حوالي سنتين في محاكم مجلس الدولة، قضية بطلان انتخابات نادي الزمالك رجعت النهاردة تقريباً لنقطة الصفر بعد ما قررت المحكمة الادارية العليا بتأجيل النظر فيها وإعادة المرافعة مرة تانية نتيجة لإعادة تشكيل هيئة المحكمة بعد نهاية السنة القضائية.
بلدنا: أولى جلسات حق المصريين بالخارج في التصويت
أولى جلسات القضاءالإداري في الدعوى المقامة ضد القرار السلبي بعدم تمكين المصريين بالخارج من حقهم في التصويت بالانتخابات
بلدنا بالمصري: مؤتمر صحفي د. أيمن نور ١٨ أكتوبر ٢٠١١
النهاردة وبعد يوم واحد من قرار محكمة النقض برفض إعادة محاكمة الدكتور أيمن نور، مؤسس حزب الغد والمرشح المحتمل للرئاسة، الدكتور ايمن نور أعلن النهاردة إنه في مؤتمر صحفي إنه اتقدم بدعوى بطلان ضد قرار الرفض ودعوى تانية قدام الإدارية العليا بالطعن على قرار لجنة شؤون الأحزاب برفض تأسيس حزب الغد الجديد.
بلدنا بالمصري: بعد أسبوع على فتح باب الترشح للانتخابات
احنا كلها كام يوم ويتقفل باب الترشح للانتخابات، وندخل في المراحل اللي بعدها من أول الطعون لإعلان الكشوف النهائية للدعاية الانتخابية للتصويت وعلينا خير إنشاءالله.. ولإن الانتخابات ديه الأمل فيها كبير والقلق منها وعليها أكبر فاحنا من هنا ورايح هنركز عليها بشكل أكبر في بلدنا بالمصري وهنبتدي من النهاردة بسؤال: الانتخابات اللي جاية ديه هي الدوا ولا هي الداء.. هي النعمة ولا النقمة.. وإيه إمكانية إننا نعدي بيها لبر الأمان من غير ما تقلب بغم ومن غير عاهات مستديمة؟!!! السؤال دة هنحاول نجاوب عليه في فقرتنا اللي بعد آخر أخبار بلدنا، بس على ما ييجي وقتها، خلونا نطمن على عملية تقديم الأوراق بعد أسبوع من فتح باب الترشيح.
بلدنا: ائتلاف المصرية للاتصالات يكشف ملفات فساد
ائتلاف العاملين بالشركة المصرية للاتصالات أعلن النهاردة في مؤتمر صحفى فى سنترال الدقى عن عدد من الملفات اللي وصفها بملفات فساد، دة غير الإعلان عن الإجراءات التصعيدية اللي ممكن يلجأولها في الفترة اللي جاية
بلدنا بالمصري: وزير البترول رفض الكلام عن تصدير الغاز
وزير البترول عبد الله غراب رفض النهاردة أي كلام في قضية تصدير الغاز لإسرائيل بما إنها حالياً قدام القضاء، واستغرب جداً من استمرار دعم الحكومة للمواد البترولية على حساب الصحة والتعليم.
بلدنا بالمصري: احتفالات فلسطين بتحرير الأسرى العائدين
النهاردة من الأيام اللي صحينا فيها على أحداث ومشاهد مبهجة وتشرح القلب وترفع الراس، لأول مرة بالزخم دة يمكن من يوم التنحي.. صحينا على احتفالات وهتافات ودموع فرح من القدس لغزة للضفة، اللي استقبلوا النهاردةأعز الناس من الأسيرات والأسرى الفلسطينيين اللي فيه كتير منهم قضوا اكتر من نص عمرهم في سجون الاحتلال.. واللي زود الفرحة فرحتنين إن رجوعهم بالسلامة مصر كانت فيه واسطة الخير وفي إطار صفقة وصفوها الأسرى المحررين بعضمة لسانهم بإنها "مشرفة وتليق بمقامهم وبمقام مصر"
بلدنا بالمصري: نعمة الانتخابات وازاي متقلبش بغم
أول انتخابات بعد الثورة هي الدوا اللي ممكن يقلب بعاهة مستديمة والنعمة اللي ممكن تقلب
كل اللي هنعمله من هنا لحد آخر الحلقة إننا هنحاول نفهم إيه اللي ممكن يخللي نعمة الانتخابات تقلب بغم، أو بمعنى أصح: إيه ولا إيه؟!!! وإيه هي الوسائل الممكنة لتعظيم الفوايد وتقليل الخساير سواء السياسية أو المادية أو في الأرواح.
اللواء/ رفعت عبد الحميد: خبير العلوم الجنائية ومسرح الجريمة
الاستاذ/ بهي الدين حسن: مدير مركز القاهرة لدراسات حقوق الإنسان
http://www.youtube.com/watch?v=chv3sIA1BuA
ليست هناك تعليقات:
إرسال تعليق