كلمتين بالمفتشر : واحدة مرة والتانية مرة علقم
يسعد مساكم وحلقة جديدة من بلدنا بالمصري.. هنبدأها بكلمتين بالمفتشر متأمننهم أمانة من كتير من أهالي المحروسة حاسين إنهم ما بين نارين، لإن الاتنين: واحدة مرة والتانية مرة علقم.. من ناحية، مش هاين عليهم الدم اللي سال تحت العجل يكون بإيدين عسكري مصري أعصابه فلتت وهو بيحاول ينفد بحياته، ونفسهم ومنى عينهم يخيب الظن دة، ويطلع إن اللي كان سايق لا ليه دعوة بالجندية ولا عمره نال شرفها ولا عمره اقسم يصونه بحياته وعن طيب خاطر.. لكن من ناحية تانية، مش هاين عليهم كمان تكون مدرعات الجيش المصري اتسرقت على الكورنيش على آخر الزمن.. وإنهم بيدعوا ليل مع نهار ربنا يكفينا شر النارين، وإنهم في كل الحالات رافعين إيديهم للسما وداعيين في سرهم وبعلو الصوت: " اللهم إننا لا نسألك رد القضاء وإنما نسألك اللطف فيه"!!! اللهم آمين.
بلدنا: تحقيقات أحداث ماسبيرو سرية .. وللقضاء العسكري
على أي حال، الحقيقة مش ممكن هتبان إلا على إيدين جهات التحقيق وبعد العدالة ما تاخد مجراها.. جهات التحقيق لحد النهاردة، كانت كالآتي: النيابة العسكرية اللي قررت أول امبارح حبس 21 متهم في أحداث ماسبيرو 15 يوم على ذمة التحقيقات، ووجهت لهم مجموعة من الاتهامات، أهمها: تدمير معدات مملوكة للقوات المسلحة والأهالي، وإتلاف المنشآت العامة والتعدي على قوات الشرطة العسكرية ما أسفر عن إصابة ووفاة عدد من أفراد الشرطة.. وجهة التحقيق التانية كانت النيابة العامة، بالإضافة للجنة تقصي الحقائق اللي شكلها وزير العدل.. دة كان لحد النهاردة.. لكن النهاردة، النيابة العامة أحالت كل التحقيقات اللي أجرتها في القضية لهيئة القضاء العسكري، على اعتبار إنه هو القضاء المختص قانونا دون غيره بالجرائم التى تدخل فى اختصاصه، طبقا للدستور والقانون، حسب تأكيدات اللواء عادل المرسى، رئيس هيئة القضاء العسكرى، اللي شدد على إن القضاء العسكرى هيئة قضائية مستقلة تتوافر لها كل ضمانات الاستقلالية والحيادية وتحقيق العدالة وتوفير سبل الدفاع عن المتهمين بصورة كاملة دون تحيز لمصلحة أحد أطراف الدعوى أو ضد مصلحته.. وبناءاً عليه، أهاب بكل من لديه معلومات أو مستندات ممكن تفيد التحقيقات فى أحداث ماسبيرو أنه يتقدم بيها فورا للنيابة العسكرية.. لكن مش بس القضاء العسكري هو اللي هيختص بالتحقيق والحكم في القضية، لكن كمان وعلى ما يبدو إنه فيه نوع من أنواع حظر النشر فيما يخص التحقيقات اللي بتجريها النيابة العسكرية، حيث إن البيان الصادر من رئيس هيئة القضاء العسكري بيأكد بالحرف على إنه: " النتائج التى تسفر عنها التحقيقات هي من الاسرار التى لايجوز افشائها من اعضاء النيابة ومساعديهم من كتاب وخبراء وغيرهم ممن يتصلون بالتحقيق او يحضرونه بسبب وظيفتهم او مهنتهم".. احنا هنحاول على قد ما نقدر نفهم الإجراءات ديه معناها إيه بالظبط
بلدنا: تقصي حقائق أحداث ماسبيرو تبدأ عملها
أما لجنة تقصي الحقائق اللي شكلها وزير العدل بتكليف للحكومة من المجلس العسكري، فبدأت فعلاً عملها من امبارح برئاسة المستشار/ عمر مروان.. وبدأت التحقيق من أول الخط، من أسوان، وتحديداً من قرية الماريناب في ادفو.
بلدنا بالمصري: الأنبا هيدرا يكشف حقيقة تصريحاته
بمناسبة الماريناب بقة اللي هي كانت مستصغر الشرر، فيه فيديو بقى له كام يوم منتشر انتشار النار في الهشيم، وعامل بلبلة وملخبط الناس على الآخر، مع إن فيه اكتر من برنامج من البرامج الزميلة والشقيقة، ومن ضمنها "صباح أون" حاولوا يوضحوا الموقف، لكن مع ذلك لسة الفيديو منتشر وملخبط الدنيا.. الفيديو عبارة عن تصريحات للأنبا هيدرا، أسقف أسوان لقناة الكرمة بيتكلم فيه عن كنيسة الماريناب والوضع في الماريناب.. خلينا نسمعه في الأول ولما نرجع هنفهم اللخبطة جاية منين وهنحاول نوضح اللبس جي منين
بلدنا: موقف القوى السياسية من أحداث ماسبيرو
كلمة المجلس العسكري اللي قالها امبارح في مؤتمره الصحفي حوالين رؤيته وتفسيراته ومبرراته لأحداث ماسبيرو، ما مرتش أبداً مرور الكرام، ودة طبيعي بما إن المجلس العسكري من ناحية هو الحاكم الفعلي حتى الآن، ومن ناحية تانية لإنه شئنا أم أبينا هو طرف في الأحداث.. كتير من القوى السياسية المختلفة، قالت هي كمان كلمتها النهاردة وأعلنت في مؤتمر صحفي مشترك في مقر جريدة التحرير، عن موقفها من أحداث ماسبيرو ومن رؤية المجلس العسكري ورد فعله عليها.
مسيرة للتنديد بتغطية ماسبيرو لأحداث الأحد الأسود
أما الإعلاميين المصريين، أو على الأقل عدد كبير منهم، فقالوا هم كمان كلمتهم النهاردة، مش بس فيما يخص أحداث ماسبيرو، لكن فيما يخص السياسات التحريرية لماسبيرو ونوع التغطية الإعلامية اللي لجأ إليها في أحداث ماسبيرو اللي كانت تحت البلكونة، واللي أشاد بيها وحياها امبارح، اللوا/ إسماعيل عتمان، مدير إدارة الشؤون المعنوية بالقوات المسلحة.
بلدنا: د. عصام شرف يعزي البابا في شهداء ماسبيرو
الدكتور/ عصام شرف رئيس مجلس الوزرا، قدم النهاردة الصبح واجب العزا في الكاتدرائية المرقسية لقداسة البابا شنودة في شهداء أحداث ماسبيرو.. وبعدها التقى بالإمام الأكبر، الدكتور أحمد الطيب في مشيخة الأزهر وأعلن عن قرار مجلس الوزرا بإنشاء "بيت العائلة المصرية" برئاسة البابا شنودة وشيخ الأزهر واللي صدر يوم 12 اغسطس اللي فات.
بلدنا: ثاني أيام الترشح للانتخابات البرلمانية
تعالوا بقة نروح نطل طلة على أحوال تاني من أيام فتح باب الترشح لأول انتخابات برلمانية بعد الثورة، ولو إن المؤشرات من امبارح كانت بتوحي بإنه "ما اشبه اليوم بالبارحة"
بلدنا: قرب الانتهاء من تشكيل قائمة الكتلة المصرية
الكتلة المصرية، أعلنت في بيان ليها النهاردة عن قرب الإنتهاء من تشكيل قايمة موحدة هتنافس علي أكتر من 90% من مقاعد الشعب والشوري، واكدت على التنسيق الكامل بين أحزاب الكتلة علي المقاعد الفردية. وفي نفس الوقت، أعلن البيان عن انسحاب حزب التحالف الإشتراكي من الكتلة المصرية.. وركز على تفصيلة هنحاول نفهمها وهي إن: اللجنة العليا للإنتخابات أكدت خلو قائمة الكتلة المصرية من فلول الوطني المنحل
بلدنا: د. حسام كامل يفوز برئاسة جامعة القاهرة
النهاردة كان أشبه كتير بالبارحة، كمان في جامعة القاهرة، بعد ما فاز الدكتور حسام كامل بمنصب رئيس الجامعة مرة تانية، بعد استقالته بحوالي شهرين، في انتخابات اصدرت المحكمة الادارية العليا حكم بوقفها، واستشكلت عليه إدارة الجامعة، فتمت الانتخابات رغم انف حكم المحكمة.
بلدنا: غداً .. أول انتخابات لنقابة الأطباء من ٢٠ سنة
نقابة أطباء مصر على معاد بكرة، مش بس مع أول انتخابات بعد الثورة، لكن يمكن الأهم من كدة إنها أول انتخابات من حوالي عشرين سنة إلا حاجة بسيطة، وما أدرانا ما النقابات المحرومة من الانتخابات.
بلدنا: اختفاء د. أحمد عاطف ومداخلة ناجي أبو النجا
الدكتور/ أحمد عاطف، من ضمن المرشحين لعضوية مجلس نقابة الاطباء.. ومن امبارح بالليل وهو مختفي تماماً وتليفونه مقفول وماحدش عارف له طريق.. في كل الحالات احنا كنا هنتابع الموضوع دة، لكن اللي زاد وغطى بالنسبة لنا، إن يوم الحد اللي فات وأثناء تغطيتنا لأحداث ماسبيرو، كان معانا على التليفون، المدعو/ ناجي أبو النجا بصفته الإعلامي، وذكر الدكتور أحمد عاطف في سياق كلامه.. ولسبب ما البعض ربط ما بين المداخلة وما بين اختفاء الدكتور/ أحمد عاطف، هنحاول نعرف السبب بس بعد ما نفتكر المداخلة.
بلدنا بالمصري: وقف انتخابات نقابة الصحفيين
لحد النهاردة الصبح، نقابة الصحفيين كانت كمان على معاد مع أول انتخابات بعد الثورة، لحد ما قررت محكمة القضاء الإدارى وقف قرار فتح باب الترشيح لانتخابات نقابة الصحفيين سواء على منصب النقيب أوعضوية مجلس النقابة، وبالتالي وقف إجراء الانتخابات
بلدنا: العلاقة بين مسلمين وأقباط أهالي المحروسة
أهل مصر المحروسة مسلمين وأقباط والعلاقة بينهم .. حديث ذو شجون
ليست هناك تعليقات:
إرسال تعليق