برنامج صباح ON حلقة الخميس 6/10/2011 من قناة ONTV كاملة يوتيوب -حلقة خاصة عن انتصارات 6 اكتوبر
يوم ٦ أكتوبر ٧٣ مصر بقت حرة
في بيتنا وبيتكم وفي بيت كل مصري من الوطن ده في شهيد
أمي وأمك وجدي وجدك .. دموعهم كلهم اتوحدت من 38 سنة فرحة وحزن على ولادنا الشهداء.
يوم 6 أكتوبر مصر بقت حرة ..
يوم 6 أكتوبر 73 ترابنا رجع طاهر
رمل سيناء يختلط بدماء الشهداء
دم ولادنا ماراحش هدر لأن بلدنا رجعت حرة
يا أم كل شهيد ابنك عند ربنا ما تزعليش النهاردة عيد
يا كل أم استنت ابنها يرجع سنين بعد الحرب .. ما تحزنيش لأنه في الجنة
صباح الخير جميع مشاهدينا .. حلقة خاصة في الذكرى الثامنة والثلاثين لحرب اكتوبر .. ضيوفنا من أبطال الحرب العظيمة ومشاهدينا من الناس اللي في قلوبها أكتوبر ساكن ومش مجرد ضربة جوية.
6 أكتوبر النهاردة أبطال كتير مش شخص واحد .. النهاردة عيد الحرية .. حلقتنا مليانة بالأسرار وحاجات اتسكت عليها 30 سنة .. استنونا هنكشف كل الأسرار.
أزمة الدم في مستشفى الدمرداش الجامعي
ممكن نخرج لدقائق من احتفالات أكتوبر لاستكمال موضوع مهم فتحناه امبارح .. أزمة الدماء في مستشفى الدمرداش الجامعي اتكلمنا عنها وقولنا إن مرضى فقر الدم عندهم أزمة في نقص أكياس الدماء والناس دي مش عارفة تاخد كميات الدم اللازمة ليهم .. ناشدنا الناس تروح تتبرع بالدماء للمرضى دول لإنقاذهم .. لكن يظهر إن فيه أزمة في المستشفى أكبر من حكاية نقص الدم.
الأزمة ممكن تكون كبيرة فعلا وعشان نعرف إيه الأزمة وسببها بالضبط معانا عبر الهاتف الدكتور إبراهيم يوسف المشرف على بنك الدم في مستشفيات جامعة عين شمس
نتمنى حل الأزمة دي بسرعة عشان الناس المريضة دي بس.
دور الإعلام في صنع الديمقراطية ودعمها
نروح لموضوع تاني ليه علاقة بالإعلام الحر .. الهيئة القبطية للخدمات الاجتماعية نظمت منتدى للحوار المصري والدنماركي وتدور جلساته حول دور الإعلام في صنع الديمقراطية ودعمها في البلدان التي تمر بتحولات بارزة في شتى المجالات
بيان انتصار أكتوبر الحقيقي
نرجع بقى لانتصار أكتوبر الحقيقي دون تزييف ودون اقتصار النصر الكبير ده على مبارك الرئيس السابق أو المخلوع .. السادس من أكتوبر في تاريخ مصر نقطة مضيئة .. نصر صنع مستقبل .. حرب صانت أجيال .. عتاد وجنود وشهداء ودم ورملة وطيارات في السما ومراكب في القناة ونابالم مالوش لازمة وساتر ترابي بينهار.. كلها صور راسخة ي عقولنا وقلوبنا.
أكتوبر يعني كرامة .. يعني حياة دون احتلال .. يعني حاجات كتير شعرنا بيها بعد سنين من الصراع العربي الاسرائيلي .. اكتوبر يعني انتهاء الأسطورة العسكرية الإسرائيلية .
صباح ON:صحافة وإعلام ما بعد أكتوبر ١٩٧٣
حلقة النهاردة كلها عن حرب أكتوبر .. ضيوفنا أبطال هذه الحرب الحقيقيين .. ضيوفنا كانوا على استعداد يضحوا بحياتهم عشان البلد دي ما يروحش منها شبر واحد .. نروح لفاصل قصير جدا ونرجع عشان نشوف صحافة ما بعد حرب أكتوبر كتبت إيه .. وإعلام السنوات الماضية كان عايش الوهم إزاي ..معانا أحد أبطال الحرب من الصحفيين الأستاذ شوقي حامد الكاتب الصحفي بجريدة الأخبار
أحد أبطال المجموعة ٣٩ ومحمد أفندي رافع العلم
حرب أكتوبر ما كانتش مجرد طيارات في السما بتضرب خطوط العدو .. كل واحد في جيش مصر العظيم كان ليه دور في إن ترابنا ما يبقاش ملطخ بدنس الاحتلال
ورا نجاح أي حرب مجموعة ابطال أشداء بيطلق عليهم اسم الصاعقة .. ناس قلبها ميت ما بتخافش من حد .. تفوت في الحديد .. كل همهم حماية جنودنا واختراق خطوط العدو .. عملياتهم شديدة الخطورة والجرأة .. معانا عشان نستفيض في الكلام عن حرب أكتوبر من وجهة نظر بطلين مصريين البطل محمد العباسي أو محمد أفندي رفعنا العلم اول من وضع العلم المصري على الضفة الشرقية لقناة السويس .. ومعانا كمان اللواء محى نوح من أبطال المجموعة 39 قتال وأحد أهم و أفضل ابطال الصاعقة المصرية ..
أبطالنا النهاردة نموذج لأبطال كتير حقهم في التكريم اتنسى عشان الكل كان مهتم بإبراز دور مبارك فقط .. تحية لكل بطل شارك في حرب أكتوبر وتحية لكل شهيد وتحية لكل واحد له ذكريات مع هذه الحرب لأن بجد هما دول الأبطال اللي رفعوا راس مصر
صباح ON: اللواء طيار عكاشة وحقائق الضربة الجوية
التاريخ العسكرى سيقف طويلا بالفحص والدراسة والتأمل أمام نصر السادس من أكتوبر عام 1973 .. جملة رددها وكان يعنيها الرئيس الراحل محمد أنور السادات .. ففى هذا اليوم المضئ من تاريخ العرب تمكنت القوات المسلحة المصرية بكافة أفرعها وتشكيلاتها من كتابة تاريخ جديد لفنون القتال والاشتباك العسكرى جوا وبحرا وبرا .. تاريخ سطر صفحاته جنود بحروف من الكرامة والعزة والإصرار فى معركة رد الاعتبار.
6 أكتوبر .. الساعة 2 الضهر .. سنة 73 .. تمكنت قواتنا الجوية من قطع ذراع إسرائيل الطولى .. وفى الرابع عشر من أكتوبر وفوق سماء الدلتا كسرت أنفها تماما فى معركة المنصورة التى صنفت بأنها أكبر وأشرس معركة جوية منذ الحرب العالمية الثانية .. وخلال المعارك الجوية التى دارت فى أيام الحرب وقبل وقف إطلاق النار .. أبهر نسور مصر المحلقة العالم أجمع وفى مقدمتهم العدو الإسرائيلى .. عندما اخترقوا قواعد التحليق والطيران .. مش هنتكلم كتير .. لكن نسمع بطولات الطيران المصرى من أحد أبطاله .. يسعدنا أن يكون معنا اليوم اللواء طيار محمد عكاشة .. أحد أبطال الضربة الجوية الحقيقية .. ليحكى لنا تفاصيل وحقائق عن الضربة الجوية ودور الطيران المصرى فى معركة الكرامة يوم 6 أكتوبر
ليست هناك تعليقات:
إرسال تعليق