بلدنا: المشاركون بـ جمعة تصحيح المسار يرفضون العنف
خلص كلامنا اللي بالمفتشر وبصريح العبارة برده هنبدأ آخر أخبار بلدنا.. بس قبل آخر الأخبار.. احنا وعدناكوا امبارح بعد مداخلة الدكتورة ريم ممدوح المتحدث الإعلامي باسم ائتلاف شباب روكسي، إننا هنتابع موضوع الفيديوهات اللي بتحرض على الصدام مع الجيش يوم الجمعة اللي جاية واللي أكدت إنها منشورة على صفحة "ثورة الغضب التانية".. الحقيقة إننا وصلنا النهاردة رد من المسؤولين عن صفحة ثورة الغضب التانية ومعاه الفيديو المقصود_اللي فعلاً لا يخلو أبداً من لهجة تحريضية وبالتالي قررنا إننا مش هنعرضه في بلدنا بالمصري لا هو ولا أي مادة تانية سواء مكتوبة أو مرئية فيها لهجة تحريضية على الأقل من وجهة نظرنا وأرجو إنكوا تثقوا في حكمنا .. لكن رد المسؤولين عن صفحة "ثورة الغضب التانية كان
من ناحية تانية، حد من أعضاء ائتلاف شباب روكسي_وواضح إنهم بيدوروا على الفيديوهات المحرضة ديه بمنكاش_ بعت لنا النهاردة فيديو تاني منشور على صفحة تانية على فيس بوك، اسمها "المجلس الأعلى لحماية وتحقيق أهداف الثورة" ومعاه بيان عنوانه "تخطيط" بيتكلم كلام فارغ_ لو ماخدناهوش على محمل الجد وكلام في منتهى الخطورة لو خدناه بجد_ احنا لا هنعرض الفيديو ولا هنقرا البيان والاتنين موجودين على فيس بوك للي عايز يبص عليهم من باب العلم بالشئ
بلدنا بالمصري: ائتلاف شباب الثورة وجمعة تصحيح المسار
طب خلونا كمان بالمرة نعرف موقف ائتلاف شباب الثورة من مليونية تصحيح المسار واللي أعلن عنه في مؤتمر صحفي النهاردة
بلدنا: محاكمة عاجلة للمحتجزين في أحداث محاكمة مبارك
وبجملة المتابعات، نيابة القاهرة الجديدة أمرت النهاردة بإخلاء سبيل ال22 شخص اللي تم القبض عليهم امبارح خلال الاشتباكات اللى حصلت قدام أكاديمية الشرطة أثناء المحاكمة، بكفالة 200 جنيه لكل واحد، وقررت إحالتهم لمحاكمة عاجلة، وتحديد جلسة بعد بكرة البداية محاكمتهم قدام محكمة جنح القاهرة الجديدة، بتهمة التعدى على ظباط الشرطة والبلطجة واتلاف الممتلكات العامة والخاصة. وكلها اتهامات أنكرها المتهمين حتى بعد مواجهتهم بالمصابين، اللي كشفت تحقيقات النيابة إنهم 3ظباط وأمين شرطة و11 عسكري من عساكر الأمن المركزي.
بلدنا بالمصري: 20 محامي كويتي يتضامنون مع أهالي الشهداء
زي ما حضراتكوا عارفين إن فيه حوالي عشر محامين كويتيين اتطوعوا للدفاع عن الرئيس المخلوع من باب رد الجميل _على حد تعبيرهم_ ولإنه غالباً ما كل فعل بيكون له رد فعل مضاد ليه في الاتجاه ومساوي ليه في القوة و يمكن أقوى كمان.. اتحاد المحامين الكويتى تلقى النهاردة طلب رسمي مكتوب من أكتر من 20 محامي كويتي للتضامن مع أهالي الشهدا وحضور جلسات المحاكمة للدفاع عن مطالبهم. وما اكتفوش بكدة، لأ كمان عبروا عن عن استياءهم من موقف الوفد الكويتى اللي اتطوع للدفاع عن الرئيس السابق، ومن تصريحاتهم اللي وصفوها بإنها "جانبها الصواب"..
بلدنا بالمصري: إحالة ضباط قسم الأميرية لمحكمة الجنايات
لسة في قضايا قتل المتظاهرين، النائب العام المستشار عبد المجيد محمود، قرر النهاردة إحالة 3 ضباط وأمين شرطة لمحكمة الجنايات بتهمة قتل المتظاهرين، وتحديد جلسة عاجلة،هم العقيد حازم محمد عبد الفتاح والرائد مصطفى فادى حبشى والنقيب معتز بالله محمد وأمين الشرطة أحمد عبد الفتاح، وكلهم من قسم الأميرية، بعد ما كشفت تحقيقات النيابةإنهم أطلقوا الرصاص الحى على المتظاهرين قدام قسم الأميرية
بلدنا: أولى جلسات محاكمة أحمد عز وإبراهيم سالم
النهاردة كانت أول من جلسات محاكمة المتهمين أحمد عز صاحب مجموعة عز لحديد التسليح وأمين التنظيم في الحزب الوطني المنحل، وإبراهيم سالم وزير الصناعة الأسبق وخمسة من المسئولين في شركة الدخيلة للحديد والصلب، قدام محكمة جنايات الجيزة بتهمة التربح بغير حق والاضرار العمدي الجسيم بالمال العام، (قيمته ٥ مليار جنيه حاجة ببلاش كدة).. النيابة طالبت بتوقيع أقصى العقوبة والمحكمة أجلت لجلسة 1 أكتوبر اللي جاي.
بلدنا: تأجيل القضايا المطالبة بتطبيق قانون الغدر
لسة في المحاكم، بس المرة ديه في محكمة القضاء الإداري، اللي قرت النهاردة بتأجيل القضايا الأربعة المرفوعة قدامها للمطالبة بتطبيق قانون الغدر على رموز النظام السابق لجلسة 11 أكتوبر اللي جاي. المحامين أصحاب الدعوى أكدوا على ضرورة صدور القانون قبل لإنتخابات البرلمانية لضمان إستبعاد فلول الحزب الوطنى ورموز النظام السابق من المشاركة في الحياة السياسية، وأكدوا كدة بصريح العبارة إن الحكومة مش جادة في إقرار القانون فرد عليهم محامى الحكومة، بإن الحكومة سبق ووافقت على إقرار القانون وعدلت فيه التعديلات اللازمة وبعتته للمجلس العسكرى لإصداره في مرسوم.. وبالتالي القاضي أجل النطق بالحكم لحد 11 أكتوبر اللي جاي بالكتير، ولو المجلس العسكري ما أصدرش القانون لحد التاريخ دة، المحكمة هتنطق بالحكم.
بلدنا: جرافيتي على الجدار العازل أمام سفارة إسرائيل
تعالوا بقة نوصل لحد كوبري الجامعة نشوف بعينينا اللي عملوه ولاد البلد في الجدار العازل.
بلدنا: حكاية م. يوسف العشماوي المعتقل في السعودية
تعالوا نشوف ايه حكاية المهندس يوسف العشماوي المعتقل في السعودية من تلات سنين
بلدنا بالمصري: احتفال ضخم بعيد الفلاح 9 سبتمبر
بشرى للفلاحين في كل شبر على أرض مصر، المجلس الأعلى للقوات المسلحة كلف وزارة الزراعة واستصلاح الأراضي بالإعداد لأضخم احتفال بعيد الفلاح يوم الجمعة 9 سبتمبر، الموافق يوم جمعة «تصحيح المسار».. مع التأكيد على إنه من هنا ورايح هيكون احتفال سنوي وعيد قومي وأجازة رسمية.. الاحتفال هيكون السنة ديه في استاد القاهرة بحضور 120 ألف فلاح وعدد من الشخصيات العامة والحزبية والدينية وعدد كبير من وسائل الإعلام المصرية والعربية والعالمية!!!
بلدنا : عدم تنفيذ حكم رفع الحراسة عن نقابة المهندسين
تعالوا بقة نروح لحد نقابة المهندسين اللي حطوا صوابعهم في الشق من عدم تنفيذ حكم المحكمة برفع الحراسة عن النقابة، وغالباً ناويين على الاعتصام المفتوح في مقر النقابة من أول الأسبوع اللي جاي.
بلدنا بالمصري: عقبات على طريق الحرية
قانون تقسيم الدواير الانتخابية قوم الدنيا وما قعدهاش من قبل حتى ما يصدر بشكل رسمي، وقلب كل المواجع من أول قانون الأحزاب لحد قوانين مجلس الشعب والشورى، وفيه شبه اجماع بين القوى السياسية المختلفة على إن القوانين ديه هتجيب لنا برلمان لا هيمثل الشعب تمثيل حقيقي ولا هيعبر عن مطالب الثورة. ويمكن دة من ضمن الأسباب اللي دعت المركز الوطني لدعم الانتخابات ومؤسسة النقيب للتدريب ودعم الديمقراطية، لتنظيم مؤتمر باين من عنوانه: "عقبات على طريق الحرية".
بلدنا بالمصري: الذكرى السادسة لحريق بني سويف
وقبل الفاصل خلونا نعيش ونفتكر ولاد بلدنا اللي راحوا هدر في حريق بني سويف زي امبارح من 6 سنين.. لكن سبحان الله يشاء السميع العليم إن ذكراهم السادسة تعدي علينا في نفس اليوم اللي احنا بنحاكم فيه للمرة التالتة راس النظام اللي ماكانش عنده لا أهون ولا أرخص مننا!!!
مشجعي الأهلي: ولاء الداخلية ما زال لـ العادلي
عمار فؤاد رئيس رابطة مشجعي الأهلي والاشتباكات بين جماهير الأهلي وقوات الأمن عقب مبارة الأهلي وكيما أسوان في كأس مصر
بلدنا بالمصري: الجدل حول قائمة 6 ابريل لأحزاب الفلول
الحكاية وما فيها إن حركة 6 إبريل -- الجبهة الديموقراطية -- وحركة شباب من أجل الحرية العدالة، فاجئونا بقايمة طويلة عريضة فيها 8 أحزاب على الأقل، سموها أحزاب الفلول.. إيه حكاية الأحزاب ديه بالظبط ومين هم الفلول وهل ينطبق عليهم فعلاً وصف الفلول ولا لأ؟! ولو صحيح فعلاً أمال فين قانون الغدر؟! طب حتى لو هم فلول إيه الخطر في كدة؟! مش هي ديه الديمقراطية.. مش من حق كل مواطن في البلد ديه يأسس الحزب اللي في نفسه أو يشارك في الحزب اللي على هواه، والعبرة في النهاية في الصندوق مادام الانتخابات هتبقى حرة ونزيهة.. كل ديه أسئلة هنحاول نلاقي إجاباتها مع ضيوفنا النهاردة:
- طارق الخولى: المتحدث الإعلامى لحركة 6 إبريل "الجبهة الديموقراطية"
- د. صلاح حسب الله: وكيل مؤسسى حزب المواطن المصرى
- معتز محمد محمود: وكيل مؤسسى حزب الحرية.. وعضو مجلس الشعب السابق عن الحزب الوطني المنحل بدائرة قوص وأحد كوادر لجنة أمانة السياسات
- فريد زهران: عضو الحزب المصري الديمقراطي الاجتماعي وواحد من أعضاء في مؤتمر الوفاق القومي اللي خرج بتوصية من ضمن التوصيات بضرورة العزل السياسي لقيادات الحزب الوطني لمدة 5 سنين على الأقل
بلدنا: محاكمات المدنيين عسكرياً .. الرأي والرأي الآخر
خلونا نتفق في البداية إن الثورة ديه قامت لإن الشعب يريد: الحرية والعدالة الاجتماعية والكرامة الإنسانية، وكلها قيم لا يمكن تتحقق إلا بسيادة القانون على الكل مافيش حد أحسن من حد.. وسيادة القانون مش معناها بس الجزاء أياً كان واياً كانت الوسيلة، لكن معناها بالضرورة ضمن معاني تانية كتير: محاكمة عادلة قدام قاضي طبيعي.. وهنا مربط الفرس هل القضاء العسكري قضاء طبيعي؟ ويعني إيه أصلاً قضاء طبيعي؟ ولو هو قضاء طبيعي ليه الدنيا قايمة ومش قاعدة وبتنادي بعلو الصوت "لا للمحاكمات العسكرية للمدنيين"؟!!!
- اللواء/ راضي محمد علي: عضو هيئة القضاء العسكري سابقا
- المستشار/ أحمد الفقي: رئيس محكمة استئناف القاهرة
- الأستاذة/ راجية عمران: عضو مجموعة لا للمحاكمات العسكرية للمدنيين
- نور أيمن نور
ليست هناك تعليقات:
إرسال تعليق