بالمفتشر: إذا الشعب عايزها عيشة حرة وكريمة
يسعد مساكم وحلقة جديدة من بلدنا بالمصري، هنبدأها أولاً باعتذار واجب عن غيابنا عنكوا امبارح لأسباب إنسانية مالهاش أي علاقة بالسياسة ولا بالأمن ولا بحرية الرأي والتعبير ولا دياوله!!! دة أولاً.. أما ثانياً ونظراً لنفس الظروف، أنا كان عندي فرصة اقابل ناس كتير في وقت قصير منهم القريب ومنهم الغريب.. منهم الكبير ومنهم الصغير.. اللي ليه في السياسة واللي مالوش.. المتفائل والمتبت في الأمل بإيديه وسنانه، واللي الدنيا في عينه أضيق من خرم الإبرة.. منهم اللي شايل الثورة فوق راسه ومنهم اللي شايل من الأرض وحاطط فوق راسها.. منهم اللي حاسس إن الثورة اتنشلت منه ومستعوض فيها ربنا.. ومنهم اللي حاسس انها اتنشلت بس راسه وألف سيف ليحوش اللي وقع منه ويفضل ورا النشالين وشيوخ المنصر مهما طال الزمن!!! وكل واحد بقة وعلامه وكل واحد وصنعته وكل واحد وضميره وكل واحد حجته معاه!!! لكن سبحان الله ما فيش حد ييجي عند "الإعلام" إلا ويحسبن عليه وعلى سنينه وإيامه اللي مالهاش راس من رجل، ويطلع فيه العبر والقطط والفاطسة أشكال وألوان!!! وبرده كل واحد حجته معاه: اللي شايف إن الإعلام سايق فيها وعايز جنازة ويشبع فيها لطم وطوبة على طوبة خلي العركة منصوبة!!! ومنهم اللي شايف إن ما حد ضيع الثورة في خبر كان وكبس على نفسها وفطسها إلا الإعلام اللي راجع بالمستعجلة للست ريمة وعادتها القديمة من أول السم اللي في العسل لحد يا شاويش يا بوليس ويادي الخراب المستعجل!!! منهم اللي شايف إن الاعلام لابس نضارة سودة، بس مش سودة كفاية.. ومنهم اللي شايف إنها أسود من اللازم.. ومنهم اللي شايف إنه لابسها وردي مخطط بأبيض من غير أمارة وهكذا لحد ما كنت على وشك ادعي على اليوم اللي اشتغلت فيه الشغلانة ديه عمداً ومع سبق الإصرار وعن طيب خاطر.. وقعدت أسأل نفسي: " يا ترى يا هلترى بلدنا بالمصري فين من دة كله"؟!!! احنا مش عايزين جنازة ونشبع فيها لطم لاقدر الله.. وأكيد مش عايزين نضيع الثورة في شربة مية كفاالله الشر!!! ولا احنا غاويين نضارات من حيث الأصل، لكن عايزين نشوف من الغربال ستة على ستة واربعة عشرين قيراط... ما احناش عايزين نقلبها ضلمة لكن كمان ماحناش عايزين ندفن راسنا في التراب وكان الله بالسر عليم!!! وأكيد مش عايزين الخراب المستعجل، بس كمان مش ناويين نقف نتفرج على الخراب وهو جاي يتمخطر بالهداوة وعلى أقل من مهله ومستخبي ورا توب مش توبه وقدامه جنازة بتولول على حال البلاد والعباد ووراه زفة بتهلل لحيطان مايلة ولكل من خادها من قاصرها ومشي جنبها من سكات كافي خيره شره!!! النهاية.. لما لقيتني خلاص هيجيني لطف لقيتني بارفع ايديا للسما واقول: " يا رب.. يا رب انفخ في صورة إعلامنا واصلح حاله ونور بصيرته واكفيه شر الولولة والتهليل والحيطان المايلة واجعله سبب لصلاح حال البلاد والعباد".. لكن لحد ما يقضي الله أمراً كان مفعولا، لقيت عقل بالي بيقول لي بعلو الصوت_بيصبرني يمكن_: " بالإعلام أو من غيره.. إذا الشعب يوماً أراد الحياة فلابد أن يستجيب القدر_وجربناها وفلحت_.. فلو الشعب عايزها عيشة والسلام هيستجيب القدر من سكات ومن غير مآوحة، دة حتى غالي والطلب رخيص.. ولو الشعب عايزها عيشة حرة كريمة تليق بمقامه برده هيستجيب القدر من سكات ومن غير مآوحة بس الفرق إنه غالي والطلب غالي والغاوي بس هو اللي هينقط بطاقيته!!!
بلنا بالمصري: سحب كتب مبارك رئيس مصر
لكن على ما كل غاوي ينقط بطاقيته والشعب يقرر هو عايز إيه بالظبط، خلونا نروح لآخر أخبار بلدنا.. وآخر خبر على الأقل بالنسبة لنا، لإننا مش قادرين نمنع نفسنا من التفكير بإن بلدنا بالمصري كان ليه يد فيه بشكل أو بآخر. النهاردة وزير التربية والتعليم، الدكتور احمد جمال الدين موسى أمر بسحب 80 الف كتاب من كتب التاريخ والتربية الوطنية المقررة على مرحلة الثانوية العامة.. إما لإنها بتضم صور للرئيس المخلوع أو عبارات من أقواله المأثورة، واللي اعتبرها وزير التعليم نوع من "المجاملة للرئيس المخلوع" على حد تعبيره.. القرار اتاخد مش بس بعد ما كشفنا في بلدنا بالمصري عن عينة من الكتب ديه، لكن كمان بعد ما كترت شكاوي المدرسين وأولياء الأمور منها، لإنها حسب ما قالوا فيها مغالطات تاريخية ليها تاثير سلبي على نوع المعلومة اللي بتوصل للطلبة. على ما فهمنا، إن الكتب ديه اتطبعت فى صيف 2010، قبل الثورة، وما كانتش استخدمت في السنة الدراسية اللي فاتت لأنها كانت فايضة عن حاجة الطلاب، فتم الاستعانة بيها السنة ديه لتوفير 120 مليون جنيه قيمة طبع النسخ الجديدة.
بلدنا بالمصري: إضراب المعلمين .. الصورة مش واضحة
بعد يوم واحد من قرار المعلمين المضربين تعليق إضرابهم لمدة أسبوع على الأقل، كمهلة للحكومة لدراسة مطالبهم ووضع جدول زمني لتحقيقها، الصورة إلى حد ما مش واضحة.. أولاً لسة فيه معلمين ومدارس مضربين في عدد من المحافظات وإن كانت بنسب أقل بكتير، بدليل إن محافظ كفر الشيخ هدد المدارس المضربة وعددها 3 حسب تقديره بإنه هيقفلها وينقل التلاميذ لأقرب مدارس مش مضربة وهينقل المعلمين خارج إدارة كفر الشيخ التعليمية.. لكن في نفس الوقت، وزير التربية والتعليم أعلن إن مجلس الوزرا وافق على 90%من مطالب المعلمين، وأولهم فصل مكافاة الامتحانات عن حافز الإثابة، غير إنه تم تثبيت 13 الف معلم مساعد وتوفيق اوضاع 123 الف معلم بالمكافاة، بالإضافة لاعتماد 1.7 مليار جنية لصرف حافز المعلمين باثر رجعى من أول يوليو. في نفس الوقت، كان فيه النهاردة اجتماع لوزير التربية والتعليم مع ممثلين عن حركات المعلمين وتحديداً حركات "معلمون بلا نقابة"، و"تنسيقية معلمى مصر"، ومعلمو الإخوان المسلمين، لكن النقابة المستقلة للمعلمين واتحاد معلمى مصر، اللي هم أبرز جهتين دعوا للإضراب، رفضوا حضور اللقاء.. إيه اللي بيحصل بالظبط دة اللي هنحاول نستفسر عنه من كل الأطراف المعنية.
بلدنا بالمصري: تلبية مطالب عمال ميناء العين السخنة
الإضراب اللي فعلاً عدى على خير امبارح بالليل، هو إضراب عمال مينا العين السخنة بعد ما شركة مواني دبي قررت فتح المينا مرة تانية بعد ما قفلته من يوم الخميس اللي فات وبعد ما قدر العمال يوصلوا لاتفاق بتلبية مطالبهم بعد جلسة تفاوض شارك فيها وفد من النقابة المستقلة لعمال المينا واثنين من مجلس إدارة الشركة واللوا محمد عبدالقادر رئيس هيئة موانئ البحر الاحمر واللوا محمد عبدالمنعم محافظ السويس.
بلدنا: إضراب شامل للنقل العام بالقاهرة
نروح لإضراب عمال هيئة النقل العام.. الإضراب لسة مستمر وتحول النهاردة لإضراب شامل في القاهرة الكبرى بعد مشاركة 25 جراج. دة غير إن عمال أوتوبيس القاهرة الكبرى انضموا النهاردة كمان لعمال هيئة النقل في وقفتهم الاحتجاجية التالتة قدام مجلس الوزرا. والمطالب هي هي ما بين مطالب بتحسين الأوضاع الوطيفية والمالية ومطالب بالتطهير من رموز الفساد. في نفس الوقت في11 سواق مضربين عن الطعام من امبارح في جراج المظلات، ووزير القوى العاملة، الدكتور أحمد البرعى، لغى اجتماعه النهاردة مع العاملين في الهيئة بحضور محافظ القاهرة ورئيسة هيئة النقل العام المهندسة/ منى مصطفى بعد رفض العاملين تعليق الاعتصام مقابل التفاوض.
بلدنا بالمصري: تظاهر مصابوا الثورة أمام مجلس الوزراء
لكن الحقيقة إن عمال هيئة النقل العام في نهاية وقفتهم وسعوا السكة والشارع كله، لعدد من مصابين الثورة تظاهرو هم كمان النهاردة قدام مجلس الوزرا لأسباب مختلفة هنعرفها بالتفصيل .... فيه عدد من من أسر الشهدا والمصابين اتقدموا النهاردة ببلاغين للنائب العام اتهموا فيه اللواء منصور العيسوي وزير الداخلية بالسب والقذف في حق أولادهم، بعد ما وصفهم بـ"البلطجية" في أكتر من حوار مع وسائل الإعلام المختلفة.. وتحديداً تصريحاته اللي أكد فيها اكتر من مرة أن "كل من تم اطلاق الرصاص عليه قدام أقسام الشرطة فهو بلطجي مش شهيد"
بلدنا بالمصري: الداخلية على الحياد في الإنتخابات
أما عن دور وزارة الداخلية واستعداداتها للانتخابات، خاصة وإن كله كوم وهاجس الدور دة كوم تاني خالص، فوزير الداخلية، اللوا منصور العيسوي، بشرنا النهاردة بإن الداخلية مش هتزور الانتخابات المرة ديه لإنها هتقف على الحياد وعلى مسافة واحدة من كل التيارات والقوى السياسية بدزن التدخل في العملية الانتخابية.. وإن دور قوات الأمن هيكون مقتصر بس على تأمين اللجان من الخارج إلا في حالة استدعائها من رئيس اللجنة. وعود وزير الداخلية جت خلال اجتماعه مع عدد من مساعدين الوزير ومديرين الامن والادارات المختلفة لمناقشة استعداد الوزارة للانتخابات، وأكد خلاله إن الجدوال الانتخابية هتكون دقيقة وخالية من الاسماء الوهمية، نتيجة الاستعانة بالرقم القومي.. وطالبهم من ناحية تانية بتكثيف الحملات الامنية خاصة في المناطق المعروف عنها إنها شديدة الاجرام، والتصدي لاي اعمال ترويع اوبلطجة، والاهتمام بالمواطن، دون تمييزفي تطبيق القانون.. وطالبهم بالتيسير علي المواطنين في الحصول علي الخدمات الجماهيرية من قطاعات الوزارة المختلفة. وشدد عليهم في نهاية الاجتماع بضرورة " ضبط النفس في كل المواقف والعمل باحترام لكسب احترام الناس".
بلدنا بالمصري: حملة الجيزة لإعادة الإنضباط للشارع
تعالوا بقة بالمرة نوصل لجد الجيزة نتابع الحملة الموسعة اللي قامت بيها أجهزة الأمن التابعة لمديرية أمن الجيزة لإعادة الانضباط للشارع.
بلدنا: القوى السياسية وتعديلات قانون الإنتخابات
دلوقتي احنا عارفين من امبارح إن مجلس الوزرا وافق على تعديلات جديدة على قوانين مجلس الشعب والشورى _هنناقشها ونحاول نفهمها بالتفصيل وبالهداوة كدة في فقرتنا اللي جاية_ لكن أهممها وباختصار إن التقسيمة الجديدة بين نظام القايمة والنظام الفردي هتبقى التلت للفردي والتلتين للقايمة بدل النص بالنص.. وإن القوايم هتكون قوايم حزبية والفردي بس للمستقلين.. الجديد النهاردة هي ردود أفعال القوى السياسية المختلفة ما بين الرفض القاطع أو القبول على مضض.. فلحد م ييجي أوان فقرتنا عن التعديلات هنتعرف سريعاً على عدد من ردود الأفعال المختلفة
بلدنا بالمصري: إستدعاء جمال مبارك لتحذيره بالتأديب
على عهدة المصري اليوم، فيه قيادة من قيادات وزارة الداخلية استدعت النهاردة الصبح المتهم جمال مبارك من زنزانته وحذرته لو عمل كدة تاني ما فيش قدامه غير زنزانة التأديب والحبس الانفرادي..
بلدنا بالمصري: جلسة محاكمة المفسدين في الأرض
النهاردة كان فيه جلسة من جلسات محاكمة المتهمين فى قضية تخصيص أراضى الدولة أو "المفسدين في الأرض" على حد وصف النيابة في مرافعتها قدام محكمة جنايات القاهرة واللي طالبت فيها بتوقيع أقصى العقوبة.
بلدنا بالمصري: تحقيقات تعذيب سيد بلال حتى الموت
نيابة غرب الكلية في اسكندرية استمرت امبارح تقريباً لحد نص الليل في تحقيقاتها في واقعة تعذيب الشاب السلفي سيد بلال حتى الموت.. النيابة استمعت لأقوال اللوا طارق الموجى، الظابط السابق في جهاز مباحث امن الدولة اللي كان مسؤول عن التحريات فى قضية كنيسة القديسين ولأقوال 10 من الشهود اللي أكد عدد منهم إن عملية التعذيب تمت في مكتب أمن الدولة في مقر مديرية أمن اسكندرية القديم.
بلدنا بالمصري: تأجيل قضية تفجير كنيسة القديسين
من ناحية تانية، محكمة الأمور المستعجلة قررت امبارح تأجيل جلسة قضية تفجير كنيسة القديسين لجلسة يوم 13 نوفمبر اللي جاي لتقديم المستندات الخاصة بالقضية. الدعوى القضائية كان رفعها الأستاذ/ جوزيف ملاك ضد رئيس مجلس الوزراء الدكتور عصام شرف ووزير الداخلية الحالى اللواء منصور العيسوى والمستشار عبد المجيد محمود النائب العام بيتهمهم فيها بالتباطؤ فى القضية.
بلدنا بالمصري: دور الإعلام بعد الثورة
احنا لسة في الأول كنا بنتكلم بالمفتشر عن احساس الناس ناحية الإعلام ودوره وخصوصاً بعد الثورة، وكان واضح الإحساس في مجمله كدة مش ولابد.. تعالوا بقة نشوف المتخصصين رأيهم إيه وبيشوروا علينا بإيه.
بلدنا بالمصري: إتحدى وإحلم .. صغار رواد الأعمال
وبما إننا في الجامعة الأمريكية، تعالوا نحضر جزء من المسابقة اللي نظمتها جماعة رواد لصغار رواد الأعمال تحت عنوان: "اتحدى واحلم"
بلدنا بالمصري: الفلاحين قالوا إيه لـ البرادعي
تعالوا بقة قبل الفاصل نوصل لحد دار الخدمات النقابية والعمالية نسمع ونشوف الفلاحين قالوا إيه للدكتور محمد البرادعي وقال لهم إيه غير إن ثورتنا ديه مش ممكن تنجح من غير عدالة اجتماعية.
بلدنا بالمصري: محاولة لفهم تعديلات قانون الإنتخابات
احنا عارفين اننا تعبنا ويمكن فيه كمان اللي زهق وروحه بقت في مناخيره وفاض بيه من كتر الكلام عن الانتخابات وعن قوانين الانتخابات وعن مواعيد الانتخابات وعن اللي هيحصل في الانتخابات وهكذا.. بس اللي احنا فيه ديه ينطبق عليه بالثلث رأي المثل: "وجع ساعة ولا كل ساعة".. نتعب شوية ونذاكر كويس ونشغل مخنا ونفهم إيه اللي لينا وإيه اللي علينا، عشان في النهاية احنا "كمواطنين بدرجة ناخبين" احنا اللي هنختار واحنا اللي هنتحمل نتيجة اختيارتنا.. وفي اللحظة ديه ما عندناش اختيارات تانية غير إننا نكون قد المسؤولية.. وعشان نكون قدها لازم نفهم.. فبغض النظر عن ردود الأفعال المختلفة على التعديلات الأخيرة لقوانين انتخابات مجلس الشعب والشورى ما بين مؤيد ومعارض أو راضي بقضا أخف من قضا.. كل اللي احنا هنعمله النهاردة اننا هنحاول نفهم بالهداوة التعديلات ديه معناها إيه وممكن تاخدنا على فين.. وهنستعين على الموضوع دة بالدكتور على الصاوي: استاذ العلوم السياسية بجامعة القاهرة
ليست هناك تعليقات:
إرسال تعليق