بالمفتشر: احنا رايحين مكان ما نعوز وننوي ونشد الرحال
دلوقتي احنا منين ما نروح نلاقي على لسان الناس وفي حباب عينيهم أسئلة مالهاش عدد من عينة: "هو لسة فيه أمل؟! طب بأمارة إيه؟!".. " هو بكرة أحسن؟! طب بأمارة إيه؟!".. "هي الثورة لسة عايشة ولا وقعت مننا ولا حدش سما عليها؟!!! وغيرها من الأسئلة اللي ما بتفارقش الناس اللي لسة عشمانة في بكرة وبتتعلق في القشاية بإيديها وسنانها قبل اليأس ما يغرقها ويشل حركتها ويضيق الدنيا في وشها... والناس دول مش طالبين من الله ولا يكتر على الله غير هي بس "أمارة" على إن بكرة جاي ولو بعد حين!!!... وناس تانية خلقها خلاص داق وفاض بيها ومافيش على لسانها وفي حباب عينيها غير " كفاية بقة.. البلد اتشقلب كيانها وجاي عاليها واطيها، وأمنا الغولة وأبو رجل مسلوخة مستنيينها ورا كل باب بالمرصاد وعصاية المقشة وغطا الحلة.. وآدي اللي خدناه من الثورة!!! وفي الحالتين، دول ودول عاشقين جمال البلد ديه حتى في الضلمة وقلبهم عليها ويفدوها برموش عينيهم بس كل شيخ وله طريقة!!! لكن في كل الحالات "لولا الناس" ما كانت الثورة قامت لها قومة.. ومن غيرهم حتماً ولابد هتجيب ورا وماعادت هتقوم لها ولا هتقوم لنا قومة!!! فسؤال الأول للناس التانيين: " بأمارة إيه البلد بتخرب؟! بأمارة ما كانت عمرانة بحس بأهلها اللي كانوا واخدين حقوقهم على داير الحق والمليم؟!!! بأمارة ما كانت العجلة إياها مقطوع نفسها من كتر اللف والدوران والانتاج على قفا من يشيل مكفينا وزيادة؟! بأمارة ما كانت نفس العجلة إياها ديه مش دايسة للعمال على طرف وهارساهم ولا مشحطاطهم على كل رصيف شوية ولا حياة لمن تنادي؟!!! بأمارة ما كانت راسنا مرفوعة وبناكل اللقمة بعرق جبيننا لا ذل ولا مرمطة؟!!! ولا بأمارة ما كانت أمنا الغولة أحن علينا من روحنا.. وأبو رجل مسلوخة واقف عليها ددبان يحمينا ويحرسنا من غير ما يبع ويشتري فينا؟! ولا بأمارة ما كانت أيامنا بيضة وماهياش اسود من قرن الخروب واملنا في بكرة كبير ومالوش آخر؟!!! القصد.. هي كلمة ورد غطاها لدول ودول ولكل مين بيسأل "احنا رايحين على فين وبأمارة إيه"؟!!! احنا رايحين مكان ما نعوز وننوي ونشد الرحال.. لو عايزين نخطي لقدام مرفوعين الراس مهما كان التمن.. هيحصل وماحدش هيقدر يقف قدامنا.. ولو تعبنا وماعدناش قادرين نستحمل _مع إننا ياما استحملنا - وما احناش قد التمن وماعندناش مانع نرجع تاني نرضى بقليلنا ونمشي جنب الحيط ونوطي راسنا، بس ناكلها بدقة وأهوه ضل "خيال المآتة" أحسن من مافيش.. صدقوني وماليكوا علي حلفان: هيحصل ومش ناخد في إيد حد غلوة ومحبب على قلب ناس ياما عمالة تهب وتدب عشان يشوفونا راجعين ايد ورا وايد قدام بنجرجر في رجلينا ووراها الخيبة القوية وبنقول: "حقي برقبتي وتوبة من ديه النوبة"؟!!! فيا أهالي المحروسة الكرام: انتوا الأمارة اللي مافيش غيرها وانتو الخير والبركة واللي انتوا عايزينه هيكون.. حطوا عقلكوا في راسكوا وارفعوها فوق وكونوا قد التمن.. أو خدوها من قاصرها وحطوا وشكوا في الأرض من تاني، بس خليكوا عارفين إنه برده كل شئ بحسابه.. مافيش حاجة كدة بلوشي ولا شكك.. وانتو وشطارتكوا بقة!!! اللهم ما بلغت اللهم فاشهد!!
نروح بقة لمحاكمة الرئيس المخلوع وأعوانه بتهمة قتل الثوار.. محكمة جنايات القاهرة بدأت من امبارح الجلسات العلنية مرة تانية لفض الأحراز، بعد 3 جلسات سرية لسماع شهادة: اللواءات عمر سليمان ومنصور العيسوي ومحمود وجدي، وقبل جلستين تانيين هيكونوا بالتأكيد جلسات سرية ومحظور النشر فيها يوم 24 و25 لسماع أقوال المشير حسين طنطاوي والفريق سامي عنان... الأحراز اللي فضتها المحكمة امبارح والنهاردة عبارة عن مجموعة من الفيديوهات لأحداث مختلفة من أيام الثورة.. وعلى قد ما الفيديوهات اللي اتعرضت امبارح، ادت بصيص أمل في امكانية اثبات التهم على المتهمين، خاصة إن من ضمنها لقطات لأشخاص مسلحين فوق سطح وزارة الداخلية وسطح بيت تاني قدامها واسطح اماكن تانية صعب تحديدها من خلال الفيديوهات.. ومعظم مانشيتات الجرايد خرجت النهاردة بتتكلم عن القناصة اللي قتلوا المتظاهرين بالصوت والصورة.. لكن دة كان امبارح، بالعكس بقة النهاردة، فيه حالة من خيبة الأمل سيطرت على معظم اللي حضروا سواء من الصحفيين أو من محامين المدعين بالحق المدني، لدرجة إن فيه منهم وصفوا الفيديوهات اللي عرضتها المحكمة النهاردة بإنهم مجرد "قصقصة".
بلدنا: انسحاب معظم محامين حق الشهداء من جلسة اليوم
انسحاب معظم المدعين بالحق المدني عن أسر شهداء ومصابي الثورة من جلسة محاكمة مبارك اليوم مع أ. أسعد هيكل عضو لجنة الحريات بنقابة المحامين
بلدنا بالمصري: ضوابط وضمانات استخدام قانون الطوارئ
قبل ما نكمل المحاكمات، آخر وأهم خبر هو الاجتماع اللي تم النهاردة بين ممثلين عن 43 حزب سياسي وبين أربعة من قيادات المجلس العسكري، الفريق سامي عنان رئيس الأركلن ونائب رئيس المجلس واللواءات مختار الملا واسماعيل عتمان وممدوح شاهين.. الهدف الرئيسي من الاجتماع باختصار هو الوصول لصيغة محددة لانهاء الفترة الانتقالية وتسليم السلطة لسلطة مدنية منتخبة في جدول زمني باين له ملامح وبنظام انتخابي يضمن لمصر تمثيل برلماني يليق بمقامها بعد الثورة.. دة باختصار شديد جداً لكن التفاصيل كلها هنناقشها في فقرتنا اللي جاية على طول بعد آخر الأخبار.. وغالباً إنه من ضمن المطالب الرئيسية اللي عرضتها الأحزاب النهاردة على المجلس المطالب الخاصة برفض تفعيل قانون الطوارئ وتمديد فترة العمل بيه وهنعرف برده وصلوا لإيه في الموضوع دة في فقرتنا اللي جاية.. لكن مؤقتاً، وزارة الداخلية اصدرت بيان النهاردة_يمكن من باب التطمين_ شرحت فيه ضوابط وضمانات تطبيق قانون الطوارئ.. وكعادة بيانات وزارة الداخلية من قديم الأزل، البيان بيبدأ ب" صرح مصدر مسؤول في وزارة الداخلية بأن معانا الاستاذ ناصر أمين عضو المجلس القومي لحقوق الانسان
بلدنا بالمصري: ضابط أنقذ سيدة بعد دفنها
معلش وقبل ما نرجع للمحاكمات، فيه خبر غريب جداً عن ظابط في المنيا انقذ واحدة ست بعد ما جوزها دفنها حية.. الحكاية بدأت ببلاغ لمدير أمن المنيا من مأمور مركز شرطة مطاي، بيتهم تاجر أدوات منزلية بخنق زوجته ودفنها في المقابر بعد ما اكتشف خيانتها ليه.. الكلام دة كان في نص الليل، والظاهر ان فيه تعليمات للظباط بعدم المعاينة في ساعة متأخرة.. لكن لإن الست ديه مكتوب لها عمر جديد، الرائد احمد صالح رئيس مباحث المركز، صمم يعاين الجثة في المقابر في ساعتها، وبمجرد ما فتح الست مسكت فيه وطلبت منه ينقذها.. وقد كان.. وربنا كتب لها عمر جديد على أيده وكتب له هو كمان عمر جديد بعد الخضة ديه.
بلدنا بالمصري: سجن زهير جرانة 3 سنوات
نرجع للمحاكمات، النهاردة صدر حكم جديد على رمز من رموز النظام السابق ووزراءه.. حكمت المحكمة بالسجن 3 سنين على وزير السياحة السابق زهير جرانة في قضية إصدار ترأخيص لشركات سياحية بالمخالفة لقرار بوقف التراخيص.
بلدنا بالمصري: محاكمة أنس الفقي - 18 سبتمبر 2011
لسة في نفس المحكمة، محكمة جنايات القاهرة اللي كانت بتحاكم النهاردة كمان وزير الإعلام السابق، أنس الفقي بتهمة اهدار المال العام بالاضافة لاولى جلسات قضية قتل المتظاهرين في بور سعيد.
بلدنا بالمصري: غالي يتنقل بين قطر والإمارات
طيب دول عدد من رموز النظام السابق اللي ما لحقوش ياخدوا ديلهم في سنانهم في الوقت المناسب زي غيرهم وعلى رأسهم: وزير المالية الأسبق يوسف بطرس غالي مثلاً.. وآخر حاجة كنا سمعناها إنه كان في قطر وإنه ساب قطر وطلع على أسبانيا، لكن فيه تاكيدات النهاردة من مصلحة الأمن العام بأن السلطات المصرية والإنتربول المصرى ما جاتلهاش اي معلومات عن معلومات عن سفر يوسف بطرس غالى لأسبانيا وأن التحريات الإنتربول بتأكد على إنه لسة في قطر وإنه بيتنقل بشكل مستمر ما بين قطر والإمارات.
بلدنا بالمصري: بيان شركة حديد عز بعد سجن أحمد عز
المهندس رشيد محمد رشيد، وزير التجارة والصناعة الأسبق واحد من المتهمين في قضية تراخيص الحديد واللي حكمت فيها المحكمة يوم الخميس اللي فات بالسجن المشدد على المتهمين التلاتة في القضية وحكمت بسحب الرخصة من اربع شركات من ضمنهم بالتأكيد حديد عز.. والحكم دة، لسة فيه جدل كبير حوالين تفسيره وحوالين مدى تأثيره مش بس على سوق الحديد في مصر وعلى سوق العقارات عموماً، لكن كمان على مصير العمالة في الشركات ديه وعلى وضع البنوك اللي اقرضت الشركات ديه بالمليارات وإيه اللي يضمن انها تسترد فلوسها وغيرها من الأسئلة اللي هنحاول نجاوب عليها بالتفصيل في فقرتنا الأخيرة.. لكن مبدئياً: شركة حديد أصدرت بيان النهاردة أكدت فيه إن الأحكام اللي صدرت ضد رئيس مجلس إدارتها السابق أحمد عز لا تتعلق بالنشاط القائم للشركات وإنتاجها الحالى، إلا أنه من المتوقع أن يؤثر بشكل مباشر وغير مباشر على شركة حديد عز وشركاتها التابعة، بالنسبة لاستثماراتها المستقبلية.. ولذلك ستتحرك الشركة وشركاتها التابعة على عدة محاور أهمها: دراسة الخيارات القانونية المتاحة واتخاذ الإجراءات اللازمة لمواجهة الضرر الناتج عن الحكم، وإعادة النظر فى الاستثمارات المستقبلية التى يتم البدء فى تنفيذها لتحديد مدى الحاجة لتجميدها مؤقتا وإعادة دراسة هذه الاستثمارات فى ظل الظروف الاقتصادية السائدة فى حينه. كل دة معناه إيه؟! في فقرتنا الأخيرة بقة إنشاءالله
بلدنا بالمصري: إضراب المعلمين بياخد حده يوم عن يوم
نظرياً، المدارس دخلت امبارح والمفروض إن السنة الدراسية بدأت.. لكن عملياُ الدراسة لسة ما بدأتش ومش باين هتبدأ امتى وازاي، خاصة وإن إضراب المعلمين بياخد حده يوم عن يوم، ووصل تقريباً لنسبة 50% في معظم المحافظات.. وفيه أخبار بتتكلم عن 100% نسبة الإضراب في أسوان وبني سويف والمنيا وسوهاج.. وبالتأكيد الأمر ما يسلمش من مناوشات ويمكن مشادات كمان بين الأهالي وبين المعلمين.. لكن كل دة برة وبعيد عن المدارس اللي زارها وزير التربية والتعليم بمناسبة بداية السنة الدراسية الجديدة "نظرياً".
بلدنا بالمصري: مدرسة المتفوقين الثانوية في 6 أكتوبر
بعد اللفة ديه على المدارس، تعالوا نروح لحد مدرسة في 6 أكتوبر، اسمها مدرسة المتفوقين فى الشهادة الاعدادية من على مستوى الجمهورية.. إيه جكايتها بالظبط في التقرير اللي جاي.
بلدنا بالمصري: منع سير التوك توك في شوارع القاهرة
بشرى لأهالي العاصمة وتحذير لسواقين التوك التوك، من هنا ورايح ممنوع منعاً باتاً سير التوك توك في شوارع القاهرة بحكم قانون المرور اللي هتفعله الإدارة العامة لمرور القاهرة، بتوصية من الدكتور عبد القوي خليفة محافظ القاهرة. وهيتم التنسيق بين الأحياء وشرطة المرافق لظبط التوك توك المخالف والتحفظ عليه، علماً بإنه ما صدرش لحد النهاردة ولا ترخيص واحد لأي توك توك بالسير في شوارع القاهرة.
بلدنا بالمصري: ظهور الحوت الأحدب عند جزيرة مجاويش
امبارح حصل حادث فريد من نوعه على حد وصف خبراء البيئة والمحميات.. عند حزيرة مجاويش قدام ساحل الغردقة، ظهر كائن بحري نادر هو الحوت الأحدب.. والحقيقةإنهم كانوا اتنين: أم طولها 10 متر وابنها طوله 3 متر.. والاتنين السياح اللي كانوا موجودين في المنطقة قدروا يشوفوهم بعينيهم.
بلدنا بالمصري: فادي بيتحاكم عسكرياً على حاجه مشافهاش
من ضمن المطالب اللي المفروض تكون كمان اتعرضت على المجلس النهاردة، موضوع وقف المحاكمات العسكرية للمدنين ويمكن كمان وقف المحاكمات الاستثنائية بكل أشكالها.. لكن بعيداً عن المطالب وعن المسائل القانونية وحتى الحقوقية، ورا كل محاكمة عسكرية أو استثنائية فيه حالة انسانية تقطع القلب.. زي حالة والدة فادي مثلاً.. فادي طالب في معهد السينما قسم تصوير، واتقبض عليه في أحداث السفارة يوم الجمعة 9/9، مع إن أهله وأصحابه وحتى مكان شغله كلهم بيأكدوا إنه ماكانش حتى من ضمن المتظاهرين اللي كانوا عند السفارة في الليلة ديه.
بلدنا بالمصري: كامب ديفيد .. هنروح على فين
وقبل الفاصل وبمناسبة ذكرى توقيع معاهدة السلام مع إسرائيل، تعالوا نشوف احنا كنا فين وبقينا فين، يمكن نفهم هنروح على فين.
بلدنا : اجتماع المجلس العسكري ورؤساء الأحزاب المصرية
بعد اجتماع ممثلين الأحزاب السياسية بقيادات المجلس العسكري النهاردة: نستبشر خير والصورة هتطلع حلوة ولا اللي حضروا الاجتماع ليهم رأي تاني؟!!!
- الدكتور/ أحمد سعيد: مسئول التثقيف السياسي في حزب المصريين الأحرار
- الدكتور/ مصطفى النجار: عن حزب العدل
- الأستاذ/ أنور عصمت السادات: حزب الإصلاح والتنمية
بلدنا بالمصري: تداعيات سحب ترخيص 4 شركات حديد
إيه العمل بعد ما حكمت المحكمة بسحب الرخصة من أربع شركات للحديد مرة واحدة وإزاي الحكم دة يبقى نعمة مش نقمة.. وهنستعين على اجابته بضيفنا النهاردة
- الكاتب الصحفي الأستاذ/ مصباح قطب
ليست هناك تعليقات:
إرسال تعليق