برنامج بلدنا بالمصرى تقديم ريم ماجد على قناة OTV حلقة الثلاثاء 13/9/2011 يوتيوب كاملة
كلام في سركوا: الغولة رجعت تاني
هنبدأها ورزقنا على الله من هنا ورايح.. تطلع بقة بالمفتشر تطلع كلام في سركوا، المهم إنها تطلع.. حاكم احنا صوتنا عمره ما كان واطي، في عز العين الحمرا والسيخ المحمي والعصايا ام مسمار.. لكن لإن الصوت "اللي مش واطي" غالباً بيصيب.. عوايده كدة.. بس من عوايده كمان إنه بيدوش وبيجيب خوتة ووجع دماغ!!! المهم.. وعشان ما طولش عليكوا أنا عايزة بس احكي لكوا منظر ليه العجب بقى له حبتين بيجيني في المنام يوماتي ليلاتي.. قال إحنا خير اللهم اجعله خير لسة يا دوب خارجين من تحت ضرس غولة وعينها حمرا.. خلعناه والحمد لله.. صحيح بطلوع الروح لكن على مية بيضة وزي الفل وخارجين عال العال، صحيح مش صاغ سليم، لكن على رجلينا.. وحلوين زي البدر في ليلة تمامه، وراسنا مرفوعة في العلالي لما لحد النجوم اللي كنا بنشوفها في عز الضهر!!! لحد هنا وحاجة جميلة مافيش بعد كدة واللي جي اجمل ومتعشمين في بكرة عشم كبير مالوش آخر.. بشوية صبر على شوية همة نوصل لحد عنده وكل شئ بأوان.... قوم إيه.. احنا لسة بنقول يا هادي يا رب ويا دوب هنبتدي المشوار، وعيننا ما تشوف إلا النور إشي حوادايات على مطبات على حفر وربنا يسلم ويجيب العواقب سليمة.. بس برده احنا والحمد لله قدها وقدود ويشاء السميع العليم إننا نطلع من كل حفرة ودحديرة وراسنا وألف سيف لنكمل المشوار والله المستعان.. لحد هنا وبرده ماشي الحال.. لكن اللي زاد وغطى بقة وهنا مربط الفرس والمنظر اللي ليه العجب.. قال كل ما نخطي خطوة لقدام نتكعبل في خط أحمر غريب الشكل: مرة بالطول ومرة بالعرض.. مرة بالهداوة ومرة على مشمنا.. مرة بالتي هي أحسن ومرة مترح ما تحطوا راسكوا حطوا رجليكوا... النهاية.. في عز المتاهة المخططة بأحمر ديه، قال خير اللهم اجعله خير، قال احنا سامعين صوت عالي بس زي ما يكون جاي من بعيييييد.. وما فيش على لسانه غير هم كلمتين: " يا أهالي المحروسة الكرام.. اسمعوا واعوا والحاضر يعلم الغايب بإنه من هنا ورايح: انتوا بس "الخط الأحمر" اللي "من هنا ورايح" ما يصحش أبداً ينداس له على طرف"!!! وصحيت من النوم!!!
بلدنا : آسف يا ريس تنشر شهادة عمر سليمان
بس على ما الحلم بقة يتفسر خلونا في آخر أخبار بلدنا، وآخر خبر، مشهد لحد وقت قريب أوي ماكانش ممكن يخطر على بال حد ولا حتى يجرؤ حتى يحلم بيه.. الرئيس المخلوع وشركاه في القفص متهمين بقتل الثوار المصريين.. ورئيس مخابراته ونائبه الأول والأخير والوحيد، شاهد قدام المحكمة.. حيث إن الجلسة سرية زي ما احنا عارفين ومحظور النشر فيها_فالحاجة الوحيدة اللي احنا متأكدين إن اللوا عمر سليمان قالها هي إنه حلف بالله العظيم يقول الحق"!!! احنا مش حقنا النهاردة نعرف أي تفاصيل عن الجلسة لكن بالتأكيد من حقنا نعرف تفاصيل عن أجواء الجلسة
بلدنا : جلسة محاكمة متهمين موقعة الجمل -- 13 سبتمبر
النهاردة كمان كانت جلسة من جلسات محاكمة المتهمين في موقعة الجمل.. ولو إن رئيس المحكمة اعترض النهاردة على الإسم دة وقال "مافيش حاجة اسمها موقعة الجمل.. موقعة الجمل ديه كانت على أيام سيدنا علي بس"!!!
بلدنا: جلسة قضية تصدير الغاز لإسرائيل -- 13 سبتمبر
لسه فى محكمة جنايات القاهرة في التجمع الخامس لكن المرة دى فى الدايرة اللى بتنظر في قضية تصدير الغاز لاسرائيل، وزيها زي موقعة الجمل، دخول الصحفيين والإعلاميين والكاميرات ما كانتش بالساهل أبداً، دة إن دخلوا.
بلدنا بالمصري: آراء المصريين في محاكمة رؤوس النظام
بالمرة بقة تعالوا كدة نطل طلة على "آراء المصريين فى محاكمة رموز النظام السابق".. دة استطلاع رأي أجراه مركز المعلومات ودعم اتخاذ القرار التابع لمجلس الوزرا، وأعلن النهاردة عن نتايجه.. أهمها: 67% من المواطنين عندهم رغبة في محاكمة الرئيس المخلوع،مقابل 13% بس رافضين المحاكمة و20% مش محددين موقفهم أصلاً.
بلدنا بالمصري: الإعتداء على مأمور بولاق الدكرور
العقيد محمود شاكر، يمكن تكونوا حضراتكوا تابعتوا من امبارح الليل، هو مأمور قسم شرطة بولاق الدكرور.. فيه 25 بلطجي قطعوا طريقه امبارح أثناء جولة ليه في منطقة بولاق الدكرور، ووقفوا البوكس اللي كان راكبه واعتدى عليه وعليه السواق اللي كان معاه وسرقوا منه 4 طبنجات ميري غير متعلقاته الشخصية هو والسواق.. لحد امبارح بالليل، كانوا الاتنين في المستشفى وحالتهم ما كانتش مستقرة.. والنهاردة نيابة بولاق الدكرور،أحالت الواقعة للنيابة العسكرية.
بلدنا بالمصري: مواقف من الأحداث المصرية الراهنة
تعالوا بقة نوصل لحد مقر جريدة الشروق، اللي أعلن منه عدد من الائتلافات والقوى السياسية عن موقفهم من الأحداث الأخيرة من أول الوزارة والسفارة والمديرية ولحد تفعيل بنود قانون الطوارئ وتعديلها وتمديد العمل بيها.
بلدنا بالمصري: إخلاء سبيل مهندس بث الجزيرة مباشر مصر
آخر تطورات أزمة قناة الجزيرة مباشر مصر، إن النيابة بعد ما أخلت امبارح سبيل المهندس إسلام البنا، مهندس البث اللي كان تم القبض عليه يوم الحد، بضمان محل اقامته، بتهمة بث قنوات فضائية بدون ترخيص، النيابة أمرت النهاردة بسرعة ضبط وإحضار صاحب الشركة المسؤولة عن تزويد قناة الجزيرة مباشر مصر، بخدمة البث المباشر.
بلدنا بالمصري: إضراب شامل لأطباء 20 مستشفى
الأطباء نفذوا النهاردة العهد اللي خادوه على نفسهم من يوم ما بدأوا إضرابهم يوم السبت اللي فات.. وبدأوا النهاردة اضراب شامل في حوالي 20 مستشفى على مستوى الجمهورية.. احنا كنا في واحدة منهم النهاردة، خلونا بس الأول نشوف أحوالها كانت إيه ونرجع نكمل كلامنا.
بلدنا بالمصري: وقفة طلاب الجامعات تضامناً مع أساتذتهم
النهاردة اتحاد طلاب مصر، نفذ وعده بتنفيذ وقفة احتجاجية في معظم الجامعات على مستوى الجمهورية للمطالبة بنفس مطالب أعضاء هيئات التدريس، وتحديداً إقالة القيادات القديمة واختيار القيادات الجديدة بالانتخاب وبالآلية اللي اتفق عليها اكتر من 80% من أعضاء هيئات التدريس على مستوى الجمهورية.
بلدنا بالمصري: رجب طيب أردوغان في زيارة القاهرة
طبعاً كلنا عارفين، إن رئيس وزراء تركيا، رجب طيب أردوجان، مخطي عندنا من امبارح خطوة عزيزة على قلب كتير من المصريين.. النهاردة، ألقى خطاب في مقر جامعة الدول العربية قدام وزراء الخارجية العرب، بعد ما قابل رئيس الوزرا الدكتور عصام شرف، وبعدين التقى بالمشير حسين طنطاوى القائد العام ورئيس المجلس الأعلى للقوات المسلحة.
بلدنا: البوسطجية بيشتكوا من إيه وإيه اللي يرضيهم؟
البوسطجية بيشتكوا من إيه وإيه اللي يرضيهم؟! خاصة إن إضرابهم وإن كان حق مشروع ما يصحش حد يقول عليه تلت التلاتة كام، لكن دة ما يمنعش إنه ممكن يكون موقف حال ناس كتير من ضمنهم أصحاب المعاشات.
- الدكتور/ أسامة عبد اللطيف: رئيس النقابة المستقلة للعاملين بالبريد
- الاستاذ/ محمد حكيم: موظف بمركز الدفع الالكترونى برمسيس، وامين عام النقابة المستقلة للعاملين بالبريد
- الاستاذ/ محمد حسن: المستشار القانوني للنقابة المستقلة للعاملين بالبريد
ليست هناك تعليقات:
إرسال تعليق