برنامج صباح ON حلقة الخميس 29/9/2011 من قناة ONTVكاملة يوتيوب
رداً على وزير الصحة .. عصيان مدني بمستشفيات المنصورة
أول خبر عندنا النهاردة غريب ومش قادرين نفهمه .. قالك ايه بقى إن وزارة الصحة والسكان قررت تعديل خطة حملة التطعيم ضد مرض شلل الاطفال، التى ستبدأ يوم 2 أكتوبر المقبل، نظرًا للظروف الأمنية التى تمر بها البلاد، بأن يكون التطعيم فى المنازل بالمناطق الريفية فقط.
الدكتور عمرو قنديل، رئيس قطاع الشئون الوقائية، أكد أن اتباع إستراتيجية التطعيم من منزل إلى منزل هيكون فى المناطق الريفية فقط، ويتم التطعيم فى المدن من خلال فرق التطعيم الثابتة بجميع المنشآت الصحية التابعة للوزارة. كما توجد فرق التطعيم الثابتة بالأسواق والنوادى ومحطات القطارات ومواقف نقل الركاب والحدائق العامة، ودور العبادة، والجمعيات الأهلية، ومقار النقابات الفرعية للأطباء والصيادلة بالمحافظات بالإضافة إلى فرق متحركة، ولن يتم المرور من شقة إلى شقة حفاظًا على سلامة الفريق الصحى. يعني سلامة الفريق الصحي مضمونة في الأماكن العامة ومش مضمونة في الشقق .. يا سلام ايه الكلام الجميل ده .. بعدين هي حملة تطعيم شلل الأطفال مش كانت بتتعمل مرتين في السنة من يوم الثورة ما قامت ما اتعملش حملات وقالك عشان الأمن برضه .. ودلوئتي بيقولك مش رايحين شقق عشان الأمن برضه..
خد التقيلة بقى .. مستشفيات المنصورة عاملة عصيان مدني ووصف عصيان مدني ده على لسان الأطباء المشاركين فيه .. الحكاية بدأت فى إن الأطباء بدأوا اضراب من اسبوعين بتصعيد تدريجى ..الاضراب تطور الى اضراب كلى فحاولت الوزارة التفاوض بشكل غير مباشر معاهم وببنودد غير منطقية مما ادى الى حدوث عصيان مدنى الان فى مستشفى المنصورة الدولى اكبر مستشفى فى الدلتا ومستشفى التامين الصحى والمستشفى العام. الوزارة بتحاول تحل الأزمة بأطباء حديثي التخرج قليلي الخبرة بمكافئة 200 جنيه لفتح هذه المستشفيات لكن فشل الحل ده لأن الناس مش واثقة في الأطباء الشباب.. ربنا يستر
عارفة العصيان المدني ده حصل ليه يا إيمان عشان وزير الصحة استهان بإضراب الأطباء وتعامل معاه من برج عالي واعتقد إنه لما يتجاهل إضرابهم مفيش حد هيعبرهم .. فوصلت الأمور للحد ده ولسه الوزير قاعد وهيفضل قاعد عشان الدكتور شرف مبسوط كده ومرتاح كده .. عشان نعرف تفاصيل وتطورات اللي حصل معانا على الهاتف د.ابراهيم الزيات استشارى الجراحة بمستشفى المنصورة الدولى وهي أكبر مستشفى فى الدلتا
عمال النقل العام يستأنفون إضرابهم وموقف القوى العاملة
لسه الأزمات ما خلصتش .. فاكرين إمبارح لما عرضنا في فقرة الصحافة عنوان بيؤكد أن أزمة سائقي النقل العام خلصت .. فجأة وكأن وزارة القوى العاملة بتنيم الناس .. العاملون بهيئة النقل العام المتظاهرون أمام مجلس الوزراء، قرروا الاستمرار فى الإضراب عن العمل داخل الجراجات التابعة للهيئة، بمحافظتى القاهرة والجيزة، انتظاراً لاجتماع الدكتور عصام، رئيس الوزراء، مع محافظ القاهرة الدكتور عبد القوى خليفة، ومنى مصطفى، رئيسة الهيئة، بالإضافة إلى وزير المالية الدكتور حازم الببلاوى، لبحث زيادة أجور العاملين بالهيئة.
العاملون في هيئة النقل العام عاوزين حقوقهم وشايفين إن وزراة القوى العاملة بتماطل رغم إنهم كانوا قد تراجعوا عن تعليق إضرابهم عن العمل حتى يوم 10 أكتوبر المقبل، انتظاراً لرد وزارة المالية حول إمكانية زيادة أجورهم عقب لقاء الدكتور أحمد البرعى وزير القوى العاملة والهجرة. اللي اتعصب على فؤاد إمبارح..
عشان نعرف موقف وزارة القوى العاملة من استمرار الإضراب وتفسيرهم لفشل الاجتماع مع الوزير في حل الأزمة رغم الإعلان عن حلها الاستاذ علاء عوض مستشار وزير القوى العاملة
صحافة الخميس 29 سبتمبر 2011 -- الفنان نصير شمة
أول ما تسمع اسم نصير شمة .. على طول هيخطر في بالك العود المميز اللي خلاه قريب من قلوب كل العرب .. ألحانه اللي أمتعت ونمت مشاعر العروبة في كل واحد بيحب الوطن ده .. عراقي مصري فلسطيني سوري تونسي ليبي .. نصير شمة عربي وبيعتز بعروبته .. لكن مالا يعرفه كثيرون عن نصير شمة إنه صاحب رأي سياسي يحترم
هذا الفنان المحترم .. العربي ضيفنا النهاردة واحنا قررنا في صباح أون إننا نستكشف مناطق جديدة في شخصية هذا المبدع .. أهلا بيك الأول يا نصير .. أول حاجة هنعملها نشوف الصحافة بعين الفنان .. إزاي هيقرأ معانا عناوين النهاردة
الناس عايزة إيه من صباح ON .. 29 سبتمبر 2011
موعد فقرتنا لاستعراض ما يريده الناس من البرنامج .. الفقرة دي هنخصصها كل أسبوع عشان نعرف الناس عاوزة ايه .. عاوزة ايه من الحكومة .. عاوزة ايه من البرنامج. محتاجين ايه نتكلم فيه .. ايه الملفات اللي شاغلة بالكم ونفسكم الاعلام يتكلم عنها .. البرنامج ده صوتكم وهدفنا نفضل نبض الشارع .. هننزل لكم كل يوم أربعاء الشارع في كل حتة هنعرف منكم انتوا اهتمامتكم وهنحاول على قد ما نقدر نلبي كل طلباتكم وتطلعاتكم ..
الأسبوع اللي فات يمكن ما صورناش تقرير من الشارع بس ناقشنا خلال الاسبوع حاجات اتطلبت مننا .. مشاهدينا طلبوا بداية الأسبوع نفتح ملف منجم السكري وفتحناه .. وحد طلب عرض ازمة الفشل الكلوي وناقشناها .. وإضراب المعلمين كان مطلب أساسي طول الأسبوع وفعلا عملنا فقرة مطولة عنه .. يعني البرنامج ده ليكم انتوا .. ابعتوا لنا مقترحاتكم واحنا هناخدها في اعتبارنا.. امبارح نزلت كاميرا صباح أون صورت مع عدد من المواطنين وسالتهم هما عاوزين إيه .. وكان لينا اللقاءات دي.
صباح ON: ثورات الربيع العربي -- الفنان نصير شمة
حينما تساوى الكرامة الحياة وحينما تمتزج الدماء بارض الوطن لابد ان يخرج انين القلوب منتفضا معبرا عن نشوة الخروج من ظلام السكات الى نور الهتاف والحرية .. بموسيقاه عبر عن نبض الشعوب الثائرة الشعوب الابية التى انتفضت من فرط الاحساس بالحرمان والقمع والديكتاتويرية
الموسيقى هى لغة الحرية ولسان الديمقراطية ومشاعر العدالة بل احاسيس الانسانية ..والكلمات العربية دليل ميادين الحرية تشدو بها الشعوب على اوتار موسيقية من حناجر تشدو بنشيد الوطنية ومع نصير شمة اليوم سنعزف انشودة عربية من داخل اعماق فنية خالصة.
الكلام مع نصير عن الوطن العربي يوجع القلب ويخلي الواحد مش قادر يمسك دمعته حسرة على سنين ضاعت في عهد الظلم والاستبداد
ليست هناك تعليقات:
إرسال تعليق