بلدنا بالمصري: دم الشهداء في مؤتمر نقابة المحامين
سواء أهالي الشهدا اللي قطعوا طريق مصر- السويس أو اللي قاعدين في بيوتهم بحسرتهم أو اللي حضروا النهاردة المؤتمر اللي نظمته لجنة الحريات في نقابة المحامين، ما بيترجوشمن الدنيا غير واحدة بس: دم ولادهم ما يرحش هدر!!!
اعتصام أهل السويس بعد إخلاء سبيل المتهمين بقتل الشهداء
محكمة جنايات السويس ومقرها التجمع الخامس لأسباب أمنية، كانت بتحاكم النهاردة 14 من المتهمين بقتل الثوار قدام شرطة الأربعين في السويس أيام الثورة: 10 ظباط وصاحب معرض وولاده التلاتة.. دفاع المتهمين قال إن الشهدا مسجلين خطر وسوابق وعليهم احكام.. والمحكمة قررت تأجيل القضية ليوم 14 سبتمبر وعلينا وخير واخلاء سبيل كل المتهمين بكفالة 10 آلاف جنيه لكل واحد.. هو الحكم اتنطق من هنا وعينينا ما تشوف إلا النور وقامت الدنيا وما قعدتش.
لكن يمكن يكون اللي برد نار الأهالي مش بس أهالي الشهدا، أهالي مصر كمان، إن النائب العام المستشار عبد المجيد محمود، ما كدبش خبر وطعن على الحكم في ساعتها، والمفروض غن الطعن دة ينظر خلال 48 ساعة قدام دايرة تانية من دواير محكمة جنايات السويس غير الدايرة اللي بتنظر في القضية، حسب تصريحات المستشار عادل السعيد، النائب العام المساعد والمتحدث الرسمي باسم النيابة العامة.
مداخلات: أحمد شلبي -- رئيس قسم الحوادث بالمصري اليوم
و معانا جمال الورداني والد الشهيد مصطفى الورداني
و الاستاذ خالد عمر محامي أسر شهداء السويس
بلدنا بالمصري: تفجير خط الغاز في العريش للمرة الثالثة
اصطبحنا النهاردة واصطبح الملك لله على خبر تفجير خط أنابيب الغاز المصري اللي رايح إسرائيل والأردن للمرة التالتة في اربع شهور.. وهو هو نفس السيناريو بتاع المرتين اللي فاتوا: أشخاص ملثمين ومسلحين بالآلي، يأربجوا الحراس ويعملوا العملة وياخدوا ديلهم في سنانهم ولا من شاف ولا من دري ومنت غير ما حد يلحقهم ولا نعرف هم مين.. وتبتدي المصادر الأمنية الممتنعة عن ذكر اسمها، تخمن في التقارير الاخبارية والمواقع الالكترونية: ميمكن عناصر فلسطينية دخلت عن طريق الأنفاق.. يمكن متشددين مصريين من الإسلاميين اللي رافضين إن مصر تصدر الغاز لإسرائيل برخص التراب.. ولحد دلوقتي الله أعلم.. بس احنا هنحاول نعرف تفاصيل اكتر من:
محمود عبد الكريم -- رئيس قسم القضايا في الاهرام المسائي
بلدنا بالمصري: تخريج دفعة من طلبة الفنية العسكرية
المشير حسين طنطاوى القائد العام للقوات المسلحة ورئيس المجلس حضر النهاردة حفل تخرج دفعة جديدة من طلبة الكلية الفنية العسكرية.. تفاصيل اكتر في التقرير اللي جاي
بلدنا بالمصري: قبول دفعة جديدة في أكاديمية الشرطة
أكاديمية الشرطة أعلنت النهاردة في مؤتمر صحفي إنها هتبدأ من يوم السبت اللي جاي في قبول دفعة جديدة من الحاصلين على الثانوية العامة أو الأزهرية، بمجموع 65% على الأقل.. إنشالله يا رب تكون البركة فيهم ويكون فيهم الشفا.
بلدنا بالمصري: أربعة أحزاب ترى النور بشكل رسمي
النهاردة فيه اربع أحزاب خرجت للنور رسمي بعد موافقة لجنة شؤون الأحزاب على تأسيسها هم: الحزب المصرى الديمقراطى الاجتماعى، المصريين الاحرار، مصر الثورة ومصر الحديثة.. ألف مبروك عليهم وعلينا وعلى اللي سبقوهم وعقبال اللي جاي، وعقبال ما ييجي علينا اليوم اللي يبقى عندنا فيه حياة حزبية سليمة وبحق وحقيقي.. بس على ما ييجي اليوم دة خلونا كدة نجس النبض.
بلدنا: التحالف الديمقراطي من أجل مصر - قانون مجلس الشعب
زي ما احنا سامعين وشايفين وعارفين وراسيين كدة، إننا لسة حتى مش متفقين على ملامح المشوار اللي لازم ناخده إيد واحدة لحد بر الأمان، لكن دة ما يمنعش إن فيه أحزاب قديمة وجديدة بدأوا فعلاً يشوروا على بعض حوالين قانون مجلس الشعب ووثيقة المبادئ الدستورية وما فيش مانع كمان من التنسيق في الانتخابات اللي جاية.. العينة في التقرير اللي جاي
بلدنا: فصل 5 من شباب الإخوان أسسوا حزب التيار المصري
أما شباب الإخوان، ففيه خمسة منهم صدر لهم قرار بالفصل من الجماعة بعد ما انضموا لحزب التيار المصري بعد خمس جلسات من النصح والارشاد.. الشباب الخمسة هم: إسلام لطفى و عبد الرحمن خليل وعبد الرحمن هريدى وهانى محمود ومصعب الجمال
بلدنا: حلم العودة بعد 47 سنة على تهجير أهل النوبة
تعالوا بقة نوصل لحد النوبة بعد 47 سنه بالتمام والكمال على تهجيرهم من أراضيهم، لكن دة ما يمنعش أبداً إن حلم العودة لسة ممكن على الأقل بالنسبة لهم.
بلدنا: نقابة الصيادلة تستعد لأول انتخابات بعد 16 عاماً
تعالوا بقة نروح لحد نقابة الصيادلة وهي بتستعد لأول انتخابات ليها من 16 سنة وأول انتخابات في نقابة مهنية بعد الثورة.
بلدنا بالمصري: الثقافة بعد الثورة .. لقدام ولا محلك سر
الشهر دة وبالتحديد يو 7 هيمر اربع شهور بالتمام والكمال على تولي الدكتور عماد أبو غازي منصب وزير الثقافة.. وهو اللي قال بالحرف إنه: " مستعد للحساب يوم بيوم وإن مش بيتضايق أبداً من النقد بالعكس بيستفيد منه جدا في سير العمل".. لكن دة مش معناه إن النهاردة يوم الحساب، لكن محاولة لتقييم دور وزارة الثقافة بعد الثورة ما بين اللي حاصل والمفروض والممكن.. فاسمحوا لي ارحب ب
- الدكتور/ عماد ابو غازي: وزير الثقافة
وهنستعين على عملية التقييم ب:
- الفنان التشكيلي محمد عبلة: رئيس مجلس ادارة اتيليه القاهرة
ليست هناك تعليقات:
إرسال تعليق