برنامج بلدنا بالمصرى تقديم ريم ماجد على قناة OTV حلقة الثلاثاء 19/7/2011 يوتيوب كاملة
بلدنا بالمصري: رد اليوم السابع على أم الشهيد
أنا بس متأمنة أمانة ولازم أأديها.. واللي مأمني عليها، الزميل خالد صلاح رئيس تحرير اليوم السابع.. والحكاية وما فيها إن في حلقة امبارح، مدام عزة إبراهيم والدة الشهيد نقيب الشرطة محمد علي عبد العزيز، ذكرت في كلامها جريدة اليوم السابع وقالت إنها نشرت بالحرف إن "ريم ماجد قالت على الشهيد إنه مات تخليص حق" وحيث إنه ثبت ليها وللكل والحمد لله إن الجملة ديه عمرها ما جت على لساني ولا حتى خطرت في بالي، فمدام عزة حملت اليوم السابع جزء من المسؤولية عن اللبس.. فالأمانة اللي أنا نتأمناها إني أصحح سوء التفاهم اللي حصل وأأكد إن مافيش حاجة من ديه اتنشرت في اليوم السابع.. وفعلاً احنا دورنا كتير على أي خبر منشور على موقع اليوم السابع بالمعنى دة، وبصراحة والحق يتقال: فعلاً ما فيش أي خبر بالمعنى دة.. فرجعنا لمدام عزة عشان نستفهم منها وتفضلت مشكورة وادتنا لينك الخبر اللي هي تقصده.. ودة الخبر مقصود: خبر عادي جداً منشور يوم الحد 17 يوليو عن "تفاصيل جديدة في مقتل ضابط الشرطة في العجوزة"... دة عنوان الخبر ونصه فعلاً عن تفاصيل في الواقعة بدون أي ذكر لريم ماجد من قريب أو من بعيد.. لكن لما نزلنا نقرا التعليقات_ ومن هنا جه اللبس ما بين اللي قالته مدام عزة منسوب لليوم السابع وما بين اللي حاصل فعلاً_ فاللي حاصل فعلاً إن فيه تعليق من ضمن التعليقات: تحديداً التعليق رقم 17 بواسطة "مصري" بيقول فعلاً: "ريم ماجد قالت على الشهيد دة إنه مات تخليص حق"، فاتضح إنه تعليق موجود فعلاً على موقع اليوم السابع مش خبر.. ولما كملنا قراية بقية التعليقات لقينا تعليق تاني، التعليق رقم 22 بواسطة: بيقول الآتي: "نص التعليق"... مع إن بروتوكول اليوم السابع لنشر التعليقات بينص في الفقرة 4 منه على عدم نشر كل ما يتعرض للسمعة الشخصية أو يحمل تجريحا شخصيا أو إهانة أو سب وقذف_ وحتى لو افترضنا إن التعليق الأخير دة ما فيهوش أي تجريح شخصي أو إهانة لي أنا والزميل العزيز يسري فودة_ وقلنا بلاش الفقرة ديه، لو رحنا للفقرة 7 هنلاقي بتنص على: " عدم نشر أي اتهام لأى فرد بدون سند أو التشهير به أو التعرض لحياته الخاصة وتشويه سمعته، بلا وثائق أو سند قانونى أو قضائى_ التعليقات ديه فضلت موجودة على الموقع، لحد ما لفتنا نظر الزميل خالد صلاح لوجودها على موقعه _ وعلى ما يبدو إنه ماكانش واخد باله منهم_ والحقيقة هو وعدنا إنه يلغيها من التعليقات.. وقد كان.. ولو حضراتكوا بصيتوا على الخبر دلوقتي هتلاقوه خالي من التعليقين دول!!! احنا كدة أدينا الأمانة وعدانا العيب والحمد لله وربنا يكفينا شر "العيب"!!!
بلدنا بالمصري: د. عصام شرف بخير - تأجيل التشكيل الوزاري
نقول بقة يا هادي يا رب بآخر أخبار بلدنا، وهنبدأها بإننا نطمن أولاً على صحة الدكتور عصام شرف رئيس الوزرا، بعد ما دخل العناية المركزة امبارح بالليل بعد أزمة صحية مفاجئة نتيجة للإجهاد الشديد، لكن كل الأخبار اللي وصلتنا النهاردة من مجلس الوزرا بتأكد إن حالته الصحية مستقرة، وإنه بس محتاج شوية راحة_وبجد الله يكون في عونه_ لكن بسبب اللي حصل امبارح دة، بدأت تتنتور طراطيش كلام النهاردة عن استقالة الدكتور عصام شرف من رئاسة الوزرا لظروفه الصحية.. لكن بيان رسمي من مجلس الوزرا، قطع الطريق فوراً على النوع دة من الإشاعات ونفى تماماً الاستقالة وأكد إن الدكتور عصام شرف كلف الوزرا القدام بتسيير أعمال وزاراتهم لحد ما يتم تشكيل الحكومة الجديدة وإن المشاورات حوالين التعديلات الوزارية هتتأجل لحد ما يرجع الدكتور عصام شرف، من غير ما يحدد معاد معين لرجوعه.
بلدنا بالمصري: إعتذار د. أحمد فكري عن وزارة الصناعة
الدكتور/أحمد فكرى عبد الوهاب، كان الاسم المرشح لمنصب وزير الصناعة والتجارة الخارجية، لكنه اعتذر النهاردة عن قبول المنصب، وفسر أسباب اعتذاره في بيان رسمي بإنه " بيرفض تماماً أن يكون هناك جدل حول شخصه يتسبب في أي إشكاليات أو تخبط قد يعطل الوصول بمصر لمرحلة الاستقرار وإعادة البناء.
مع العلم إن الدكتور/ أحمد فكري عبد الوهاب من رجال الأعمال والصناعة في مجال الصناعات الهندسية.. وبما إن تجربتنا مع السادة الوزرا رجال الأعمال وقفت علينا بخسارة معتبرة، فغالباً الجدل اللي اتفنح حواليه ما كانش حوالين شخصه على قد ما كان حوالين كونه راجل أعمال.. لكن الدكتور أحمد فكري ليه وجهة نظر تحترم في اللي وصفه بإنه "الخطأ الجسيم" اللي بيفترض بالتعميم كدة إن أي رجل أعمال لازم يكون بالضرورة فاسد.. والحقيقة إنه التعميم عموماً مجحف ومش مقبول.. لكن وجهة نظره لها علاقة اكتر باللي سماه في البيان امكانية حرمان البلد من كفاءات حقيقية لمجرد إنهم رجال أعمال
بلدنا : البرادعي الأول في استطلاع المجلس العسكرى
النهاردة كان آخر يوم في الشهر اللي قرر المجلس العسكري إنه كافي جداً لاستطلاع الرأي على صفحته على فيس بوك حوالين 18 مرشح من المرشحين لانتخابات الرئاسة.. واللي أثار جدل واسع هنتكلم عنه بالتفصيل بس بعد ما نطل طلة على المحصلة النهائية للاستفتاء
- عدد المشاركين فى التصويت: 270 ألف و346 صوت.
- د. محمد البرداعى: استمر في المركز الأول من أول يوم لحد آخر يوم بنسبة 25% بعدد أصوات حوالي 68 ألف.
- د.محمد سليم العوا فى المركز الثانى بنسبة 18% بحوالي 48 ألف صوت
- الدكتور أيمن نور في المركز الثالث بنسبة 13% ب 35 ألف صوت
- الرابع الفريق عمر سليمان: بنسبة ١١%
- الخامس الفريق أحمد شفيق بنسبة ١٠%
- السادس: الداعية الإسلامى حازم صلاح أبوإسماعيل ٩%
- السابع عمرو موسى ٦% وإجمالى
- في المركز التامن اتساووا الدكتور عبدالمنعم أبوالفتوح، والأستاذ حمدين صباحى، والدكتور كمال الجنزورى بنسبة ٢%
- التاسع المستشار هشام البسطويسى ١%
- أما الأستاذ مجدى حسين، والفريق مجدى حتاتة، وتوفيق عكاشة، واللوا محمد بلال، والمستشار مرتضى منصور، والإعلامية بثينة كامل: فما حدش منهم خد ولا صوت
بلدنا بالمصري: التخبط في وضع الثورة -- أ. وائل قنديل
التخبط في وضع الثورة المصرية وما نح فيه الآن وكيف نعود إلى الطريق الصحيح
بلدنا بالمصري: مؤتمر المجلس الوطني
النهاردة اتلم شمل عدد كبير من الأحزاب والقوى والحركات السياسية تحت سقف مؤتمر المجلس الوطنى، لعل وعسى يوصلوا مع بعض لعقاد نافع يتفقوا عليه وخصوصاً حوالين وثيقة المبادئ الأساسية للدستور.. يا مسهل يا رب.
بلدنا بالمصري: اللجان الشعبية -- من حواديت الميدان
ودلوقتي آن أوان حدوتة من حواديت الميدان، والدور النهاردة على اللجان الشعبية
بلدنا بالمصري: مليونية التيارات الإسلامية
لكن زي ما حضراتكوا شفتوا كدة إنه من ضمن التيارات اللي غابت عن مؤتمر المجلس الوطني، التيارات الإسلامية الأعضاء في ائتلاف القوى الإسلامية اللي هم بالتحديد: جماعة الإخوان المسلمين، الجماعة الإسلامية، "الهيئة الشرعية للحقوق والإصلاح"، "الدعوة السلفية" و"جبهة الإرادة الشعبية".. ونفس الائتلاف أصدر بيان النهاردة حوالين الجمعة 29 يوليو.. رفضوا فيه أولاً ومجددًا وضع "وثيقة مبادئ حاكمة" و"فوق دستورية".. واستنكروا ما تم الإعلان عنه من حركة المحافظين والتشكيل الوزاري القادم، و"تضمن الحكومة لليبراليين واليساريين وفلول "الحزب الوطني" واستبعاد غيرهم من فئات الشعب المصري.. وطالبوا بإنجاز مطالب الجماهير من: المحاكمات العادلة، وسرعة إنهاء التحقيقات مع قتلة الثوار ورموز الفساد في النظام البائد. ودعوا "الدولة" و"المجلس العسكري الحاكم" لتعديل الأوضاع المعكوسة، وتقدير الاتجاهات الإسلامية والوطنية بما يتناسب مع حجمها ودورها في الشارع المصري.. وأخيراً دعوا جموع المصريين ل"مليونية حقيقية" ومفتوحة يوم "الجمعة" 29 يوليو في "ميدان التحرير" للدفاع عن الشرعية والهوية، ومكتسبات "الثورة المصرية". ونفس الدعوة ديه تبنتها الدعوة السلفية في اسكندرية ولنفس السبب.
بلدنا بالمصري: محكمة الغدر لمحاكمة المفسدين
محكمة الغدر .. د. محمود كبيش و أ. شحاتة محمد شحاتة .. في بلدنا بالمصري
ليست هناك تعليقات:
إرسال تعليق