نشاهد اليوم
برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
ONtv Livestreaming - البث الحي
اتمنى مشاهدة ممتعة
و نبدا
برنامج بلدنا بالمصرى الاربعاء 30 يناير 2013 على قناة ONTV حلقة يوتيوب كاملة
ريم ماجد: لا على راسنا بطحة ولا هندفنها في الرمل
بنمسي على حضراتكوا وحلقة جديدة من بلدنا بالمصري.. هنختمها بمواجع سكتنا عنها كتير وماعادش ينفع السكوت عليها . سكاتنا كان في الغالب سهواً والوجع يعدي علينا ويفوت في وسط الزحمة والمعمعة.. او لانه مش وقته او لان في مواجع تانية تبدو اهم.. او من خوفنا على الميدان لا يتشوه ونشمت فيه الاعادي.. لكن خلاص بقة ما بدهاش وان الاوان نطلع روسنا من الرملة ونتكلم بالفم المليان عن الاعتداءات اللي على كل شكل ولون اللي بتتعرض لها للاسف كتير من البنات والستات اللي بتستجري تهوب ناحية الميدان وتفتح بقها وتزعق بعلو صوتها على العيش وعلى الحرية وعلى الكرامة فما ينوبها الا تقطيع هدومها.. التحرش في بلدنا ماهواش حكر على الميدان.. وخلونا صرحة مع بعض: ماهواش ظاهرة دخيلة على مجتمعنا المتحفظ والمتدين بطبعه ولا يحزنون.. مش حقيقي.. او على الاقل ما عادش حقيقي.. التحرش في بلدنا ومن سنين طويلة داء اجتماعي وبلا ازرق وعرض لامراض تانية كتير.. بدليل اننا ما كناش مصدقين نفسنا في ال١٨ يوم وبنحكي ونتحاكى على الميدان واخلاق الميدان الخالي من التحرش ومن كل الامراض التانية اللي كانت معششة فينا قبل ال١٨ يوم ورجعت تعشش فينا تاني من بعدهم يا دوب وما لحقناش نتهنى بيهم.. لكن اللي زاد وغطى مؤخراً ان اللي بيحصل ومسكوت عنه عدى مراحل التحرش كلها.. وعدى مراحل الاغتصاب ودخل مراحل التعذيب والشروع في القتل.. ممكن تكون وسايل منحطة عشان يخوفونا ويقهرونا ويوصمونا ويكسروا عين اهالينا.. جايز جداً.. لكن المؤكد ان لو المجتمع المتحفظ المتدين دة كان صاغ سليم عمر الاعتداء الجنسي الجماعي في الشارع في عز الزحمة ما كان ممكن يكون سيف في ايد اي سلطة تقدر تسلطه على رقابينا.. ديه خلاصة القول اللي هنستين على الشقا بالله ونناقشها بعد اخر اخبار بلدنا.. وقبل ما حد يستعجل ويقول في عقل باله "هو دة وقته.. احنا في ايه ولا في ايه".. يستنى بس للختام وبعدين يقول لنفسه ان كان دة وقته ودة جزء اساسي من اللي احنا فيه ولا لأ..
بلدنا بالمصري: ٣ شهداء جدد في ٣٠ يناير ٢٠١٣
من كتر الشهدا اللي دفعناهم بالجملة في الكام يوم اللي فاتوا في بورسعيد وفي السويس بالذات.. ولان للاسف بقى فيه مننا بيتعامل مع الشهدا على انه مجرد ارقام، كل شغلتنا نعدهم.. فلما ندفع في اليوم شهيد ولا اتنين.. يبقى حصل خير والحمد لله انها جت على قد كدة.. وبننسى او بنستسهل ونعمل ناسيين ان كل واحد فيهم كان حكاية وفي الغالب كانت الحلوة وانتهت بماساة.. النهاردة وش الفجر دفعنا شهيدين جداد في الاشتباكات على كورنيش النيل.. حسب بيان وزارة الصحة.. وفيه خبر كمان عن شهيد تالت النهاردة في ميدان عبد المنعم رياض
بلدنا بالمصري: لغز قناصة بورسعيد بالصوت والصورة
قبل ما نبعد عن بورسعيد.. عايزاكوا بس تشوفوا معانا التقرير دة لشبكة يورونيوز الاخبارية ودققوا اوي في الصورة وفي التعليق.. ولما نرجع هيكون لنا كلام تاني ..
شاهد عيان: أحمد السيد توفى بطلق خرطوش أخترقت قلبه
شريف سيد - شاهد عيان على مقتل الشهيد احمد السيد الي استشهد فجر اليوم بكوبري قصر النيل .. وأن الشهيد عمره 18 عام من الجيزة وتوفى بطلق خرطوش أطلقته الشرطة وأخترقت قلبه
بلدنا بالمصري: خرج لشراء طلبات للمنزل فقتلته طلقة قناص
أ. محمد الفيل - والد شهيد بورسعيد يروي تفاصيل مقتل نجله محمود .. وأن محمود طالب جامعي واستشهد يو م الاحد أثناء شراءه طلبات للمنزل بطلق ناري في الرأس اطلقه قناص. وأحمل الرئيس مرسي مسئولية قتل أبناء بورسعيد.
بلدنا: تقليص حظر التجوال بالإسماعيلية لـ ٣ ساعات
زي ما حضراتكوا عارفين ان الرئيس محمد مرسي اصدر قرار امبارح قبل ما يكير على المانيا بتفويض محافظين مدن القناة التلاتة المفروضة عليهم حالة الطوارئ وحظر التجول، في تحديد ساعات حظر التجول أو إلغائها حسب الحالةالأمنية.. فكانت سماعيلية اول الغيث.. المحافظ قرر تقليص ساعات حظر التجول ل٣ ساعات بس من الساعة ٢ بعد نص الليل لحد الساعة ٥ صبح.. بورسعيد والسويس لسة الموضوع محل دراسة
قانونية دعوة النائب العام للقبض على البلاك بلوك
البلاك بلوك وما ادرانا ما البلاك بلوك.. واحنا فعلاً لحد اللحظة ديه بجد احنا مش عارفين هم مين ولا يطلعوا ايه.. لكن المؤكد ان النئب العام اصدر قرار امبارح بضبط واحضار كل من ينتمي لمجموعة البلاك بلوك باعتبارها مجموعة منظمة وتقوم باعمال ارهابية
قام النائب العام اصدر بيان تاني النهاردة يوضح فيه كان يقصد ايه بمناشدة المواطنين
القبض على خمسة من البلاك بلوك أمام القضاء العالي
في نفس الوقت، المتحدث باسم اليابة العامة ورداً على الدعوة لمسيرات ووقفة قدام دار القضاء العالي لمجموعات البلاك بلوك بمشاركة عدد من المجموعات الثورية اعتراضاً على قرار النائب العام، صرح بالاتي
وقد كان، تم فعلاً القبض على خمسة على الاقل من المتواجدين قدام دار القضاء العالي بتهمة الانتماء لمجموعات البلاك بلوك، والوقفة اللي بدات للاحتجاج على قرار النائب العام اتحولت ولسة مستمرة احتجاجاً على القرار وتضامناً مع المقبوض عليهم
بلدنا بالمصري: اكشفوا عن المعتقلين والمقبوض عليهم
دول اللي اتقبض عليهم النهاردة، او على الاقل اللي احنا عارفين انهم اتقبض عليهم النهاردة.. اما المقبوض عليهم والمعتقلين في الايام اللي فاتت في القاهرة والمحافظات على خلفية الاحداث الاخيرة، فيا اما نا نعرفش عنهم حاجة يا اما المعلومات بتتوفر بالصدفة او بطلوع الروح
بلدنا بالمصري: الرئيس بيقول الطوارئ بتاعته مطلب شعبي
على حس الريس مرسي وزيارته لالمانيا النهاردة.. اولاً، ومن قبل ما يخطي الرئيس مرسي عتبتهم، الجماعة الالمان كانوا واضحين ودغري كالعادة.. ومن امبارح وزير الخارجية الالماني حذر من ان المساعدات المالية لمصر تتوقف على التقدم الذي يحرزه هذا البلد على صعيد الديمقراطية. وقال بالحرف الواحد: "رأينا في الأيام الأخيرة صورا فظيعة، صور عنف ودمار".. ودعا الحكومة والمعارضة في مصر إلى "الحوار" و"التقارب".. واحنا شطارتنا بقة.. على اي حال الحوار والتقارب النهاردة واخد حده في بلدنا ما بين ومبادرات ودعوات واجتماعات وربنا يوفق الجميع.. وهنرجع لكل دة في اوانه.. بس خلونا دلوقتي في زيارة الرئيس مرسي لالمانيا.. ناهينا عن انه سايب البلد ومسافر في عز اللي احنا فيه دة.. لكن مش دة الموضوع.. الحكاية ان كل اللي قاله ريسنا في المؤتمر الصحفي مع المستشارة الالمانية كوم وللاسف ما عندناش نقف وقت عنده بالتفصيل.. واللي قاله لما اتسال على حالة الطوارئ اللي اعلنها في مدن القناة التلاتة كوم تاني خالص
بلدنا بالمصري: ست صعيدية تحاسب الرئيس مرسي
.. احنا هنطلع فاصل ونرجع نكمل اخر اخبار بلدنا.. بس واحنا في السكة للفاصل هنعدي على امارة من الامارات اللي ربنا بيبعتهالنا لما الدنيا تضلم عشان يطمنا انه النور جاي وانه لسة فيه امل.. وان الامل في الناس.. وانه شئتم ام ابيتم تعظيم سلام لكل ست بنت بلد بصحيح
بلدنا بالمصري: شهيد رابع بميدان عبد المنعم رياض اليوم
د. محمد سلطان - رئيس مرفق الإسعاف .. يصرح أنه استشهد اليوم 3 أشخاص بطلقات خرطوش وإصابات متعددة. وشهيد رابع أصيب أمس بميدان عبد المنعم رياض واستشهد اليوم.
محافظ السويس: لا يوجد قرار رسمي بتقليص ساعات الحظر
سيد نون - مراسل جريدة الشروق بالسويس .. أن محافظ السويس أكد على إنه لم يتم اتخاذ قرار حتى الآن بتقليص ساعات الحظر. والقوى الثورية لم تحضر اجتماع المحافظ بخصوص الحظر.
تقليص عدد ساعات الحظر لـ 3 ساعات بالإسماعيلية
جمال حراجي - مراسل اليوم السابع بالإسماعيلية .. تم تقليص عدد ساعات الحظر الإسماعيلية من الساعة الثناية فجراً حتى الساعة الخامسة فجراً. ومسيرة الآن تطالب بالإلغاء الكامل للحظر وليس تقليص عدد الساعات.
بورسعيد تتطالب بإقالة المحافظ ومحاكمة مدير الامن
معانا من بورسعيد أ. محسن عشري - مراسل أون تي في ببورسعيد .. قام ممثلي الاحزاب السياسية والقوى ببورسعيد بوقفة احتجاجية أما مبنى ديوان عام المحافظة للمطالبة بإقالة محافظ بورسعيد ومحاكمة مدير الأمن.
التيار الشعبي يحمل النظام مسؤولية اختفاء أحد أعضائه
من ناحية تانية التيار الشعبي اعلن النهاردة عن اختفاء احد اعضاءه
بلدنا بالمصري: النهضة اللي بيتقال بعدها نعيماً
بس قبل الفاصل وكالعادة اخويا هايص في الجمهورية التانية خالص على راي باسم يوسف.. الموضوع طلع مش بس على قد دورة بلاي ستيشن ودورة في عمل الحلويات.. اخر صحة بقة دورة للحلاقة الامنة
أصل وفصل حوارات البرادعي والنور وجبهة الإنقاذ
زي ما كنا بنقول في الاول ان النهاردة كان الحوار واخد حده باشكال مختلفة اشي مبادرات على اجتماعات على دعوات.. البداية كانت مبادرة حزب النور امبارح رحبت بيها قيادات جبهة الانقاذ وما كدبوش خبر واجتمعت الجبهة مع حزب النور في مقر حزب الوفد واعلنوا عن مبادرة مشتركة.. في نفس الوقت اللي دعا فيه الدكتور محمد البرادعي، رئيس الجمهورية ووزراء الدفاع والداخلية وقوى المعارضة للحوار من احل وقف العنف ..
المسكوت عنه .. التحرش والاغتصاب في التحرير
دة مجرد ما قل ودل على مصيبة سودة كل مادى ما بتسود وداء وعلة كل مادى بتتحول لعاهة مستديمة هتجيب اجلنا كلنا.. في مجتمع متحفظ بطبعه ٨٣٪ من ستاته عرضة للتحرش نصهم يوماتي على الله.. الكلام دة في ٢٠٠٨.. في ٢٠١٣ الله اعلم بالنسبة لكن المؤكد انها ماىعادتش بتيجي على قد التحرش اللفظي او الجسدي وحصلت لحد الاغتصاب الجماعي والتعذيب والشروع في القتل.. ودة اللي احنا عارفينه والله اعلم بالمستخبي.. اما المجتمع المتدين بطبعه، اللي المفروض انه مؤمن بانه لا تزر وازرة وزر اخرى.. اللي متفسرة في كل كتب التفسير بان كل نفس وما جنت.. مافيش نفس بتتاخد بذنب غيرها.. نفس المجتمع المتدين المؤمن دة هو اللي بيحمل الضحية ذنب الاعتداء عليها.. فيعاقبها بدل المرة اتنين وتلاتة واربعة: مرة بالاعتداء عليها ومرة بالفرجة ومرة بالسكوت علي اللي بيجرى لها ومرة بلومها ناهينا عن وصمة العار اللي بيوصمها بيها مع ان المجتمع دة هو الموصوم.. حطينا بقة فوق دة كله دولة غايبة وانظمة مصهينة او متواطئة او محرضة او بتلجا للاعتداء الجنسي على البنات والستات كوسيلة منحطة لقمع الثائرات وكسر شوكتهم اللي واقفة في زورهم وفي ضهرهم.. رحنا في خبر كان، لو كافينا على خبر ماجور ودفننا راسنا في التراب واتسترنا على الجريمة.. ودة اللي مش هيحصل ولا هيكون.. استعناةعلى الشقا بالله واسمحوا لي اولاً ارحب بضيفي وضيفاتي
الفنانة عزة بلبع: لكن النهاردة مش بصفتها الفنانة لكن بصفتها ست مصرية تم الاعتداء عليها في ميدان التحرير.. اعتداء وصفته بانه مش تحرش لكن محاولة للقتل
الدكتورة/ ماجدة عدلي: مدير مركز النديم لتاهيل ضحايا التعذيب.. واللي وصفت الحالات الاخيرة بانها لا تخرش ولا اغتصاب وانما حالات تعذيب
الاستاذة جوانا جوزيف: عضو عامل في مجموعة قوة ضد التحرش والاعتداء الجنسي
مصطفى قنديل: عضو عامل في نفس القوة
القبض على خمسة من البلاك بلوك أمام القضاء العالي
في نفس الوقت، المتحدث باسم اليابة العامة ورداً على الدعوة لمسيرات ووقفة قدام دار القضاء العالي لمجموعات البلاك بلوك بمشاركة عدد من المجموعات الثورية اعتراضاً على قرار النائب العام، صرح بالاتي
وقد كان، تم فعلاً القبض على خمسة على الاقل من المتواجدين قدام دار القضاء العالي بتهمة الانتماء لمجموعات البلاك بلوك، والوقفة اللي بدات للاحتجاج على قرار النائب العام اتحولت ولسة مستمرة احتجاجاً على القرار وتضامناً مع المقبوض عليهم
