نشاهد اليوم
برنامج اون تيوب
ON Tube
و الذى يذاع على قناة ONTV
تقديم رامى رضوان
برنامج اون تيوب برنامج يقوم علي الصحافة الشعبية التي بدات في الانتشار حيث اصبحت بديلا هاما للاعلام الرسمي و يساعد علي انتشارها الشبكات الاجتماعية لذلك يهتم اون تيوب بعرض محتويات اللقطات التي يصورها المواطنون بأنفسهم كما يهتم البرنامج بمساعدة المواطنين الراغبين في توثيق لحظات بعينها و نشرها علي الانترنت بل و عرضها علي شاشة اون تي في لايف
شارك الخبر مع اصدقائك على الفيس بوك و تويتر و جوجل +1 من اعلى الصفحة
مع تمنياتى بمشاهدة ممتعة
و لنبداء
برنامج اون تيوب حلقة الخميس 13 ديسمبر 2012 تقديم رامى رضوان من قناة ONTV يوتيوب كاملة
رامي رضوان: كفاية خلاص تتندم !
في ظل هذه الظروف العصيبه التي يمر بها الوطن .. وفي ظل الخطر الذي نتعرض له يوميا لكي نصل الى ستوديوهات التصوير بسبب المعتصمين في الخارج .. فقد قررت ان اتقدم باستقالتي. ولا اقول لكم بلاش رجعت في كلامي. مش عيب .. اصلي بصراحة مادرستش القرار .. انا قلت ارميه كده واشوف رد الفعل هيكون إيه. وبعدين ده الريس بتاعنا ذات نفسه عمل كده .. في موضوع الضرايب وزيادة الاسعار. قرار طلع بالليل وإتوقف الصبح. وحصل كده في لقاء "حوار في حب مصر" اللي كان دعا لي وزير الدفاع. لا ولسه..الجديد بقه السيد النائب العام. أنا قلتلكم إمبارح .. واضح إن في حاجة غلط في الجو اليومين دول.
بعد التحقيقات اللي أجراها المستشار مصطفى خاطر المحامي العام الأول لنيابات شرق القاهرة .. وإفراجه عن المتهمين في أحداث الاتحادية .. اللي هما في نفس الوقت المجني عليهم .. وصل لمكتبه عن طريق الفاكس .. كما أكد بنفسه .. قرار النائب العام بنقله وانتدابه للعمل فى نيابة استئناف بنى سويف. وبعدين إمبارح بالليل المتحدث باسم النيابة العامة نفى الخبر .. يعني خبر مش صحيح .. و مع ذلك اصدر النائب العام قرار صباح اليوم بإلغاء قرار ندب المستشار خاطر للعمل بنيابات بني سويف. أدي قرار تاني تم الرجوع فيه .. رغم إن كانو بينفوه.
أنا بصراحة مبقتش فاهم .. هو احنا في دولة .. ولا في لعبة بلاي ستيشن؟ كل شويه نخش لفل نخيش فيها فنعمل ريستارت؟ ايه ده؟ ايه المسؤلين دول من كبيرهم لصغيرهم؟ ليه واخدين من اغنية المرجيحة شعار؟ من ناحية الاهتزاز يعني مش فكرة تحت وفوق. احنا ماشفناش اي فوق لحد دلوقت. احنا شايفين زحليقه .. أه والله بالظبط زحليقه. فيها ناس طلعوا فجأه وقفوا فوق..وكل اللي بيعملوا هو انهم بيزقونا كلنا لتحت. ياخوانا سبكوا من الزحليقه والمرجيحة والكلام ده..فكروا مثلا في اغنية حط النقط على الحروف قبل مانطلع سوا عل روف..وبلاش دي لحسن تتفهم غلط.. خليها احين اتقدم اتقدم وكفايه خلاص تتندم!
والله هم يبكي وهم يضحك!
المهم إن النائب العام ماكتافاش بكدة و بس .. خدوا الخبر ده.
المستشار طلعت عبدالله النائب العام .. قرر نقل المستشار محمد عبد القادر الحلو .. المحامى العام لنيابات بورسعيد .. إلى إدارة التفتيش القضائى .. لرفضه الإشراف على الاستفتاء. و أخطروه الفاكس برضو على فكرة.
واضح إننا أمام إدارة مهلهلة من فوق لتحت .. ديه بقة زي المرجيحة. و مع النوع ده من الحكم في بلدنا .. ماتتعوقعوش غير إن كل يوم نشوف كوارث ومصايب. مش هكلمكم عن اللي فات .. تعالو ناخد أجدد حاجة.
شايفين الصورة إلي قدام حضرتكم دلوقتي دي .. دي مش صورة قديمة .. دي صورة القطار رقم 158 .. اللي طلع من اسكندرية متجها إلى الأقصر .. وقبل ما يدخل محطة بني سويف ولع بالمنظر اللي أنتم شايفينه ده. وعقب اشتعال الحريق .. قام الركاب بالتدافع والقفز من الشبابيك للنجاة بأرواحهم. ولم يتسنى حتى الآن معرفة أسباب اندلاع الحريق .. و ما إذا كان هناك ضحايا ومصابين من عدمه. لا حول ولا قوة إلا بالله. جروحك يامصر عماله تزيد .. والموت بقة أقرب لكل واحد فينا من حبل الوريد.
ONTube: جولة في أخبار تويتر وفيسبوك اليوم 13/12/2012
خلونا نروح إلى عادل وائل عشان يقولنا أخر الأخبار على المواقع الاجتماعية.
ONTube: مؤتمر العريان في نيويورك
الأخبار في كل حتة في الدنيا وبالذات بلدنا اليومين دول .. مش بتخلص .. لكن في حقيقة واحدة لحد دلوقتي. وهي إن يوم السبت اللي جاي .. المفروض كلنا ننزل ونروح ندلي باصواتنا في الإستفتاء على أول دستور بعد ثورة 25 يناير. الدستور إللي المفروض يحقق أهداف الثورة .. اللي المفروض يعيشنا في حرية .. في كرامة .. في مساواه وعدالة اجتماعية. وطبعاً مش سر إن جماعة الاخوان المسلمين بدأت تحشد انصارها للتصويت بنعم .. مش بس في مصر .. لكن في كتير من الدول الأوروبية والعربية وأمريكا.
ONTube: الإستفتاء على الدستور في واشنطن
على مدار الفقرة اللي جاية .. هيكون معانا مجموعة من المصريين المقيمين بالخارج .. عشان ينقلوا لنا الصورة من عندهم. لكن في الأول خلونا نروح لفيديو إنتشر بقوة على مواقع التواصل الإجتماعي .. وهو من الولايات المتحدة الامركية .. وتحديدا من ولاية نيويورك .. اللي كان الدكتور عصام العريان متواجد فيها .. لعقد ندوة عن الدستور .. وجماله.
طبعاً ممكن حد يسأل وهو الدكتور العريان يعمل ندوة عن الدستور بصفته إيه؟ بصفته قيادي بجماعة الاخوان المسلمين .. وده دستورهم. لكن اللي ملوش أي تبرير .. هو إنه يتم منع مصريين من انهم يدخلو الندوة .. اللي المفروض إنها عن دستور مصر .. دستور بلادهم .. دستور كل المصريين. فمن المنطقي إنه مايتمش منعهم .. و إن الدكتور العريان لو مقتنع بجودة الدستور ده .. يتكلم مع معارضيه قبل مؤيديه عشان يقنعهم. إلا بقى لوخايف إن وجود المعارضين .. وطرحهم رأيهم .. ممكن يكون مؤثر .. وهما اللي يقنعوا المؤيدين.
على مدار الاسابيع اللي فاتت .. كان فيه أخبار عن مظاهرات ووقفات احتجاجية في الولايات المتحدة الامركية .. من ساعة الإعلان الدستوري وحتى الآن. هيكون معنا من العاصمه واشنطن دي سي .. الدكتور عادل اسكندر .. أستاذ الإعلام بجامعة جورج تاون.
ONTube: طابور التصويت بجدة
زي ما حضرتكم عارفين الاستفتاء بدأ في دول الخليج. هنشوف دلوقت فيديو لطابور الإستفتاء أمام إحدى اللجان بجدة بالمملكة العربية السعودية ونرجع نكمل كلامنا.
ONTube: الإستفتاء على الدستور في الكويت
في الكويت سمعنا عن كم كبير من الانتهاكات .. من دفع فلوس للناخبين ووجبات وحشد وتوجيه .. و ده حسب ما أفادت جريدة الشاهد الكويتيه .. اللي قالت إن في ٤٦ قيادي من الإخوان المسلمين فى مصر .. وصلوا الكويت للتنسيق والتجهيز والإعداد لإنجاح الدستور الذى يتم الاستفتاء عليه. وقالت الجريدة عن الإخوان المسلمين "بعد وعودهم بمنح 20 دينار لكل من يصوت بـ"نعم" للدستور المصري الجديد .. قرر الاخوان إكرام هؤلاء المصوتين بالعصائر والمثلجات والوجبات الدسمة .. شريطة الموافقة على دستور مرسي".
من الكويت معنا الأستاذ محمد .. وهو مصري مقيم هناك
أستاذ محمد مساء الخير وأهلاً بحضرتك معنا على أون تيوب
ONTube: مشادات كلامية أمام السفارة المصرية بفرنسا
من الكويت نروح لفرنسا .. اللي هنشوف منها الفيديو التالي .. وهو لبعض المواطنين المصريين المقيمين هناك .. وهم بيحاولوا غلق السفارة حتى لا يتم الإستفتاء على الدستور. نشوف الفيديو
ONTube: الإستفتاء على الدستور في البحرين
هنروح للبحرين علشان نعرف أخبار التصويت على الإستفتاء .. معانا إيهاب شاهين مدير تحرير مجلة أخبار الخليج
ONTube: الإستفتاء على الدستور في فرنسا
من الكويت نروح لفرنسا .. اللي هنشوف منها الفيديو التالي .. وهو لبعض المواطنين المصريين المقيمين هناك .. وهم بيحاولوا غلق السفارة حتى لا يتم الإستفتاء على الدستور. نشوف الفيديو ونرجع نرحب بالاستاذ يحيى شاهين المحامي المقيم بفرنسا.
ONTube: الدستور والأزهر
الحديث عن استقلالية الازهر في مواد الدستور .. خلى بعض قيادات التيار الإسلامي يقولوا ان احنا لازم نقول نعم للدستور ده .. وبيسوقوا للموضوع من خلال فكرة إنه بيضمن استقلالية الازهر .. و إن شيخ الازهر محدش هيقدر يتدخل في عزله.
يعني شيخ الازهر حيبقى بالشكل ده اقوى من الازهر الشريف نفسه. والحقيقه ان الدستور اللي هنصوت عليه ده .. بيقول إن مجلس الشعب هوا اللي هيضع القانون الخاص بتنصيب شيخ الازهر.
الباحث الإسلامي .. إبراهيم الهضيبي في الفيديو اللي جاي .. بيتكلم عن المواد المتعلقة بالأزهر الشريف وشيخ الأزهر في مشروع الدستور.
ONTube: الدستور وحقوق العمال
بعض قيادات التيار الإسلامي بيسوقوا للدستور وبيقولوا إنه حيخلي فيه حد اقصى وحد ادني للاجور .. وإنه هيساعد على تحقيق العدالة الاجتماعية في التوزيع اللي كل مصري بيحلم بيها .. وإن مش حيبقى فيه غني قوي وفقير قوي .. يعني هيقلل الفجوه. وكمان إن الدستور ده حيساعد في ربط الاجور بالانتاج .. فبالتالي كلنا حنشتغل بهمة ونشاط. وعشان كده يبقى لاززززززم نقول نعم للدستور.
الفيديو اللي جاي حنشوف فيه الاستاذة فاطمة رمضان (عضو المكتب التنفيذي للنقابات المستقلة).. وايضا الدكتور احمد السيد النجار (الخبير الاقتصادي) .. كلاهما تحدثان عن حقوق العمال في مشروع الدستور.
ONTube: الاستفتاء والشريعة الإسلامية
الدكتور كمال توفيق الهلباوي .. المتحدث السابق باسم جماعة الأخوان المسلمين في الغرب .. والرئيس المؤسس للرابطة الإسلامية في بريطانيا .. كان ليه راي بخصوص الدستور وفكرة إنه بيدعم الشريعة الاسلامية.
ONTube: الدستور لا يؤدي للإستقرار
طيب بلاش كل ده .. على الاقل الدستور ده حيساعد البلد انها تستقر. يعني بعد مانقول نعم .. ييجي البرلمان .. ويبدأ بناء مؤسسات الدولة .. في دستور بقى هيفصل بينها .. فهيبقى فيه إستقرار وبعدين عجلة الإنتاج تدور .. وساعتها التصنيف الائتماني بتاع مصر يزيد .. و نقدر نقترض بفوائد اقل .. والمستثمرين ينزلوا بقا ايه ييجوا زي الرز .. مش هنلاحق. وعشان كده لازم نقول نعم.
الكلام ده حلو قوي .. وبصراحه يخلي الناس تقول (نعم) وهما مغمضين. بس تعالوا نشوف الفيديو اللي جاي .. واللي فيه المستشار يوسف عوف .. الكاتب و الباحث في القانون الدستوري والنظم السياسية .. واللي بيتكلم عن المشاكل الشكلية والجوهرية في مشروع الدستور .. واللي هتؤدي الى سيل من الازمات الدستورية والقانونية .. وساعتها قبلوني لو شفنا استقرار.
ONTube: حركة شايفينكم لمراقبة الإستفتاء
طبعاً زي ما حضرتكم عارفين إن العملية الإنتخابية أو التصويت في أي إستحقاق ديمقراطي .. سواء كان إنتخابات أو إستفتاء .. لا يكتمل من غير مراقبة شعبية. حركة شايفنكم هي حركة مراقبة شعبية موجودة من فترة طويلة وأشرفت على عدد من الإستحقاقات الماضيه. هيكون معنا الأستاذ محمد يحيى عضو مجلس حركة شايفنكم عشان نعرف منه إذا كانوا حيقوموا بمراقبة الإستفتاء الحالي أم لا .. وازاي بيستعدوا لي.
ONTube: لماذا لا للدستور
قبل الختام .. نروح لاخر فيديو معانا النهاردة .. وهو لمجموعة من المواطنين في الشارع المصري .. اللي بيقولوا رأيهم في الدستور اللي حيتم الاستفتاء عليه يوم السبت القادم .. ثم السبت اللي بعده كمرحله تانيه .. وكل ده لو بكره عده على خير.
ONTube: الشخصيه الأكثر تأثيراً في مجلة تايم الأمريكية
نختم بخبر سريع بقى .. عن استفتاء مجلة تايم الأمريكية عن الشخصيه الأكثر تأثيرا في عام 2012.
