نشاهد اليوم
برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
ONtv Livestreaming - البث الحي
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الاثنين 8 اكتوبر 2012 يوتيوب كاملة
قصيدة يامنه للخال عبدالرحمن الأبنودي في بلدنا بالمصري
والله وشبت ياعبد الرّحمان
عجّزت ياواد ؟
مسرع..؟
ميتى وكيف ؟
عاد اللى يعجّز
فى بلاده
غير اللى يعجّز ضيف.
هلكوك النسوان؟
شفتك مره فى التليفزيون
ومرّه ورّونى صـــــــــــــــورتك فى
الجورنان
قلت:كبر عبد الرحمان !!
أمّال أنا على كده مت
بقى لى ميت حول.!!
والله خايفه ياولدى القعده تطول .
مات الشيخ محمود
وماتت فاطنه أب قنديل.. واتبـــاع
كرم اب غبّان!!
وانا لسّه حيّه وباين حاحيّا كمان
وكمان ..!!
عشت كتير
عشت لحد ماشفتك عجّزت ياعبد
الرحمان .
وقالوا لى قال: خلّفت
وانت عجوز خلّفت ياخــــوى؟
وبنات؟
أمّال كنت بتعمل ايه طيلة العمر
الفات ؟
دلوقت مافقت؟
وجايبهم دلوك تعمل بيهم ايه ؟
على كل أهى ريحة من ريحتك ع
الارض
يونسوا بعض
ماشى ياعبد الرحمان!!
أهو عشنا وطلنا منّك بصّه وشمّه
دلوك بس مافكرت فى " يامنة"
وقلت:ياعمة؟!
حبيبى انت ياعبد الرحمان..
والله حبيبى وتتحب
على قد ماسارقاك الغربة
لكن ليك قلب
مش زى ولاد الكلب اللى نسيونا
زمان.
حلوه مرتك وعويلاتك ؟
والاّ شبهنا..؟
سمّيتهم ايه؟ قالوا لى"" أية ونور"
ماعارفش تجيب لك حتة واد ؟
والاّ أقولك :
يعنى اللى جبناهم
نفعونا فى الدنيا بأيه..؟
غيرش الانسان مغرور..!!
ولسّه يامنه حاتعيش وحتلبس
لمّا جايب لى قطيفه وكستور؟
كنت اديتهمنى فلوس
اشترى للركبه دهان
أبا..ى ما مجلّع قوى ياعبد
الرحمان.
طب ده انا ليّا ست سنين
مزروعه ف ضهر الباب
لم طلّوا عليّا أحبّه ولا الاغراب
خليهم.
ينفعوا .
أعملهم أكفان..!!
كرمش وشّى ..
فاكر " يامنه" وفاكر الوش؟
أوعى تصدّقها الدنيا
غش ف غش.!!
اذا جاك الموت يا وليدى موت على
طول
اللى اتخطفوا فضلوا أحباب
صاحيين فى القلب كان ماحدش
غاب
واللى ماتوا حته حته
ونشفوا حيين
حتى سلامو عليكم مش بتعدى
من بره الاعتاب.
اول مايجيك الموت افتح
اول ماينادى عليك اجلح
انت الكسبان
اوعى تحسبها حساب..!!
ولا واد ولا بت
ده زمن يوم مايصدق.. كداب.
سيبهالهم بالحال والمال وانفد.
اوعى تبص وراك..
الورث تراب
وحيطان الايام.. طين
وعيالك بيك موش بيك عايشين.!!
يو...ه يا" رمان"
مشوار طولان
واللى يطوله عن يومه ياحبيبى
حمار.
الدوا عاوزاه لوجيعة الركبه
مش لطولة العمر
اوعى تصدق الوانها صفر وحمر
موش كنت جميله ياواد ؟
مش كنت وكنت؟
وجدعه تخاف منى الرجال؟
لكن فين شفتونى؟ كنتوا عيال
بناتى (رضيّة) و " نجيّه "
وماتوا وراحوا وانا اللى قعدت
طيّب يازمان
اوعى تعيش يوم واحد بعد عيالك
اوعى ياعبد الرحمان
فى الدنيا وجع وهموم أشكال والوان
الناس مابتعرفهاش
أوعرهم لو حتعيش بعد عيالك ما
تموت.!!
ساعتها بس .. هتعرف ايـــــــه هو
الموت!!
اول مايجى لك نطّ
لسه بتحكى لهم بحرى
حكاية فاطنه وحراجى القط؟
اباى ماكنت شقى وعفريت
من دون كل الولدات.
كنت مخالف.. برّاوى
وكنت مخبى فى عينيك السحراوى
تمللى حاجات
زى الحدّايه تخوّى ع الحاجه
وتطير
من صغرك بضوافر واعــــــــره
ومناقير
بس ماكنتش كداب.
وادينى استنيت فى الدنيا
لما شعرك شاب
قدم البيت
اتهدّت قبله بيوت وبيوت
وأصيل هوّه... مستنينى لما أموت
حتيجى العيد الجاى؟
واذا جيت حتجينى لجاى ؟
وحتشرب مع يامنّه الشاى؟
**********
حاجى ياعمّه... وجيت
لا لقيت يامنه ولا البيت ..!!
رسائل حراجى القط للخال الأبنودي في بلدنا بالمصري
1. الجوهرة المصونه
والدره المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلايه الفار
2. أما بعد .. لذا كنت هاودت كسوفي ع التأخير
سامحيني يا فطنه في طول الغيبه عليكم
وأنا خجلان .. خجلان .. وأقولك يا زوجتنا أنا خجلان منكم ..
من هنا للصبح ..
شهرين دلوقت ..
من يوم ما عنيكي يا فاطنه .. بلت شباك الجطر ..
لسوعتي بدمعك ضهريديَ
لحضتها قلت لك :
قبل ما عوصل عتلاقي جوابي جي
نهنهتي .. وقلتي لي بعتاب:
النبي عارفاك كداب .. نساي
وعتنسى أول ما عتنزل في أسوان
حسيت واليد بتخطفها يد الجدعان
بالقلب ف جوفي ما عارف ان كان بردان .. دفيان
والبت عزيزه والواد عيد
قناديل في الجوف .. زي ما بتضوي .. بيقيد ..
.......... والقطر إتحرك ..
وقليبي بينتقل من يد لإيد .
والجطر بيصرخ ويدَودِو
اتدلدلت بوسطي من الشباك ..
خذي بالك م الولد .. راعي عزيزه وعيد
والقطر صرخ ورمح لكإنه داس على بصة نار ..
ولقطت الحس قريب .. قد ما كنتي بعيد :
قلبي معاك يا حراجي هناك في أسوان
...........................
ورميت نفسي وسط الجدعان .. وبكيت ..
وبلدنا اللي كنا بنمشيها ف نص نهار
كان القطر في لحضه .. فاتها بمشوار .
سامحيني يا فطنه على التأخير ..
ولو الورقه يا بت الخال تكفي
لأعبي لك بحر النيل والله بكفيِ
وختاماً ليس ختام ..
بابعت لك ِ
ليكي ولناس الجبلايه ولبتي عزيزه والواد عيد
ألف سلام
زوجك ... لوسطى حراجي القط ..العامل بالسدالعالي
أسوان
1. زوجي الغالي
لاوسطى حراجي القط
العامل في السدالعالي
جبلاية الفار
زوجي حراجي ..
فوصلنا خطابك ..
شمينا فيه ريحة الأحباب .. ربنا ما يوري حد غياب ..
مش أول مره البسطاوي يخطي عتبة الدار ؟؟
عمرنا يا حراجي .. ما جلنا جواب .
النبي ساعة مرزوق البسطاوي .. ما نده ..
كده زي ما كون .. دقت في حشايا النار .
وكإن العمر بيصدق .. بعد ما كان كداب ..
اتأخرت مسافه كبيرة كبيرة علي
عارف فاطنه يا حراجي لاليها عايل .. ولا خي .
ليه تتأخر كده يا حراجي .. ؟
طب والنبي كأن ورقتك دي
أول قنديل بتهز ف جوف الدار .
أول ندعة ضو.
الدار من غيرك يا أبو عزيزه .. هو .
وعزيزه وعيد ..
من غيرك يا حراجي زي اليُتما في العيد .
الواد على صغره حاسس بالغربه والبعد .
ولا عاد حتىبيطلع يلعب في الحارة مع الولِد .
اطلع وأخش .. أطلع وأخش القاه .. غيمان
وكأنه محروق له دكان .
ويقوللي : (( فين يامه أسوان .. ؟))
وآبا سابنا ليه يا مه ؟ ما يمكن زعلان .. ؟
شهرين يا بخيل ؟
ستين شمس وستين ليل؟
النبي يا حراجي ما أطول قلبك
لاقطع بسناني الحته الجاسيه فيه
..........................
كل الجبلايه تسلم فرداً فرد ..
((م الحاج طِلب حامد )) لعيلة بيت علي ابو سعيد
وانشالله يا حراجي ما يوريني فيك يوم
وانشالله تكون ا تعلمت ترد قوام .
ومادام احنا راسيين ع العنوان
والله ما حنبطل بعتان..
مفهوم..أسوان
زوجي الغالي
لاوسطى حراجي القط ..
العامل في السد العالي
زوجتك
فاطنه أحمدعبد الغقار
جبلايه الفار
موال لجمال .. للخال الأبنودي في بلدنا بالمصري
موال الأبنودى لجمال
..... وألْف رحمة على اللى لِسَّه «قُلْنا وقال».
اللى مَضَى وذمِّته.. مَثَل جميل.. يتقال.
[ما هى نادْرة فى مصر حاكم.. يطلع ابن حلال.]
حاكم.. يِدادى الجميع.. ويبوسْ رقيق الحال.
وده عِشْقِتُه: فلاحين.. طلَبة.. جنود.. عُمّال.
وخاض معارك جِسام.. مين طلّع الاحتلال..؟
مين اللى صحَّى الشعوب.. تكسَّر الأغلال؟
ويْبُخُّوا أكاذيب فى سيرتُه يسمِّموا الأجيال.
من بعد ما شفنا غيرُه.. فهمنا عهد جمال.
ياما انتصر.. ياما حَرَنِ المُهْر بالخيَّال.
هل كان وجوُده العظيم.. حقيقة والاّ خَيَال؟
أسطورَة حيَّة.. ما زالت عاصْية ع الموّال!!
أبو النضال.. بانى سَدّ العزّه فى أسوان.
اللى استردّ الكنال فى خُطبه.. م البريطان.
لكلّ خطوة تمَنْ.. ولكلّ فجر أدان
ولِسَّه صُوتُه الجميل... بِيدوّى فى الميْدان.
حارب.. وصنّع بلاده.. بَقى لْها صُوت.. وكيان.
وزّع على الفلاحين.. دوَّقْهُم الفَدَّان.
وقالْ لُهم: «حقُّكُم.. لا مِنَّه ولا إحسان».
وزرعْها منارات ثقافة.. تضوِّى للإنسان.
مِش تِطْفِى عقْلُه.. وتملاه عَنْكَبَة ودُخَّان.
قال: «الوطن للجميع.. والدين للدَّيان».
مش قام عَرَضْ أمِّتُه ع الدنيا فى الدكّان.
لأ.. مات فداها وْما زالت تذكره للآن..
للآن.. وبكره.. وبعدُه.. (وردة الأوطان).
يا....ه ع الزمن.. كنّا فين وبقينا فين قوللّى:
صوت مصر ليه انطفى
الدايرة المقطوعة .. للخال الأبنودي في بلدنا بالمصري
إذا مش نازلين للناس ف بلاش
والزم بيتك..
بيتك.. بيتك
وابلع صوتك
وافتكر اليوم ده
لإنه تاريخ موتى..
وموتك.
إذا مش نازلين للناس
فَ بلاش
مادام الدايرة ماكاملاش
والحاجة ماتاماش
وأصحاب الحاجة ماعارفاش
إيه المعني
وأى بطولة
ف إن حياتنا
واحلا سنينَّا
يروحوا بلاش؟
حاجة ماراكباش!!
***
الله يخرب بيت الفكر
وبيت اليوم
اللى ورانا الفكر
لإن الفكر كتاب
و(عويضة)
حياته هباب وتراب.
عايش زمنه الكداب
زى العادة ـ مرتاب!!
كنكة على دِمْس
ونفَس
مقطوع فى الغاب
ماشبعناش عنه بُعد
وهوه
ماشبعش غياب!!
***
(عويضة)
هنا.. ك فى الأرض
فى المدن الأُوَض
اللى نايمة على بعض!!
***
وأقولك
إيه اللى قطع الدايرة يا أمير
وخلى مابين النبى والخلْق
الغربة.. وتقطيع المشاوير؟
إن انا وانت
بنلعب طول العمر دورين:
طليعة وجماهير.
و(عويضة)
بينفخ موت الدِّمس
والعالم..
نِمْس.
العالم..
سرقة وقلْع ولبس
و(عويضة) بقلبه الجبس
اللى معلِّمُه..
إمتى مايحسش
وامتى يحسّ..
بيعدِّى فى الأيام
جمل المراحيل.
زى ما عدَّاها
من أول ما اتخرط الكون
من أول ما طلع للدنيا
ووجد قبلُه..
فرعون!!
***
نفس الأيام
نفس النسخة
مطبوعة
على كل الأعوام.
ماسمعشى بينا
ماسمعناش.
ماقابلناش.
ما اتكلمناش.
***
ولإن حمول الأيام
مش مرفوعة
إذا يد (عويضة)
ماترفعهاش.
والقولة الحقَّة
مش حقّة
إذا صدر (عويضة)..
ماطلَّعهاش
والخطوة..
حتفضل مشلولة
إذا قُدّامنا (عويضة) ماخطَّاش.
ولإن دى حاجة
(عويضة)
لسّه مايدركهاش
ولايدركناش
ولا يعرفناش
ولإننا..
لما دبحنا بعض
ـ مناقشة ـ
على القهوة
ـ لاجل البشرية ـ
(عويضة) ماسمعناش
تبقى الدايرة
مادايراش!!
واما ييجى المخبر
يسحبنا ع الزنازين
لازم نبقى عارفين
إن السَّحبة ببلاش
وان الحدوتة
مالافَّاش
ف الدايرة ماتامَّاش
والدنيا.. ماحِلْواش
وان (عويضة)
لما قِبل الظلم ماماتْش
إحنا مُتنا..
وهوه.. عاش!!
***
الحاجز..
أكبر من كل الأحلام
واسْمَك..
من جهلى وجهلك..
واسمى..
واسمك!!
***
مش حتعلمنى أكتر ما اتعلمت
روح
علِّم أبو الواد والبت
اللى حيرميهم
فى فرن الثورة
يطيبوا بُكرة
واللى لحد الوقت
مايعرفشى إزاى يكتب
وازاى يقرا.
وازاى يعشق..
وازاى يكره.
ولا عنده فكرة
عنك.. أو عن بكرة
ولا ليك ذكري
لانا.. ولا إنت..
نجحنا ف تغيير الفكرة!!
***
الفاس يردم بذرة
المنجل يحصد سبلة
الشغل يجيب أجرة
وانت بعى....ـد
بحكاية
مامفهوماش!!
بينَّنا وبينُه شعْرة
وأرقّ من الشعرة
ده اللى مفروض
ناسج علم الثورة
وصانع بكرة
واحنا شهدا..
مع إننا.. ماحاولناش.
حاجة..
ماراكْباش!!
عبد الرحمن الابنودى
الميدان للخال عبدالرحمن الأبنودي في بلدنا بالمصري
أيادي مصرية سمرا ليها في التمييز
ممدودة وسط الزئير بتكسّر البراويز
سطوع لصوت الجموع شوف مصر تحت الشمس
آن الآوان ترحلي يا دولة العواجيز
عواجيز شداد مسعورين
أكلوا بلادنا أكل.. ويشبهوا بعضهم نهم وخسة وشكل
طلع الشباب البديع قلبوا خريفها ربيع
وحققوا المعجزة.. صحّوا القتيل من القتل
اقتلني! قتلي ما هيعيد دولتك تاني
باكتب بدمي حياة تانية لأوطاني
دمي ده ولّا الربيع؟ الاتنين بلون أخضر
وبابتسم من سعادتي ولّا أحزاني؟
تحاولوا ما تحاولوا.. متشوفوا وطن غيره
سلبتوا دم الوطن وبشيمتوا* من خيره
أحلامنا.. بكرانا.. أصغر ضحكة على شفة
شوفتوشي صياد ياخلق بيقتله طيره؟
السوس بينخر وسارح تحت إشرافك
فرحان بهم كنت وشايلهم على اكتافك
وأما أهالينا من زرعوا وبنوا وصنعوا
كانوا مداس ليك ولولادك وأحلافك
ويامصر قام العليل رجعتله أنفاسه
وباس جبين الوطن.. مال الوطن باسه
من قبل موته بيوم صحوه أولاده
من كان سبب علّته محبته لناسه
الثورة فيضان قديم محبوس ماشافوش زول
الثورة لو جت ماتبنش في كلام أو قول
تقلب وتعتل في سرية
تفور في القلب وتنغزل فتلة فتلة في ضمير النول
متخافش على مصر يابا.. مصر محروسة
حتى من التهمة دي اللي فينا مدسوسة
ولو انتا أبوها بصحيح وخايف عليها قوي
تركتها ليه بدن بتنخره السوسة؟!
وبيسرقوك يالوطن قدامنا عيني عينك
ينده بقوة الوطن ويقولي: قوم.. فينك؟!
ضحكت علينا الكتب.. بعدت بنا عنك
لولا ولادنا اللى قاموا يسددوا دينك
لكن خلاص ياوطن صحيت جموع الخلق
قبضوا على الشمس بإديهم وقالوا لأ
من المستحيل يفرطوا عُقد الوطن تاني
والكدب تاني محال يلبس قناع الحق
بكل حب الحياة خوَّط في دم أخوك
قول إنت مين للي باعوا حلمنا وباعوك.. أهانوك وذلّوك
ولعبوا قمار بأحلامك
نيران هتافك تحرر صاحبك الممسوك
يرجع لها صوتها.. مصر تعود ملامحها
تاخد مكانها القديم والكون يصالحها
عشرات سنين تسكنوا بالكدب في عروقنا؟
والدنيا متقدمة ومصر مطرحها
كتبتوا أول سطور في صفحة الثورة
وهما عُلما وخٌبرا مِداورة ومناورة
وقعتوا فرعون هرب من قلب تمثاله
لكن جيوشه مازالوا يحلمه ببكره
صباح حقيقي.. ودرس جديد قوي في الرفض
أتاري للشمس صوت.. وأتاري للأرض نبض
تاني معاكم رجعنا نحب كلمة مصر
تاني معاكم رجعنا نحب ضحكة بعض
مين كان يقول ابننا يطلع بنا من نفق
دي صرخة ولّا غنا؟ وده دم ولّا شفق؟
أتاريها حاجة بسيطة الثورة ياخوانّا
مين اللي شافها كده؟ مين أول اللي بدأ؟
مش دول شبابنا اللي قالوا كرهوا أوطانهم؟!
ولبسنا توب الحداد وبعدنا قوي عنهم؟!
همّا اللي قاموا النهارده يشعلوا الثورة
ويصنّفوا الخلق مين عانهم ومين خانهم
يادي الميدان اللي حضن الفكرة وصهرها
يادي الميدان اللي فتن الخلق وسحرها
يادي الميدان اللي غاب اسمه كتير عنه وصبرْها
ما بين عباد عاشقة وعباد كارهة
شباب.. كإن الميدان أهله وعنوانه
ولا في الميدان نسكافيه ولا كابتشينو
خدوده عرفوا جمال النوم على الأسفلت
أحزاني العادية .. للخال الأبنودي في بلدنا بالمصري
من كل جهات المدن الخرسا الوف شبان زاحفين يسألوا عن موت الفجر استنوا الفجر ورا الفجر
ان القتل يكف ان القبضه تخف ولذلك خرجوا يطالبوا بالقبض على القبضه وتقديم الكف الدم قلب الميدان وعدل
وكأنه دن نحاس مصهور انا عندى فكرة عن المدن اللى يكرهها النور والقبر اللى يبات مش مسرور
وعندى فكرة عن العار وميلاد النار والسجن فى قلبى مش على رسمه سور قلت له لأ يا بيه
انا اسف بلدى بربيع وصباح ولسه فى صوتى هديل الينابيع لسه فى قلبى صهيل المصباح لسه العالم حيى رايح جى
بيفرق بين الدكنه وبين الضى بلدى مهما تتضيع مش حتضيع ما ضايع الا ميدان وسيع
يساع خيول الجميع يقدم المقدام ويفرسن الفارس ويترك الشجاعه للشجيع ولا باعرف ابكى صحابى غير فى الليل
انا اللى واخد على القمر ومكلمه اطنان من الشهور وعلى النظر من خلف كوة فى سور واللى قتلنى ما ظهر له دليل
وفى ليله التشييع كان القمر غافل ..مجاش والنجم كان حافل لا بطل الرقصه ولا الارتعاش لما بلغنى الخبر
اتزحم الباب وجونى الاحباب ده يغسل ..ده يكفن ..ده يعجن كف تراب وانا كنت موصى لا تحملنى الا كتوف اخوان
اكلوا على خوان وما بينهمش خيانه ولا خوان والا نعشى ما حينفدش من الباب ما اجمل نومه على كتوف اصحابك
ثوّار.. على ثورة.. تاهِتْ .. للخال الأبنودي
ثوّار.. على ثورة.. تاهِتْ
فى البحر.. لم شايفَه مينا
الأرض عن بُعد بانِت
نطُّوا .. وسابوا السفينة!!
وطنى مخيبش ظنى .. للخال الأبنودي
وطنى مخيبش ظنى لكنما الوقت خانه ... صحى الشهيد جنب منى لقينى ... بايع مكانه
الخال عبدالرحمن الأبنودي في بلدنا بالمصري
عن مصر والثورة التي تنبأ بها في أشعاره .. ماذا ينتظر من ثورة مصر .. أشعار وقصائد جديدة يتلوها لأول مرة في بلدنا بالمصري
