برنامج بلدنا بالمصرى
تقديم ريم ماجد
على قناة ONTV
يوتيوب كاملة
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
ONtv Livestreaming - البث الحي
اتمنى مشاهدة ممتعة
ونبدا
برنامج بلدنا بالمصرى تقديم ريم ماجد على قناة ONTV حلقة االاربعاء 26 سبتمبر 2012 يوتيوب كاملة
بلدنا بالمصري: لسة موظفي الجامعات بيطالبوا بحقهم
اما عن بقية الجامعات المصرية فحدث ولا حرج ولسة الاداريين العاملين في الجامعات ريقهم ناشف يطالبوا بحقوقهم ولسة لا حياة لمن تنادي يبل ريقهم
بلدنا بالمصري: رسالة أطباء مصر لشعب مصر
وبما اننا بنتكلم عن الحقوق وعن اصحابها اللي بيطالبوا بيها بوسائل مختلفة.. فالاطباء المضربين والداعين للاضراب الكلي في اول اكتوبر باعتين النهاردة رسالة بعلم الوصول للشعب المصري
بلدنا بالمصري: اعتقال منى الطحاوي في نيويورك
يحدث حالياً في نيويورك حدثين بالتوازي وغالباً مالهمش اي علاقة ببعض بس ممكن نعتبرهم من باب سخرية القدر.. عندنا اول رئيس منتخب بيخطب قدام الجمعية العامة لامم المتحدة لاول مرة من سنين.. وبيخطب في توقيت حرج ولحظة في منتهى الحساسية في العلاقات المصرية الامريكية.. وبالذات على خلفية الفيلم اياه.. الرئيس المصري بيطالب بتشريع بتجريم ازدراء الاديان والولايات المتحدة الامريكية رافعة راية حرية الراي والتعبير.. لكن يشاء السميع العليم انه في نفس الوقن دة يتم القبض في نيويورك على الصحفية المصرية منى الطحاوي وهي بترش سبراي ملون على إعلان متعلق في محطة مترو "تايمز سكوير"، بيوصف الاسرائيليين بالمتمدنين وأعداءهم العرب بالهمج والرعاع.
بلدنا بالمصري: نعتذر لوائل أبو الليل علشان مصلحته
يسعد مساكم وحلقة جديدة من بلدنا بالمصري.. قبل ما نبداها لازم نوضح بس حاجة في منتهى الاهمية.. وهي اننا اعلننا امبارح على حسابنا على تويتر ان ضيف حلقة النهاردة هيكون الناشط وائل ابو الليل اللي قضى اخر سنة و٨ شهور من عمره مسجون على ذمة قضية متهم فيها بالتحريض على القتل المتظاهرين في ايام ٨ و٩ ابريل بعد ما اتقال عليه ما قال مالك في خمر وكتير من اللي اتقال عليه ولا ليه اي علاقة بالحقيقة واولهم ان مدير مكتب رجل الاعمال ابراهيم كامل واحد من المتهمين في موقعة الجمل ومن ساعتها ووائل مصنف فلول وهو ابعد ما يكون عنهم واقرب ما يكون لثوار الميدان.. بعد سنة و٨ شهور حكمت المحكمة باخلاء سبيل وائل ابو الليل على ذمة القضية وكالعادة كان في النوع دة من اخلاءات السبيل كان فيه شوية لكاعة على شوية عصلجة لحد ما خرج بالسلامة امبارح الليل.. واتحجزت القضية لحكم يوم ٢٩ نوفمبر.. وائل كان المفروض يخطي عتبتنا خطوة عزيزة النهاردة لكن للاسف الشديد انه بعض الاستشارات القانونية شارت علينا بانه مش من حقنا نخوض في تفاصيل التفاصيل في قضية لسة منظورة قدام القضاء والا نبقى كدة بناثر على سير القضية وبالتالي ظهور وائل اعلامياً في اللحظة ديه لا من مصلحته ولا من مصلحتنا.. فحرصاً على الاتنين اعتذرنا لوائل عن حلقة النهاردة.. وممكن يكون واخد على خاطره مننا لكن ما باليد حيلة. وكل شئ باوان.. ومصير الحي يتلاقى ان اجلاً او عاجلاً جداً ومصير الحقيقة تبان طول ما صاحب الحق عينه قوية
وبما انه مش مكتوب لنا استضافة وائل ابو الليل النهاردة فمش هنروح بعيد ابداً لا عن الثورة ولا شهداءها ولا مصابينها ولا معتقلينها ولا مفقوديها ولا اللي عملوا فينا كل العمايل ديه وعيشونا ايام اسود من قرن الخروب عمر مواجعها ما بطلت تتقلب علينا.. وبناءاً عليه هيكون معانا المستشار عمر مروان امين عام لجنة جمع المعلومات والادلة وتقصي الحقائق في جرايم الثورة من يوم ما قامت ولحد ما الرئيس المنتخب استلم السلطة
بلدنا بالمصري: طلبة جامعة النيل بيدرسوا في الشارع
اخر اخبار بلدنا اللي هنبداها باخر اخبار اول يوم دراسي لطلبة جامعة النيل في عز اعتصامهم في نص الشارع على الرصيف في الطل
بلدنا بالمصري: خطاب الرئيس مرسي أمام الأمم المتحدة
اما عن الحدث التاني وهو خطاب اول رئيس مصري منتخب في انتخابات حرة نزيهة قدام الامم المتحدة فاليكم اهم ما جاء فيه
بلدنا بالمصري: ردود أفعال على زيارة مرسي أمريكا
اما عن اول زيارة للرئيس المصري لواشنطن واهم ردود الافعال عليها فدة مجملها
د. حسن نافعة: الرئيس مرسي كان حذر في خطابه
معنا على الهاتف د. حسن نافعة - أستاذ العلوم السياسية بجامعة القاهرة للتعليق على خطاب الرئيس محمد مرسي بالأمم المتحدة. حيث قال أن الرئيس مرسي كان حذر في خطابه .. وكنت أتمنى أن يكون أقوى من ذلك
د. عمرو حمزاوي: خطاب مرسي جيد ولكن به بعض الثغرات
وللتعليق على خطاب الرئيس مرسي بالأمم المتحدة .. د. عمرو حمزاوي - أستاذ العلوم السياسية بالجامعة الأمريكية.. حيث قال أن خطاب مرسي جيد ولكن به بعض الثغرات.
بلدنا بالمصري: أولى جلسات محاكمة ألبير صابر
نرجع تاني لعلاقة حرية الراي والتعبير وعلاقتها بازدراء الاديان واللي بيدفع تمنها حالياً المواطن البير صابر عياد.. النهاردة كانت اول جلسة من جلسات محاكمته قدام محكمة الجنح واللي اهله محامين الدفاع عنه خده خبر بيها من الاعلام ولحد امبارح بالليل ماكانوش يعرفوا هي امتى بالظبط
بلدنا بالمصري: حمدين صباحي يكذب أحمد غنيم
احنا وغيرنا من وسائل الاعلام جاءنا البيان التالي من المكتب الاعلامي للسيد حمدين صباحي
سراب .. دور ع الناس في بلدنا بالمصري
هندور على الخير في قلب عبدالرحيم اللي عايش بيحلم ان ييجي يوم يتمرمغ فيه في تراب الميري
بلدنا بالمصري: إيه اللي عملته لجنة تقصي حقائق الثورة
مين اللي سيح دمنا وخطف نور عينينا ويتم عيالنا وضيع عيالنا اللي لسة مفقودين لحد النهاردة؟! ومين اللي فتح علينا السجون وطلق علينا البلطجية وموتنا من الخوف على حياتنا وحياة عيالنا، لولاش وقفنا جنب بعض في اللجان وامنا خوفنا؟! مين اللي كان بيخطف شبابنا وبناتنا وحتى امهاتنا من الشوارع وهم ماشيين في امانة الله ويغمي عينيهم ويستوجبهم ويهددهم من غير ما يعرفوا لحد النهاردة دول مين ولا هم كانوا فين؟! ومين انتهك حقوقنا الانسانية والقانونية وقبض علينا عشوائي واحتجزنا في اماكن مش معروفة او مش ادمية او مش قانونية.. مين اللي منع عننا المية والزاد وحتى الدوا واحنا معتقلين؟! مين اللي خان ومين اللي غدر ومين اللي دهس ومين اللي عذب؟! مين اللي كل دة في رقبته ؟! وبما ان كل شئ باوان لسة ما انش الاوان نعرف مين ولسة ما انش الاوان مين ياخد جزاءه؟!
كل ديه اسئلة هنستعين عليها بضيفنا النهاردة
المستشار/ عمر مروان : مساعد وزير العدل وامين عام لجنة جمع المعلومات والادلة وتقصي الحقائق في وقائع اللي جرى لنا من يوم ٢٥ يناير ولحد يوم ٣٠ يونيو و المشكلة بالقرار الجمهوري رقم ١٠ لسنة ٢٠١٠
المستشار عمر مروان كان كمان امين عام لجنة تقصي الحقائق اللي تم تشكيلها بعد التنحي مباشرة بقرار من رئيس الوزرا في الوقت دة الفريق احمد شفيق وبرئاسة المستشار عادل قورة وقدمت تقريرها النهائي في ابريل ٢٠١١ عن الاحداث من ٢٥ يناير ولحد ١١ فبراير ٢٠١١ في ميادين التحرير ومحافظات مصر المختلفة
