برنامج بلدنا بالمصرى
تقديم ريم ماجد
على قناة ONTV
يوتيوب كاملة
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
ونبدا
برنامج بلدنا بالمصرى تقديم ريم ماجد على قناة ONTV حلقة الثلاثاء 27 مارس 2012 يوتيوب كاملة
بلدنا بالمصري: نقابة الصحفيين تهاجم إفلاس النواب
يسعد مساكم وحلقة جديدة من بلدنا بالمصري، هنبدأها باخر اخبار بلدنا وهنختمها ب"الطرف التالت" في أزمة العسكر والاخوان. آخر أخبار بلدنا هنبدأها من نقابة الصحفيين من مؤتمر "جبهة دستور لكل المصريين" اللي انتهى بالاعلان عن رفض الجمعية التاسيسية لصياغة الدستور وتشكيل لجنة تاسيسية موازية".
بلدنا: أجواء إجتماع رموز القوى السياسية مع المشير
لحد دلوقتي مافيش اي تفاصيل عن اجتماع عدد من رؤساء الأحزاب ورموز القوى السياسية مع المشير حسين طنطاوي رئيس المجلس العسكري في وزارة الدفاع، وبناءا على دعوته لمناقشة كل الأمور على الساحة الداخلية ومحاولة الوصول لصيغة نهائية حول موقف الجمعية التأسيسية للدستور للخروج من الأزمة الراهنة" دة حسب المنشور على بوابة الاهرام من غير اي تفاصيل اكتر من كدة وبالتالي لسة مافيش اي معلومات عن مين اللي حضر الاجتماع ومين ما حضرش وانتهى الاجتماع لاي نتايج. لتفاصيل أكتر إحنا معانا على الهاتف النائبة أ/ ماريان ملاك
بلدنا: خناقة .. والحكم في بطلان التأسيسية 10 أبريل
زي ما قلنا امبارح، ان اللجوء للمجلس العسكري او الاستنجاد بيه ان جاز التعبير ماهواش اختيار متفق عليه بين القوى الوطنية او بمعنى اصح وادق هو اختيار مرفوض من معظمها حتى ان البعض شبه الطريق دة بمن "يستجير من الرمداء بالنار" والبعض التاني استخدم مثل شعبي_بس شعبي جداً لدرجة ان حتى بلدنا بالمصري ما يقدرش عليه_ لكن الوسايل التلاتة المتفق عليها واللي دخلت حيز التنفيذ فعلاً هي وسايل الضغط السياسي، والضغط الشعبي واللجوء للقضاء.. النهاردة، كانت الجلسة الأولى في محكمة القضاء الإداري في مجلس الدولة، لنطر الدعاوي القضائية المرفوعة للطعن علي تشكيل الجمعية التأسيسية وإلغاء قرار ال50% برلمانيين و50% من غير البرلمانيين، وبطلان تشكيل أعضاء اللجنة التأسيسية.. المحكمة حجزت القضية للحكم في 10 إبريل اللي جاي.. لكن سير الجلسة ماكانش بالساهل ابدا.
بلدنا بالمصري: اتحاد طلاب مصر يرفض تشكيل التأسيسية
من ضمن وسائل الرفض كمان البيانات والتصريحات اللي ما بطلتش تتوالى من يوم ما تم الاعلان عن تشكيل الجمعية التاسيسية، آخرها البيانات اللي صدرت النهاردة، بيان اتحاد طلاب مدارس مصر.
بلدنا بالمصري: موقف 6 أبريل من أزمة الإخوان والعسكري
أما حركة شباب 6 ابريل فاعلنت النهاردة في مؤتمر صحفي عن موقفها من الجمعية التاسيسية ومن الأزمة بين المجلس العسكري وجماعة الاخوان المسلمين.
عبد الغني: العسكري إجتمع بنا للمّ شمل القوى السياسية
لمزيد من المعلومات عن إجتماع المجلس العسكري مع القوى السياسية إحنا معانا د/ صفوت عبد الغني - رئيس المكتب السياسي لحزب البناء والتنمية
بلدنا بالمصري: مسيرات احتجاج لأجل دستور لكل المصريين
لكن بغض النظر عن كل الآراء والاصوات والقوى الوطنية الرافضة للجمعية التاسيسية بتشكيلها الحالي وللمعايير والآلية اللي تم تشكيلها بيها، وعلى الرغم من ان عدد المنسحبين من اعضاءها وصل النهاردة ل20 عضو، الا ان بكرة وفي القاعة الفرعونية تحت قبة البرلمان هتبدأ كتابة الحروف الأولى من أول دستور لمصر بعد الثورة.. واذا استمر الاعضاء المنسحبين على موقفهم_وغالبا او يمكن مؤكد ان هو دة اللي هيحصل_ هيتم التوافق خلال الاجتماع على اسماء من قائمة الاحتياطي... لكن بالتزامن مع اللي هيحصل تحت قبة البرلمان، هتتحرك مسيرات احتجاجية من ميدان التحرير في اتجاه مجلس الشعب بدعوة من الاحزاب والحركات والقوى الوطنية المنضمة لجبهة دستور لكل المصريين.
بلدنا بالمصري: الكتاتني قد يكون مرشح الإخوان للرئاسة
أما عن الإنتخابات الرئاسية، واللي استناه الجميع بفارغ الصبر على امل ان جماعة الاخوان المسلمين تحسم موقفها من انتخابات الرئاسة، فكان الاجتماع الطارئ لمجلس شورى الجماعة اللي ربما يكون مستمر لحد دلوقتي.. الاسم اللي كان مطروح بقوة في الفترة اللي فاتت كان اسم المهندس خيرت الشاطر، نائب المرشد العام.. لكن نظرا لصعوبة موقفه القانوني بدات تظهر اسماء تانية من امبارح للنهاردة اهمها: الدكتور سعد الكتاتني رئيس مجلس الشعب والدكتور محمد المرسي رئيس حزب الحرية والعدالة والدكتور خالد عودة واحد من القيادات الاخوانية في اسيوط.. مافيش اي خبر مؤكد حتى الان، لكن المؤكد ان الدكتور محمد المرسي ساب الاجتماع ومشي ومن ساعتها ما صدرش عنه اي تصريح.. وبعدم بكام ساعة خرج الدكتور رشاد البيومي نائب المرشد من الاجتماع قبل الوصول لقرار.. اما الاخبار اللي مش مؤكدة ان مكتب الارشاد استقر بنسبة كبيرة على ترشيح الدكتور سعد الكتاتني_اللي صرح النهاردة بالمناسبة خلال احتفالية في المنيا ان اللي حصل بين الإخوان والمجلس العسكري من توتر خلال اليومين اللي فاتوا "مجرد بيان اترد عليه ببيان" وأنه مافيش أزمة حقيقية زي ما البعض بيحاول تصويرها. لكن رجع وقال ان النواب هيستمروا في ممارسة حقهم في سحب الثقة من الحكومة ومش هيرهبهم التهديد بحل البرلمان واللي "عايز يحل البرلمان يحله"!!! ولمزيد من المعلومات إحنا معانا د/ جمال حشمت - عضو مكتب شورى جماعة الإخوان المسلمين..
بلدنا: البسطويسي مرشح حزب التجمع لرئاسة الجمهورية
عن آخر تطورات الترشح للرئاسة، النهاردة حصل تطورين مهمين اولهم اعلان المستشار هشام البسطاويسي عن ترشحه لرئاسة الجمهورية ولكن مش كمستقل وانما كمرشح لحزب التجمع.
مجهودات الداخلية في محاربة تجار السلاح والمخدرات
مجهودات وزارة الداخلية في محاربة تجار السلاح والمخدرات المنتشرين في مختلف محافظات مصر
بلدنا: المستشار شكري يستقيل بعد تجديد الثقة بعبدالمعز
الجمعية العمومية الطارئة لمحكمة الاستئناف، وفي حضور المستشار احمد الزند رئيس نادي القضاة، رفضت سحب التفويض من المستشار عبد المعز ابراهيم رئيس المحكمة، على خلفية الغاء قرار المنع من السفر الصادر للمتهمين الاجانب في قضية التمويل الاجنبي في ظروف مازالت غامضة.. وكان قرار الجمعية بتجديد الثقة للمستشار عبد المعز ابراهيم بأغلبية 154 صوت مقابل 101 صوت مع سحب الثقة والتفويض.. أما المستشار محمد شكري، القاضي اللي تنحى عن نظر قضية التمويل الاجنبي بسبب اللي وصفه بتدخل المستشار عبد المعز ابلااهيم والضغط عليه لالغاء قرار المنع من السفر، فاعلن استقالته قدام الجمعية العمومية. ولمزيد من المعلومات إحنا معانا المستشار وليد الشافعي
القبض على بدوي إسرائيلي الجنسية أثناء عملية تهريب
خبر عن أطلاق نيران على الحدود المصرية الإسرائيلية هانعرف التفاصيل من مراسلنا في العريش أحمد أبو دراع
بلدنا بالمصري: الشرطة العسكرية ضربت أمن القصر العيني
امبارح بالليل حوالي الساعة عشرة، وعلى مدخل البوابة الرئيسية لكلية طب القصر العيني حصلت احداث ليها العجب ما بين مجندين من قوات الشرطة العسكرية وما بين امن الكلية، نتج عنها اصابات ما بين افراد امن الكلية والقبض على عدد منهم.. والنهاردة اضرب عدد من العمال والموظفين في الامن الاداري للكلية عن العمل.. ومجلس الكلية عقد اجتماع طارئ لمناقشة انتهاكات الشرطة العسكرية واقتحامها للحرم الجامعى. ولتفاصيل أكتر إحنا معانا أ/ سيد مبروك مدير عام المنافذ بالقصر العيني
هشام البسطويسي: ترشحي عن حزب التجمع لن يغير مواقفي
إحنا معانا على الهاتف المرشح المحتمل للرئاسة المستشار هشام البسطويسي وهو أصبح مرشح حزب التجمع
بلدنا بالمصري: مبروم على مبروم ميلفش - عمرو سليم
صحيح اننا نادرا ما بنعرض كاريكاتير من الجرايد لكن النهاردة بالذات ماقدرناش نتجاهل حكمة اليوم في كاريكاتير الفنان عمرو سليم في جريدة الشروق.. حيث ان حكمة اليوم من وجهة نظره ان: "مبروم على مبروم ما يلفش"!!!
بلدنا بالمصري: الطرف التالت في أزمة العسكر والإخوان
زمان قبل الثورة، النظام اللي كان كاتم على انفاسنا_ومازال_صور لنا مشهد سطحي ثنائي الأبعاد، بحيث ما نقدرش نشوف فيه مهما قلبنا الصورة وش وضهر، غير هم اتنين لاعبين مافيش غيرهم: الحزب الوطني والاخوان.. لكن النهاردة وبعد الثورة اللي كسرت الثنائية ديه بامتياز وقلبت موازين الصورة وغيرت ابعاد المشهد، هل يصح نفضل نتفرج على المشهد وكاننا تاني مش شايفين غير طرفين، ولا الليلة مش اشبه بالبارحة وفيه النهاردة "طرف تالت" لا هو لهو خفي ولا لابس طقية الاخفا، لكن طرف تالت معلوم وليه اسم على مسمى.. سؤال هنوجهه لضيوفنا وكلهم من الشباب اللي يمكن يعتبروا جزء من هذا الطرف التالت.
- عمرو صلاح:
- انجي حمدى: المنسق الاعلامي لحركة 6 ابريل
- علي خفاجى: أ مين شباب حزب الحرية والعدالة في الجيزة
