برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الاربعاء 29 فبراير 2012 يوتيوب كاملة
بلدنا بالمصري: إعلان الجدول الزمني لانتخابات الرئاسة
يسعد مساكم وحلقة جديدة من بلدنا بالمصري.. هنبدأها بالجدول الزمني لانتخابات الرئاسة اللي تم أخيراً الاعلان عنه النهاردة وعرفناله أخيراً راس من رجل.. لكن اللي احنا لسة مش عارفينه هو يا ترى يا هلترى احنا على ما نيجي ننتخب الرئيس دة يوم 23 و24 مايو اللي جايين، هنكون خلصنا كتابة الدستور والاستفتاء عليه ولا لأ؟!!! ولو الاجابة "لأ" وغالباً هو دة اللي هيحصل، يبقى فيه حاجة أو حاجات تانية احنا لسة مش عارفينها زي مثلاً حاجة بسيطة أوي: الرئيس اللي جاي دة صلاحياته ايه بالظبط.. وقبل صلاحيات الرئيس نفسه، احنا اصلاً مش عارفين هو هيكون رئيس في نظام شكله ايه: شكله رئاسي ولا برلماني ولا بين البينين؟!!! ولو انتخبناه على أساس صلاحياته في الاعلان الدستوري اللي نظامنا فيه لسة رئاسي، وبعدين اختارنا في الدستور الجديد ان نظامنا يكون شكل تاني، الرئيس دة هيكمل مدته معانا ولا هيستقيل؟ ولو كمل هيكمل بصلاحيات الرئيس في النظام الرئاسي حسب الاعلان الدستوري ولا بصلاحيات الرئيس حسب النظام الجديد اللي هينص عليه الدستور؟!!! كل ديه أسئلة هنختم بقة بيها حلقتنا النهاردة وهنطرحها في فقرتنا اللي جاية بعد آخر الأخبار ضمن أسئلة تانية كتير تحت عنوان بالبنط العريض اسمه: "هو ايه النظام"؟!!!
بس خلونا مبدئياً نبدأ باللي احنا على الأقل بقينا عارفينه.
بلدنا بالمصري- الكتاتني: التأسيسية لن تقصي أحداً
من ضمن الحاجات اللي احنا عرفينها والحمد لله، ان مجلس الشعب ومجلس الشورى هيجتمعوا وعلينا خير انشاءالله في أول اجتماع مشترك ليهم يوم 3 مارس اللي جاي وهيبدأوا في اجراءات انتخاب اعضاء الجمعية التأسيسية اللي هتضع الدستور.. لكن اللي احنا مش عارفينه لحد دلوقتي هي المعايير والآلية اللي هيتم بيها الانتخاب.. لكن اللي احنا عارفينه هو ان الدكتور سعد الكتاتني رئيس مجلس الشعب، أكد النهاردة أثناء زيارته لرئيس مجلس الشورى، الدكتور أحمد فهمي ، "أنه مش هيتم إقصاء أي من القوى السياسية، الممثلة في البرلمان من عضوية الجمعية التأسيسية.. وان الجمعية هتضم كل أطياف المجتمع، وانها مش هتكون مرتبطة بالأغلبية البرلمانية.. دة كلام جميل وكلام معقول ويفضل بس انه يترجم لحقيقة ملموسة وقال يا خبر بفلوس كلها كام يوم ويبقى بلاش..
بلدنا: نتيجة انتخاب اللجان النوعية لمجلس الشورى
من ضمن بقة الحاجات اللي مش بالضرورة كانت معروفة لكن بالضرورة كانت متوقعة هي نتايج انتخابات اللجان النوعية في مجلس الشورى اللي ما اختلفتش تقريباً خالص عن نتيجتها في مجلس الشعب وفي الحالتين ارتبطت ارتباط وثيق وشرطي بالأغلبية.
بلدنا: الأمن الوطني وصل لمعلومات عن الطرف الثالث
من ضمن بقة الحاجات اللي يمكن نكون قربنا نعرفها والله اعلم وبعد ما تعبنا من اللف والدوران وبعد سنة واكتر واحنا عقلنا بيجيب ويودي لعل وعسى نوصل لكينونة الطرف التالت، النهاردة، مدير قطاع الأمن الوطنى، اللواء مجدى عبد الغفار _وكان في زيارة النهاردة للجنة الدفاع والمن القومي في مجلس الشعب_ كشف عن الوصول لمعلومات عن الطرف التالت.. المعلومات ديه بتأكد انه مش شخص واحد لكن "عدة أطراف جمعها هدف واحد وهو إطالة فترة الفوضى، مشيرًا إلى أن هناك شواهد حول أشخاص يقومون بدفع أموال لإحداث تخريب وفوضى. وأكد قائلا: "سنصل قريبًا لحقائق واضحة جدًا بالأدلة المادية لتورط رموز معينة سنقدمها للنيابة".
بلدنا بالمصري: إلزام حبيب العادلي و3 ضباط بالتعويض
وعلى ذكر حبيب العادلي ورجال حبيب العادلي اللي اول بند في أي خطة لاصلاح وزارة الداخلية هو تطهير الوزارة منهم، النهاردة محكمة جنوب القاهرة الزمت حبيب العادلي و3 ظباط بسداد 75 ألف جنيه، فى دعوى التعويض المقامة من الطالب شادى ماجد سعد ضدهم بعدما احتجزوه داخل قسم شرطة 6 أكتوبر وتعدوا عليه دون وجه حق.
بلدنا: القضاء العسكري قد يحرك دعوى ضد زياد العليمي
هنرجع تاني تحت قبة البرلمان أو بمعنى اصح حواليها.. النهاردة، اللواء عادل المرسى، رئيس هيئة القضاء العسكري صرح في مؤتمر صحفي إنه "من غير المستبعد أن يحرك القضاء العسكري الدعوى ضد نائب مجلس الشعب زياد العليمي بتهمة الإساءة إلى شخص القائد العام رئيس المجلس الأعلى للقوات المسلحة المشير حسين طنطاوي وللمؤسسة العسكرية"، وقال انه "هيتم حفظ الدعوى إذا كان الجزاء اللي هيتخذه مجلس الشعب متناسب مع جسامة الواقعة".. وأضاف ان "موضوع زياد العليمي تحول لقصيدة حب في سيادة المشير وان معظم البلاغات اللي اتقدمت سواء من عسكريين أومدنيين أوقضاة أومصريين مقيمين في الخارج تحدثت علي ضرورة عدم المساس بالقوات المسلحة ككيان والمشير طنطاوي كرمز".. عدد البلاغات على حسب تصريحات رئيس القضاء العسكري، وصل ل50 ألف بلاغ
بلدنا - مجمع اللغة: الحمار والبردعة ليس إهانة للمشير
من ناحية تانية، وعلى الرغم من ان هيئة مكتب مجلس الشعب اللي قررت احالة زياد العليمي للجنة القيم، ما استجابتش لحد دلوقتي ويمكن مش هتستجيب خالص لطلبه بعرض تصريحاته على المجمع اللغوي لبيان ما اذا كانت من باب السب ولا من باب الوصف المجازي، الا ان اعضاء من المجمع اللغوي بدأوا يقولوا رأيهم ولو بشكل شخصي.. من ضمنهم، خالد مصطفى مدير عام بإدارة التحرير في المجمع، مصرح النهاردة لموقع البديل
بلدنا: متقبضش على الرجل الثاني في القاعدة ولا حاجة
النهاردة صحينا الصبح على خبر انتشر انتشار النار في الهشيم، نصه ان سلطات مطار القاهرة تمكنت النهاردة من القبض على "سيف العدل" قائد تنظيم القاعدة الجديد المعروف باسم الضابط الهارب، والمطلوب من المخابرات الأمريكية، والمرصود له مكافأة مالية 5 مليون دولار لمن يدلى بمعلومات تساعد على القبض عليه.. لكن طلع ان الموضوع على ما يبدو تشابه أسماء وتوالى النفي تباعاً من مصادر قضائية ومن مصادر أمنية ومن الشخص اللي تم القبض عليه.
بلدنا: بيان وزارة الداخلية حول حرق المجمع العلمي
مكتوب جالنا من وزارة الداخلية النهاردة به أسماء بعض من ساهموا في حرق المجمع العلمي و مرفق بالبيان فيديو به مشاهد للأشخاص الذين تم ذكرهم للتعرف عليهم من المواطنين
بلدنا بالمصري: خسائر حريق واحة سيوة تقدر بـ 6 مليون جنية
لمزيد من التطورات حول حريق واحة سيوة إحنا معانا على الهاتف اللواء / حسين فكري مدير أمن مطروح
بلدنا بالمصري: شلل المحاكم مستمر لليوم الثاني
الشلل في المحاكم لسة مستمر لليوم التاني على التوالي على الأقل في 13 محافظة بسبب اضراب العاملين في النيابات والمحاكم لحد ما تتم الاستجابة لمطالبهم اللي مش فئوية على حد تأكيدهم.
بلدنا بالمصري: أزمة الصرف الصحي في الوادي الجديد
أهالي مصر المحروسة في كل شبر في أرضها ليهم دايما نصيب في البرنامج زي ما وعدتناكو دايماً النهاردة مع أهلنا في الوادي الجديد و أزمة مشروع الصرف الصحي
بلدنا بالمصري: محافظ الأقصر ومعاناة سكان هابو
أخيرا بقى في شكاوى عليها ردود من المسئولين .. إمبارح عرضنا تقرير عن مشكلة منطقة هابو الأثرية في الأقصر وإزاي بيعاني اهلها .. المشكلة هي ارتفاع منسوب المياه الجوفية وتهديد المنازل اللي هناك بالانهيار بعد تنفيذ مشروع سحب المياه الجوفية من تحت الآثار
بلدنا بالمصري: السؤال الأول، إيه النظام اللي يليق لنا؟
أما وان الوقت أزف وخلاص هننتخب أول رئيس لينا بعد الثورة.. ومسافة ما نغمض ونفتح هنلاقينا بنكتب الدستور اللي هيرسم ملامحنا يمكن لسنين طويلة جاية، وفركة كعب ونلاقي نفسنا قدام الصناديق ومطلوب مننا نقول كلمتنا اللي هتقرر مصيرنا ويمكن كمان مصير ولادنا من بعدنا، فاحنا يا دوب نلحق نذاكر.. ونذاكر عشان نعرف نفكر فنفهم ونبقى كدة على بينة من أمرنا واحنا بنختار وبنقرر.. مش هنحفظ تاني ولا هنسيب فرصة لأياً من كان يحفظنا أو يقرر يختار بالنيابة عننا على أساس انه عارف مصلحتنا اكتر مننا.. السؤال الأول: ايه النظام؟!
يعني بما اننا مش هنخترع العجلة من أول وجديد، فاحنا بالضرورة هنختار واحنا بنجاوب على سؤال "ايه النظام" غالباً هنختار ما بين 3 اجابات على الأقل: "نظام برلماني ونظام رئاسي ونظام مختلط أو شبه رئاسي".. بس الأول وقبل ما نختار ونقرر لازم نفهم مبدئياً يعني ايه نظام سياسي أو بمعنى تاني نوع النظام اللي هنختاره بيحدد لنا ايه بالظبط؟! وبعدين ايه الفرق بين النظم المختلفة وبعضها؟! ايه عيوب ومميزات كل نظام؟! ايه صلاحيات كل سلطة من السلطات التلاتة في كل نظام وايه طبيعة العلاقة بينهم؟!!! وبناءاً عليه نبتدي نحاول نفهم أي واحد فيهم يليق علينا اكتر في اللحظة ديه؟!! كل ديه أسئلة ضيوفنا النهاردة هيساعدونا على محاولة الاجابة عليها
د. رباب المهدى: أستاذ السياسة بالجامعة الأمريكية
د.عمرو هاشم ربيع: الباحث فى شئون الأحزاب بمركز الأهرام للدراسات الاستراتيجية والسياسية
د. جمال نصار: مدير المركز الحضارى للدراسات المستقبلية والقيادى بجماعة الإخوان المسلمين
