برنامج بلدنا بالمصرى
تقديم ريم ماجد
على قناة OTV
يوتيوب كاملة
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الخميس 1 ديسمبر 2011 يوتيوب كاملة
بالمفتشر: رد الاعتبار الحقيقي هو القصاص
يسعد مساكم وحلقة جديدة من بلدنا بالمصري.. هنبدأها بقراءات مختلفة لأول قطفة من تجربة الصناديق_ اللي نجح فيها الشعب المصري بامتياز مع مرتبة الشرف_ وهنختمها بحكاوي لسة ما اتحكتش من الميادين لولاها ولولاهم ما كانت اللحظة ديه جت لحد عندنا ومع ذلك يمكن يكونوا لسة محتاجين لرد اعتبار..
لكن رد الاعتبار بوقفة مهيبة على أرواح الشهدا في الميادين في أول جمعة بعد انتخابات ما كناش نحلم بيها لولا إنهم سبقونا في الحلم ودفعوا حياتهم عشان احنا نعيش الحلم حقيقة، دة أضعف الإيمان.. أما رد الاعتبار الحقيقي والحق اللي لازم يترد لأصحابه من غير ما يطول عليهم الزمن هو القصاص العادل من اللي قطفوا الورد اللي فتح في جناين مصر وطفوا نور عينيهم وقال فاكرينها شطارة وجدعنة!!
بلدنا: تفاصيل التحقيقات مع الشناوي قناص العيون
أول الغيث قطرة، الباشا الجدع، ملازم أول محمود الشناوي الشهير إعلامياً ب"قناص العيون" اتعرض فعلاً على النيابة العامة امبارح بالليل، حوالي الساعة عشرة، والنائب العام قرر حبسه 4 إيام على ذمة التحقيقات بتهمة القتل العمد المقترن بجرائم الشروع فى قتل اخرين ممن كانوا فى شارع محمد محمود، بعد التحفظ على سلاحه اللي احضره معاه هو بنفسه لغرفة التحقيقات. لكن حسب مصادرنا القضائية الموثوق فيها، الظابط المتهم نفى كل الاتهامات المنسوبة ليه واكد هو ودفاعه على الآتي: انه ما كانش معاه أي سلاح ناري أو خرطوش وان كل اللي كان معاهم قنابل غاز مسيل للدموع وطلقات دفع وانه كان بيطلقها فى الهوا، وإنه ماكانش بينشن على عيون المتظاهرين. ولما واجهته النيابة بالفيديو الشهير، اقر انه هو اللي ظاهر فعلاً فى الفيديو، لكن رجع وقال إن الفيديو مش ظاهر فيه إن هو اللي بيطلق النار وإنه مش عارف إذا كان كلام المجند اللي قال: "جدع يا باشا جت في عين أمه" موجه ليه ولا لشخص تاني.. لكن اكد انه كان على راس فريق من المجندين، ضمن تشكيلات من قطاع الامن المركزى مكلفين بحماية مقر وزارة الداخلية من بعض المتظاهرين، اللي حاولوا الهجوم عليها واقتحامها _حسب أقوال الظابط المتهم في التحقيقات_ ومع إنه قال إن التعليمات اللي صدرت لهم من القيادات كانت بعدم حمل أي اسلحة الية او نارية، إلا إنه رجع وأكد إن كان فيه ظباط من الحراسات الخاصة في الوزارة كانوا حاملين اسلحة الية ونارية.. وبعد ما قال إن ظباط الحراسات الخاصة اللي معاهم الآلي والناري ما احتكوش بالمتظاهرين وإن الامن المركزى هو اللي كان بيتعامل معاهم، رجع محامي الدفاع عنه _وفي سياق التأكيد على إن المتظاهرين كان بيضربوا نار_ فأكد إن " ظباط الشرطة ماكانوش الجهة الوحيدة اللي كانت بتطلق النار، فكان هناك متظاهرون يطلقون النار ايضا" ودلل على كلامه بتقارير طبية سلمها للمحقق بتفيد اصابة اكتر من 50 ضابط وشرطة بطلقات نارية.. لكن دة معناه صراحة حسب أقوال الدفاع إنه حتى لو ثبت إن فيه اطراف تالتة أو حتى من المتظاهرين كانوا بيضربوا النار فال "ظباط كانوا من ضمن الجهات اللي كانت كمان بتضرب نار" ودة في حد ذاته لو مش بيدحض فعلى الأقل بيتناقض مع بيانات وزارة الداخلية والمجلس العسكري اللي أكدت مراراً وتكراراً إن قوات الأمن "لم ولن تطلق الرصاص على المتظاهرين" في احداث محمد محمود!!!
بلدنا: قناص العيون يكذب العيسوي وزير الداخلية
من ضمن أقوال الظابط المتهم كمان فيما يخص الإعلان عن هروبه، أكد إنه ما هربش بعد صدور قرار من النائب العام بضبطه واحضاره، لكن غير مكان اقامته لمكان غير معلوم بعد انتشار تهديدات بالانتقام منه بعد نشر الفيديو وانه اتصل بقياداته واخطرهم بمكانه بعد ما سمع أخبار عن هروبه!!! وهنا معلش فيه كام حاجة كدة على الماشي: " أولاً ان خبر هروبه ماكانش مجرد خبر اتنتور ديه كانت تصريحات رسمية لوزير الداخلية.. ثانياً إن آخر علمنا على عهدة وزارة الداخلية إن الوزارة اتحفظت عليه بعد صدور قرار النائب العام بضبطه واحضاره لحين تسليمه للنيابة فيعني إيه الوزارة تقول إنها متحفظة عليه فيطلع بعد كدة كان في بيتهم وبعدين يغير مكان اقامته بدون علم قياداته وبعدين يخطرهم لما يسمع زينا زيه إنه هرب؟!!! على أي حال الأصل في الموضوع دلوقتي إنه محبوس حالياً 4 إيام على ذمة التحقيقات بتهم القتل العمد والشروع في قتل.. لكن زي ما قلت في البداية إن دة اول الغيث وبالتالي مش لازم ننسى إن فيه مسؤولين وقيادات وظباط في وزارة الداخلية استدعتهم النيابة للتحقيق معاهم وتحديد مدى مسؤوليتهم عن قتل المتظاهرين وعن المصابين في أحداث محمد محمود.. وفي زحمة الانتخابات النيابة اجلت التحقيق معاهم للانشغال في الانتخابات، وآدي المرحلة الأولى عدت على خير فلازم التحقيقات ديه تستأنف ويتم الإعلان عن أسماء ومناصب المسؤولين اللي بيتحقق معاهم وعن نتايج التحقيقات
إشمعنى .. الثوار بيتحاكموا عسكري والشناوي مدني
بعد صدور بقة أمر النيابة العامة امبارح بحبس الظابط المتهم 4 إيام على ذمة التحقيقات، فيه ناس كتير الحقيقة ما قدرتش تمنع نفسها من قولة "اشمعنى"؟!!! اشمعنى الظابط ياخد 4 إيام حبس في حين علاء عبد الفتاح وغيره من المتهمين في أحداث ماسبيرو بالذات ياخدوا من أولها 15 يوم اتجددت مرتين وتلاتة وأربعة.. واشمعنى الظابط دة يتعرض على النيابة العامة في حين إن نيابة أمن الدولة العليا طوارئ هي اللي بتحقق مع المتهمين في أحداث ماسبيرو حتى بعد قرار المجلس العسكري بإحالة القضية من النيابة العسكرية للنيابة العامة مش لنيابة أمن الدولة العليا طوارئ اللي جددت حبس علاء عبد الفتاح يوم الحد اللي فات واللي أمرت النهاردة بتجديد حبس 28 متهم في نفس الأحداث باتهامات الشروع في القتل العمد وارتكاب أعمال إرهابية وتخريبية ومقاومة السلطات واستعمال القوة والعنف وإتلاف ممتلكات عامة وخاصة، في حين إنه في زحمة الانتخابات مر علينا خبر كدة مرور الكرام بالإفراج عن كل المتهمين بدهس المتظاهرين في أحداث ماسبيرو!!! هنحاول نفهم على قد ما نقدر
بلدنا: أسباب تأجيل إعلان نتيجة الانتخابات تاني
نفس اللي حصل امبارح هو اللي حصل النهاردة بالمللي، الكل كان مستني بفارغ الصبر إعلان النتيجة الرسمية للمرحلة الأولى من الانتخابات، فتقرر اللجنة العليا للانتخابات تأجيله 24 ساعة تانيين.. أسباب التأجيل هنعرفها
بلدنا: النتائج النهائية للمرحلة الأولى للانتخابات
صحيح إن النتيجة الرسمية الكلية للمرحلة الأولى اتأجلت، لكن تم إعلان النتايج الرسمية في عدد كبير من الدواير في المحافظات المختلفة خاصة فيما يخص المقاعد الفردية.. فيه عدد من الدواير اتحسمت فيها المنافسة لكن أغلب الدواير حتى الآن هيكون فيها جولات إعادة
بلدنا: إيجابيات وسلبيات المرحلة الأولى للانتخابات
قبل ما نشوف آخر تطورات تشكيل حكومة الدكتور الجنزوري، خلونا نعرف أهم الملحوظات سواء الإيجابية أو السلبية اللي رصدها الائتلاف المستقل للرقابة على الانتخابات اللي بيضم عدد من منظمات المجتمع المدني، لإنها بالضرورة هتنفعنا في اللي جاي.
بلدنا: الجنزوري يكشف ملامح تشكيل حكومته
الدكتور كمال الجنزوري المكلف من المجلس العسكري بتشكيل الحكومة الجديدة، بدأ فعلاً النهاردة يقابل عدد من الشخصيات المرشحة لمناصب وزارية في الحكومة الجديدة، وأعلن في مؤتمر صحفي بعد لقاءه 6 من المرشحين إن لقاء المرشح لا يعني بالضرورة إنه هيتولى الوزارة وإنه مش هيعين نواب لرئيس الوزرا وإن فيه وزرا من حكومة الدكتور شرف هيستمروا في الحكومة الجديدة وإن وزير الداخلية اللي جاي مش هيكون مدني.
بلدنا بالمصري: الرسالة 88 للمجلس الأعلى للقوات المسلحة
بعد المؤتمر الصحفي للدكتور كمال الجنزوري .صدر الرسالة 88 من المجلس الأعلى للقوات المسلحة ونصها كالآتى:
بلدنا: جنازة رمزية في جمعة رد الاعتبار للشهداء
زي ما قلنا في البداية إن جمعة بكرة في ميادين التحرير هي جمعة "رد الاعتبار للشهدا"، رد الاعتبار في ميدان التحرير في القاهرة هيبدأ بجنازة رمزية هتتحرك بعد صلاة الجمعة من جامع مصطفى محمود لحد الميدان
أما جمعة "دعم الشرعية" فمكانها هيكون ميدان العباسية واللي داعي ليها ما يسمى ب"اتحاد حركات الأغلبية الصامتة
بلدنا بالمصري مع النائب د. عمرو حمزاوي
خلونا نتفق في البداية على حاجة تبدو بديهية بس معلش ساعات البديهيات بتوه مننا في الزحمة: كل اللي احنا فيه دة لسة الجولة الأولى من المرحلة الأولى من أول انتخابات برلمانية في مصر بعد ما الثورة ردت فيها وفينا الروح.. وبالتالي فاحنا لسة مش في آخر المطاف والطريق لسة في أوله " لكي لا نأسى على ما فاتنا ولا نفرح بما آتانا" لكن نتعلم منه..
الدكتور/ عمرو حمزاوي: أستاذ العلوم السياسية بجامعة القاهرة والفائز بمقعد الفئات في الدايرة الرابعة في القاهرة اللي بتضم: مصر الجديدة والنزهة ومدينة بدر والشروق.
بلدنا: مصطفى النجار يطلب شطب منافسه محمد يسري
ن ضمن الدواير اللي فيها إعادة، الدايرة التالتة في القاهرة أو دايرة مدينة نصر، وعلى مقعد الفئات هتكون الإعادة بين مرشح حزب العدل الدكتور مصطفى النجار، والدكتور محمد يسري مرشح التيار السلفي.. لكن على ما يبدو إن الدكتور مصطفي النجار، اتقدم النهاردة ببلاغ لشطب منافسه.. التفاصيل هنعرفها من:
الدكتور/ مصطفى النجار
الدكتور/ محمد يسري
بلدنا: جمعة رد الاعتبار و شهداء ومصابي محمد محمود
حكايات من ميدان التحرير وشارع محمد محمود مع شهداء ومصابي الميدان ..ومعانا والد الشهيد أحمد محمد عبد الحميد والمصاب هيثم الجندي
