د. حازم الببلاوي يحسم اللغط حول استقالته
د. حازم الببلاوي نائب رئيس الوزراء ووزير المالية في حكومة د. عصام شرف يحسم اللغط حول استقالته المسببة التي تقدم بها اليوم وأسباب هذه الاستقالة مع ريم ماجد في بلدنا بالمصري
بلدنا بالمصري: تقارير الطب الشرعي لشهداء ماسبيرو
من إصابة في الكوع أدت إلى الوفاة وطوبة دهست المتظاهر، للإصابة بالرصاص والاصطدام بجسم صلب: دة بالحرف الواحد الفرق بين أسباب الوفاة في التقارير الطبية للشهدا قبل وبعد عرضهم على الطب الشرعي بعد صولات وجولات لولاها غالباً حقهم كان هيروح في شربة مية ولا من شاف ولا من دري.. إزاي اتبدلت الأحوال وتقارير الطب الشرعي المبدئية بتقول إيه دة اللي هنعرفه من ضيوفنا والاتنين من شهود العيان على الحكاية كلها من أولها لآخرها.
أ. خالد علي: المحامي ورئيس المركز المصري للحقوق الاقتصادية والاجتماعية
د. محمد فتوح: رئيس جمعية أطباء التحرير
بلدنا بالمصري: إزاي مصر ترجع بخير
صحيح إن فيه مؤشرات مش بطالة أبداً على إن الشارع المصري لسة بخير وإن شمله لسة ملموم إلى حد كبير رغم المحنة ومر الكاس.. لكن دة ما يمنعش إنه غالباً متلصم ومحتاج أولاً لعلاج فوري، لإن الأعراض اللي كل مرة نسميها شدة وتزول خلاص على وشك تبقى عاهة مستديمة ما نسلمش منها أبداً لا قدر الله.. بعد الفاصل: محاولة لتشخيص حالة الشارع المصري وأعراضها ومدى خطورتها وإيه الحلول اللي ممكن يكون فيها الشفا؟!!!
كل اللي هنحاول نعمله من هنا ولحد آخر الحلقة إننا هنحاول أولاً نشخص حالة الشارع المصري النهاردة، وإيه اللي وصله للحالة ديه وإيه مدى خطورتها؟! وهل على عكس ما يبدو اللي حصل دة ممكن يكون وراه أي خير، ورب ضارة جداً ممكن نحولها احنا لنافعة؟! وإزاي نبتدي ونبتدي منين وبمين؟!! وإيه احتمالات الشفا وهل ممكن نرجع تاني بخير وبصحة وبعافية ونصحى الصبح نبص في المرايا نلاقينا تاني شبه ما كنا يوم 25 يناير ولا ديه أضغاث أحلام؟!!! هنستعين على الأسئلة ديه وغيرها بضيوفنا:
الدكتور/ ضياء رشوان: مدير مركز الاهرام للدراسات السياسية والاستراتيجية
الاستاذ/ ياسر رزق: رئيس تحرير الاخبار
