برنامج بلدنا بالمصرى تقديم ريم ماجد على قناة OTV حلقة الخميس 22/9/2011 يوتيوب كاملة
بالمفتشر: هجمة إمبارح على قهاوي البورصة
يسعد مساكم وحلقة جديدة من بلدنا بالمصري.. هنبدأها من ليلة امبارح من ساعة ما الناس كانت قاعدة على القهوة في أمانة الله بتتفرج على الماتش والمشاريب نازلة ترف والآشية معدن.. لكن دة ما يمنعش أبداً إن كان فيه بينهم كالعادة "قلة مندسة" مالهاش في الكورة لكن ليها في عشرتين طاولة معتبرين مع شوب عناب مشبر يبل الريق ويروق الدم.. أما اللي فيهم بقة "خطر على نفسه وعلى المجتمع بما يهدد بزعزعة الاستقرار وتهديد صحة الجيران" فدول اللي اتمعظموا وجابوا الديب من ديله "ولم تأخذهم شفقة ولا رحمة بأي حد" واستجروا وطلبوا شيشة تفاح مع شوية شاي بالنعناع في الخمسينة وصلحه!!! ما لحقش بقة يا ولداه يصلحه.. وخير اللهم اجعله خير، وعينيه ما تشوف إلا النور وحتتك بتتك، القهوة لا بقت عادة ولا محبوسة، لكن في غمضة عين بقت في خانة اليك وجاي عليها واطيها والكل بيضرب كف بكف.. وكل واحد بيغني على ليلاه: الزباين عايزة الشيشة أولاً.. والجماعة التانيين مالهمش في المعمعة ديه عشان الشيشة مش من المشاريب التوافقية وفيها التفاف على الإرادة الشعبية.. أما صاحب القهوة فدة من أصحاب المطالب الفئوية وراسه وألف سيف لهيفضل واقف كدة قدام عجلة الانتاج لحد ما حد يعبره ويرسيه هو "الحساب على مين"؟! والظاهر كدة إنه في عز المعمعة ديه كان معدي بالصدفة واحد من كبارات المال والأعمال، قلبه طب وقال في عقل باله "يادي الخراب المستعجل.. حاكم البورصة ديه بتتلكك وما هتصدق وهتنزل على جدور رقبتها" وكل ما يقابل حد في سكته يأمنه أمانة ويحلفه بالغاليين ما يجيبلها سيرة ويخلي الطابق مستور!!! بس ياللاه الحمد لله جت سليمة وعدت على خير ويا دار ما دخلك شر!!! بس معلش يعني ولو فيها رزالة مننا: "هو فيه إيه"؟!!!
بلدنا بالمصري: حملة إزالة إشغالات طريق السويس
وعلى برده ما نلاقي حد يرد علينا، وعلى ذكر حملات إزالة الإشغالات والتعديات، خلونا نوصل لحد طريق السويس كان فيه النهاردة حملة معتبرة.
بلدنا بالمصري: شهاداتكم للجنة توثيق الثورة
تعالوا بقة نوصل لحد مكتبة السيدة مبروك، نسمع أول شهادات شفهية عن الثورة واللي بدأت لجنة توثيق الثورة من امبارح في سماعها وتوثيقها، عشان عمرنا ما ننسى اللي احنا عملناه ولا الي اتعمل فينا ولا حتى بعد 200 سنة.
الدكتور/ خالد فهمي رئيس لجنة توثيق الثورة دعا في مداخلته معانا أول امبارح كل المصريين بغض النظر عن موقفهم من الثورة: اللي شارك واللي بارك واللي مع واللي ضد وقال بعضمة لسانه إن حتى الفلول فيه لشهادتهم مكان على الرحب والسعة، ويمكن كمان جماعة "احنا آسفين يا ريس" ليه لأ.. فاحنا بنكرر الدعوة مرة تانية عنوان المكتبة 15 ش الإسراء بجوار ميدان لبنان، كل يوم لحد يوم الأربع اللي جاي ماعدا بكرة الجمعة من الساعة خمسة للساعة 11 بالليل
بلدنا بالمصري: تمويل خليجي لـ احنا آسفين يا ريس
بس بمناسبة "احنا آسفين يا ريس"، روزاليوسف نشرت امبارح تقرير على لسان مصدر أمني وبعدين نقلته عنها مجموعة من المواقع الاخبارية.. التقرير بيتكلم عن تمويل جماعة احنا آسفين يا ريس من مصادر خليجية وعن خطابات تحريضية من الرئيس المخلوع لأبناءه اللي آسفين.. دة كله على عهدة روزاليوسف.. إيه مدى صحة الكلام دة من عدمه وإيه الإجراءات اللي بتتاخد لإثبات صحة الكلام دة أو نفيه، دة اللي هيقولهولنا:
بلدنا بالمصري: اختراق صفحة دعم المستشار البسطويسي
من ضمن الحاجات الغريبة والمريبة برده، إن فيه النهاردة صفحة من الصفحات الرسمية على فيس بوك لدعم المستشار/ هشام البسطويسي كمرشح محتمل لرئاسة الجمهورية، اتعرضت للاختراق والسيطرة من شخص سما نفسه نفسه "سيف مصر" وشال صورة المستشار البسطويسي وحط بدالها صورة الرئيس المخلوع على الصفحة الرئيسية
بلدنا بالمصري: ضبط المتهم بقتل النقيب حازم عزب
وبما إننا لسة مع الحملات الأمنية المختلفة، أجهزة الأمن تمكنت النهاردة وامبارح من القبض على المتهمين بقتل 2 من شهداء الشرطة المقدم / هشام رفعت المتولى، مفتش مباحث قسم القصير، اللي استشهد يوم 4 مايو 2011 أثناء مطاردته لعصابة متخصصة فى السطو على محطات البنزين.. الأجهزة الأمنية كانت قبضت فعلاً على خمسة من أصل عشرة من أفراد العصابة والنهاردة قبضت على السادس وجاري البحث عن الباقيين.. أما الشهيد التاني فهو، النقيب حازم محمود عزب، الظابط في مديرية أمن القاهرة، اللي استشهد من يومين على الطريق الدائري أثناء تأمين الطريق.. اجهزة الأمن قبضت على المتهم، امبارح بالليل واحنا النهاردة كنا عنده في مكان احتجازه.
بلدنا بالمصري: قطع صفحة مبارك يحكم مصر الآن
بمناسبة الرئيس المخلوع، المدرسة الخاصة اللي وزعت السنة ديه على تلاميذها في سنة أولى ابتدائي، كتاب الأنشطة في الدراسات الاجتماعية وفيه سؤال عن من يحكم بلدي وإجابته: من يحكم بلدي الآن الرئيس محمد حسني مبارك، النهاردة كان أول يوم دراسة فيها.. الولاد والبنات راحوا المدرسة بالكتاب إياه ورجعوا من المدرسة بنفس الكتاب لكن مقطوعة منها الصفحة إياها ودة أضعف الإيمان والاعتراف بالحق فضيلة وعقبال ما يكون إجابة السؤال: "من يحكم بلدي الآن فلان الفلاني اللي انتخبه الشعب في أول انتخابات رئاسية حرة ونزيهة في تاريخ الشعب المصري"..
بلدنا بالمصري: شهادات جلسة قتل متظاهرين حدائق القبة
النهاردة كان فيه جلسة جديدة من جلسات محاكمة المتهمين بقتل الثوار في حدايق القبة وعددهم 14 ظابط وأمين شرطة.. وعلى ما يدوا إن الشهود النهاردة كان عندهم كلام كتير.
بلدنا بالمصري: الجمعية المصرية لم تكلف بمراجعة المناهج
الدور والباقي بقة على كتاب "مبادئ الفلسفة والمنطق والتفكير العلمي" المقرر على أولى ثانوي السنة ديه وعلى ضهره أقوال مأثورة من خطابات الرئيس المخلوع... بس بالمناسبة ديه، احنا جالنا جواب من الدكتور عادل غنيم، رئيس الجمعية التاريخية فيه توضيح بخصوص بعض من اللي قاله الدكتور رضا مسعد، رئيس قطاع التعليم في وزارة التربية والتعليم، في حلقة يوم الخميس على الهوا.. فخلونا نسمع أولاً الجزء اللي بيوضحه الدكتور عادل غنيم في جوابه وبعدين نشوف الجواب بيقول إيه.
بلدنا بالمصري: ملف الخصخصة بكل فساده اتفتح
ملف الخصخصة بكل فساده خلاص اتفتح والقضاء وراه والزمن الطويل، ومسيره ييجي اليوم اللي تترد فيه المظالم وترجع الحقوق لأصحابها.. بعد عمر أفندي وطنطا للكتان والمراجل البخارية وغزل شبين، جه الدور على الشركة العربية للتجارة الخارجية، هيئة مفوضى الدولة أوصت النهاردة بإلغاء وبطلان عقد بيعها واسترداد الدولة لكل أصول وممتلكات ومعدات الشركة، وإعادة العاملين لسابق أوضاعهم.
أما محكمة القضاء الادارى في مجلس الدولة، فقررت النهاردة إحالة الدعوى اللي بتطالب بإقالة أعضاء الحزب الوطنى المنحل وإقصائهم عن المناصب القيادية لمدة 5 سنين لهيئة المفوضين لإعداد تقرير بالرأى القانونى
بلدنا بالمصري: وقفة عمال النقل العام أمام مجلس الوزراء
رصيف مجلس الوزرا النهاردة الحقيقة كان يساع من المضربين يمكن أكتر بكتير من ألف.. غير الأطباء كان موجود كمان عمال هيئة النقل العام المضربين كمان عن العمل، العمال وصلوا لحد مجلس الوزرا في مسيرة طويلة عريضة، هنشوفها بعينينا في التقرير اللي جاي.
بلدنا بالمصري: محاولة لحل أزمة إضراب عمال السكر
نروح بقة للإضرابات العمالية والمهنية.. مبدئياً، دولوقتي حالاً واحنا على الهوا، فيه اجتماع في مكتب وزير الصناعة في محاولة لحل أزمة إضراب عمال مصانع السكر في الصعيد، من أول ممثلين عن العمال لحد رئيس مجلس الإدارة.. الاجتماع بدأ الساعة التلاتة ومازال مستمر.. وبمجرد ما يخلص الأطراف المعنية هياخدوا بعضهم وهييجوا على هنا وفي فقرتنا الأخيرة هنعرف منهم هم شخصياً الأزمة رسيت على إيه..
بلدنا بالمصري: وقفة احتجاجية للأطباء أمام مجلس الوزراء
نروح بقة لإضراب الأطباء، اللي ما زال مستمر في كتير من المستشفيات على مستوى الجمهورية، بس النهاردة كمان كان ليهم وقفة احتجاجية قدام مجلس الوزرا اعتراضا على اللي سموه تجاهل وزير الصحة ورئاسة الوزرا لمطالبهم.
بلدنا بالمصري: ضرب تلميذ رفض تنظيف الحوش
على هامش إضراب المعلمين، مدير مدرسة من مدارس شبرا الخيمة، قال بدل ما التلاميذ قاعدين كدة لا شغلة ولا مشغلة قرر يجمعهم في حوش المدرسة وطلب منهم ينضفوه.. فواحد من الطلبة رفض ما كان من مدير المدرسة إلا إنه نزل عليه بالعصايا وفين يوجعك.
بلدنا: مكافأة امتحانات النقل واقتراح وزير التعليم
أما عن إضراب المعلمين، مجلس الوزرا رفض النهاردة اعتماد المقترح اللي قدمه الدكتور أحمد جمال الدين موسى، وزير التربية والتعليم، بزيادة إجمالى حوافز المعلمين من خلال عدم احتساب مكافأة امتحانات النقل، وقيمتها 200 يوم فى السنة، من إجمالى الحوافز، بمعنى عدم احتساب مكافأة الامتحانات من إجمالى الحوافز. والظاهر إن الوزارة كانت متوقعة موافقة الحكومة، خاصة إنه ديه تاني مرة يتقدم فيها الوزير بنفس المقترح.. التفاصيل هنعرفها من:
بلدنا بالمصري: إلغاء لقاء الفريق شفيق بنادي اليخت
في حلقة امبارح كنا نقلنا خبر عن جريدة الجمهورية بيأكد إن اتحاد ثوار اسكندرية هينظم بكرة الجمعة لقاء مفتوح في نادي اليخت في اسكندرية، للفريق أحمد شفيق رئيس الوزرا السابق، وإن فيه احتمال يكون فيه "العديد من المفاجآات" ومش بعيد يكون من ضمنها، إعلان الفريق أحمد شفيق ترشحه لمنصب رئيس الجمهورية. لكن النهاردة الأستاذ احمد الحمامي عضو اتحاد ثوار اسكندرية،أعلن إنه تم الغاء اللقاء لأسباب هو هيقولهالنا بنفسه.
بلدنا بالمصري: رأي الشارع في ربع مليون لـ مدرب المنتخب
وقبل الفاصل، ما تيجوا بقة ننزل كدة لحد الشارع نشوف في عز اللي احنا فيه دة الناس رأيها إيه في ال250 ألف جنيه مرتب المدير الفني لمنتخب كورة القدم كل شهر.
بلدنا بالمصري: وقفة احتجاجية لطلبة الجامعات أول أكتوبر
المجلس الأعلى للجامعات أصدر قرار النهاردة بضرورة تواجد رؤساء الجامعات الحاليين أو القائمين بأعمالهم، وعمداء الكليات وجميع القيادات الجامعية، مع بداية اليوم الأول من السنة الدراسية في أول أكتوبر، كرد فعل علي أعضاء هيئات التدريس اللي قرروا الإضراب عن العمل مع بداية السنة الدراسية. وفي نفس القرار إلغاء سفر القيادات وأعضاء هيئة التدريس، إلا فى حالة الضرورة القصوى مع التأكيد على ضرورة الانضباط فى العملية التعليمية، وتشجيع الأنشطة الطلابية فى جميع المجالات. أما من ناحية الطلبة، المكتب التنفيذى لاتحاد طلاب مصر قرر تنظيم وقفة احتجاجية أول أكتوبر مع بداية السنة الدراسية الجديدة.. بحيث تكون الوقفات في كل جامعة على حدة ويكون مسؤول عنها اتحاد الطلبة "الشرعى المنتخب" في كل جامعة، تضامنًا مع إضراب أعضاء هيئة التدريس للمطالبة برحيل كل القيادات الجامعية الحالية وتوعية الطلبة الجداد بالقضية.
بلدنا بالمصري: أمن .. عيش .. حرية
من ناحية تانية، فيه اكتر من 40 من القوى والحركات السياسية أعلنوا النهاردة في مؤتمر صحفي في نادى أعضاء هيئة تدريس جامعة القاهرة،عن مبادرة "التوافق الشعبي" على المطالب الأساسية للثورة تحت شعار "أمن.. عيش.. حرية".
بلدنا بالمصري: تسرب بترول وغازات سامة بالغردقة
في منطقة جمشة في الغردقة، فيه عملية تسرب بترولي للزيت الخام الخفيف، من ثلاث ينابيع قديمةمستمرة النهاردة بقى لها يومين وإمتدت لحد المنطقة البحرية، وفيه كميات من الزيت الخام وصلت لمية البحر الأحمر.. دة معناه إيه وإيه خطورته خاصة وإن وزارة البيئة اكدت أن الزيت الخام بيصاحب تدفقه عدد من الغازات السامة تم رصدها بأجهزة قياس التلوث الجوي
بلدنا بالمصري: أهالي المحروسة وإضراب المعلمين
نظرياً ومن وجهة نظر ناس كتير إضراب المعلمين واقف بخسارة جامدة على التلاميذ وعلى أهاليهم بالتأكيد.. لكن المعلمين المضربين بيأكدوا إنه عملياً الإضراب دة لو حقق مطالبه الفايدة هتعم علة الطلبة وعلى أهاليهم زيهم زي المدرسين بالظبط ويمكن زيادة شوية.. وكل طرف حجته معاه، هنسمعها منه شخصياً:
أ. أحمد حنفى: تاجر وولى أمر لتلاميذ فى اعدادى وابتدائى (ضد الاضراب)
أ. هدى عبد الغني: ولية امر لطلبة فى اعدادى وابتدائى وعضو مجلس امناء فى احد المدارس
أ. هدى محمد: مدرسة لغة المانية وولية امر في نفس الوقت لولد في 1 اعدادي وعضو لجنة روابط المعلمين
أ. نور الدين على: مدرس لغة عربية وولى امر لطالب فى ابتدائى واحد منظمى الاضراب فى احد المدارس
بلدنا بالمصري: بلدنا على كف إضراب
الأستاذ/ أحمد الصاوى: مدير تحرير جريدة الشروق .....ومقاله فى جريدة الشروق (بلد على كف إضراب)
