برنامج بلدنا بالمصرى تقديم ريم ماجد على قناة OTV حلقة الثلاثاء 20/9/2011 يوتيوب كاملة
كلمتين بالمفتشر عن المدعوة النخبة
كلمتين بالمفتشر وبصريح العبارة كدة عن المدعوة "النخبة" وسنينها وإيامها.. حيث إن الظاهر كدة والله أعلم إن الناس خلقها ضاق وفاض بيها من قولة: " المفكر السياسي والناشط الحقوقي.. لأ الخبير الأمني أو الاستراتيجي أو الاتنين في نفس واحد.. طب الفقيه الدستوري.. أو وكيل مؤسسي الحزب الفلاني العلاني لكل حاجة في الدنيا من الإبرة للصاروخ ومن طقطق لسلامو عليكوا... طب عضو المكتب التنفيذي اللي ماعرفش ماله لائتلاف أو اتحاد أو مجلس أمناء الكرة الأرضية وضواحيها وعلى المقيمين خارجها مراعاة فروق التوقيت الثوري، وربنا يزيد ويبارك وعلى العين والراس.. بس دة ما يمنعش إن الناس اللي بيتسموا مجازاً " الأغلبية الصامتة والأعضاء المؤسسين لحزب الكنبة"، روحهم بقت في مناخيرهم وبقة عندهم إحساس كدة إنهم كوم والعالم ديه كوم تاني خالص.. إنهم في وادي والجماعة دول في وادي تاني خالص.. دول يقولوا: لقمة هنية ودول يقولوا حرية وديمقراطية.. دول يقولوا أمن وأمان ودول يقولوا لا للطوارئ على المحاكمات العسكرية في يوم واحد.. دول يقولوا استقرار ودول يقولوا دولة مدنية وقايمة نسبية.. دول يقولوا كفاية بقة ودول يقولوا لأ مليونية!!!... بس الأكادة بقة إني أبصم بالعشرة إن دول ودول نفسهم ومنى عينهم في نفس الحاجة ومش طالبين من الدنيا غير هي نفس الحاجة.. بس غالباً الأزمة في الترجمة وفي همزة الوصل!!! يعني مثلاً:" لقمة هنية": اللقمة لوحدها أمرها سهل وماحدش بيموت من الجوع وممكن ناس تاكلها والعة وناس تاكلها بطعم الذل وبالضالين، لكن عشان اللقمة تبقى هنية: فدة معناه انها مش هتيجي إلا بالحرية والديمقراطية والدولة المدنية: يعني الكرامة والحق والعدل ومافيش حد أحسن من حد!!! طب الأمن والأمان: الأمن جايز مش أكيد يتحقق بالحديد والنار والسيخ المحمي والبيع والشرا في خلق الله على الفاضية والمليانة، لكن الأمان مستحيل ييجي كدة.. الأمان يعني الواحد يمشي آمن وهو رافع راسه ومتأكد إن ماحدش يوطيها والحجة الأمن.. إن الواحد يحط راسه على المخدة وهو مطمن إن اللي بيحميه بيحميه من غير ما يتأمر ويتشرط عليه: أحميك بس أأذيك وقت ما يحلالي وما تقولش تلت التلاتة كام، ويا كدة يا إما يفتح الله لا أذيك يا عم ولا احميك واصطفي انت بقة مع نفسك لحد ما تقول حقي برقبتي.. الأمان ما بيجيش بالعين الحمرا بييجي بالهيبة ومش أي هيبة، هي هيبة واحدة اسمها هيبة القانون اللي يمشي زي السيف وهو مغمض على الكبير زي الصغير وعلى الوزير زي الغفير وبرده مافيش حد أحسن من حد!!! وهكذا.. أما بقة قولة كفاية لأ مليونية: فدة مجرد اختلاف في وجهات النظر مش لازم ابداً يفسد للود قضية: اللي عايز ينزل ينزل واللي عايز يقعد على الكنبة خليه، بس مش من حق لا دة ولا دة إنه يجيب من الأرض ويحط على دماغ التاني: " هتخربوها.. لأ دة انتوا اللي هتجيبونا ورا.. انتوا ملعوب في دماغكوا.. لأ انتوا اللي مش فاهمين حاجة وهتغرقونا.. انتوا قلة مندسة.. لأ بقة دة انتوا اللي فلول.. انتوا مش الشباب الجميل اللي عمل الثورة.. لأ دة انتوا اللي ثورة مضادة..."!!! بقة بالذمة دة اسمه كلام؟!!! القصد عشان أنا طولت عليكوا: " اللي عمل الثورة ديه لا هم النخبة ولا هم الشباب الجميل.. بس الأكيد إنهم جزء من "كل" هو الأصل وهو اللي عليه العين وهو الخير والبركة..
بلدنا : لا يجوز مد حالة الطوارئ دون استفتاء الشعب
بمناسبة الكلام عن الطوارئ بقة خلونا نبدأ بتصريحين في منتهى الأهمية ويمكن أهميتهم جاية من إنهم مش لايقين على بعض خالص.. أولهم للدكتور عصام شرف رئيس الوزرا، أثناء ما كان بيفتتح النهاردة الصبح صالة "المواسم" للسفر والوصول في مبنى الركاب رقم (3) في مطار القاهرة الجوى.. الدكتور شرف وصف تفعيل قانون الطوارئ بـ''الموقت''، وأكد إن الهدف منه حماية الثورة من البلطجة، وسيتم التخلص منه في أقرب فرصة.. أما التصريح التاني، فدة المستشار/ طارق البشري رئيس لجنة التعديلات الدستورية اللي استفتينا الشعب عليها والمفروض إنه قال كلمته ووافق عليها.. مع العلم إنه امبارح فات 6 شهور بالتمام والكمال على يوم الاستفتاء.. المستشار طارق البشر بيأكد إن مصر النهاردة المفروض إنها بدون حالة طوارئ، بقوة المادة 59 من الإعلان الدستوري المأخوذة من التعديلات الدستورية التي تم الاستفتاء عليها، واللي بتنص في فقرتها الأخيرة على الآتي: "في جميع الأحوال لا يجوز أن تمتد حالة الطوارئ لأكثر من 6 شهور إلا بعد استفتاء شعبي"!!!
بلدنا بالمصري: إعتصام عمال مصنعي سكر أرمنت وإدفو
من المدرسين للعمال في مصنع سكر ارمنت في الاقصر، اعتصامهم في المصنع تم النهاردة 8 إيام.. ومطالبهم: زيادة الحافز وبدل الانتاج وضم مدة التجنيد والغاء النشاط الرياضي وتوفير مواصلات امنة وغيرها من المطالب اللي على ما يبدو اترفع سقفها بعد هجوم المهندس/ حسن كامل رئيس مجلس ادارة شركة السكر والصناعات التكاملية على العمال المعتصمين ووصفهم بانهم من "العمال أصحاب الأجندات الخارجية".. فبقوا بيطالبوا كمان باقالة رئيس مجلس الادارة ومجلس الادارة بالكامل.. وانضم ليهم عمال مصنع سكر ادفو في اسوان ومعتصمين من امبارح، وحوالي ألف عامل من عمال مصنع سكر ابو قرقاص في المنيا ونظموا النهاردة وقفة احتجاجية وهددوا باعتصام مفتوح لو ما تمتش الاستجابة لمطالبهم.
بلدنا بالمصري: إستقالة الأمين العام لمجلس الآثار
من ناحية تانية، الإضرابات والاعتصامات في المجلس الأعلى للآثار اللي أدت لقفل مقر المجلس خلال اليومين اللي فاتوا واتنقل جزء كبير منها النهاردة لمبنى المجلس في العباسية، أدت النهاردة بالدكتور محمد عبدالفتاح، الأمين العام للمجلس لتقديم استقالته لمجلس الوزرا لإنه فاض به الكيل -على حد تعبيره- ولإنه رافض يكون مسئول بلا صلاحيات، برده على حد تعبيره.
بلدنا: د. عصام شرف يحرض الأهالي ضد المعلمين المضربين
الدكتور/ عصام شرف كان ليه النهاردة كمان تصريحات حوالين اضراب المعلمين، أكد فيها إنه على اتصال مستمر بوزير التربية والتعليم لحل أزمة إضراب المعلمين اللي تم النهاردة يومه الرابع، وبحث مطالبهم، خاصة وإن كان فيه اجتماع امبارح بين وزير التعليم ووزير المالية.. لكن رجع رئيس الوزرا وأكد إنه من الصعب الاستجابة لمطالب واحد نص مليون معلم دفعة واحدة، دة غير الستة مليون موظف في الحكومة عندهم مطالبهم هم كمان، خاصة في ظل اقتصاد يعانى من المشاكل في الوقت الحالى. وبعدين الدكتور شرف وجه كلامه لأولياء الأمور وطالبهم "بالضرب بيد من حديد على جميع المدرسين الذين يعطلون العملية التعليمية، وهم أنفسهم من حولوا المدارس فى الفترة المسائية إلي مراكز متخصصة للدروس الخصوصية" على حد تعبير رئيس الوزرا!!!
بلدنا بالمصري: إضراب عمال النقل العام -- 20 سبتمبر 2011
على ما يبدو إن الأزمة الوحيدة اللي عدت على خير لحد دلوقتي هي أزمة إضراب عدد من العاملين في هيئة النقل العام، بعد ما وافق الجهاز المركزى للتنظيم والإدارة على إدراج هيئة النقل العام فى حافز الإثابة الـ200%. فقررت النقابة العامة المستقلة للعاملين بالهيئة إلغاء جميع الإضرابات والاعتصامات في جميع جراجات الهيئة، بعد تحقيق الجزء الأكبر من مطالبهم.
بلدنا بالمصري: إنتخابات رؤساء أقسام الجامعات
من ضمن اللي خادناه من الثورة إنها ردت الروح في " مبدأ الانتخابات" من أول النقابات لحد الجامعات، اللي كانوا فقدوا الأمل في إنهم ممكن يعيشوا ويشوفوا اليوم دة.. يعني النهاردة مثلاً يوم تاريخي في عمر الجامعات المصرية اللي بدأت فيها أول انتخابات من 17 سنة، وبالتحديد من سنة 94.. انتخابات النهاردة لاختيار رؤساء الأقسام، وعلى ما يبدو إن الإقبال في كل الكليات في كل الجامعات على مستوى الجمهورية كان معتبر.
بلدنا: المعركة الإنتخابية محتدمة في نقابة المحامين
أما بالنسبة للنقابات فالمعارك الانتخابية على قدم وساق وموقفة الدنيا على رجل بالذات في نقابة المحامين والصحفيين.. خلونا نبدأ بنقابة المحامين.
بلدنا: المعركة الإنتخابية محتدمة في نقابة الصحفيين
ومش بعيد أوي عن نقابة المحامين، الوضع في نقابة الصحفيين ما يختلفش كتير بالذات فيما يخص سخونة الأجواء الانتخابية.
بلدنا: تأجيل محاكمة قتل المتظاهرين بحدائق القبة
النهاردة كان فيه جلسة من جلسات محاكمة المتهمين بقتل المتظاهرين في حدائق القبة، وعددهم 14 ظابط وأمين شرطة.. المحكمة اجلت نظر القضية لجلسة يوم الخميس اللى جاى.
بلدنا بالمصري: أمر ضبط وإحضار قتلة سيد بلال
حد فاكر سيد بلال؟!! الإسم مش غريب عليكوا صح؟!!! سيد بلال، هو الشاب السلفي اللي قبضت عليه مباحث أمن الدولة بعد أحداث كنيسة القديسين في اسكندرية أول السنة ديه ومات.. وأهله اتهموا ظباط أمن الدولة بتعذيبه لحد مات ومعاينة الجثة وشهادة الشهود اللي كان مقبوض عليهم معاهن أكدا إنه اتعرض للتعذيب والسحل لمدة 18 ساعة متواصلة بدون توقف لحد ما مات.. فمن ضمن الحاجات اللي خادنا من الثورة إن النهاردة، نيابة غرب اسكندرية الكلية أمرت بضبط وإحضار الظباط المتهمين بقتله، وبعتت أمر الضبط والإحضار للمنطقة الشمالية العسكرية لتفيذ القرار.
بلدنا بالمصري: إستشهاد النقيب حازم محمود عزب
بس الظباط الفاسدين والمتهمين بتعذيب ولادنا وقتلهم بدم بارد ويمكن بضمير مرتاح، ما هماش كل الظباط ويمكن كمان ماهماش الأغلبية مهما كتروا وزادوا عن حدهم، والدليل على كدة الظباط اللي بيقوموا بواجبهم في حمايتنا لوجه الله والوطن حتى ولو دفعوا حياتهم في المقابل.. آخرهم كان الشهيد النقيب حازم محمود عزب، الظابط في مديرية أمن القاهرة.. استشهد امبارح على الطريق الدائرى عند منزل مدينة السلام في نفس الواقعة اللي أصيب فيها الرقيب / حسين على إبراهيم بطلقة في رجله الشمال وتم نقله لمستشفى الشرطة في العجوزة.
بلدنا بالمصري: طلة على تجربة الشرطة المجتمعية
بما إننا كلنا بنحلم بشرطة مننا وعلينا تحمينا من غير ما تإذينا ويبقى حد الله ما بيننا وما بينها غير القانون، فتعالوا نطل طلة كدة على تجربة الشرطة المجتمعية يمكن لو اتعممت يبقى فيها الشفا.
بلدنا بالمصري: القمر الصناعي لن يسقط في مصر
دلوقتي وكالة ناسا، وكالة الفضاء الأمريكية أعلنت إن القمر الصناعي "آبر أتموسفير ريسترتش ساتيلايت"اللي انطلق سنة 1991 لدراسة الغلاف الجوي العلوي، خلص مهمته من ست سنين، سنة 2005، وإنه هيرجع على الأرض بسبب نقص الوقود على يوم الجمعة اللي جاية.. هيرجع إزاي بقة.. قالك هيقع على الأرض في مكان مجهول لكن الخطر على سكان الأرض "ضئيل جدا" لإن المفروض إن الجزء الأكبر منه هينفجر في الغلاف الجوي لكن الحطام مش هيتحرق كله وغالباً هينزل على الأرض 26 حتة. ومع إن ناسا بذات نفسها أكدت إنه مستحيل تحديد المكان اللي هيقع فيه حطام القمر مسبقا، إلا إن الدكتور أيمن الدسوقي، رئيس الهيئة القومية للاستشعار عن بعد وعلوم الفضاء ورئيس برنامج الفضاء المصري، أكد النهاردة إن مافيش أي احتمال لسقوط القمر على أرض مصر.
بلدنا بالمصري: قضية فساد كل دقيقتين
قبل الثورة كان الفساد للركب وبعد الثورة اكتشفنا إنه كان من الساس للراس ومازال.. قبل الثورة كان فيه قضية فساد مالي أو إداري كل دقيقتين، وبعد الثورة احنا لسة زي ما احنا محلك سر: قضية فساد مالي وإداري في المصالح والهيئات الحكومية كل دقيقتين.. دة مش كلامنا، ديه النتيجة اللي وصل لها تقرير صادر عن هيئة الرقابة الإدارية.. وعشان بس اللي ممكن يكونوا بيقولوا دلوقتي في عقل بالهم: " يبقى احنا خادنا إيه من الثورة"؟!!! الثورة ما حكمتش عشان تتحمل مسؤولية القضاء على الفساد من عدمه لكن المؤكد إن القضاء على الفساد وعلى القيادات الفاسدة وعلى التشريعات الفاسدة وعلى أي قشاية فاسدة معششة في أي خرم إبرة في بلدنا هو مطلب أساسي من مطالب الثورة وحتى من المطالب اللي بيتقال عليها "فئوية"!!! بس يا هنا من يسمعنا!!!
بلدنا بالمصري: لجنة توثيق ثورة 25 يناير
لجنة توثيق الثورة التابعة لدار الوثائق القومية، نقدر نقول إنها اللجنة الرسمية المسؤولة عن جمع وحفظ كل الوثائق المتعلقة بثورة 25 يناير: من أول الصور والفيديوهات والتسجيلات الصوتية لكل اللي اتنشر عن الثورة في الصحافة سواء المحلية أو العربية أو العالمية.. بالإضافة لدور تاني مهم وهو الحفاظ علي مواقع الإنترنت ومقاطع الفيديو اللي لعبت دور في الثورة.. لإنه مع مرور الوقت ممكن يتم حذف المواقع أو المقاطع ديه.. من ضمن المهام الأساسية للجنة كمان: جمع كل المكاتبات والوثائق الرسمية المتعلقة بأحداث الثورة من الوزارات والهيئات الحكومية المختلفة زي الداخلية والإعلام والدفاع وغيرها.. أما المهمة الأضخم ويمكن الأصعب من ضمن مهام اللجنة هي جمع الشهادات الشفهية من الناس اللي شاركت في الثورة.. وعلى ما يبدو إن المهمة ديه تحديداً هتبدأها لجنة التوثيق من بكرة، وهنعرف التفاصيل من د. خالد فهمي: أستاذ ورئيس قسم التاريخ في الجامعة الأمريكية ورئيس اللجنة (اللي لازم نقول إنها من ست أعضاء معظمهم من الأكاديميين المتخصصين في مجالات مختلفة: التاريخ والعلوم السياسية والتوثيق والانثروبولوجي والأهم إنهم كلهم متطوعين للمهمة ديه)
بلدنا بالمصري: خالد سعيد على حائط برلين
دلوقتي احنا ساعات كتير بتقع تحت إيدينا صور أو فيديوهات أو تصريحات أو بيانات أو حتى مجرد خواطر أو افتكاسات، ساعات دمها خفيف وساعات سقيلة وساعات تخض... من ناحية هي لا تنفع خبر ولا تنفع فقرة ولا محتاجة اصلاً أخد وعطا وكلام كتير، لكن من ناحية تانية بيبقى مش هاين علينا نبخل بيها عليكوا فقررنا إن كل ما تقع تحت إيدينا حاجة من النوع دة، ما علينا إلا إننا نوريهالكم على الماشي كدة ونبقى خلصنا ضميرنا.. اللي معانا النهاردة، على قد ماهي حاجة بسيطة لكن حاجة تفرح وتشرح القلب وتخلي الواحد فخور باللي احنا عملناه وبيضرب بيه المثل في الدنيا كلها.. زي ما حضراتكوا شايفين كدة، ديه الصورة الشهيرة لخالد سعيد اللي احنا كلنا عارفينها كويس وحافظينها صم ويمكن تكون ما بتفارقش ناس كتير وبالذات الأمهات.. لكن صورة خالد سعيد المرة ديه، مرسومة بالإيد واللي رسمها فنان تشكيلي ألماني اسمه أندرياس فون تشرزانوفسكي.. وراسمها على جزء من بقايا حائط برلين اللي فضلت للذكرى واتحولت مع الوقت لزي معرض مكشوف لجميع أنواع الفن.. صورة خالد سعيد هتفضل هناك مؤقتاً لحد ما تتنقل لمكان تاني برده في ألمانيا اسمه "فريدوم بارك" أو حديقة الحرية. (خالد سعيد)
بلدنا بالمصري: فلوسنا اللي اتنهبت .. هترجع؟
السؤال اللي احنا هنحاول نجاوب عليه مع ضيوفنا النهاردة وغالباً الإجابة شرحها هيطول ومش أكيد إننا هنوصل لعقاد نافع بس دة مايمنعش إنه لازم يتسئل.. دلوقتي فلوسنا اللي اتنهبت ديه طول السنين اللي فاتت، هيبقى لنا نصيب فيها، يعني هنعرف نجيبها على داير المليم أو حتى ناقصين شوية ولا عليه العوض ومنه العوض؟! والسؤال دة هيجاوبنا عليه ضيوفنا النهاردة:
- الدكتور/ جمال جبريل: من المجموعة المصرية لاستعادة ثروات مصر
- الأستاذ/ معتز صلاح الدين: رئيس المبادرة الشعبية لاسترداد اموال مصر المنهوبة
مع الوضع بس في الاعتبار إنه من بعد الثورة اتشكلت مجموعة من اللجان الرسمية والشعبية لاسترداد الأموال المنهوبة.. اللي قدرنا نحصرهم ونحددهم هم:
1- اللجنة القضائية: برئاسة المستشار عاصم الجوهري مساعد وزير العدل لجهاز الكسب غير المشروع: وهي اللجنة الرسمية التي تم تشكيلها لاسترداد أموال مصر والمكونة من عدد من المستشارين بوزارة العدل
2- لجنة استرداد الأموال: شكلها مجلس الوزرا برئاسة الدكتور عصام شرف
3- اللجنة القانونية لاسترداد الأموال المنهوبة: أول لجنة شعبية تم تشكيلها من عدد من الشخصيات القانونية وأساتذة الجامعات والخبراء. يرأسها الدكتور حسام عيسي أستاذ القانون الدولي بجامعة عين شمس
4- المجموعة المصرية لاستعادة ثروة مصر: أسستها مجموعة من نشطاء الثورة من واقع البلاغات المقدمة للنائب العام وتقارير الأجهزة الرقابية. أمينها العام: الدكتور محمد محسوب
5- المبادرة الشعبية لاسترداد أموال مصر المنهوبة: برئاسة الإعلامي معتز صلاح الدين. تشكلت في يونيو الماضي من خبراء دوليين وعرب ومصريين في القانون ومكافحة الفساد وبالتعاون مع منظمات المجتمع المدني
بلدنا: مفاجآت بالصوت والصورة في قضية قتل المتظاهرين
امبارح الاستاذ امير سالم محامي اسر الشهداء كان معانا ع التليفون وقال انه عنده معلومات جديدة في قضية قتل المتظاهرين .. وخصوصا قضية القناصة اللي قتلوا المتظاهرين في ميدان التحرير .. واللي لسه غير معروفين لحد دلوقتي .. وهي قضية بتشغل الراي العام مش بس ساحات المحاكم والقضاء .. خصوصا بعد تصريحات اللواء منصور العيسوي وزير الادلخية بانه لا يوجد ادارة للقناصة بالوزارة ؟ مين اللي قتل المتظاهرين ؟ وايه حكاية فيديوهات القناصة اللي اتعرضت في جلسات قضية قتل المتظاهرين اليومين اللي فاتو ؟
