بالمفتشر: مين اللي بياخد فرقة اصطياد البشر
يسعد مساكم وحلقة جديدة من بلدنا بالمصري.. هنبدأها بسؤال واحد مافيش غيره لكن بالمفتشر كدة وبصريح العبارة ومحتاجين رد غطاه.. دلوقتي وزير الداخلية في حوار طويل عريض مع المصري اليوم قال حاجات كتير ياما من ضمنها مثلاً إن تعليماته لمدير أمن الجيزة في الليلة إياها بتاعة الوزارة والسفارة، كدة بالفم المليان: "اللي يحط رجله جوة مديرية الأمن اضربه في قلبه بالنار، لإن اقسام الشرطة ووزارة الداخلية خط أحمر".. وحلف بعزة جلال الله إن اللي هيدخلها مش هيخرج منها حي، وكله بالقانون وماحدش يقدر يقول تلت التلاتة كام لإن ساعتها ضرب النار في القلب هيكون حالة دفاع شرعي عن النفس!!! دة كلام وزير الداخلية!!! المهم إنه لما اتسأل تاني عن القناصة إياهم، ماقالش بقة المرة ديه "ماعندناش وماحيليتناش وفتشني فتش"، لأ أبداً بالعكس.. الراجل بس قال إن الوزارة مافيهاش إدارة للقنص.. وهي ديتها إن فيه شوية ظباط كدة على قد ما قسم بياخدوا فرق قناصة على أصولها، اكمن يعني بيبقى فيه عمليات أمنية كدة، عشان الظابط من دول يبقى قدها وقدود حتماً ولابد ياخد الفرقة إياها، زي مثلاً: ظباط الإدارة العامة للمخدرات ومكافحة الإرهاب!!! كلام جميل وكلام معقول!!! وقال زيادة توكيد بقة على كل ما سبق، سيادة اللوا كان ناقص يحلف ميت يمين على إنه من سنة 70 لسنة 2011، يعني في 40 سنة في عين العدو، مافيش غير هم 1366 ظابط أول عن آخر اللي خدوا الفرقة إياها!!! يبقى لازم بقة الظباط دول يا تبع المخدرات يا تبع الإرهاب، صح؟!!! لأ مش صح.. مين قال كدة؟!!! دول ماشالله ظباط في كل مديريات الأمن والقطاعات المتخصصة -- دة سيادة الوزير اللي بيقول_ طب زي إيه يعني يا سيادة اللوا؟! قالك زي مثلاً: الحراسات الخاصة/ التفتيش والرقابة/ المعلومات والتوثيق والدفاع المدني والنقل والمواصلات وشرطة الكهربا والضرايب والأحوال المدنية/ قطاع الأمن المركزي والمرور وإدارة الإعلام وفنادق الشرطة!!!! _ناهينا مؤقتاً عن إن ظباط الأمن المركزي على سن ورمح وشوية خرطوش على حبتين غاز يطلعوا الروح، أهم من ضمن الظباط اللي بياخدوا فرقة القناصة إياها_ لكن السؤال بقة اللي احنا عايزين رد غطاه: " لا مؤاخذة يعني ولو فيها رزالة أو قلة مفهومية مننا: هو صنف "العمليات الأمنية ديه" اللي حتماً ولابد يبقى الظابط من دول قدها وقدود بفرقة قناصة على أصولها، لو هو ظابط في الأحوال المدنية؟ ولا في شرطة الكهربا أو في المرور؟!!! ومعلش خدوني على قد عقلي وقولوا لي: " الظابط في إدراة الإعلام والعلاقات العامة أو التوثيق والمعلومات ليه حتماً ولابد ياخد فرقة متخصصة تعلمه إزاي يصطاد البشر عند اللزوم؟! بس.. آدي السؤال اللي لسة ماعندناش رد غطاه!!! بس يمكن نقدر نلاقي له إجابة في فقرتنا اللي جاية بعد آخر الأخبار واللي هنسأل فيها سؤال تاني بس يمكن إجابته يطول شرحها عن الاحساس بخيبة الأمل ويمكن القلق اللي بدأوا يصيبوا كتير من المتابعين لقضايا قتل الثوار.. وسؤالنا بالتحديد: على الإحساس دة في محله ولا مالوش لزمة؟!!!
بلدنا بالمصري: دكتور رضا مسعد مبيردش علينا
بس خلونا نبدأ كالمعتاد بآخر أخبار بلدنا.. وهنحاول نبدأها بمتابعة للموضوع اللي كنا فتحناه في حلقة يوم الخميس اللي فات عن كتابين على الأقل من كتب المدارس السنة ديه مش مقتنعين أو سهى عليهم الله أعلم إننا عملنا ثورة وإن الرئيس محمد حسني مبارك صبح رئيس سابق ومخلوع وما بيحكمش وبيتحاكم.. أولاً بس فيه توضيح بسيط بخصوص "كتاب الدراسات الاجتماعية للصف الأول الابتدائي" اللي فيه سؤال: " من يحكم بلدي" والإجابة إن اللي بيحكمها هو الرئيس محمد حسي مبارك.. والتوضيح دة مع إننا وضحناه في حلقة يوم الخميس لكن الظاهر إنه لسة مش واضح وجات لنا عليه تعليقات كتير بما معناه يعني "إننا بنألف أو بنتبل على الوزارة لا سمح الله"!!! لإن أولى ابتدائي مش مقرر عليها أصلاً دراسات اجتماعية، ودة صحيح ووضحنا إن الكتاب اللي كان في إيدينا هو كتاب انشطة مقرر على تلاميذ أولى ابتدائي في مدرسة من المدارس الخاصة "في مصر" مش في المريخ.. والدكتور رضا مسعد أكد لنا يوميها إن وزارة التربية والتعليم مالهاش أي إشراف أو سيطرة علة النوع دة من الأنشطة في المدارس الخاصة_حتى احنا ساعتها سألنا هل دة معناه إن ولادنا ممكن تدرس أي حاجة في أي حاجة في المدارس الخاصة تحت بند أنشطة_؟!!! وكان الرد إن في كل الحالات ديه مخالفة وهيتم التحقيق فيها.. ديه حاجة.. الحاجة التانية، إن الكتاب التاني اللي عرضناه والمقرر على طلبة أولى ثانوي السنة ديه 2011-2012 دة كتاب بختم النسر ومكتوب عليه عبارة واضحة وصريحة "غير مصرح بتداوله خارج وزارة التربية والتعليم"!!! احنا بقة من امبارح وعلى يدكوا بنحاول نتابع الموضوع دة مع الدكتور رضا مسعد، إلا إنه يا اما قافل موبايله يا اما بيردش علينا من حيث الأصل!!!
بلدنا بالمصري: السواقين والكمسارية يعلقون إضرابهم
من اضراب المعلمين لإضراب العمال في هيئة النقل العام، العمال كانوا بدأوا امبارح بإضراب جزئي بدأ في جراج المظلات وانضم ليه تباعاً عدد من الجراجات في الاميرية والترعة ومدنية نصر والفتح، وفي عدد من المحافظات.. لكن العمال أكدوا من امبارح إنهم ما عندهمش أي نية لإستمرار الإضراب، وان ديه مجرد وقفة تحذيرية محدودة لتوصيل رسالة لإدارة الهيئة اللي سبق وقدمت لهم الوعود بتنفيذ مطالبهم وبعدين ماطلت فيها.. وعلى ما يبدة إن الإدارة وصلتها الرسالة فعلاً، بدليل إن السواقين والكمسارية اقتنعوا بتعليق الإضراب على وعد بالتفاوض على مطالبهم.
بلدنا: تهديد الأطباء بالتصعيد بعد اجتماعهم بوزير الصحة
النهاردة فات أسبوع بالتمام والكمال على الإضراب الكلي للأطباء وعشرة إيام على بداية إضرابهم الجزئي اللي استمر تلات إيام.. ولحد دلوقتي مش باين إن فيه أي احتمال لحل واضح للأزمة، خاصة بعد ما انتهى اجتماع الأطباء بوزير الصحة أول امبارح تقريباً على مافيش فيما يخص مطالبهم، لكن اللي زاد وغطى إن الأطباء المضربين خرجوا من الاجتماع باحساس ما بين الصدمة وخيبة الأمل، لدرجة إنهم هددوا بالتصعيد يوم الحد اللي جاي إذا استمر تجاهل مطالبهم.
إنتخابات القيادات الجامعية تحت إشراف الأمن الوطني
النهاردة بدأت الانتخابات في الجامعات على مناصب رؤساء الأقسام بالكليات، في أجواء اتوصفت بالهدوء الحذر وعدم وضوح الرؤية في عدد من الجامعات نتيجة لإنه لحد النهاردة فيه قيادات ماحدش عارف إن كانت قدمت استقالتها ولا لأ أو إن كانت استقالاتها اتقبلت ولا لأ.. في نفس الوقت الدكتور معتز خورشيد وزير التعليم العالى، قرار امبارح بس إلغاء التصويت بالتوكيلات واعتماد نتيجة الانتخابات بأى نسبة حضور فى حالة عدم اكتمال نسبة التصويت 50% بعد ساعتين من فتح باب التصويت. وعلى ما احنا فاهمين إن التعديلات الجديدة هي استجابة لمطالب أعضاء هيئة التدريس بالرجوع للآلية اللي أقرها أكثر من83% من أعضاء التدريس فى الاستفتاء اللي اجرته وزارة التعليم العالى.. ومع ذلك، على ما يبدو إن في حالة من التوجس بين أعضاء هيئة التدريس، أولاً من تأخرصدور القرار وبالتالي عدم التأكد من امكانية تطبيقه تاني يوم الصبح على طول.. والحاجة التانية، اللي مش تقلق بس أعضاء هيئة التدريس في الجامعات، ديه تقلق بلد بحالها إن صحت.. الموضوع عبارة عن تقرير اتنشر على عدد كبير من مواقه الصحف والمواقع الالكترونية منها الدستور الأصلي واليوم السابع وبوابة الأهرام تحت عنوان بما معناه_مع اختلاف الصيغ_ "انتخابات القيادات الجامعية تحت اشراف الأمن الوطني"!!! وبيقال إنه تقرير موجه من جامعة القاهرة لجهات أمنية من ضمنها الأمن الوطني فيه قايمة كاملة بأسماء كل المرشحين لمناصب عمداء الكليات والمرشحين للمجمع الانتخابى لاختيار رئيس الجامعة. وجنب اسم ملاحظات من نوع: إخوان/ 9مارس/ معتدل/ معارض لإدارة الكلية الحالية/ محترم وليس له أي توجهات سياسية...الخ. فالسؤال دلوقتي "هو اجنا هنعيده تاني"؟!!!
بلدنا بالمصري: إضراب المعلمين مستمر لليوم الثالث
على أي حال، الغايب حجته معاه.. ويمكن حجته اليومين دول: إضراب المعلمين اللي استمر النهاردة لليوم التالت تقريباً في كل المحافظات على مستوى الجمهورية بنسب مختلفة.. لكن الجديد النهاردة إن الإضراب وصل حتى للمدارس اللي بيزورها وزير التربية والتعليم بمناسبة بداية العام الدراسي الجديد.. والظاهر إنه ماقدرش كمان يقنع المعلمين المضربين بفض إضرابهم قبل الاستجابة لمطالبهم.
بلدنا بالمصري: حجز قضية بث المباريات للنطق بالحكم
من محكمة جنايات الجيزة لمحكمة جنايات القاهرة، المحكمة أجلت القضية المتهم فيها وزير الإعلام السابق أنس الفقي بإهدار المال العام في قصة اشارات البث ليوم 28 ستمبر.
مسيرة لا للطوارئ .. لا للمحاكمات العسكرية للمدنيين
لا للطوارئ.. لا للمحاكمات العسكرية للمدنيين.. لا للقوانين المجرمة للاعتصامات والإضرابات: دول اللاءات التلاتة اللي رفعتهم المسيرة اللي اتحركت النهاردة الساعة أربعة من ميدان التحرير لمجلس الوزرا، بدعوة من 19 حزب وحركة سياسية.
بلدنا بالمصري: جمعة الثورة في خدمة الشعب
من ناحية تانية، فيه عدد من الحركات والأحزاب اللي شاركت في مسيرة النهاردة، وغيرهم من اللي ماشاركوش، أعلنوا إن الجمعة اللي جاية هتكون جمعة "الثورة فى خدمة".. من ضمن الأحزاب والحركات اللي دعت ليها:حركة 6 ابريل وحملة دعم البرداعى والحزب المصرى الديمقراطى الاجتماعى وحزب الجبهة وحزب الشعب والجمعية الوطنية للتغيير والتراس الثورة.
بلدنا بالمصري: تأجيل محاكمة 7 من ألتراس الأهلي
تعالوا بقة نلف لفة بين القضايا والمحاكم وهنبدأها من محكمة الطفل فى ابو قتادة اللى اجلت جلسة محاكمة سبعة من الالتراس الاهلى لجلسة 16 اكتوبر لسماع باقي الشهود مع استمرار اخلاء سبيل المتهمين القصر.. أما بقية المتهمين التسعة في نفس القضية، فعندهم جلسة يوم 5 اكتوبر قدام محكمة جنح مدينة نصر.
بلدنا بالمصري: تأجيل قضية قتل المتظاهرين في الجيزة
أما قضية قتل المتظاهرين فى الجيزة فأجلتها محكمة جنايات الجيزة ليوم الأربع اللي جاي. لكن تفاصيل جلسة النهاردة في التقرير اللي جاي.
بلدنا: إستقالة د. حازم عبد العظيم من وزارة الإتصالات
إستقالة د. حازم عبدالعظيم من منصبه كرئيس مركز الإبداع التكنولوجي وريادة الأعمال التابع لوزارة الإتصالات لورود خطاب إليه بمنعه من التحدث لوسائل الإعلام دون إذن من الوزير
بلدنا : رفض حزب الجماعة الإسلامية: البناء والتنمية
لجنة شؤن الأحزاب وافقت النهاردة على تأسيس حزبين هما الوعي، شادي الغزالي حرب هو وكيل المؤسسين، وحزب الاتحاد اللي اسسه الدكتور حسام بدراوي.. لكن في نفس اوقت رفضت تأسيس "حزب البناء والتنمية" اللي تقدم لتأسيسه عدد من أعضاء الجماعة الإسلامية، وسبب الرفض: قيامه على اساس دينى بالمخالفة لقانون الأحزاب.
بلدنا بالمصري: لم يقر جدول زمني للانتخابات بعد
المستشار عبد المعز إبراهيم، رئيس محكمة استئناف القاهرة ورئيس اللجنة العليا للانتخابات، نفى النهاردة كل الكلام اللي اتردد حوالين قيام اللجنة بتحديد يوم 4 أكتوبر اللي جاي، لفتح باب تقديم أوراق الترشيح لانتخابات مجلس الشعب وأكد ان اقتراح اللجنة على المجلس هو يوم 27 سبتمبر، وإن لحد دلوقتي ما وصلهاش أي رد من المجلس حوالين الجدول الزمني سواء لانتخابات الشعب أو الشورى بمراحلهم المختلفة.
بلدنا: ندوة لمناقشة وفك طلاسم قوانين الإنتخابات
أما عن قوانين الانتخابات، مؤسسة النقيب للتدريب ودعم الديمقراطية، نظمت ندوة النهاردة لمناقشتهم ومحاولة توضيح الطلاسم واللوغاريتمات اللي فيهم وانتهت باقتراح متكامل لعرضه على المجلس العسكري.
بلدنا بالمصري: خيبة أملنا في محاكمات قتلة المتظاهرين
سؤالنا قبل الفاصل كان عن الاحساس بخيبة الأمل اللي اتنقل بالعدوى من داخل قاعة المحكمة في اكاديمية الشرطة وبالذات من امبارح لحسن المتهمين بقتل الثوار والشروع في قتلهم وإصابتهم_اللي أكيد فيه حد قتلهم وخطف نور عينيهم وجابلهم عاهات مستديمة، لإنهم اكيد ما انتحروش ولا عوروا نفسهم ولا عوروا بعض بالرصاص الحي.. وحتى اللي بيتكلموا أيادي خارجية مؤكد ما يقصدوش إن كان فيه عفاريت ضمن القلة المندسة بين الثوار_ المهم.. فالسؤال: الاحساس دة جاي منين وهل هو في محله وليه ما يبرره ولا مالوش أي لازمة؟!!! هنستعين على إجابته بضيوفنا:
- اللواء/ سامح سيف اليزل: مدير مركز الجمهورية للدراسات الأمنية
- اللواء/ رفعت عبد الحميد: واحد من أهم الخبراء الأمنيين
- الدكتور/ خالد أبو بكر: عضو الاتحاد الدولي للمحامين وواحد من المحامين عن المدعين بالحق المدني في قضية قتل الثوار
