برنامج بلدنا بالمصرى تقديم ريم ماجد على قناة OTV حلقة الخميس 15/9/2011 يوتيوب كاملة
بالمفتشر: مبارك يحكم مصر الآن
يسعد مساكم وحلقة آخر الأسبوع من بلدنا بالمصري.. والظاهر كدة إن الواحد على آخر الأسبوع بيبقى تعب باين وخرف وزي اللي بتجيله هلاوس ولا إيه؟!!! أصل الحكاية وما فيها إننا شفت في المنام خير اللهم اجعله خير، قال أنا قاعدة في حتة خلا زي ما تكون كدة حوش المدرسة.. وفي إيدي كام كتاب برده شبه كتب المدرسة.. بصيت لقيت كتاب حلو كدة ولونه بمبة.. باقلب فيه _عادي يعني ولسة مش واخدة خوانة_ ابص الاقي مكتوب على ضهره العبارة الآتية: قال " مقتطفات من حديث "الرئيس محمد حسني مبارك" وتحتيها ييجي 3 4 مقتطفات من إياهم دول!!! أنا بصراحة قلبي طب وبعدين ضحكت وقلت في سري "اللهم ما اخذيك يا شيطان" وما خدتش واديت وقلت في عقل بالي دة حتماً ولابد "كتاب دقة قديمة وعفى عليه الزمن".. ورحت ركناه على جنب على أساس يعني إنه ماعادش ليه عازة والحمد لله!!! وبعدين.. قال بافر في كتاب تاني إلا وعينيا بتقع على سؤال ظريف ودمه خفيف.. ألا وهو: " من يحكم بلدي؟!!!.. يا حلوين.. يا ترى"؟!!! بس وعنها وعيني ما تشوف إلا إجابة السؤال اللي تحرق الدم وتطير برج من عقل ست وسيد العاقلين في ساعة واحدة!!! قال: " من يحكم بلدي جمهورية مصر العربية "الآاااان"_كدة بالمفتشر وبالبنط العريض _ خير اللهم اجعله خير وسلام قول من رب رحيم: قال "الرئيس محمد حسني مبارك"!!! يا ساتر يا رب والشر برة وبعيد!!! المهم.. استهديت بالله كدة وخدت نفسي وكدبت عينيا وغمضتهم وفتحت، قال والاقي الكتابين في وشي يسدوا عين الشمس.. قال الأخراني "كتاب الدراسات الاجتماعية للصف الأول الابتدائي" والأولاني قال "مبادئ الفلسفة والمنطق والتفكير العلمي"!!! شوفوا الحلاوة وسخرية القدر في ساعة واحدة!!! لسنة كام بقة يا أهل الله؟!!! 2011-2012 وعليكوا خير!!! آه والله وماليكوا علي حلفان!!! طب ادوني عقلكوا... بس وما بدهاش.. وقال رحت واخدة بعضي من سكات وطلعت اجري في الشارع زي المجاذيب وقال معلقة الكتب في رقبتي واحد بسبحة والتاني بدبارة وناكشة شعري ومافيش على لساني غير هم كلمتين اتنين: "من أنتم"؟!!! بس الأكادة بقة واللي يحرق الدم ويطير برج من العقل بجد وبحق وحقيقي إنه_ ما عدا الجري في الشارع زي المجاذيب_ كل دة لا هو كابوس ولا هلاوس ولا تخاريف آخر الأسبوع.. والدليل أهوه!!!
بلدنا بالمصري - محاكمة مبارك : شهادة ل. محمود وجدي
بس الحمد لله إننا فعلاً مش في كابوس ولا في حلم وإننا في علم اسمه إن الرئيس المخلوع محمد حسني مبارك، "الآااااان" هو متهم وبيتحاكم بقتل الثوار المصريين_عشان البلد ديه حصلت فيها ثورة واللي لسة مش داريان آن الأوان يصحصح معانا كدة ويفوق_وديه تهمة واحدة من ضمن الاتهامات اللي بيتحاكم عليها الرئيس المخلوع، وكلها _ماشاءالله_ تحت بند الفساد: سواء المالي أو السياسي!!! النهاردة، كان الدور في الشهادة في قضية قتل الثوار، على وزير الداخلية السابق، اللوا محمود وجدي اللي تولى وزارة الداخلية لمدة شهر ونص من يوم 30 يناير.. وفيه عدد من المواقع نشرت شهادته اللي استمرت حوالي 3 ساعات ونص، منقولة عن موقع أخبار مصر، ومعظمها تحت عنوان: "التلفزيون المصري يقوم بتسريب شهادة اللواء محمود وجدي" اللي الحقيقة تعتبر مفاجئة، مش في مضمونها لكن في كونه هو الشاهد اللي أدلى بيها لكن احتراماً منا لقرار حظر النشر_حيث إن الجلسة ديه من الجلسات السرية المحظور النشر فيها_ فاحنا هنكتفي كالعادة بالسؤال عن أجواء الجلسة من بعيد لبعيد.
بلدنا بالمصري: اللي بيتحاكموا أهالي الشهداء
ولإن الرئيس المخلوع بيتحاكم.. ولإن فيه ناس لسة مش معترفة إنه مخلوع وإنه متهم وإنه لازم يتحاكم.. فالناس دول اللي بيسموا نفسهم "أبناء مبارك وفخورين" مافيش جلسة من جلسات محاكمته إلا وياخدوا بعضهم بربطة المعلم ويروحوا يناكفوا في أهالي الشهدا وفين يوجعك.. لكن الغريبة إن اللي بيتحاكموا دلوقتي قدام محكمة جنح القاهرة الجديدة، بتهمة الشغب معظمهم إن ماكانش كلهم من طرف أهالي الشهدا والمتعاطفين معاهم.
بلدنا بالمصري: 10 سنين سجن لـ عز وأعوانه
ولإن مصر برده قامت فيها ثورة عملها الشعب.. ولإن الشعب دة أصر على محاكمة رموز النظام اللي خلعه.. ولإن الشعب دة متحضر وابن اصول فأصر على إنهم يتحاكموا بالحق وبالعدل وبالقانون، "فيحيا العدل": كانت من ضمن الهتافات اللي اترددت النهاردة تقريباً في مصر كلها بعد ما حكمت المحكمة ب10 سنين سجن على المتهمين في قضية "تراخيص حديد عز".
بلدنا بالمصري: إلغاء تراخيص شركات حديد عز
دلوقتي المحكمة مش بس حكمت بحبس المتهمين وتغريمهم بالملايين، ديه حكمت كمان بإلغاء تراخيص شركات الحديد اللي بيملكها أحمد عز.. وبالتالي كان أول رد فعل على الحكم هو رد فعل أسهم "حديد عز" في البورصة.. الأسهم تراجعت بشكل رهيب بنسبة 9% تقريباً يمكن أقل حاجة بسيطة.. لكن السؤال دلوقتي: إيه مصير الشركات ديه.. هتتحول ملكيتها للقطاع العام تاني.. وامتى، من دلوقتي ولا بعد الحكم النهائي بعد الطعن؟ وإيه تأثير تحويل الملكية للقطاع العام أولاً على العاملين في الشركات ديه وعلى سوق الحديد وعلى سوق العقارات عموماً في مصر؟ (الشركات: العز للصلب المسطح، وشركة العز للدرفلة، والعز لحديد التسليح، والشركة المصرية للحديد الأسفنجي، والصلب بشاي, وشركة السويس للصلب, وشركة طيبة للحديد)
بلدنا: تطورات محاكمة المتهمين في قضية تصدير الغاز
خلونا كمان بالمرة بقة ما دام الثورة قامت، نروح لحد محكمة جنايات القاهرة فى التجمع الخامس، نشوف بعينينا آخر تطورات محاكمة المتهمين فى قضية تصدير الغاز لاسرائيل، اللي ما كانش ممكن يتحاكموا في زمانهم لو ماكانتش الثورة قامت.
بلدنا بالمصري: متهمين أحداث السفارة للنيابة العسكرية
يعني المتهمين ببعزقة ثروتنا وحر مالنا على إسرائيل بيتحاكموا قدام محكمة الجنايات معززين مكرمين، أما المتهمين في أحداث سفارة إسرائيل فدول كانوا متحولين للنيابة العسكرية.. لكن رئيس هيئة القضاء العسكرى، اللوا عادل المرسى، قرر النهاردة إحالتهم لنيابة أمن الدولة العليا، عملاً بتوصية مجلس الوزرا امبارح بمحاكمة "اعمال البلطجة" قدام محاكم أمن الدولة العليا بدل المحاكم العسكرية.. من باب إن قضا أخف من قضا!!!
بلدنا بالمصري: رحيل موظفوا السفارة الإسرائيلية من عمان
وبمناسبة أحداث السفارة، احنا عارفين إن السفير الإسرائيلي ومعاه ييجي 70 واحد من البعثة الدبلوماسية خدوا بعضهم وطيران على تل ابيب في نفس الليلة.. لكن النهاردة بقية الطقم الدبلوماسي اللي فضل موجود في السفارة طار هو كمان على تل أبيب النهاردة ومنهم الوزير المفوض ومدير أمن السفارة.. دة إجراء عادي ولا له معنى
بلدنا بالمصري: رد صفحة ثورة الغضب الثانية
بمناسبة برده أحداث الوزارة والسفارة والمديرية.. امبارح كان معانا الدكتور أيمن نور، واتكلم عن واحد اسمه سمينة، الشخص دة ليه صور _عرضناها برده امبارح_ وهو مشارك بعزم ما اداه ربنا في حرق مقر حزب الغد في وسط البلد سنة 2008.. وقال إنه لمح نفس الشخص وإن كان مش متأكد إنه هو، لكن بيرجح إنه هو، لمحه في الفيديوهات بتاعة الأحداث اللي حصلت عند وزارة الداخلية يوم الجمعة اللي فاتت.. لكن المسؤولين عن صفحة "ثورة الغضب التانية" ليهم رأي تاني خالص وطالبين حق الرد المكفول ليهم ولغيرهم بالتأكيد.
بلدنا بالمصري: تكذيب حملة حمدين صباحي
في حلقة امبارح برده، كنا اتكلمنا سواء مع الدكتور أيمن نور أو في أخبار بلدنا، عن الاجتماع اللي ضم 6 أو 7 من مرشحين الرياسة بدعوة من مجموعة من الشباب من ضمنهم وائل غنيم.. وما كانش عندنا أي تفاصيل عن الاجتماع غير إنه ناقش اقتراح السيد عمرو موسى الشهير بلجنة ال100.. النهاردة وصلنا بيان صحفي من حملة الأستاذ/ حمدين صباحي المرشح المحتمل للرياسة والمفروض إنه واحد من ضمن اللي شاركوا في الاجتماع، البيان تحت عنوان "تكذيب" ونصه كالآتي: " ما نشر في بعض وسائل الاعلام بالأمس واليوم لا يعبر بأي صورة من الصور عما يتداوله المرشحون المحتملون للرئاسة في اجتماعاتهم وهم متفقون على استمرار تشاورهم في الشئون الجارية للتوصل الى تحديد القضايا التي يتم التفاهم حولها مع جميع القوى السياسية والاطراف المعنية تحقيقا للصالح الوطني العام".
بلدنا بالمصري: اللعبة .. مصر عايزة مين؟
وبمناسبة مرشحين الرياسة وقبل ما نطلع فاصل، ما تيجوا نشوف "مصر عايزة مين"؟!!!
بلدنا بالمصري: خريطة القوى المشاركة في جمعة 16 سبتمبر
نيجي بقة لجمعة بكرة.. خلونا نعرف من التقرير اللي جاي مين الحركات والقوى والأحزاب اللي هتشارك في مظاهرات بكرة وليه.. ولما نرجع هيكون لنا لسة كلام تاني.
بلدنا بالمصري: الجبهة السلفية تشارك في جمعة 16 سبتمبر
وعلى غير العادة في الظروف اللي زي ديه، الجبهة السلفية أعلنت كمان إنها هتشارك في مظاهرات بكرة.. ومش بس كدة ديه أصدرت بيان دعت فيه عموم المسلمين فى مصر للنزول لميدان التحرير دعما للي سمتهم "اللاءات الثلاثة": لا للطوارئ و لا للمحاكمات العسكرية للمدنيين ولا لعسكرة الدولة.
بلدنا بالمصري: 6 أبريل لن تشارك في جمعة لا للطوارئ
وعلى غير العادة برده في الظروف اللي زي ديه، حركة شباب 6 أبريل أعلنت إنها مش هتشارك فى جمعة " لا للطوارئ" مع التأكيد على تأييدها لمطالبها، لكن المشكلة إن الدعوة جت متأخرة.
بلدنا بالمصري: مذكرة التحالف الديموقراطي من أجل مصر
من ناحية تانية، رؤساء احزاب التحالف الديمقراطي من أجل مصر اجتمعوا النهاردة في اجتماع مغلق لمدة 3 ساعات مضوا فيه على مذكرة هيتم ارسالها للمشير محمد حسين طنطاوى رئيس المجلس الاعلى للقوات المسلحة وأعلنوا عنها في مؤتمر صحفي.
بلدنا بالمصري: رفض الإخوان المسلمون تصريحات أردوغان
جماعة الاخوان المسلمين حذرت امبارح رئيس الوزرا التركي رجب طيب اردوغان من اللي وصفته بإنه "سعي بلاده للهيمنة على منطقة الشرق الأوسط".. واعتبرت الجماعة والتيار السلفي إن كلامه حوالين النموذج العلماني في تركيا على إن تدخل مش مقبول في السياسة الداخلية المصرية. قبل ما نستفهم من الجماعة عن موقفها خلونا الأول نشوف الاستقبال الحافل اللي استقبله اعضاء الجماعة لرئيس الوزرا التركي قبل ما يتكلم عن النموذج العلماني في تركيا.
بلدنا بالمصري: سمير غانم ينفي وفاته
الفنان سمير غانم ينفي ما تردد عن وفاته
بلدنا بالمصري: فيلم الشرارة والمخرج إسلام بلال
مع فيلم الشرارة إخراج إسلام بلال.. دة الفيلم المصري اللي فاز بجايزة مسابقة "حكايات من الربيع العربي" اللي نظمتها إذاعة هولندا العالمية بالتعاون مع مهرجان روتردام للأفلام العربية
- اسلام بلال: كاتب السيناريو ومخرج الفيلم
