نشاهد اليوم
برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
ONtv Livestreaming - البث الحي
اتمنى مشاهدة ممتعة
و نبدا
برنامج بلدنا بالمصرى الاحد 3 فبراير 2013 على قناة ONTV حلقة يوتيوب كاملة
ريم ماجد: مش هلوم الضحية .. واحنا معدناش بتوع الأوتوبيس
بنمسي على حضراتكوا في يوم وليلة من الايام والليالي اللي زيها زي ايام وليالي تانية كتير مرة علقم عدت علينا، وما كناش نتخيل ولا يخطر لنا على بال اننا هنشوفها كدة رؤى العين، فمسافة ما نغمض ونفتح نلاقيها مقدر ومكتوب على جبيننا.. والمكتوب على الجبين لازم تشوفه العين.. بس سبحان الله، كله كوم، كل اللي عشناه وشفناه بكل المر اللي شربناه كوم، كل اللي بنترجاه من الدنيا وبنتمناه على الله ان ربنا يستر عرضنا ستات ورجالة، دة كوم تاني خالص ولا حول ولا قوة الا بالله.. طيب يمكن دة جزاءنا عشان فرطنا في حق ست البنات او على الاقل نسيناه في الزحمة او استهوننا بيه في وسط كل اللي بيجرى لنا؟! او يمكن لاننا دافنين راسنا في الطين وسايبين بناتنا وستاتنا يتمرمطوا على ايد حيوانات مسعورة بتنهش في عرضهم عشان تكسر نفسهم وتكسر عين اهاليهم واللي خلفوهم واللي يتشدد لهم، قال خايفين على صورة الميدان واهل الميدان مع ان الميدان واهل الميدان هم الضحية، لكن احنا جهابزة مع مرتبة الشرف في لوم الضحية ولو طلنا ننصب لها المشانق مش هنتاخر وهنطبطب على ضميرنا وناخده على قد عقله ونلبسه العمة ونقوله احنا عملنا اللي علينا وانت مرضي يعني مرضي!! وبعدين نرجع نقول: لا ابداً مافيش تعذيب ممنهج ولا حاجة هي ديتها احداث فردية وتجاوزات غير مقبولة اه، لكن هتعدي ولا من شاف ولا من دري.. وان دري هيعمل ايه يعني؟! اعلى ما في خيله يركبه لان اغلبنا برده هيستسهل ويلوم الضحية ويعلق لها المشانق ويقنع ضميره ان الضحية بلطجي او عصبحي او شيخ منصر، وكان البلطجي وشيخ المنصر يستاهلوا التعذيب وهتك العرض والقتل كمان وماله في ستين داهية وبناقصهم.. وطز في القانون وفي حق البني ادم في المعاملة الادمية او حتى في الحياة.. احنا القاضي واحنا الجلاد وحكمنا غيابياً على الضحية بانها تستاهل اللي يجرالها وهنقنع ضمايرنا برده اننا كدة وقفنا مع الحق في وش الشر ولازم ضمايرنا ديه ما تبقاش حنبلية وما تحبكهاش اوي وتاخدها من قاصرها وترضى.. بس المرة ديه هنعمل ايه؟! المرة ديه مش هنعرف نكدب عينينا، والا بجد ياكلهم الدود ونخلص منهم ونرتاح.. مش هنقدر نكدب عينينا حتى لو الضحية انكر وحكى لنا حكايات وحواديت ليها العجب ويا ريتها محبوكة.. مش هنعرف نكدب عينينا المرة ديه.. ولو كدبناها المرة ديه وصدقنا الحكايات والحواديت واستسهلنا برده وريحنا ضمايرنا يبقى حلال فينا اي حاجة بقة.. بس الالعن المرة ديه من اننا نكدب عينينا، هو اننا نصدق عينينا ونلوم على الضحية انه كدبها، ونقرر انه شرب شاي بالياسمين، او باع نفسه او فرط في حقه وعرضه وشرفه، من غير ما نفكر ثانية واحدة نحط نفسنا مكانه.. او نتخيل ممكن يكون اتعرض لايه هو ومراته وعياله واهله واللي يتشددوله وهم تحت ضرس اللي سحله واللي عراه واللي ما يعرفش لا شفقة ولا رحمة.. حتى لو الداخلية كلها باللي فيها بالحكومة باللي فيها بالرياسة باللي فيها بكل القنوات اللي عاملة فيها دينية باللي فيها، انا لا هاكدب عينيا ولا هاصدق حكاياتهم وحواديتهم ولا هالوم على الضحية، ولا هارمي طوبته ولا هفرط في حق ولا هسيبه يصطفي منه ليهم.. حمادة صابر الهلالي بالنسبة لي هو المواطن مصري من بتوع الاوتوبيس.. بس الفرق ان احنا ما عدناش بتوع الاوتوبيس
بلدنا: المواطن المسحول يتراجع ويتهم الداخلية بسحله
المواطن المسحول يتراجع ويتهم الداخلية بسحله .. هنرفع ليه قال كده واتهم المتظاهرين. وبعدين ليه تراجع في أقواله. وهل اتعرض لضغط ولااا أيه اللي حصل .. ومعانا على الهاتف صعب الهلالي - إبن عم حمادة صابر.
متحدث وزارة الداخلية: معترفون بالخطأ .. وسيحاسب من أجرم
معنا على الهاتف اللواء هاني عبد اللطيف - المتحدث بإسم وزارة الداخلية .. ويصرح بأن قوات الشرطة أعتقدت أن حمادة من ضمن المتظاهرين واعتدت عليه. والقضية بأيدي النيابة وتحقق بها. وسوف يحاسب من أجرم. و ارجو أن نعتبر أن ما حدث من سحل وتعرية هو بداية وصفحة جديدة لجهاز الشرطة .. بس أعطونا فرصة.
ريم ماجد: مفيش صوت هيعلى على صوت الوجع النهاردة
ما تستنوش مننا النهاردة اي اخبار غير اخبار الشهدا والمصابين والمعتقلين والمفقودين ومواجع اهاليهم واصحابهم وحبايبهم.. مافيش صوت هيعلى على صوتهم النهاردة.. لا صوت وزير ولا صوت غفير ولا صوت قيادي ولا صوت خبير ولا يحزنون.. على الاقل لحد فقرتنا الاخيرة اللي برده اصوات الشهدا والمصابين والمعتقلين والمفقودين هتكون في الخلفية واحنا بنحاول نفهم طب لو وزارة الداخلية ما كانتش غيرت العقيدة زي ما بتقول كان حصل فينا ايه اكتر من كدة؟!!!! فنصيحة لوجه الله اللي مش ناقص غم ووجع قلب، بلاش يحضرنا النهاردة.
بلدنا بالمصري: عمرو سعد مش بلطجي .. ثالث شهداء الاتحادية
اول صوت هنسمعه هو صوت اهل اخر شهداء موقعة الاتحادية التانية.. اللي استشهد النهاردة
بعد اصابته بطلق ناري في الراس يوم الجمعة اللي فاتت.. عمرو سعد عنده ٢٠ سنة ومش بلطجي، قبل بس ما حد يتشملل ويخلع عليه اللقب مقدماً زي ما عملوا مع كريستي ومع غيره
بلدنا بالمصري: هشام حسنين .. ثاني شهداء الاتحادية
معظم الناس فاكرين ان عمرو سعد الله يرحمه هو تاني شهيد لموقعة الاتحادية بعد كريستي الله يرحمه.. لكن الحقيقة اللي سقطت في عز الزحمة، هي ان عمرو هو الشهيد التالت.. لان في نفس اليوم ويمكن حتى في نفس الوقت اللي استشهد فيه كريستي ويمكن كمان مش بعيد عنه، سقط شهيد تاني، واتصلى عليه وخرجت جنازته من مسجد السيدة نفيسة هو وكريستي في ساعة واحدة.. هشام حسنين هو كمان عنده ٢٣ سنة زيه زي كريستي وزي محمد عبد العزيز الجندي اللي راقد في المستشفى بين الحياة والموت، وزي شهدا ومصابين ومعتقلين ومفقودين في عز شبابهم يادوب عدوا مرحلة الطفولة.. دة طبعاً غير الاطفال.. هشام كان سواق ولا ليه في السياسة ولا ليه في حاجة، وما كانش من المتظاهرين اصلاً.. كان رايح مشوار مع واحد صاحبه في العربية.. فراح وما رجعش
مداخلة من ابو هشام او حد من اهله وياريت لو عرفنا نوصل لصاحبه اللي كان معاه
بلدنا بالمصري: جنازة زي جيكا .. وصية الشهيد كريستي
اخر وصية لمحمد كريستي، كانت جنازة زي جنازة جيكا.. حتة ورقة لقوها اصحابه في جيبه مكتوب عليها "لو مت تتعمل لي حنازة زي جنازة جيكا".. صحيح ان جنازة كريستي ما خرجتش من ميدان التحرير زي جنازة جيكا وكانت على قد اهله واصحابه القريبين، على عكس جنازة جيكا اللي خرجت وراها ناس تسد عين الشمس، لكن دة ما يمنعش ان وصيته اتنفذت واتعمل له بدل الجنازة اتنين وتلاتة وكلهم يليقوا بمقامه.. ولو ان مافيش حاجة في الدنيا تليق بمقام الشهيد.. لكن عزاءنا ان مقامه عالي عند ربه في السما مهما قالوا عليه في الارض
خالة الشهيد كريستي: محمد تم استهدافه وقتله عن عمد
أ. ماجدة شكري - خالة الشهيد محمد كريستي: محمد شجع أسرته على انتخاب مرسي لمنح الإخوان فرصة. وأسرة محمد لا تنتمى لأي فصيل أو حزب سياسي. محمد قال الحمدلله عقب فوز مرسي لأنه كان يرفض شفيق. ومحمد تم استهدافه وقتله عن عمد
حمادة صابر غير أقواله بعد ما شاف اللي إحنا شوفناه
أ. نرمين سليمان - صحفية باليوم السابع .. وأن حمادة صابر غير أقواله بعدد ماشاف اللي إحنا شوفناه بعنينا بعد ما شاف فيديو سحله وتعريته وبعد شهادة إبنته وزوجته وعائلته. وبعد ما كل من حواله عنفوه ولاموه على عدم قول الحقي
بلدنا: الجندي و عمر .. من مفقودين الثورة اللي هنلاقيهم
اما عن المفقودين واللي بيختفوا في عز الاحداث ويا نلاقيهم يا ما نلاقيهمش.. يا نلاقيهم بين الحيا والموت.. فحدث ولا حرج
تلاعب في توقيت دخول الجندي المستشفى وأدعوا أنها حادثة
محمد عبد العزيز - المحامى الحقوقى .. حالة محمد الجندي متأخرة. وبحثنا عن محمد في كل مكان قبل أن نجده في مستشفى الهلال. الإسعاف لم تخطر الشرطه بحادث السيارة الذي يدعون أن الجندي تعرض له
الشرطة تعامل البلطجية أحسن معاملة .. وتعتدي على الثوار
أحمد محمد - والد المصاب عمر: شاهدت الشرطة تعامل البلطجية أحسن معاملة وتعتدي على الثوار. وشاهدت إسم عمر ضمن أسماء المقبوض عليهم فى قسم قصر النيل: إسم عمر أختفى من كشوف المقبوض عليهم فى قسم قصر النيل.
بلدنا بالمصري: مصير شريف الصيرفي مجهول
شريف الصيرفي، اسم اتردد كتير في الفترة اللي فاتت على انه عضو في جماعة بلاك بلوك.. وبعدين رجعت مجموعات منهم قالت ان ما عندهمش حد بالاسم دة.. النهاردة عالريق كدة، انتشر خبر على مواقع التواصل الاجتماعي انه تم العثور على جثة شريف الصيرفي مقتول على طريق مصر اسماعيلية الصحراوي.. وبعض الاخبار ديه نسبت الخبر لمركز النديم، لكن مركز النديم نفى ان يكون خرجت عنه اي اخبار او تقارير بالمعنى دة.. وبعدين نشرت بوابة الاهرام الخبر دة
طفل عنده سرطان وحبستوه .. طب عالجوه أحسن يموت في أيديكم
محمود تم القبض عليه بشكل عشوائي خلال ذهابه إلى المنزل بالاسكندرية. ومحمود مصاب بورم في العظام ومازال محبوس في مدرية أمن الاسكندرية. محمود عمره 14 سنة وحالته خطيرة بسبب تأخر علاجه. طفل عنده سرطان وحبستوه .. طب عالجوه أحسن يموت في أيديكم
طفل عنده سرطان قبضوا عليه عشوائي .. وحالته خطيرة
حمدي خلف - محامى المعتقل محمود المصاب بالسرطان: محمود تم القبض عليه بشكل عشوائي خلال ذهابه إلى المنزل بالاسكندرية. ومحمود مصاب بورم في العظام ومازال محبوس في مدرية أمن الاسكندرية. محمود عمره 14 سنة وحالته خطيرة بسبب تأخر علاجه. طفل عنده سرطان وحبستوه .. طب عالجوه أحسن يموت في أيديكم
بلدنا بالمصري: الداخلية ضحية ولا متهم .. وآخرتها ايه
بعد كل اللي احنا عايشنه دة على الاقل من يوم ٢٥يناير اللي فات على طول دة ولحد النهاردة، هي الداخلية بتعمل فينا ايه بالظبط، باللي ليها واللي عليها، دة لو ليها في ذمتنا اي حاجة؟! واللي بتعمله دة منها لينا كدة، يعني تار بايت وبتخلصه ولا الموضوع اكبر من كدة بكتير يمكن اكبر من الداخلية نفسها باللي فيها.. ويمكن الداخلية نفسها باللي فيها بقت هي كمان ضحية للي اكبر منهم بكتير؟! واخرتها ايه، دة لو كان ليها اخر؟! كل ديه اسئلة هنستعين عليها وعلى غيرها بضيوفنا النهاردة
اللوا/ عبد الهادي بدوي: مساعد وزير الداخلية الاسبق للاموال العامة وصاحب خطة متكاملة لاعادة بناء جهاز الشرطة
ناصر امين: مدير المركز العربي لاستقلال القضاء والمحاماة
