نشاهد اليوم
برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
ONtv Livestreaming - البث الحي
اتمنى مشاهدة ممتعة
و نبدا
برنامج بلدنا بالمصرى الاربعاء 5/6/2013 ONTV حلقة يوتيوب كاملة
ريم ماجد: ٥ يونيو .. كل سنة والمصريين جدعان ومبيفرطوش
يسعد مساكم وحلقة جديدة من بلدنا بالمصري.. النهاردة 5 يونية ويوم 5 يونية دة يوم بسنة.. تقيل قوي على قلبنا وبيقلب علينا مواجع الهزيمة والنكسة وكل نكسة.... ولكن.. احنا الحق علينا.. اشمعنى بنفتكر ان 5 يونية ذكرى النكسة ونقطة.. مع انه بعد النقطة ومن اول السطر 5 يونية شايلنا كمان ذكرى حلوة تشرح القلب وترفع الراس، بحلاوة اعادة افتتاح قناة السويس للملاحة العالمية لاول مرة بعد النكسة ب8 سنين؟!!!! صح؟!!! نقوم احنا وعجبي نفتكر بس الهزيمة وننسى النصر.. وبالتالي انا النهاردة ودوناً عن كل السنين.. هفتكر بس 5 يونية 75.. وهقول كل سنة وكل المصريين طيبين وجدعان وصابرين وصامدين وبيعافروا ومش ساكتين ومش ناويين يفرطوا لا في قناة السويس اللي اتحفرت واتاممت واتقفلت واتفتحت بدم قلبنا.. ولا ناويين يفرطوا في غير قناة السويس ولا في شبر واحد من بلدنا ولا حتى على جثتنا.. كل سنة وهم متمردين على الظلم وعلى القهر وعلى اليأس وعلى الخيبة وقلة الحيلة... كل سنة وهم لسة قادرين يحلموا ببكرة وكل سنة وهم قد التمن.. والاهم من كل دة، كل سنة وهم كل ما يبصوا وراهم كدة ويطلوا على مصر من اول الزمان، يصدقوا ويبصموا بالعشرة اولاً انها محروسة وربنا هو الحارس ومن بعده ليها شعب يحميها ويحرسها ويقرقش الظلط ويشرب المر ويدفع دم قلبه عشان هي تسلم من كل شر... وثانياً يصدقوا ويبصموا بالعشرة ان كل نكسة ومن بعدها نصر ولو بعد حين.. وان كل نهار بيعدي ما بيقدرش يدفع مهرها.. مهما فضل مكتفها وكاتم على انفاسها بييجي عليه يوم وبيرحل.. وبتفضل بلدنا للنهار
ريم ماجد: حسام خرج من القسم على المشرحة .. خالد سعيد جديد
وبرده بلدنا للنهار.. مع انه لسة مافيش حاجة اتغيرت ولسة الدنيا ضلمة.. ولسانا بنموت في عرض البحر وتحت عجل القطر وفي المظاهرات وفي اقسام البوليس.. ولسة خالد سعيد ماهواش اخر شهيد للتعذيب في بلدنا.. بكرة ذكرى استشهاد خالد سعيد التالتة ولسة حقه وحق كل الشهدا من بعده ضايع ولسة رايح هدر.. وامبارح راح مننا خالد سعيد جديد.. بس اسمه المرة ديه حسام.. حسام كان ماشي في أمانة الله، قابل كمين شرطة، وقفه الظابط.. طلب يشوف بطاقته ادهاله.. طلب يفتشه قال له مش من حقك.. وهو فعلاً مش من حقه.. زمن الطوارئ المفروض انه ولى وراح وعشان حضرة الظابط يفتش اي مواطن لازم له اذن من النيابة ولا يبقى مش من حقه.. المهم كلمة من حسام على كلمتين من الظابط جرجروه على قسم شرطة حلوان.. حسام دخل القسم على رجليه وخرج على مشرحة زينهم
ريم ماجد: يدينا العمر ونفتكر حق خالد سعيد وكل الشهدا
نعيش ونفتكر خالد سعيد.. بس ربنا يقدرنا ويدينا العمر لحد ما نعيش ونفتكر خالد وسعيد ونفتكر كل الشهدا بس واحنا جايبين حقهم وضميرنا مرتاح ناحيتهم ويا حبذا يارب لو كنا محققين حلمهم... او عبى الاقل ودة اضعف الايمان اننا نعيش ونفتكرهم بس من غير ما نكون بنشيع اللي بعدهم..
ريم ماجد: معلش .. الحساب يجمع .. والحساب تقل أوي
بتنا امبارح واحنا مش عارفين لاحمد دومة طريق ولا لاقيين له اثر.. واصطبحنا على خبر احالته لمحكمة الجنايات بتهمة التحريض على الاعتداء على مقر مكتب الارشاد في المقطم في جمعة رد الكرامة.. ومش دومة بس اللي متحول للجنايات، دومة واحد ضمن ١٢ ناشط وناشطة امر النايب العام النهاردة باحالتهم لمحكمة الجنايات بنفس التهمة.. من ضمنهم مين بقة: علاء عبد الفتاح، نوارة نجم، احمد عيد، الدكتور حازم عبد العظيم... تهمتهم التحريض على احداث جمعة رد الكرامة.. فاكرين جمعة رد الكرامة كانت بمناسبة ايه؟!! كانت بمناسبة ما السبت اللي قبلها وبرده قدام مكتب الارشاد، نزل واحد من شباب الاخوان بالقلم على وشنا، لما نزل بكف ايده على وش مرفت موسى.. فكانت جمعة رد الكرامة واللي صار واللي كان فيها..... طيب دول اللي حرضوا.. فرضنا فرضاً جدلاً مالوش ريحة الصحة ولا المعنى ان دول اللي حرضوا.. طب فين بقة اللي ضربوا واللي سحلوا واللي عذبوا في قصر الرياسة وفي الجوامع ان كان في الاتحادية ولا في المقطم ومتصورين صوت وصورة يسدوا عين الشمس؟!!! فين اصلاً اللي ضرب مرفت بالقلم على وشها.. اتحقق معاه وكان الله بالسر عليم.. طب فين اللي حرضوا على مجزرة الاتحادية وكلهم معروفين بالاسم وكلهم من كبارات الجماعة وكلهم تصريحاتهم وبياناتهم منشورة ومتصورة.. فين اللي قتلوا الحسيني ابوضيف؟!!! فين اللي شفناهم بعنينا بالرشاشات في الاتحادية؟!!! طب فين اللي شفناهم بعنينا بالمطاوي والسكاكين والسواطير في احداث الكاتدرائية هم والشرطة ايد واحدة ولما دققنا اكتشفنا انهم سبق وكانوا هم والحيش والشرطة ايد واحدة في احداث وزارة الدفاع السنة اللي فاتت؟!!!!! فين اللي قتلوا جيكا وكريستي ومحمد الشافعي ومحمد الجندي؟!!! فين اللي قتلوا ٤٢ بني ادم من اهالي بورسعيد في يوم ونص وفي عز الجنازة؟!!! فين اللي قتلوا الثوار وطفوا نور عينيهم؟!!!! فين اللي سحلوا ست البنات وعروها؟!!! بس معلش.. الحساب يجمع والحساب تقل اوي!!!!
نواره نجم: كان من المفترض استدعائي على أساس الشهادة ولكن تم الإستدعاء على إني متهمة
ومعنا عبر الهاتف نواره نجم ناشطة سياسية: كان من المفترض أن أكون شاهدة في القضية وتم إستدعائي على أساس اني متهمة
بلدنا بالمصري: أحمد دومة وزوجته مضربين عن الطعام لحين الإفراج عنه
ومعنا عبر الهاتف طارق العوضي عضو هيئة الدفاع عن أحمد دومة: النظام يستخدم القانون بديلاً للطوارئ للبطش بالمعارضين.
بلدنا بالمصري: المؤبد لقاتل الشهيد أحمد جمال (روبن هود)
لكن عشان ربنا كبير.. وهو الحق وهو العدل.. وبيقطع من هنا ويوصل من هنا.. النهاردة صدر اول حكم بالمؤبد على قاتل الشهيد احمد جمال، الشهير بروبن هود اللي استشهد في اعتصام دار القضاء العالي السنة اللي فاتت
بلدنا بالمصري: بيان الداخلية فيما يخص وفاة الشهيد حسام كمال أحمد
ليلة عشق أخت الحسن والحسين .. في بلدنا بالمصري
بلدنا بالمصري: المثقفين معتصمين في وزارة الثقافة لحين إقالة الوزير
من ضمن الحسابات اللي تقلت، حساب وزير الثقافة في دفتر المثقفين والفنانين.. وعلى ما يبدو انه فاض بيهم الكيل النهاردة، لدرجة الاعتصام في عقر دار وزارة الثقافة، لحين اشعار اخر او لحين اقالة الوزير ايهما اولاً
بلدنا بالمصري: بيان المثقفون والأدباء والفنانون عن موقفهم من وزير الثقافة
بلدنا بالمصري: إثيوبيا تسخر والسودان تحتج على اجتماع مرسي بالكبارات
اجتماع رئيس الجمهورية على سن ورمح مع كبارات البلد بجلالة قدرهم واللي اتحول لجرسة بجلاجل خلت اللي ما يشتري يتفرج علينا، جرايره عمالة تهل علينا واحدة ورا التانية... امبارح السفير الاثيوبي في القاهرة كره اليوم اللي اتعلم فيه عربي.. بس يا ريتها جت على قد كدة الا النهاردة، الناطق باسم رئيس وزراء إثيوبيا، حسب التصريحات المنسوبة ليه على اسوشيتدبرس قلل من أهمية المقترحات اللي طرحها ممثلو القوى والأحزاب السياسية في مصر أثناء جلسة "الحوار الوطني" بشأن التعامل مع السد الإثيوبي.. ويا ريتها جت على قد كدة كمان، دة كان ناقص يقول كان غيرهم اشطر!!!! لكن اكتفى بانه يفول إن القادة المصريين حاولوا في الماضي دون نجاح زعزعة الاستقرار في إثيوبيا، ووصف مقترحات الهجوم أو التخريب بالفكر القديم الفاشل.. وبان كل دة مجرد "أحلام اليقظة".
اما السودان وعلى عهدة اليوم السابع السودان فاحتجت رسمياً والحمد لله الذي لا يحمد على مكروه سواه.. وليهم حق وماحدش يقدر يقول تلت التلاتة كام!!!!! الاكادة بقة، ان الدكتورة باكينام الشرقاوي مساعدة رئيس الجمهورية وواحدة من دراعاته اليمين، بعد ما اكتفت بالاعتذار عنه انه معلش والنبي سها عليها وجل ملا يسهو.. في حين اننا لو في بلد بصحيح كانت اقيلت او على الاقل اتطلب منها الاستقالة.. ولو احنا في اليابان كانت غالباً انتحرت.... المهم والاكادة ان الدكتورة باكينام بشرتنا بالخير ان كلها كام ساعة واللجنة الوطنية لمتابعة سد النهضة الاثيوبي هتكون متشكلة ٢٤ قيراط.... مين بقة من ضمن اعضاءها
بلدنا بالمصري: البركة في الدبلوماسية الشعبية - سد النهضة
على اي حال، انشالله يكون اللجنة ديه فيها الخير.. بس برده زيادة الخير خيرين.. ومين عارف يمكن تبقى البركة في الدبلوماسية
كله يهون من أجل أمن البلد .. ولاد بلدنا في بلدنا بالمصري
لحن وادي النيل .. للملحن نصير شمة ـ بلدنا بالمصري
لحن رحيل القمر .. للملحن نصير شمة ـ بلدنا بالمصري
تعرف مصر .. نصير شمة ـ بلدنا بالمصري
على حس نصير شمة وعوده .. في بلدنا بالمصري
احتارنا واحتار دليلنا عشان نلاقي كلمات معتبرة نقدمه بيها وتليق بمقامه.. هو الفنان والمثقف والموسيقي والملحن والعازف.. صاحب بيت العود العربي.. وبيت العود العربي بيت كبير وبيت دايماً عامر بحسه وبحس اجيال جديدة من الفنانين العرب اللي اتربوا على ايديه اللي تتلف في حرير.. لكن قبل كل دة وبعده، هو الانسان المهموم بالشعوب بالبشر بالبني آدمين على وش الارض بغض النظر عن الاجناس والاعراق والالوان والاديان.. بيحط همه في المزيكا فيخاطب بيها الدنيا كلها.. يختلف اللسان وتفضل المزيكا اللغة الواحدة.. وتفضل المزيكا افضل اللغات اللي بيجيدها وبيتحاور بيها اللي ما لقيناش لتعريفه كلمات تليق بمقامه غير اننا نسميه باسمه: نصير شمة
ليست هناك تعليقات:
إرسال تعليق