نشاهد اليوم
برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
ONtv Livestreaming - البث الحي
اتمنى مشاهدة ممتعة
و نبدا
برنامج بلدنا بالمصرى الاربعاء 26/6/2013 ONTV حلقة يوتيوب كاملة
ريم ماجد: سددوا ديونكوا الأول .. احنا الشعب صاحب السيادة والمقام العالي
يسعد مساكم وآخر حلقة جديدة من بلدنا بالمصري واحنا في السكة ل٣٠ يونية وربنا يجعل سكتنا المرة ديه سكة السلامة ويتوب علينا من سكة الندامة ويكفينا شر اي سكة من سكك اللي يروح ما يرجعش... ولو فيه حاجات لازم تروح والله لا يرجعها ابداً، فهي القهر والظلم ولقمة العيش المتغمسة بالذل والمهانة... لو فيه حاجات لازم تروح وما ترجعش ابداً فهي الخوف والعجز وقلة الحيلة والمشي جنب الحيط... لو فيه حاجات لازم تروح وما ترجعش فهي التكفير والتخوين وفرز البني ادمين، دة مؤمن ودة كافر.. دة وطني ودة عميل.. دة ابن ناس وشباب طاهر ودة بلطجي يستاهل كل اللي يجرى له.. دة على راسه ريشة ودة على راسه بطحة.... لو فيه حاجات لازم تروح وما ترجعش ابداً فهي الموت ببلاش والدم اللي بيروح هدر ولوم الضحية والجري كل مرة بالمشوار ورا الجلاد نترجاه ونحب على راسه ونتخامى فيه ويبقى كتر الف خيره ومش عارفين نودي جمايله فين غير انها تفضل في رقبتناعمرنا ما هننساه مع انه هو اللي دمنا في رقبته... لو فيه حاجات لازم تزوح وما ترجعش ابداً هو اننا كل مرة نرمي نفسنا في التهلكة واحنا فاكرينها ارحم من النار وبعدين نرجع نرمي نفسنا في النار يمكن المرة ديه تكون ارحم من التهلكة مع اننا نستاهل الجنة ونعيمها... احنا الشعب صاحب السيادة وصاحب المقام العالي.. يؤمر ويتأمر.. وهنياله اللي يخطب وده.. ويا ويل اللي يعاديه او يتأمر عليه او يتمسكن له لحد ما يتمكن منه.. الحقيقة الوحيدة اللي تسد عين الشمس ومش محتاجة قوالة هي ان الشعب والشعب ايد واحدة.... انا الايدين اللي ياما اتمدت عليه والنهاردة ليها شوق تتمد له، ترمي بياضها وتسدد اولاً الدين اللي في رقبتها ولسة منقوش على ايديها بالدم وتبين امارة تليق بمقام بصاحب المقام العالي مش حيالله شوية كلام معسول ووعود... وفي كل الحالات يا قوة الله ويا قوة الشعب والشعب بعون الله قدها وقدود.... ومدد
بلدنا بالمصري: مرسي بيقدملنا كشف حساب سنة .. الحسبة خرمت على الآخر
الدكتور محمد مرسي رئيس الجمهورية اللي كلها كام يوم والشعب نازل له بعد سنة واحدة على الكرسي بكارت احمر وبالونة سودة، حب النهاردة يرمي بياضه ويقدم كشف حساب عن الايام اللي قضاها بعيد عن مصر العشة واختار بكامل ارادته مصر القصر ومن ساعتها وهو بيعلي السور... فكانت النتيجة ان الحسبة خرمت على الاخر.. اما الشعب فعجل بالنزول من باب ان خير البر عاجله
بلدنا بالمصري: الآلاف يهتفون لمرسي في التحرير الآن ارحل
ومعنا عبر الهاتف من ميدان التحرير محمد الخولي مراسل أون تي في: الآلاف يهتفون لمرسي في التحرير الآن إرحل. الوضع أمن تماماً في التحرير الآن وأعداد المتظاهرين تتزايد
بلدنا بالمصري: 237 مصاباً في اشتباكات المنصورة حتى الآن
ومعنا عبر الهاتف نعمان سمير مراسل أون تي في بالدقهلية: 237 مصاباً في اشتباكات المنصورة حتى الآن . الإخوان تجمعوا أمام الجمعية الشرعية بالمنصورة قبل توجههم لفض الإعتصام. الاشتباكات وقعت بين الإخوان وأهالي المنصورة باستخدام الأسلحة. الأهالي يحاصرون أعضاء الإخوان داخل الجمعية الشرعية بالمنصورة. طاقة المستشفيات لا تستوعب أعداد المصابين
ريم ماجد: مرسي أجل الخطاب لحد ما الماتش يخلص
ريم ماجد: مرسي أجل الخطاب لحد ما الماتش يخلص والخبر على عهدت موقع جريدة الشروق
بلدنا بالمصري: تمرد تعلن رؤيتها السياسية لما بعد رحيل مرسي
اما حملة تمرد وبعد ما بعتت امبارح رسالتها الاولى والاخيرة للدكتور محمد مرسي باسم الشهدا اللي ضاع قصاصهم والمصابين اللي لسة بينزفوا.. وباسم الملايين اللي خرجت تنادي الحرية ورجعت مطعونة في كرامتها متهمة في دينها ووطنيتها من «الأهل والعشيرة».. باسم كل دول بعتوله كلمتين ورد غطاهم: ارحل طوعاً او ارحل كرهاً زي ما رحل اللي قلبك.. ارحل لان مطالب الشعب تجاوزت كل الصفقات... بعد ما بعتوله الكلمتين دول امبارح اعلنوا النهاردة عن جبهة ٣٠ يونيو واصدرواالبيان التالي واعلنوا عن رؤيتهم السياسية لللي جاي بعد ٣٠ يونية
بلدنا بالمصري: تمرد تطالب شعوب العالم وقف مساندة الديكتاتوريات
واطلقت دعوة عالمية تحت عنوان دعوة للدعم وجهتها وطالبت "تمرد" للمصريين في الخارج ولكل المواطنين في العالم المهتمين بقضايا الحرية والعدالة الاجتماعية للاحتشاد قدام السفارات والقنصليات المصرية بدءا من يوم 30، والضغط على حكوماتهم وخاصة بالولايات المتحدة الأمريكية والاتحاد الأوروبي لوقف دعمها للقوى المتطرفة والمعادية للديمقراطية.
بلدنا بالمصري: تمرد تعلن خريطة الزحف للاتحادية والتحرير - ٣٠ يونيو
واعلنت تمرد عن خريطة اللي سمته بالزحف لقصر الاتحادية وميدان التحرير واللي هتكون كالاتي
المطرب مصطفي سعيد: الشعب مازال يريد إسقاط النظام حتى الآن
ومعنا عبر الهاتف المطرب مصطفي سعيد: الشعب قادر على تحدي الصعاب وسيكون عندنا القدرة لاننا استفدنا من الدرس الأول والشعب يريد أسقاط النظام
عادل ضرة: تلقينا رسالة تؤكد أن الإخوان سيرتدون زي الشرطة ويقبضون على النشطاء
ومعنا عبر الهاتف مراسل اليوم السابع عادل ضرة: الاشتباكات مستمرة بين الإخوان والمتظاهرين أمام محافظة الغربية . تلقينا رسالة تؤكد أن الإخوان سيرتدون زي الشرطة ويقبضون على النشطاء.
ريم ماجد: هنجيب الدفاتر تنقرا بحس المناوهلي وعم شعبان
زي ما قلنا يا هادي يارب بالغنى.. مسك الختام كمان هيطرح غنى على حس ياسر المناوهلي ورسالة متدندنة وبعلم الوصول لكل مواطن... عشان اللي ناسي او اللي عامل ناسي او اللي نفسه ومنى عينه نصبح ناسيين او اللي فاكرنا نسينا... هنجيب الدفاتر تتقرا وتتغنى على حس ياسر المناوهلي في الختام... اما فقرتنا اللي جاية على طول بعد الفاصل فمافيش صوت هيعلى فيها على صوت المواطن المصري عم شعبان محمد اللي المفروض يكون زيه زي اي مواطن مصري وزيه زي اي مواطن في الدنيا، حر في بلده وحر في دينه وفي دنيته وفي عقيدته وفي علاقته في ربنا... حر في رايه وفي قناعاته وحر يعبر عنهم وماحدش رقيب عليه ولا وصي.... حر في كل دة ودمه زي كل الدم حرام ونفسه زيها زي كل نفس تحرم علينا ويحرم علينا دمها... غيرش بس ان عم شعبان محمد واللي زيه مواطنين في بلد بعد ما كان قلبها يساع الكل، صبح قلبها بيسود وبيضيق على غير العادة وربنا ما يديمها علينا عادة ويكفينا شرها ويكتب عليها الزوال.. عم شعبان كان هيدفع عمره زي اللي دفعوا حياتهم تمن لعقيدتهم اللي اختاروها شيعية، لكن عم شعبان اراد السميع العليم يكتب له عمر جديد.. عم شعبان فضفص معانا في حلقة امبارح على التليفون والنهاردة هيقول ما بداله صوت وصورة ولحم دم وانشالله وعشمي كبير في ناس البلد ديه يكونوا واعيين ومؤمنين بحكمة ربنا في انه يفضلنا على الفولة لما تتقسم نصين ويخلقنا مختلفين ويخلقنا احرار ويخلقنا متساويين كاسنان المشط مافيش فضل لحد فينا على التاني الا بالتقوى.. والفضل والتقوى دول بتوع ربنا هو رب القلوب وهو الاعلم بالنوايا وهو اللي بيحاسب وهو اللي عنده الثواب وهو اللي عنده العقاب..
بلدنا بالمصري: لما أهالي المفقودين يقولوا تمرد ٣٠ يونيو تبقى كلمتهم أمر
حلقة النهاردة اكمنها يعني اخر العنقود قبل ٣٠ يونية وعلينا خير ان شاءالله، فكان عندنا عين في الجنة وعين في النار ما بين اننا نتابع كالعادة اخر اخبار بلدنا او اننا نركز على كشف الحساب اللي ما بطلش يجمع من سنتين ونص فاتوا.. فاخترنا كشف الحساب فما تاخزوناش لو عملنا نفسنا مش واخدين بالنا اوي ان فيه حاجات ومحتاجات بتحصل في بلدنا النهاردة... مالناش دعوة وخلونا في كشف حسابنا.. وخلونا نبدأ بالمفقودين.. من اول يوم في الثورة ولحد النهاردة راح مننا 1200 مفقود لسة لحد النهاردة ما نعرفلهمش طريق ولا نعرف ان كانوا لسة عايشين وعشمنا في ربنا كبير ولا اموات لا قدر الله وشهداء احياء عند ربهم يرزقون.. فواحنا على دخلة ٣٠ يونية والحساب يجمع.. لما اهالي المفقودين يحلموا تبقى احلامهم اوامر ولما يبقوا نازلين وحلمهم انزلوا، يبقى كلمتهم حتماً ولابد ما تنزل الارض ابداً..
بلدنا بالمصري: لما أهالي الشهد يحلموا تبقى أحلامهم أوامر - تمرد ٣٠ يونيو
من اول يوم في الثورة ولحد النهاردة، دفعنا من دم قلبنا على الاقل 1290 شهيد، منهم 105 على ايد حكم الاخوان والباقي على ايد مبارك والمجلس العسكري.. وبردة لسة حقهم رايح هدر.. فلما اهالي الشهدا يحلموا تبقى احلامهم اوامر ولما يبقى حلمهم تبقى كلمتهم حتماً ولابد ما تنزل الارض ابداً
بلدنا بالمصري: لما المصابين يحلموا تبقى أحلامهم أوامر - تمرد ٣٠ يونيو
من اول يوم في الثورة ولحد النهاردة دفعنا تمن غالي وقدره على الاقل 7000 مصاب ما بين حكم الاخوان وحكم العيكر ومن قبلهم مبارك واعوانه.. ولسة حقهم رايح هدر.. فلما المصابين يحلموا تبقى احلامهم اوامر ولما يبقى حلمهم تبقى كلمتهم حتماً ولابد ما تنزل الارض ابداً
مش لقيين لقمتنا عشان كده نازلين يوم 30 .. ولاد بلدنا في بلدنا بالمصري
ما حيليتناش احنا بقة غير رب كريم نتعشم فيه وشعب عظيم عالي المقام وقدها وقدود.. فواحنا على دخلة ٣٠ يونية وعلينا خير لما ناس بلدنا تحلم تبقى احلامهم اوامر ولما ناس بلدنا يبقوا نازلين يحققوا الحلم.. فلابد ان يستجيب القدر
كشف حساب مرسي بالصوت والصورة في عام من حكمه في بلدنا بالمصري
ديه كانت مجرد عينات بينات من كشف حساب طويل عريض.. وزي ما السيد الدكتور المهندس رئيس الجمهورية عمل اللي عليه وقدم لنا كشف حسابه وكتر الف خيره على كدة.. احنا كمان عملنا اللي علينا على قد ما قدرنا وعملناله كشف حساب على قد ما قسم كدة فكانت النتيجة رئيس قال ياهادي يارب بصدر مفتوح في ميدان التحرير وآخرة المتمة على السور وخرج من القصر من الباب الوراني وطلع من الجامع حافي على جسر من الدهب
بلدنا بالمصري: خطاب مرسي قبل 30 يوينو
يا مصر هانت وبانت .. مصطفي سعيد ـ بلدنا بالمصري
يامصر هانت وبانت كلها كام يوم... نهارنا نادي ونهار الندل مش باين
الدولة مفضلش منها إلا حبة شوم..
لو مش مصدق تعالي ع الميدان عاين ياناس مفيش حاكم إلا من خيال محكوم..
واللي هيقعد في بيته بعدها خاين اللي هيقعد كأنه سلم التانيين للأمن بإيديه وقاله هما ساكنين فين..
وصلت لضرب الرصاص ع الخلق في الميادين حتى الجثث حجزوها اكمنهم خايفين..
يامصر أصبحنا أحياء وميتين مساجين فاللي هيقعد في بيته يبقى مش مفهوم..
واللي هينزل الهي حارسه صاين يامصر هانت وبانت كلها كام يوم..
نهارنا نادي ونهار الندل مش باين.
نهارنا نادي وبايدينا علي فكرة.. الصبح عنده فضول راح نعمل إيه بكرة.
إيده علي الباب وخايف يلمس الأكرة.. ادخل ياأستاذ براحتك والبلد حرة.
إحنا زهقنا نشوف الصبح من برة.. ادخل وخرج بقايا العتمة بالمرة.
الناس ديه حرة وجنود الأمن مضطرة.. ياصبح طلعت روحنا لجل تيجي ياخي.
طالعين نجبيها أهو فى كل حارة وحي..حتى لو ضربونا بالرصاص الحي.
شوف الميادين كدة مفروشة خلق وضي.. دايما مفاجأة ودايما وقتها معلوم.
الحكم لينا وليك الحق يامداين.. يامصر هانت وبانت كلها كام يوم .
نهارنا نادي ونهار الندل مش باين.. ياصف عسكر بدال الدرع شيلوة اثنين.
25 يناير ياشباب فاكرين.. كان فيه انجليز ووزير الداخلية تخين...
كان عنده برضه عساكر زيكم جامدين.
سابهم يموتوا علولا لم سأل فيهم.. كانوا شبهكم اساميكم اساميهم.
ياعسكري البهوات اللي بتحميهم.. ممكن يردوا عليك لما تناديهم.
ياعسكري أنا أصلي بس بستغرب.. لو لاقي تأكل وتشرب قوم ياعم اضرب.
اضرب عشان الوزير من ضربتك يطرب.. لكن هتشتغل ايه لما الوزير يهرب.
أما الشديد القوي القادر أبو القادر.. برميل تلامة نشع علي مصر من الآخر.
لو شفته معددة تكتب ادب ساخر.. ثابت يقول للهرم ياكابتن اتاخر.
ولم يزل معتقد ان الهرم هيقوم.. ادي الحجر والبشر قايمين ياسيد القوم.
والدين هيترد ياللي عشت متداين.. يامصر هانت وبانت كلها كام يوم.
نهارنا نادي ونهار الندل مش باين.. ده حكم أسرة ولا خوفو ولا خفرع.
ولا وجع بطن يتعالج بزيت خروع.. عمل مسوجر بعيد عنك ولايطلع.
جربنا فيه كل شىء ملقينا شىء ينفع.. منفعش بالأدوية جربنا ألف طبيب..
ولا بعطارة شيوخ ليهم بلح وزبيب.
ولا بجحفل مغولى وضرب بالقباقيب.. عمل مسوجر وسفلي شغل تل أبيب.
وشغل أمريكا متغلف وختمة عليه.. ضيف زارنا ياعم من غير دعوة لابس بيه.
قعد 30 سنة مايقولش قاعد لية.. والنية يديها لابنه النابغة بعديه.
ويقول قضا وقدر بين البشر محتوم.. قولناله طيب ومين قال للقدر معلوم.
واش عرفك يافخمتك بالذي كاين.. يامصر هانت وبانت كلها كام يوم..
نهارنا نادي ونهار الندل مش باين
مواطن مصري شيعي معتدى عليه في مذبحة أبو النمرس .. في بلدنا بالمصري
الاسم: شعبان محمد.. الجنسية: مصري ودة المهم.. الديانة: مسلم والعقيدة: شيعي وهو حر.. وقبل كل دة وبعده ودة الاهم انه انسان لحم ودم كرمه ربنا بنعمة العقل والضمير وحرم على بقية البني ادمين اللي زيه ماله وعرضه ودمه
الله أكبر فوق كيد المعتدي ـ تمرد 30 يونيو
على حس ياسر المناوهلي .. تمرد ٣٠ يونيو - الثورة مستمرة .. في بلدنا بالمصري
نرحب بضيفنا قليل من الكلام وكثير من المغنى على حس الثورة المستمرة .. الجو عام والحالة التى يمر بها الشعب المصري تؤدي الى كثير من التخبط في المشهد الراهن في مصر والكل كان ينتظر الكثير من بداية عهد مرسي والثورة المصرية ليست اصلاح ولكن بناء من البداية
إذا الشعب يوماً أراد الحياة .. دنيا الرميلي ـ بلدنا بالمصري
ليست هناك تعليقات:
إرسال تعليق