نشاهد اليوم
برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
ONtv Livestreaming - البث الحي
اتمنى مشاهدة ممتعة
و نبدا
برنامج بلدنا بالمصرى الاحد 23/6/2013 ONTV حلقة يوتيوب كاملة
ريم ماجد: بدل خيبتنا اللي بالويبة .. لا عشنا ولا كنا الا لو عاشوا وكانوا
يسعد مساكم وحلقة خاصة جداً من بلدنا بالمصري... بلدنا اللي الظاهر كدة والله اعلم انها ماهياش بلدنا بالمصري وبس نقطة.. ودمتم وكان الله بالسر عليم وبعدين من اول السطر يبقى ماوراناش غير اللت والعجن والكلام الفارغ اللي قلته خيبة وكتره خيبة تقيلة وقوية وبالويبة!!!
لاااأ.. بلدنا ديه بالمصري، دة مفروغ منه ومش محتاجة قوالة... بس مبدئياً كدة لازم نشيل النقطة، لان بلدنا لسالها كمالة واصل وجدر.. فمبدئياً نشيل النقطة ونبطل نمد لبرة ونبطل نمد ايدينا للي يسوى واللي مايسواش.. ولاننا، بقى لنا اكتر من ٤٠ سنة في المتاهات، ماحناش عارفين احنا مين، ولا عدنا عارفين اصلنا من فصلنا، يبقى بعد ما نشيل النقطة: تفضل بلدنا بالمصري برده.. بس هنشيل النقطة ونحط بدالها فصلة، وبعدين ندور على الاصل عشان اللي مالوش خير في اصله واللي مالوش خير في اهله، مالوش خير في حد ومالوش خير في نفسه... -ومعلومة كدة عالماشي والتفاصيل بعدين: احنا لا لينا خير في اصلنا ولا في اهلنا ولا في نفسنا- وجيالكوا في الكلام... بس خليكوا معايا كدة واحدة واحدة وخدوني على قد عقلي.. خلاص قلنا بلدنا بالمصري وشيلنا النقطة وحطينا فصلة ودورنا على اصلنا وفصلنا... لو عملنا كدة، هنلاقي نفسنا بنحط بلدنا في حتة دين جملة مفيدة وفي حتة دين صفحة جديدة وبالالوان الطبيعية اللي تشرح القلب وتشد الضهر وترد الروح... بس الاكادة واللي يغيظ ويجيب الغم، ان الصفحة الجديدة ديه ماهياش جديدة ولا يحزنون... ديه صفحة قديمة من عمر سيدنا آدم وستنا حوا.. وبطول الزمن والاهم من دة كله انها بطول النيل، وبالتالي بطول حياتنا.. عملنا احنا ايه بقة في الصفحة القديمة السمرا ام عيون دبلي وسنتين لولي دول؟!!! ابداً.. حاجة بسيطة اوي... رحنا جايبين قلمين تلاتة كوبيا وهاتك يا شخبطة على وشها السمح لما خليناها بقت شبه امنا الغولة.. وبعدين اتهيألنا انها عايزة تقرقشنا بسنانها وتبلع ورانا بمية النيل كلها، فاللي مش هيموت تحت ضرسها يموت من الجوع ويموت من العطش بعد ما شربت هي النيل كله.. مع انها في الاصل الخالق الناطق احنا ومالناش بركة الا هي ومالهاش بركة الا احنا... فتبقى افيد جملة مفيدة ممكن نحط فيها بلدنا -بس نحسن خطنا المرة ديه، مش زي كل مرة كلمة في الشرق وكلمة في الغرب- هي الجملة اللي مبتدأها بلدنا بالمصري وخبرها اليقين ان روح قلبها في افريقيا.. والنيل اللي بيجري في عروقها هو نفسه اللي بيجري في عروق كل بلد عايشة على حسه ومن خيره.. وزي ما الدم عمره ما يبقى مية، مية النيل عمرها ما هتبقى علقم، الا لو مالناش خير في اصلنا ومالناش خير في اهلنا...
واللي يهون عليه اهله يباتوا فقرانين وجعانين في الضنك والضلمة ما يرجعش يتحسر لما اهله يهون عليهم انه يموت من العطش.. لكن الخبر الحلو انه مش هاين عليهم.. طب وغلاوة النيل عندنا وعندهم ما هاين عليهم نموت من العطش ويتمنوا لنا الصحة والعافية وطولة العمر كمان... فاضل بس احنا نخلي في عيننا حصوة ملح وفي عروقنا شوية دم وما يهونش علينا هم يعيشوا فقرانين وجعانين في الضنك والضلمة.. ولو مافيش لا حصوة ملح ولا شوية دم مؤقتاً، يبقى على الاقل شوية عقل لانهم لو فضلوا عايشين في الضنك والضلمة هنموت احنا من العطش لو مش عاجلاً فآجلاً.. في حين انهم لو طلعوا على وش الدنيا وشافوا النور
ريم ماجد: كلمتين نحطهم حلقة في ودننا ونتبت عليها بايدينا وسناننا
عندنا جنة بتجري من تحتها الانهار.. فضل ونعمة من عند ربنا..اصيلة وكريمة وتتمنى لنا الرضا نرضى.. وفيها الخير والبركة يكفوا ويساعوا من الحبايب شعوب وقبائل بالملايين... فبدل ما نصونها ونحافظ عليها ونتهنى بيها احنا واهلها... واما بنعمة ربك فحدث... نقوم نتبتر عليها ونبص لها من فوق لتحت ومن طرطوفة مناخيرنا ونمد لبرة ومش مستعنيينها وبنتعامل معاها من منطق "فيها لا اخفيها" او "حسنة وانا سيدك"، مش عارفين بامارة ايه واحنا اصلاً روحنا فيها... ولما يفيض بيها من عمايلنا فتقرر تشوف مصلحتها ويا روح ما بعدك روح.. نقوم احنا تاخدنا الجلالة وندق للحرب عليها بطبلة ورق وعيار ديته بس يدوش لكن لا منه ولا كفاية شره.. والف بعد الشر عليها وعلينا من اللي عايزين يحولوا جنتنا لجهنم حمرا وبئس المصير.... دة بالبلدي كدة اللي حازز في نفس اللي خدعوك فقالوا عليهم "الاخوة الاعداء" وهم اهل اباً عن جد والعرق يمد لما لحد ادم وحوا.. وهو دة بالبلدي كدة اللي مش هيقوله بصريح العبارة اوي كدة الرئيس الاوغندي يوري موسيفيني في حواره مع بلدنا بالمصري.. لكن اللي هيقوله الرئيس الاوغندي بالفم المليان ولازم نحطه حلقة في ودننا ونبني عليه بايدينا وسنانا وبقلبنا:
واحد: ان مافيش افريقي على وش الدنيا عايز يؤذي مصر ولا يقدر يئزيها ولا يرضى بازيتها.. لكن كمان مصر مش ممكن تستمر في ازية دول حوض النيل
اتنين: اللي تعوزه مصر ما يحرمش على الجار واللي يعوزه الجار مش حرام على مصر ولا هيحرمها من حقها في الحياة بس الحياة اخد وعطا
ثالثاً: احنا ماسكين ومتبتين في شوية المية اللي حيليتنا ومش داريانين باصل الخطر اللي بيهدد مية النيل اللي جاية من السما اصلاً قبل ما تجري من حداهم لحدانا.. فلو بطلت تمطر حداهم عمر النيل ما هيوصل حدانا
اربعة: احنا ماسكين ومتبتين في شوية المية اللي حيليتنا وياريتهم مكفيين ومن حقنا نطالب باكتر منهم، بس احنا بيتهيألنا ان الدنيا ضاقت على النيل مع ان ربنا موسعها علينا اشي نهر الكونجو واشي نهر النيجر.. واشي مية بتتبخر مننا في الهوا ليها الف صرفة وحلال.. وبعد ما عاد وزاد في كام صرفة وحلال.. وخلصنا الحوار اربعة وعشرين قيراط وتبادلنا السلامات والتحيات.. رجع نده علينا مرة تانية وامنا امانة نقول للمصريين على لسانه ان عندهم كمان بحور لو حلوا ميتها الدنيا هتروق وتحلى ولو على التكلفة تدبر ولو على الكهربا مية النيل كفيلة بيها ومن غير ما تمس نقطة من حق مصر فيها
خمسة: ولو على سد النهضة في اثيوبيا ولو على الاتفاقية الاطارية لدول حوض النيل نقعد.. بس نقعد على مستوى القمة وساعتها نعيد النظر ويحلها الف حلال وكل حي ياخد حقه من غير ما يجور على حق اخوه
واخيراً: شعوب حوض النيل، شعب واحد.. واولاد النيل عليهم نفس الواجبات واولهم: لا ضرر ولا ضرار.. وليهم نفس الحقوق واولهم الحق في الحياة بكل المعاني الحقيقية لكلمة حياة
سد النهضة .. ما يجيبها إلا شعوبها .. مصطفى الجندي في بلدنا بالمصري
ايه كل دة بقة؟!!! الحكاية ومافيها وباختصار شديد عشان ما اطولش عليكوا وعشان اللي جاي لسة اهم بكتير.. دة خلاصة القول بعد يومين قضيناهم على سفر وبلاد تشيلنا وبلاد تحطنا لما لحد نبع النيل في اوغندا، اللي ما خطاش عتبته لحد النهاردة ولا رئيس مصري.. لا مخلوع ولا منتخب.. احنا بقة خطينا العتبة ويا بخت من يخطيها.. خطيناها على حس الدبلوماسية الشعبية.. وما يجيبها الا شعوبها...
خطيناها ايد ورا وايد قدام بس على باب الله وعشمنا في ربنا كبير... خطيناها وراجعين بمشروع بدستور شعبي وبيوت للنيل وعلى الاقل ببشرة خير... واللي بشرنا بيها، الرئيس الاوغندي يوري موسيفيني، اقدم رؤساء دول حوض النيل والشهير بmuzai اوحكيم المدينة بلغتهم...
وبشرنا بيها في اول حوار ليه مع الشعب المصري بعد الازمة الشهيرة بازمة سد النهضة... والحكاية مش حكاية السد.. الحكاية اقدم من كدة بكتير واكبر من كدة بكتير واحنا اللي بايدينا يا نكتب لها نهاية تجيب اجلنا كلنا يا نكتب لنا صفحة جديدة اول سطر فيها بعد بسم الله.. You are because I am and I am because you are..
انت موجود لاني انا كائن وانا موجود لانك انت كائن.. واحنا الاتنين مالناش بركة الا بعض
فمسك الختام النهاردة هيكون كلمتين بصريح العبارة ومن القلب للقلب من الرئيس الاوغندي للشعب المصري وللشعوب الافريقية كلها وبشرة الخير..... لكن هنقول يا هادي يارب بكلمتين برده بالفم المليان وبرده من القلب للقلب ومن عند نبع النيل وعلى لسان ابن النيل زي ما بيحلى له ينادوه، الاستاذ مصطفى الجندي نائب رئيس البرلمان الافريقي ومنسق الدبلوماسية الشعبية...
وما تاخزوناش اكمننا قضينا اليومين دول على سفر وبلاد تشيلنا وبلاد تحطنا النيل بيجري واحنا بنجري وراه، فما تاخذوناش لو لقيتونا مرة في جينجا عند المنابع ومرة عند بحيرة فيكتوريا في كامبالا و رايح جاي ما بين الاتنين.. مرة شايفني ومرة يا دوب سامعين صوتي... احنا كنا بنصور في ظروف في منتهى الصعوبة والوقت سيف متسلط على رقبتنا طول الوقت.. عايزين نلحق مواعيدنا وعايزين نلحق نروح كل الاماكن اللي لازم نروح لحد عندها وعايزين نلحق نصور كل اللي نقدر عليه وعايزين نلحق الشمس قبل ما تغيب والطيارة قبل ما تفوت وعايزين نلحق نوفي بوعدنا معاكم... وكله عن طيب خاطر وبمنتهى الفخر والسعادة وعلى قلبنا زي العسل بس ما تاخذوناش على عمايل الوقت فينا... ودلوقتي الاستاذ مصطفى الجندي نائب رئيس البرلمان الافريقي ومنسق الدبلوماسية الشعبية، وكلمتين على قلبه وكلمتين تانيين من قلبه قبل ما نسمع كلمة حكمة من حكيم المدينة الرئيس الاوغندي يوري موسيفيني في اول حوار ليه مع الشعب المصري بعد ازمة سد النهضة الاخيرة في ختام حلقة خاصة جداً من بلدنا بالمصري، اللي في افريقيا روح قلبها من جوة.
واوعوا حضراتكوا تفتكروا انه لما تبقى ازمتنا مع اثيوبيا فنروح اوغندا، ان دة من باب ودنك منين يا جحا.. بالعكس دة من باب الدبلوماسية وما يجيبها الا شعوبها
رئيس أوغندا يحاور الشعب المصري بعد أزمة سد النهضة في بلدنا بالمصري
عندنا جنة بتجري من تحتها الانهار.. فضل ونعمة من عند ربنا..اصيلة وكريمة وتتمنى لنا الرضا نرضى.. وفيها الخير والبركة يكفوا ويساعوا من الحبايب شعوب وقبائل بالملايين... فبدل ما نصونها ونحافظ عليها ونتهنى بيها احنا واهلها... واما بنعمة ربك فحدث... نقوم نتبتر عليها ونبص لها من فوق لتحت ومن طرطوفة مناخيرنا ونمد لبرة ومش مستعنيينها وبنتعامل معاها من منطق "فيها لا اخفيها" او "حسنة وانا سيدك"، مش عارفين بامارة ايه واحنا اصلاً روحنا فيها... ولما يفيض بيها من عمايلنا فتقرر تشوف مصلحتها ويا روح ما بعدك روح.. نقوم احنا تاخدنا الجلالة وندق للحرب عليها بطبلة ورق وعيار ديته بس يدوش لكن لا منه ولا كفاية شره.. والف بعد الشر عليها وعلينا من اللي عايزين يحولوا جنتنا لجهنم حمرا وبئس المصير.... دة بالبلدي كدة اللي حازز في نفس اللي خدعوك فقالوا عليهم "الاخوة الاعداء" وهم اهل اباً عن جد والعرق يمد لما لحد ادم وحوا.. وهو دة بالبلدي كدة اللي مش هيقوله بصريح العبارة اوي كدة الرئيس الاوغندي يوري موسيفيني في حواره مع بلدنا بالمصري.. لكن اللي هيقوله الرئيس الاوغندي بالفم المليان ولازم نحطه حلقة في ودننا ونبني عليه بايدينا وسنانا وبقلبنا
هسيبكم مع كلمتين من الراجل الحكيم وهفوتكم بعافية.. بس قبل ما افوتكم بعافية.. عايزة اقول لكم ان
ليست هناك تعليقات:
إرسال تعليق