برنامج بلدنا بالمصرى
تقديم ريم ماجد
على قناة ONTV
يوتيوب كاملة
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
ONtv Livestreaming - البث الحي
اتمنى مشاهدة ممتعة
ونبدا
برنامج بلدنا بالمصرى حلقة الاربعاء 13 فبراير 2013 على قناة ONTV يوتيوب كاملة
ريم ماجد: منقدرش نتخلى .. مواجع لغاية ما يتحقق العدل
بنمسي على حضراتكوا وحلقة جديدة منوبلدنا بالمصري.. وقبل ما نقول يا هادي يارب انا بالاصالة عن نفسي وبالنيابة عن فريق بلدنا بالمصري مدينين لحضراتكوا باعتذار لاننا تقلانين عليكوا بالمواجع اليومين دول.. لكن ما باليد حيلة ومكره اخاك لا بطل.. وبالتالي فاحنا كمان بنعتذر اننا مضطرين نفضل نتقل بالمواجع طول ما المواجع تقيلة اوي كدة.. لاكتر من سبب وحطوا نفسكوا مكاننا.. اولاً: لان هي ديه الشغلانة.. اسمها كدة.. اسمها اعلام.. يعني انتوا من حقكوا المعرفة واحنا من واجبنا نعلمكم باللي احنا بحكم الشغلانة ديه اللي تقصر العمر نقدر نعرفه وحضراتكوا ما تقدروش تعرفوه الا من خلالنا احنا واللي زينا وبالتالي ما نقدرش نخبي عليكوا والا نبقى قصرنا في واجبنا وجرنا على حقكوا...ثانياً: ان فيه انظمة كدة وربنا يعفي عننا بقة، ما تجيش الا بالضغط.. الضغط عشان مصاب يتعالج.. عشان معتقل يخرج.. عشان معتقل يدخل له علاج.. عشان مفقود يبان.. عشان تقرير طب شرعي يطلع بالمظبوط وبما يرضي الله.. عشان حقيقة تبان او ما تموتش... واحنا جزء من الضغط دة ومرة تصيب ومرات تخيب.. فما نقدرش نتخلى.... ثالثاً: انه الناس اللي بتنادي بالاستقرار وبتترجاه من الدنيا وحقهم وكتر خيرهم، يستحسن بالنسبة لهم نتقل عليهم بالمواجع ديه شوية!!!! ليه؟!!! لان جزء كبير من تحقيق الاستقرار مرهون بالعدل والانصاف للضحايا واهالي الضحايا.. والا اتقي شر المظلوم اذا فاض بيه وفقد الامل في تحقيق العدالة.. العدل والانصاف دة يبدا بان الضحايا واهالي الضحايا يعرفوا مين الجاني والجاني ياخد جزاءه بالعدل.. والانصاف هو اننا نكرم الضحايا واهاليهم ونخلد ذكراهم ونكتب اساميهم بحروف من نور تضوي وتلالي على جبين البلد ديه.. لكن طول ما الضحايا واهاليهم حقهم ضايع والجاني لسة ماخدش جزاءه بالعدل.. وطول ما الضحايا واهاليهم مضطرين يثبتوا انهم مش بلطجية ومسجلين خطر.. وطول ما ام الشهيد مضطرة تحلف بالله العظيم ميت يمين ان ابنها مش بلطجي وانه كان زينة الشباب وانه كان شهم وجدع وكان سندها في الدنيا وتشهد الجيران واهالي الحي انه كان ادب واخلاق ونخوة ومروءة والكل يشهد له.. وطول ما احنا مش قادرين نحقق العدل فعلى الاقل ننصفهم.. على الاقل نسيبلهم شوية براح يفضفضوا ويسمعوا صوتهم ويحسوا انهم مش بطولهم كدة في الدنيا ولا حد حاسس بيهم... على الاقل يحكوا.. يتكلموا.. ما الكل بيتكلم.. وكتير من كتر الكلام اللي عمال على بطال خيبة وخيبة تقيلة... يبقى هم اولى بالكلام من اي حد تاني.... متاكدين ان فيه ناس كتير ماعادتش قادرة تستحمل تقل المواجع واحنا عاذرين ومقدرين.. ولو مسكوا الريموت دلوقتي قبل مانبدا نتقل بالمواجع وقلبوا بعيد عننا هنقدر ونعذر... بس وهم بيقلبوا بعيد يحمدوا ربنا ويبوسوا ايديهم وش وضهر انهم بيتفرجوا على المواجع في التلفزيون ولما تتقل عليهم اوي يقدروا يبعدوا عنها بالزرار، ويدعوا لاصحاب الوجع اللي اتكتب عليهم وهيفضل ملازمهم طول ما هم عايشين او على الاقل لحد ما يتحقق لهم العدل ويتحقق لهم الانصاف... ويارب يكون اعتذارنا مقبول...
بلدنا: الطفل بياع البطاطا .. قتلوا حلم ملحقش يحلمه
استعنا احنا وانتوا على المواجع بالله وربنا يهون.. فاكرين الصورة ديه؟!!! ديه الصورة اللي عرضناها امبارح يمكن حد يتعرف على الطفل دة اللي ماكناش عارفين له ولا اسم ولا عنوان ولا عارفين حتى جثته فين... كل اللي احنا كنا عارفينه على عهدة مجموعة لا للمحاكمات العسكرية، انه وصل مستشفى المنيرة يوم ٣ فبراير من غير اي حاجة تدل على شخصيته وجاي بعربية اسعاف من محيط ميدان التحرير.. الاطباء اللي استقبلوه في مستشفى المنيرة لما جم يعملوا محضر، كان فيه قوة من الشرطة جاية معاه عملوا خناقة مع الدكاترة عشان ما يعملوش المحضر وخدوا ومشيوا بعد ما قدر حد فيهم يصوره ومن ساعتها ماحدش عارف هو مين ولا خدوه ووده فين واذا كان في شرحة زينهم ولا لأ.. دة اللي احنا كنا عارفينه لحد امبارح بالليل.... طيب.. فكرين بيان الداخلية عن بياع البطاطا..
ايه العلاقة بين الطفل دة وبين بيان الداخلية؟! ان فيه احتمال كبير اوي ان الطفل دة يكون هو نفسه بياع البطاطا اللي الداخلية ما ذكرتش في بيانها انه كان طفل ما كملش ١٢ سنة... ايه اللي خلى الاحتمال دة وارد؟! خيوط كتير بدات تتجمع فبدات الصورة تبان اكتر في اتجاه الاحتمال دة على عهدة مجموعة لا للمحاكمات العسكرية.. وهنعرفها بالتفصيل.. بس من ضمن الخيوط ديه، فيديو ظهر امبارح بعد ما انتشرت الصورة خللى احتمال ان يكون الطفل دة هو بياع البطاطا اللي قتلته الداخلية بالغلط يوم ٣ فبراير حسب بيانها، شبه مؤكد... قبل ما نتاكد فعلاً انه هو
بلدنا: قضية مقتل بائع البطاطا أمام المحكمة العسكرية
معنا غادة شهبندر عضو مجلس إدارة المنظمة المصرية لحقوق الإنسان تعليقاً على مقتل عمر صلاح طفل عمره 13 سنة وهو بائع بطاطا .. وإن قضية مقتل بائع البطاطا بيحقق فيها أمام المحكمة العسكرية.
بلدنا - النيابة العامة: الجندي مات في حادثة عربية
اعلنت النيابة العامة النهاردة على صفحتها الرسمية فيما يخص تقرير الطب الشرعي النهائي للشهيد محمد الجندي انه توفي في حادثة سيارة وان مفيش آثار تعذيب
تعليمات د. إحسان كميل بعدم الإدلاء بأي تصريحات للإعلام
صدرت تعليمات من د. إحسان كميل - كبير الأطباء الشرعيين لجميع الأطباء بمصلحة الطب الشرعي بعدم الإدلاء بأي تصريحات لوسائل الإعلام في قضية محمد الجندي.
بلدنا بالمصري: تشييع جثمان شهيد الشرطة نبيل رأفت السيد
زي ما فيه شهداء للثورة المستمرة.. وزي ما فيه شهداء على ايد الداخلية.. كمان فيه شهداء من ظباط وافراد وامناء الشرطة.. والشهدا كلهم واهاليهم على راسنا من فوق.. اخر شهداء اشطة النهاردة، هو الامين نبيل رافت السيد اللي استشهد في حادثة الاعتداء المسلح على عربية محافظ البنك المركزي، الدكتور هشام رامز.. واتدفن في بلده في المنوفية بعد جنازة عسكرية..
بالنسبة لحادث الاعتداء نفسه.. لسة الجهات الامنية بتحاول توصل للجناة.. لكن المؤكد ان الدكتور هشام رامز ماكانش في العربية وقت الاعتداء.. العربية كانت لسة في طريقها ليه وفيها السائق والامين الشهيد.. تم الاعتداء على العربية حاول الامين التعامل مع الجناة، فاستشهد وهم استولوا على العربية وهربوا.. ولة الجهات الامنية بتحاول توصل للجناة.. اما الدكتور هشام رامز فاكد ان الاعدء كان بهدف السرقة مش بهدف الاغتيال
بلدنا بالمصري: غموض يحيط بوفاة الإعلامي عبده عباس
زي الغموض ما كان سيد الموقف حوالين اختفاء الزميل عبده عباس المذيع باتحاد الاذاعة والتلفزيون، لسة الغموض سيد الموقف حتى بعد ما تم العثور عليه جثة هامدة في بيته.. وواضح عليها ان الوفاة حصلت من وقت طويل.. الشكوك حوالين اختفاءه كان ليها اسباب ليها علاقة بانه اختفى بعد مشاركته في مظاهرة قدام قصر الاتحادية او يعني ديه كانت اخر مرة اتشاف فيها.. الحاجة التانية انه كان واحد من ضمن ثوار ماسبيرو.. لكن العثور عليه في بيته بدون اي اصابات بالاضافة الى التحقيقات الاولية للنيابة بتاكد ان الوفاة طبيعية
بلدنا: ضربوها .. أم عبدالرحمن راحت تطمن على ابنها
خلونا نروح اسكندرية.. اسكندرية النهاردة الحقيقة فيها اكتر من حاجة.. هنبداها من عند ام عبد الرحمن.. عبد الرحمن هو الطفل اللي كان تم القبض عليه مع محمود عادل.. تم اخلاء سبيل محمود لاسباب صحية مش لان حبسه مخالف للقانون لا سمح الله.. وفضل عبد الرحمن معتقل في مديرية امن اسكندرية بالمخالفة للقانون وعنده جلسة تجديد يوم السبت اللي جاي.. ام عبد الرحمن بتروح تطل عليه كل يوم وتاخد له اللي فيه القسمة وتروح.. النهاردة راحت ام عبد الرحمن زي كل يوم بس اللي حصل هو كان مختلف
بلدنا: بائع البطاطا قُتِل برصاصة خطأ على يد جندي جيش
هاتفياً: رشا عزب - عضو مجموعة لا للمحاكمات العسكرية .. والد الطفل عمر بائع البطاطا أكد أنه قتل على يد جندي جيش. وأكد والده أن ضابط جيش قال له أن إبنه قتل رصاصة خطأ. أطباء مستشفى المنيرة حاولوا تسجيل دول عمر وفشلوا. كانت لدى الشرطة تعليمات بالعودة بجثة الطفل إذا مات.
بلدنا بالمصري: أولى خطوات القصاص من العسكر
ان تأتى متأخرا خير من ان لا تأتى ابدا
يبدو ان البعض قد نسى او تناسى او أريد له ان ينسى ان المجلس العسكرى الذى قتل الشهداء وسحل الثوار وكشف العذرية وعرى وسفك دماء المصريين فى مذابح شهيرة (ماسبيرو ومجلس الوزراء ومحمد محمود والعباسية ومذبحة بورسعيد وغيرها) مازال حرا طليقا بل على العكس فأن السلطة الحاكمة بدلا من تقديمهم للمحاكمة سعت لتكريمهم بشتى الطرق فأعطتتهم قلادة النيل واطلقت اسمائهم على الشوارع والكبارى.
...ويبدو ان السلطة الحاكمة فى مصر الآن بعد ان عرضت على أهالى الشهداء قبول الدية والتنازل عن القصاص وبعد أن وجدت السلطة رفضا قاطعا من اهالى الشهداء وذويهم بدأت فى إطلاق الشائعات حول القضايا فاطلقوا شائعة حفظ التحقيق فى قضية مجلس الوزراء التى استشهد فيها خير شباب مصر وشيوخها، وذلك لجس نبض الثوار وللاطمئنان على ان معاركنا الحالية قد شغلتنا او جعلتنا ننسى دماء شهدائنا. ولكن على الرئيس وجماعته ان يعلموا ويدركوا ان الناس ليسوا سواسية واننا لسنا مثلهم.... نحن يا سيادة الرئيس ليس لدينا تصالح على الدم ولا تفاوض على القصاص..
بلدنا بالمصري: سنة كاملة .. لحد ما حنوا على أبو الشهيد
اللي ناسي بقة اسم الشهيد او اللي ناسي ان اللي قتله لسة حر طليق.. او اللي نسي او عمل ناسي ان كان فيه شهدا.. يؤسفني افكرهم انه ايوة كان فيه شهدا وشهدا كتير تحت حكم العسكر.. ويؤسفني اقول لهم ان منهم شهدا فضلوا مفقودين سنة بحالها ويمكن اكتر، لحد ما حد حن على ابو الشهيد
بلدنا بالمصري: حسن مصطفى هيفضل سجين الظلم لـ ٢٦ فبراير
حسن مصطفى لسة سجين الظلم والبطش على حد تعبيره في رسالته لرئيس الجمهورية.. وهيفضل سجين الظلم والبطش على الاقل ليوم ٢٦ فبراير
بلدنا بالمصري: العالم وقف يقول الست المصرية خط أحمر
بعد الفاصل مع المواطن المصري الاصيل.. كاتب "لا احد ينام في الاسكندرية" وهو اللي روحه منها وفيها.. صاحب بيت الياسمين الواقف على عتبات البهجة.. حتى لو بنى لنفسه سلم للسما هيروح فين من البلد ديه بمرها قبل حلوها؟!!! بعد الفاصل مع الروائي والكاتب الكبير الاستاذ ابراهيم عبد المجيد
لكن واحنا في السكة للفاصل هنلف لفة سريعة حوالين العالم وهنقف في كل بلد شوية مع اللي وقفوا معانا امبارح كل واحد في مكانه لكن على كلمة واحدة: الست المصرية خط احمر
بلدنا بمرهها وحلوها بعيون إبراهيم عبدالمجيد
مع المواطن المصري الاصيل.. كاتب "لا احد ينام في الاسكندرية" وهو اللي روحه منها وفيها.. صاحب بيت الياسمين الواقف على عتبات البهجة.. حتى لو بنى لنفسه سلم للسما هيروح فين من البلد ديه بمرها قبل حلوها؟!!! بعد الفاصل مع الروائي والكاتب الكبير الاستاذ ابراهيم عبد المجيد
"قل لمن يحمل هما ان هما لا يدوم .. مثلما يفني السرور ،هكذا تفني الهموم".. جملة من ملايين الجمل اللي خطها ضيفنا اللي مخطي عتبتنا النهاردة خطوة عزيزة.. الجملة من واحدة من اجمل رواياته.. رواية البلدة الاخرى.. ومع ان عمرها اكتر من ٢٠ سنة، لكن احنا النهاردة في عرض اللي يقول لنا الكلمتين دول ويدينا عليهم امارات.. وربنا يقدره
ليست هناك تعليقات:
إرسال تعليق