برنامج بلدنا بالمصرى
تقديم ريم ماجد
على قناة ONTV
يوتيوب كاملة
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
ONtv Livestreaming - البث الحي
اتمنى مشاهدة ممتعة
ونبدا
برنامج بلدنا بالمصرى حلقة الاثنين 11 فبراير 2013 على قناة ONTV يوتيوب كاملة
ريم ماجد: الثورة مستمرة واحنا وراها والزمن لسه طويل
يسعد مساكم وحلقة جديدة من بلدنا بالمصري.. حلقة النهاردة الموافق مرور سنتين بالتمام والكمال على ١١ فبراير ٢٠١١ وسبحان مغير الاحوال.. سنتين عدوا علينا ما بين يوم حلو زي القمر ليلة تمامه وشبه الورد اللي فتح في جناين مصر.. وما بين ايام مرة علقم، شبه قرن الخروب ويمكن اسود كمان.. وخصوصاً الايام اللي بيسن فيها غراب البين سنانه ويقطف ورد الجناين قبل الاوان.... واهيه ماشية والثورة مستمرة واحنا وراها والزمن شكله كدة لسة طويل.. بس بجد يعني وان جينا للحق.. هو اللي حصل يوم ١١ فبراير ٢٠١١ دة اسمه ايه؟! يعني تنحي دة اسم على مسمى والشعب اسقط النظام وبدأ يجني ثمار ثورته وكدة؟! ولا ديه بس العصفورة اللي فرحنا بيها واتلهينا فيها وفضلنا باصين عليها على ما يتم انقاذ ما يمكن انقاذه من النظام واللي تم على اكمل وجه.. فغمضنا وفتحنا لقينا النظام لسة صاغ سليم، صحة وعافية ولابس توب مقلم قديم في جديد؟! طب ماذا لو اللي جرى زي النهاردة من سنتين ماكانش جرى؟! طب ماذا لو كان اللي حصل حصل بس خد في ايده النظام فعلاً وعشنا احنا السنتين دول بنبني على نضافة؟! طب اللي حصل حصل واحنا في اللي احنا فيه، هنخطي ازاي لبكرة وبكرة اللي جاي دة شكله ايه بالنظر للسنتين اللي فاتوا؟! كل ديه اسئلة هنفكر فيها النهاردة بصوت عالي ومعاكوا ومع عينة بينة من ستات مصر اللي ليهم في الثورة ديه بدل القيراط ٢٤.. هيكون معانا الست المناضلة والست الصحفية والست المذيعة والست الدكتورة اللي ما فارقتش الميدان من اول يوم ولحد النهاردة والست الداعية والست ام الثوار وكلهن جدعان وبنات بلد.. هيكونوا معانا بعد شوية صغيرين وبعد ما نطل طلة سريعة على اخر اخبار بلدنا.. وهنبداها بالناس اللي بقى لهم سنتين بيجروا ورا الثورة في شوارع وميادين مصر وماسكين فيها ومتبتين وقابضين على جمرها بايديهم وسنانهم.. زاد العدد او قل.. مش هي ديه القضية.. وعلى حد قولة علي ابن ابي طالب: لا تستوحشوا طريق الحق لقلة سالكيه
حبس الشافعي بتهمة إطلاق الرصاص على المتظاهرين والشرطة
سيد نون: مراسل جريدة الشروق بالسويس
السوايسة يقولون حبسوا ناصر الغلبان
النيابة قررت حبس الناشط ناصر الشافعي بتهمة إطلاق الرصاص على المتظاهرين و الشرطة
بلدنا بالمصري: انسحاب المسيرات من التحرير للإتحادية
محمد الخولي: مراسل أون تي في من ميدان التحرير
الوضع هاديء في التحرير بعد انسحاب المسيرات في اتجاه الإتحادية
منصة التحرير طالبت بإخلاءه من الباعة الجائلين
بلدنا: مظاهرة أمام محافظة الغربية تطالب بإسقاط النظام
عادل ضرة: مدير مكتب اليوم السابع بالغربية
عادل ضرة: مظاهرة حاشدة أمام محافظة الغربية للمطالبة بإسقاط النظام
مظاهرة حاشدة أمام ديوان عام محافظة الغربية و ارتفاع ألسنة اللهب
يسقط يسقط الرئيس يسقط يسقط النظام هتافات المتظاهرين بالغربية أمام االمحافظة و مديرية الأمن
بلدنا بالمصري: قصرالإتحادية تحول لثكنة عسكرية
بهاء الطويل: مراسل أون تي في محيط قصر الإتحادية
مجموعة من الشباب ألقوا المولوتوف و الطوب على أبواب القصر
الاشتباكات في محيط الإتحادية بدأت منذ أكثر من ساعة
دُشَم أمام قصر الإتحادية و الجنود من ورائها يرشون المياه
بلدنا: سنتين .. ولسه المصري متهان وعايزين يقتلوه
اللي لسة بيسال هي الناس ديه نازلة ليه في الشوارع، يتابع بس الكام خبر اللي جايين وانا راضية ذمته..
الناس ديه نازلة لان الغلبان لسة ما بيشبعش غلب في بلدنا.. وادي عينة.. يعني ما كفاهمش اللي عملوه في حمادة صابر من سحل ومرمطة وذل وهوان.. لا.. لازم حمادة يعيش خايف وعينيه في وسط راسه.. لازم يدفع باي شكل تمن قولة الحق وجريه ورا حقه.. حمادة راح يدلي باقواله قدام قاضي التحقيق المنتدب من وزارة العدل.. وهو مروح، ماهاتش عليهم يروح في امانة الله.
بلدنا بالمصري: عامان .. المخلوع في الـ 18 يوم
تقرير بعد عامان على الثورة عن تطور الأحداث وخطابات مبارك في الـ 18 يوم حتى التنحي
بلدنا بالمصري: سنتين .. ولسه خرج ولم يعد عادي جداً
فعلاً الناس ديه مالهاش حق تنزل في الشوارع، لان نزلتهم في الشوارع هي اللي واقفة قدام عجلة الانتاج وهي السبب في العطلة ووقف الحال.. طب الناس ديه نازلة عشان "خرج ولم يعد" او خرج ورجع معدوم العافية او خرج ورجع عند ربه شهيد، لسة في بلدنا وارد جداً وممكن وجايز ومستحب كمان مادام هنخلص من محمد الجندي وامثاله او على الاقل نخليهم عبرة..
اخر المفقودين: احمد حبيب المحامي وعضو الجمعية الوطنية للتغيير خرج من بيتهم في الزقازيق ولم يعد لحد دلوقتي
بلدنا بالمصري: سنتين .. والناس بتموت بعض على شوية سولار
حاجة غريبة فعلاً ان الناس ديه لسة بتنزل في الشوارع!!! طب بلاش الناس ديه نازلة لانهم من سنتين نزلوا يطالبوا بالعيش والحرية والعدالة الاجتماعية والكرامة الانسانية.. والنهاردة بقوا بس في عرض شوية بنزين وشوية سولار للعربية من غير عطلة ووقف حال ومن غير ما يموتوا بعض على شوية السولار دول
بلدنا بالمصري: سنتين .. ولسه السلطة بتتشطر على الغلابة
طب الناس ديه نازلة عشان السلطة في بلدنا لسة بتتشطر على الغلابة وتقبض عليهم كل شين كان وترميهم في معسكرات امن مركزي ولا في اقسام ولا في سجون وهم بختهم بقة.. بس في كل الحالات الامر ما يسلمش من اللي فيه القسمة.. ونبوس ايدينا وش وضهر اننا على الاقل عارفين هم فين
بلدنا: سنتين .. ولسه الأطفال في السجن بدل المدرسة
طب الناس ديه نازلة في الشوارع عشان الاطفال في بلدنا بدل ما نعلمهم احسن تعليم ونوفر لهم ابسط حقوقهم في الملبس والماوى والصحة واللعب.. لسة بنلعب معاهم عسكر وحرامية.. ونرجع نزعل منهم ونجيب من الارض ونحط على دماغهم لما يحدفوا طوب.
توصية لكسر عين الأطفال المحتجزين لمنعهم من التظاهر
عمرو إمام - المحامي بمركز هشام مبارك الحقوقي .. وإنه تم التوصية على الأطفال المحتجزين لكسر عينهم ومنعهم من التظاهر. لا للمحاكمات العسكرية أصدرت بيان تفصيلي للرد على بيان النيابة بخصوص الأطفال. والنيابة تحركت للتفتيش بعد 12 يوماً من البلاغ.
بلدنا بالمصري: كان إيه اللي يحصل لو منجحتش الثورة
بس في السكة واحنا طالعين الفاصل هنطل طلة على الحلقة الوحيدة اللي شاركت فيها الزميل العزيز جداً باسم يوسف.. وفاكرة كويس اوي اننا طول ما احنا شغالين كنا بنقول بصوت عالي وفي سرنا وفي عثل بالنا: فال الله ولا فالنا.. بس قدر الله وما شاء فعل
ايه اللي جرالنا من سنتين .. وعلى فين؟ .. في بلدنا بالمصري
بعيون الست المصرية وعلى حسها: هو احنا ايه اللي جرى لنا يوم ١١ فبراير من سنتين؟! وماذا لو اللي جرى ما كان؟! وماذا لو الثورة كانت نجحت؟! واوعوا حد يفتكر ان السؤال الاخير دة معناه ان الثورة فشلت لا قدر الله.. لكن معناه ان الثورة لسة ما نجحتش.. وان الثورة مستمرة.. وان الثورة مستمرة لحد ما تنجح بقوة الله وقوة الشعب
دة اللي احنا كنا فيه زي النهاردة وتقريباً زي دلوقتي من سنتين.. ديه كانت السكرة اللي مرت علينا كدة مرور الكرام.. ومسافة ما غمضنا وفتحنا، بصينا ما لاقيناهاش.. فاتتنا وراحت ومن ساعتها واحنا كل ما نطلع من حفرة نقع في دحديرة وفين يوجعك.. فوجب بقة نسأل هو ايه اللي جرى يوم ١١ فبراير من سنتين؟! تنحي؟! تخلي؟! فض اعتصام ال١٨ يوم في ميادين التحرير، فضحوا بالمخلوع عشان النظام يعيش؟! ولا ايه اللي جرى؟! وماذا لو اللي جرى ما كان؟! صحيح ان لو بتفتح عمل الشيطان، لكن احنا هنحاول على قد ما نقدر نفتح بيها طاقة نور على حس ستات البلد ديه وبناتها اللي ليهم في الثورة ديه بدل القيراط ٢٤ بالتمام والكمال وزيادة كمان شوية.. فاسمحوا لي ارحب بعينة بينة منهن:
الست المناضلة اللي وهبت اغلى ما عندها: زوج وابن وعمر بحاله عشان خاطر عيون البلد ديه وعن طيب خاطر: شاهندة مقلد
الست المذيعة الثورجية اللي دفعت تمن مهنيتها واحساسها بالسؤولية بدل المرة اتنين لا خوف ولا انهزام: دينا عبد الرحمن
الست بنت البلد الجدعة اللي تقف ددبان ورا الحق ولو على رقبتها: ام الراوي
وست البنات، بس مش ست البنات اللي سحلونا وعروا نفسهم يوم ما سحلوها وعروها وبعدين نهشوا في عرضها وهتفضل على راسنا من فوق.. اصل ست البنات ماهياش بنية واحدة ولا اتنين ، ست البنات ديه كل بنت مصرية حرة واقفة زي الشوكة في الضهر لا بتلين ولا بتنكسر مهما حاولوا يكسروا عينها او حتى يكسروا نفسها.. وكلهم على فكرة عارفين ايه اللي موديهم هناك
ليست هناك تعليقات:
إرسال تعليق