نشاهد اليوم
برنامج من جديد
و الذى يذاع على قناة ONTV
تقديم شريهان أبوحسن
شارك الخبر مع اصدقائك على الفيس بوك و تويتر و جوجل +1 من اعلى الصفحة
مع تمنياتى بمشاهدة ممتعة
و لنبداء
برنامج من جديد حلقة الاثنين 7 يناير 2013 تقديم شريهان ابو حسن من قناة ONTV يوتيوب كاملة
من جديد: هشام قنديل يهنئ البابا ويعتذرله عن عدم الحضور
السلام والتحية على حضراتكوا أهلا بيكو معانا، وكل سنة والمصريين بخير واخوتنا المسيحيين يكونوا بيقضوا عيدهم بفرح رغم سقوعة الجو اللي احنا فيه واللي شكله مطول لحد آخر الأسبوع، فالناس تاخد بالها وتلبس تقيل وديه نصايح هيئة الأرصاد الجوية، واحنا بمناسبة أعياد الميلاد حنحاول في فقرتنا الأخيرة نعرف هو ايه اللي حصل للمصريين بعد ما كانوا بيحتفلوا مع بعض بكل الاعياد يطلع في الفترة الاخيرة ناس تحرم حتى تهنئة المسيحيين وحوارنا مع المؤرخ عبدالعزيز جمال الدين. امبارح احنا كنا مع حضراتكوا وتساءلنا تساؤل مشروع عن سر غياب الدكتور هشام قنديل عن حضور قداس عيد الميلاد المجيد، رغم حرص كل رؤساء الوزراء على الحضور سواء قبل الثورة أو حتى بعد الثورة، ومن المفترض ان ده عيد كلنا بنحتفل بيه مالوش علاقة بصعود تيار سياسي بعينه لانه عيد لكل المصريين وكنا اتكلمنا مع الاستاذ منصور كامل الصحفي بالمصري اليوم وسألناه عن السابقة ديه وبالفعل اكدلنا انها للمرة الأولى يغيب رئيس الوزرا عن حضور القداس، رغم انه من حقه بروتوكوليا يوفد اي شخص في اي مناسبة هو مدعو فيها ومش حيحضرها، عموما كان موقف الدكتور قنديل كان مثار تعجبنا، وعلى ما يبدو ان قرار مقاطعته لحضور القداس اكتشف انه قرار غلط وبالفعل اتوجه النهاردة للمقر البابوي عشان يهني البابا تواضروس التاني بالعيد ويعتذرله عن عدم حضوره.
من جديد: إحباط محاولة تفجير كنيسة رفح
في وسط الاحتفالات امبارح تمكنت عناصر القوات المسلحة من احباط محاولة تفجير كنيسة رفح اثناء الإحتفال بعيد الميلاد المجيد.. قوات الجيش ضبطت سيارة بها مواد متفجرة بجوار الكنيسة بينما تمكنت سيارة تانية كان راكب فيها 4 ملثمين من الهرب وجاري البحث عنهم ...
مداخلة مع أحمد أبودراع مراسل أون تي - شمال سيناء
من جديد: الأوضاع الأمنية في سيناء الآن
عايزين نعرف ليه الأحداث التي بتحدث في سيناء في الوقت هذا وفي المنطة مثل سيناء معنا عبر الهاتف اللواء حمدي بخيت - الخبير الأمني والإستراتيجي
من جديد: الحكومة بدأت مفاوضاتها مع صندوق النقد الدولي
امبارح انتهت الحكومة من تشكيلها وحلفت اليمين وابتدت شغلها سريعا عشان تعرف تنهض بالاقتصاد والنهاردة حكومة قنديل ابتدت مفاوضاتها مع بعثة صندوق النقد الدولى بالقاهرة للحصول على القرض لسد العجز فى الموازنة بحضور محافظ البنك المركزى ووزيرى المالية والتخطيط والتعاون الدولى. ومعنا عبر الهاتف منصور كامل الصحفي بالمصري اليوم
من جديد: إحتفال لتكريم أعضاء الجمعية التأسيسية
غير حضور الدكتور هشام قنديل للكتدرائية للتهنئة بالعيد، الدكتور قنديل كان النهاردة من ضمن الحاضرين في الإحتفال اللي عقد لتكريم أعضاء الجمعية التأسيسة اللي وضعوا الدستور الجديد.
من جديد: رأي المواطنين عن التعديل الوزاري الجديد
يا ترى الناس عاوزة ايه من الحكومة وايه رأيها أصلا في التعديل الوزاري وهل هو مهم ولا لا واحنا كنا محتاجينه ولا لا خصوصا واننا داخلين على انتخابات من المفترض حزب الاغلبية فيها هو اللي يشكل الحكومة ، زمليتنا سارة فؤاد نزلت سمعت من الناس وعملتلنا التقرير ده.
من جديد - المستشار الغرياني: الفترة القادمة ستشهد نهضة
المستشار حسام الغرياني رئيس الجمعية التاسيسية قال في كلمته أنه بعد ما تم إقرار الدستور بدأت تدور عجلة الديمقراطية والأيام اللي جاية حتشهد نهضة حقيقية.. وأعلن عن تحويل الجمعية التأسيسية لجمعية ثقافية باسم الجمعية التأسيسية لنشر الثقافة الدستورية.
من جديد: تأجيل تعليق عمل أعضاء النيابة لأجل غير مسمى
نروح لأزمة النيابة العامة والنائب العام وكان من المفترض ان بكرة اعضاء النيابة العامة يعلقوا عملهم اعتراضا علي استمرار النائب العام طلعت عبد الله في منصبه لكنهم قرروا تأجيل تعليق عملهم لأجل غير مسمى ياتر التأجيل بسبب انفراجة في الأزمة ولا اية بالظبط هنعرفه من المستشار أحمد عبد الفتاح - وكيل النائب العام
المصريين ما بين عصر الجبرتي وعصر الإخوان .. من جديد
من جديد اهلا بحضرتكوا ... المصريين حصلهم ايه سؤال علطول بنسألهم لما بنشوف حاجة مش كويسة الناس بقت تعملها ، وحاجة كويسة الناس تبطل تعملها، في الـ18 يوم بتوع الثورة شوفنا شخصية المصريين الحقيقية اللي طلعت وزاحت حاجات كتير كانت موجودة عليها والسبب فيه سنين من الحكم الفاسد، وبعد الـ18 يوم وبعدها بشوية المصريين اللي كنا شايفينهم اتغيروا ومش اتغيروا وبس دولا كمان وقفوا قدام بعض في اكتر من مكان، ووصلنا لحالة استقطاب ما شفنهاش طول تاريخنا اللي فات، لاننا باختصار متعودين اننا ديما مع بعض، في أيام الأعياد نلاقي الناس كلها بتعيد مش مهم عيد مين المهم كلنا فرحانين لكن السنة ديه شفنا الدعوات اللي بتطلب ان ما يتمش التعييد على المسيحيين.. يا ترى ايه اللي وصلنا لكدة وهل احنا كنا طول تاريخنا عندنا النزعة الطائفية ديه .. ده اللي حنعرفه من احنا طول تاريخنا من المؤرخ عبد العزيز جمال الدين صاحب كتاب تاريخ الجبرتي ، يا ترى ايه اللي حصل للشخصية المصرية والمصريين اللي كانوا بيحتفلوا بعيد العدرا وعيد الصليب وعيد الفطر وعيد الأضحي زي بعض وايه اللي حصلهم ما بين عصر الجبرتي وما بين عصر الإخوان.
من جديد: جبهة الإنقاذ الوطني .. بوادر الأزمة
من جديد اهلا بحضرتكوا ... بعد حالة التفاؤل اللي كانت حاصلة قبل الاستفتاء على الدستور من توحد المعارضة في جبهة الإنقاذ الوطني ابتدت تظهر بوادر أزمة بتهدد الكتلة المدنية اللى كلنا عارفين إنها لو اتفككت هتتضيع، وهيضيع معاها آمل إحداث توازن بين التيارات الدينية والتيارات المدنية فى السلطة.
ايه هي بوادر الأزمة ..باختصار في كلام شبه مؤكد عن أن جبهة الإنقاذ هتخوض الانتخابات بقائمتين الأولي هتضم الوفد والمصري الديمقراطي والمصريين الأحرار.. والتانية هتضم التيار الشعبي والتحالف الشعبي والكرامة والناصري..
الخلاف بدء بإن شباب الجبهة رفضوا فكرة التحالف مع أحزاب أو كتل سياسية فيها ناس كان ليها علاقة بالنظام القديم، وهددوا بإنهم مش هيدعموا أي قائمة فيها مرشحين فلول أو أحزاب كانت ليها علاقة بالنظام القديم، من ناحية تانية بعض أحزاب الجبهة شايفة إن الفلول فى السجن والباقي هيتطبق عليه قانون العزل السياسي فبالتالي مفيش حاجة أسمها فلول، وأنه يمكن التنسيق مع ناس كان ليها علاقة بالنظام القديم مادامت زمتهم المالية وسمعتهم كويسة.. الخلاف ده ظهر أكتر بعد زيارة الدكتور البرادعي للدكتور عبد المنعم أبو الفتوح أمبارح في بيته، وكان موجود الدكتور عمرو خالد رئيس حزب مصر، واتكلموا عن إمكانية التحالف فى الانتخابات، لكن د. أبو الفتوح رفض واتمسك باستبعاد الأحزاب اللى كان ليها علاقة بالنظام القديم، واقترح عليه تشكيل جبهة جديدة بعيداً عن جبهة الإنقاذ للتحالف فى الانتخابات الجاية.. ومن ناحية تانية أحزاب جبهة الإنقاذ نفسها، أجتمعت أمبارح وعرض عليهم الدكتور البرادعي لقاءه بابو الفتوح، لكن جبهة الإنقاذ رفضت فكرة انضمام الدكتور أبو الفتوح باعتباره من قيادي سابق بجماعة الإخوان المسلمين اللى هم متحدين أساساً عشان ينافسوها .. نحاول نفهم وجهة نظر الطرفين من ضيوفنا أنهارده الاستاذ فكري نبيل عضو أمانة الاتصال السياسية بحزب مصر القوية .. وياسر الهواري عضو المكتب الإعلامي بحزب الدستور..
ليست هناك تعليقات:
إرسال تعليق