برنامج بلدنا بالمصرى
تقديم ريم ماجد
على قناة ONTV
يوتيوب كاملة
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
ONtv Livestreaming - البث الحي
اتمنى مشاهدة ممتعة
ونبدا
برنامج بلدنا بالمصرى تقديم ريم ماجد على قناة ONTV حلقة الخميس 30 اكتوبر 2012 يوتيوب كاملة
بلدنا بالمصري: اكتبوا عن عصام عطا في ذكراه
اما اخر اخبار بلدنا فماهواش بعيد اوي عن اللي بنعيد ونزيد فيه دة.. فيه سنة بحالها عدت ولسة بتعدي على احداث كتير راح فيها اللي راح ولسةحقه رايح ولسة المتهم مش بس برئ دة لسة حر طليق ومستقوي.. من يومين عدت سنة بالتمام والكمال على قتل الشهيد عصام عطا في سجن طرة ولسة القاتل حر ولسة ماحدش خد جزاءه.. الاحتفال بذكراه واخد اكتر من مظهر اولهم الدعوة اللي وجهتها عدد من القوى والحركات الثورية عشان يكون النهاردة اول من ايام التدوين والتغريد عن عصام عطا وعن انتهاكات الداخلية عموماً
اما الاحتفال الرسمي بذكرى عصام عطا فهيكون يوم السبت ٣ نوفمبر الساعة سبعة عند تقاطع شارع منصور وشارع محمد محمود وهيتزامن معاه اطلاق حملة "وطن بلا تعذيب".. واللي هيتبناها برنامج بلدنا بالمصري بكرة على الهوا في فقرة خاصة عن عصام عطا واللي زيه من السابقين واللاحقين وعن ازاي بلدنا تكون "وطن بلا تعذيب"
ريم ماجد: ليلتنا عن الكرامة اللي لسة متمرمطة
يسعد مساكم وحلقة جديدة من بلدنا بالمصري.. اول حلقة بعد اجازة العيد كل سنة واحنا كلنا طيبين اوي وبعودة علينا الايام وعلى بلدنا وهلى اهلها وناسها الجدعان الطيبين بالف خير وسلامة وراحة بال وعيش وحرية وعدالة اجتماعية وكرامة انسانية.. ديه الاماني والاحلام اللي هي اصلاً اصلاً حقوق اصيلة ومن ابسط حقوقنا مش طالبين يعني لبن العصفور ولا عايزين الديب ييجي من ديله على ملا وشه ولا حاجة لا سمح الله.. لكن لحين اشعار اخر احنا لسة بنحلم بحقوقنا ولسة ما انش الاوان عشان نشوفها بعينينا حقيقة عايشينها.. لكن العكس هو اللي للاسف الشديد حقيقة لسنة بنعيشها كل يوم والتاني ولسة رغيف العيش بطلوع الروح.. ولسة الحرية بعافية ولسة العدالة الاجتماعية حاجة كدة شبه عشم ابليس في الجنة ولسة الكرامة متبهدلة ومتمرمطة.. ويا سلام بقة لو كنت استجريت في يوم من الايام وكنت واحد من اللي خرجوا يطالبوا بكل دة، ويا ويلك لو كنت واحد من اللي لسة بيطالبوا بكل دة..
بعد اخر اخبار بلدنا، هيكون لنا كلام شرحه يطول عن الكرامة اللي لسة متمرمطة وعن الحق في الحياة الكريمة والحق في الحياة اصلاً اللي لسة بينتهك وعلى عينك يا تاجر على اساس ان الثورة ديه كانت حيالله في التلفزيون.. بعد اخر اخبار بلدنا هيكون معانا خالد السيد وتقادم الخطيب اتنين من اللي خرجوا يطالبوا بالعيش والحرية والعدالة الاجتماعية والكرامة الانسانية ومازالوا، اتبهدلوا واتمرمطوا يوم الوقفة وكانوا على وشك يلبسوا قضايا وتهم ولا ليهم بيها اي علاقة ولولاش انهم ناشطين واعضاء في حركات وقوى واحزاب ولجان تقصي حقائق يمكن مصيرهم كان بقى مصير خالد سعيد ولا عصام عطا ولا غيرهم الفات من المواطنين المصريين اللي راحوا هدر وفي شربة مية وماحدش يعرف عنهم حاجة عشان مالهمش ضهر فسهل يضربوا على بطنهم .. وهيكون معانا اللواء/ عبد الهادي بدوي مساعد وزير الداخلية الاسبق وواحد من اهم الخبراء الامنيين اللي شاركوا في دراسة اصدرها مركز النيل للدراسات الاقتصادية والاستراتيجية وعنوانها"كيف نعيد بناء جهاز الامن على اسس وطنية وقانونية" وهيكون معانا الاستاذ جمال عيد مدير الشبكة العربية لمعلومات حقوق الانسان.. وبكدة يبقة الجواب باين من عنوانه والرسالة اللي تسد عين الشمس واللي ريقنا نشف نهاتي بيها: تطهير واعادة هيكلة وزارة الداخلية.. مع عدم الاعتذار للناس اللي بتاذيهم الكلمتين دول وكانهم عيب وما يصحش واولهم:رئيس الجمهورية ورئيس حكومته اللي اعتبروا نفسهم بقلب جامد رئيس وحكومة الثورة اللي قامت في يوم عيد الشرطة مش بالصدفة ولا اعتباطاً..
بلدنا بالمصري: الداخلية ردت مرة .. عقبال الباقي
لكن دة ما يمنعش ان وزارة الداخلية وعلى ما يبدو انه تطور في اداءها، بقت تعتذر وتتخذ الاجراءات القانونية
بلدنا بالمصري: ضابط يقتل مجند بالأمن المركزي
انتهاكات بعض ظباط الشرطة وافرادها، الظاهر كدة والله اعلم انه مش بس على قد المواطنين لكن ساعات كمان السلاح بيطول، ويصيب ويقتل افراد من جهاز الشرطة نفسه .. النيران الصديقة قتلت المجند حسن على الشرقاوي اللي كان مجند في قطاع الامن المركزي في الاقصر، حسب مركز حماية لدعم المافعين عن حقوق الانسان
معنا على الهاتف
أ/ بركات الدمراني - الناشط الحقوقي بمركز حماية
بلدنا بالمصري: دور النيابة في مواجهة انتهاكات الشرطة
في تقرير منظمة العفو الدولية عن انتهاكات الشرطة تحت حكم العسكر الصادر يوم ٢ اكتوبر تحت عنوان:"وكلاء القمع: الشرطة المصرية وقضية الاصلاح" فيه جزء بيتكلم عن دور المؤسسات العامة في مواجهة انتهاكات الشرطة ومن اهم المؤسسات اللي اشار ليها التقرير: النيابة العامة
بلدنا بالمصري: مظاهرات دار القضاء لإقالة النائب العام
التقرير بيتكلم عن دور النيابة العامة والنائب العم عموماً.. اما فيما يخص الواقع فمطلب اقالة النائب العام كان كمان من ضمن مطالب الثورة واللي خرجت تطالب بيه كتير من المظاهرات من اول ما قامت الثورة ولحد الجدل اللي ثار حوالين قرار رئيس الجمهورية بتعيينه سفير في الفاتيكان واللي تم اعتباره من كتير من القوى بما فيها قوى ثورية مخالفة صارخة للقانون واعتداء على سلطة القضاء وانتهاك لاستقلالها.. لكن النهاردة كان فيه وقفة احتجاجية قدام دار القضاء العالي نظمتها مجموعة من احزاب تيار الاسلام السياسي للمطالبة تاني باقالة النائب او مطالبته هو نفسه بتقديم استقالته
دور النيابة العامة في مواجهة الانتهاكات هيكون كمان من ضمن المحاور الرئيسية في فقرتنا اللي جاية بعد اخر اخبار بلدنا
بلدنا بالمصري: تأجيل جمعة تطبيق الشريعة ل ٩ نوفمبر
من ناحية تانية، اعلنت القوى والحزاب الاسلامية اللي كانت داعية لجمعة "تطبيق الشريعة الاسلامية حسب وصفهم" اعلنت تاجيل المظاهرة ليوم ٩ نوفمبر
تفاصيل أكتر معنا على الهاتف
د. صفوت عبد الغني - رئيس المكتب السياسي لحزب البناء والتنمية
بلدنا بالمصري: دعاوى لوقف أعمال تأسيسية الدستور
من ناحية تانية وبرده قدام محكمة القضاء الداري تم النهاردة رفع دعوتين قضائيتين بخصوص الجمعية التاسيسية لكتابة الدستور
معنا على الهاتف
أ/ شحاتة محمد شحاتة - مدير مركز العربي
بلدنا بالمصري: بيلغوا الحفلات بدعوى التنصير
هانروح لوضوع نرجو أنه مايبقاش ظاهرة وهة إلغاء حفلات فنية .. هنعرف التفاصيل من
جون برسوم - المتحدث باسم فريق قلب مصر
بلدنا: إلغاء حفلات بساقية الصاوي والسبب غير معروف
هانروح لوضوع نرجو أنه مايبقاش ظاهرة وهة إلغاء حفلات فنية .. هنعرف التفاصيل من
هاني بدير - موسيقي
بلدنا بالمصري: معاناة رغيف العيش في بلدنا
مادمنا بدانا بالكلام عن العيش والحرية والعدالة الاجتماعية والكرامة الانسانية وبما ان العيش كان ومازال اول مطلب للجماهير.. فخلونا نشوف عينة من الازمات اللي بيعدي بيها رغيف العيش في بلدنا
بلدنا بالمصري: حكم ببطلان عقد استغلال منجم السكري
نروح لمحكمة القضاء الاداري اللي اصدرت النهاردة حكم ادى الى خسارة البورصة حوالي ٥ مليار جنيه بعد النطق بحكم بطلان عقد منجم السكري للدهب ضمن قضايا تانية كانت بينظر فيها النهاردة في مجلس الدولة
معنا على الهاتف
المحامي/ خالد علي
بلدنا بالمصري: كيف نبني جهاز الأمن على أسس وطنية
على عيننا وعلى راسنا المجهودات اللي وزارة الداخلية بتعلن عنها اول باول لاستعادة الامن في الشارع ، مع الوضع في الاعتبار ان ديه شغلتها اللي المفروض ما يكونلهاش لا شغلة ولا مشغلة غيرها ودة واجبها اللي ما يصحش تشكر عليه.. والمقدمة ديه اللي فيها ما قل ودل كان لابد منها عشان ماحدش يرجع يقول لنا في الحالات اللي زيه ديه: هو انتوا ليه حطين نقركم من نقر الشرطة ولابسين النضارة السودا ومش شايفين غير السلبيات ومتجاهلين مجهودات الشرطة لاستعادة الامن؟! احنا لا حطين نقرنا من نقرها ولا لابسين نضارات سودة لكن لا عمرنا غمضنا ولا هنغمض عن اللي يدوس على طرف ولاد البلد ديه او يمد ايده عليهم او يمس شعرة منهم فما بالنا باللي يدوس على كرامتهم او ينتهك حقهم في حياة كريمة او حقهم في الحياة اصلاً.. اللي اتعرض له عدد من النشطا مؤخراً على ايد الشرطة يمكن ماهواش الاخطر لكن على الاقل هو اخرة المتمة وكونه مش الاخطر مش معناه انه مش خطير دة غير انه هيكون حجتنا اللي معانا عشان ننادي للمرة الكام ماعدناش عارفين باالي ريقنا نشف ننادي بيه من يوم الثورة ما قامت: الا وهو تطهير وزارة الداخلية واعادة هيكلتها لصالح الشرطة ولصالح الشعب
اللواء/ عبد الهادي بدوي: مساعد وزير الداخلية الاسبق للاموال العامة واحد اهم الخبراء الامنيين المشاركين في الدراسة الصادرة عن مركز النيل للدراسات الاقتصادية والاستراتيجة بعنوان: " كيف نعيد بناء جهاز الامن على اسس وطنية وقانونية
جمال عيد: مدير الشبكة العربية لمعلومات حقوق الانسان
خالد السيد: عضو الامانة العامة لحزب التحالف الشعبي الاشتراكي وعضو المكتب التنفيذي للتيار الشعبي المصري وكان واحد من الاعضاء البارزين لائتلاف شباب الثورة وطبعاً واحد من اللي نزلوا يوم ٢٥ يناير ٢٠١١ ضد انتهاكات وزارة الداخلية وفي يوم عيدها
هاتفياً
الدكتور/ تقادم الخطيب: المدرس المساعد بجامعة المنصورة.. عضو اجمعية الوطنية للتغيير.. وسبحان الله عضو لجنة تقصي الحقائق اللي شكلها رئيس الجمهورية للتحقيق في احداث قتل المتظاهرين في احداث الثورة من ٢٥ يناير ليوم ٣٠ يونية/ واللي كان هيشوف ايام سودا على حد تعبير او بمعنى اصح تهديد الظابط اللي قبض عليه فجر يوم الخميس اللي فات في كمين امني على طريق نجادة في الاقصر
ليست هناك تعليقات:
إرسال تعليق