نشاهد اليوم
برنامج من جديد
و الذى يذاع على قناة ONTV
تقديم شريهان أبوحسن
شارك الخبر مع اصدقائك على الفيس بوك و تويتر و جوجل +1 من اعلى الصفحة
مع تمنياتى بمشاهدة ممتعة
و لنبداء
برنامج من جديد تقديم شريهان ابو حسن و حلقة الثلاثاء 16 اكتوبر 2012 من قناة ONTV يوتيوب كاملة
من جديد: حرب البلاغات في أحداث كشف الحساب
السلام والتحية على حضراتكو وأهلا بيكو معانا ... كل سنة وانتم طيبين وعيد أضحى مبارك عليكم جميعا بكرة ان شاء الله هيكون اول أيام شهر ذي الحجة وبالتالي فعيد الأضحى هيكون يوم الجمعة 26 اكتوبر عادة الله علينا وعليكم بالخير والبركات ...
حرب البلاغات والتحقيقات سواء بخصوص ازمة القضاة أو بخصوص احداث الجمعة اللي فاتت لسة مشتعلة امبارح عرضنا على حضراتكو البلاغات اللي اتقدم بيها القضة ضد عدد من الشخصيات العامة خصوصا المنتميين لجماعة الإخوان المسلمين زي الدكتور عصام العريان والدكتور محمد البلتاجي ، كمان البلاغات اللي قدموا ضد عدد من الإعلاميين والنهاردة ردت جماعة الإخوان المسلمين على هذه البلاغات بأن محامي الجماعة عبد المنعم عبد المقصود اتقدم نيابة عن 180 عضو من اعضاء الجماعة للتحقيق في احداث الجمعة اللي فاتت .
من جديد: دعوات لجمعة مصر مش عزبة ١٩ أكتوبر
كمان استمرت دعوات حزب الدستور والتيار الشعبي وعدد من القوى السياسية الأخرى لتنظيم مسيرات ومليونية حاشدة يوم الجمعة اللي جاي تحت عنوان مصر مش عزبة مصر لكل المصريين للمطالبة بحق الشهداء والمصابين وإعادة فتح التحقيقات فى كل الأحداث الدموية منذ اندلاع الثورة مرورا بموقعة الجمل وأحداث مسرح البالون ومجلس الوزراء ومحمد محمود وماسبيرو وبورسعيد وانتهاء بأحداث الجمعة اللي فاتت والنهاردة عقدوا مؤتمر صحفي لألقاء بيان حول المليونية الجديدة .
من جديد: تأجيل طعون التأسيسية لجلسة ٢٣ أكتوبر
النهاردة كمان محكمة القضاء الإداري بمجلس الدولة استأنفت نظر الطعون اللي بتطالب بحل الجمعية التأسيسية وقررت التأجيل لجلسة 23 أكتوبر، رئيس المحكمة منع كاميرات التليفزيون من حضور الجلسات ودا لأنه شايف انها بتحدث نوع من الأرتباك داخل الجلسة خصوصا بسبب تدافع بعض المحامين .. ومع كدة جلسة النهاردة شهدت مشادات بين الطرفين سوا المطالبين بحل الجمعية التأسيسية أو المؤيدين لبقائها وعلى رأسهم طبعا محاموا جماعة الإخوان المسلمين .
من جديد: الدستورية ترفض وضعها في دستور التأسيسية
أما المحكمة الدستورية فواضح انها بدأت في مواجهة عنيفة مع الجمعية التأسيسية لوضع الدستور ودا لأن النهاردة المستشار ماهر البحيرى رئيس المحكمة الدستورية العليا أعلن رفض المحكمة لجميع المواد اللي جاءت بالمسودة النهائية للدستور الجديد والمتعلقة باختصاصات المحكمة الدستورية وتشكيلها وأعتبره سلب لاختصاصات المحكمة ، كمان أكد خلال مؤتمر صحفي عقدت المحكمة النهاردة أن البعض من أعضاء الجمعية التأسيسية حاولوا تصفية حسابات شخصية بسبب أحكام صدرت عن المحكمة لا تأتى على أهوائهم ودا طبعا أكيد بيشير إلى حكم حل مجلس الشعب .
من جديد: سلفيون يرفضون دستور التأسيسية
شوفنا كتير طالبوا بحل الجمعية التاسيسية لوضع الدستور لكن الجديد النهاردة هو ان بعض النشطاء السلفييون يكون هما اول من يعترض على مسودة الدستور الجديد .. مش بس كدا دول كمان دعوا لمليونية حاشدة يوم 2 نوفمبر الللي جاي لرفض الدستور الجديد والمطالبة بتحكيم الشريعة الإسلامية ...
من جديد: أزمة الغرياني واتهامات النائب العام
نروح لأخبار الجمعية التأسيسية لوضع الدستور واللي النهاردة اعلنت على لسان المسستشار حسام الغرياني رئيس الجمعية أن مناقشة المسودة الأولى للدستور ستبدأ بعد العيد بداية من يوم 4 من نوفمبر اللي جاي وتستمر على مدى أربع جلسات وأن الأسبوع التالى سنبدأ التصويت على مواد الدستور داخل الجمعية التأسيسية .. والنهاردة تم تصعيد 9 أعضاء من الاحتياطيين عبر الانتخاب بدلاً من الأساسين المنسحبين أو المتغييبن ..المستشار الغرياني كمان النهاردة تطرق خلال الجلسة العامة للجميعة التأسيسية إلى ازمة النائب العام وشكل لجنة ثلاثية من أعضاء الجمعية للتحقق مما جاء على لسان النائب العام حول قيام المستشار الغريانى بالاتصال به وتهديده ،وقال الغريانى لو ثبت أننى بعد خمسين سنة من العمل بالقضاء اعتديت على استقلال النائب العام فلن أستحق أن أبقى رئيسا لهذه اللجنة...
من جديد: استعدادات الكنيسة لانتخابات البابا ١١٨
زي ما شفنا في التقرير انه تنازل 4 من المدعين الخمسة، اللي طالبوا بوقف الانتخابات عن دعاواهم، وقدموا للمحكمة ما يفيد بالتنازل، وأن الكنيسة استجابت لمطالبهم الواردة بالدعاو.. .الكنيسة المرقصية من ناحيتها عقدت مؤتمر صحفي للوقوف على اخر التطورات الخاصة بعملية انتخاب البابا 118.
من جديد: مصير دعوى وقف انتخابات الباباوية
كمان مجلس الدولة نظر النهاردة الطعون اللي رفعها عدد من المحامين الأقباط واللي بيطالبوا فيها بوقف اجراء انتخابات البابا الجديد .. والمفاجأة النهاردة أن مقيمي هذه الطعون أثبتوا تنازلهم عن الطعون وقالوا انهم خلاص مش عاوزين يوقفوا الانتخابات لكن في واحد منهم تمسك بالاستمرار في طعنه .. تفاصيل اكتر عن الجلسة
من جديد: الداخلية تكذب اتحاد الكرة .. مصير الدوري
امبارح ناقشنا معاكو قرار اتحاد الكرة لتأجيل الدروي وقالوا انهم في انتظار موافقة الجهات الرسمية والنهاردة وزارة الداخلية أصدرت بيان قالت فيه ان الوزارة سبق وان تواصلت مع الجهات المعنية بشئون الكرة والجهات الرياضية لتحديد موعد بدء عودة النشاط الرياضي واكدت على قدرتها على تأمين مباريات كرة القدم بالدوري في الوقت اللي يراه اتحاد الكرة ملائما لذلك ... ياترى معنى الكلام دا ان اتحاد الكرة قال اسباب غير حقيقة لتأجيل الدوري وان الداخلية دلوقتي بترمي الكرة في ملعبهم .
من جديد: هل عاد الأمن للشارع المصري
خلاص الداخلية قالت كلمتها .. عشان المباريات .. نسيب الحديث عن تأمين المبارايات ونروح لتأمين الشارع ونشوف رأي الناس ايه في الحملات اللي بتقوم بيها الداخلية اليومين دولا .. خصوصا بعد اللي حصل امبارح في ميدان الجيزة ومواجهات بين الشرطة والباعة الجائيلين.
من جديد: عمال الاستصلاح على رصيف مجلس الوزرا
رصيف مجلس الوزراة خلاص تقريبا ما بقاش يعدي يوم إلا ونلاقي مظاهرات بيطالب أصحابها بحقوقهم .. والنهاردة ضيوف رصيف مجلس الوزرا كانوا عمال شركات استصلاح الأراضي أمام مجلس الوزراء مطالبين بعودة 6 شركات إلى قطاع عام.
من جديد: الصيادلة يتظاهرون أمام وزارة الصحة
كمان تظاهر عدد كبير من الصيادلة أمام وزارة الصحة اعتراضا على عدم تفعيل وزير الصحة لقرار تسعير الدواء رقم 499 وقرار إلغاء العهدة للصيادلة الحكوميين ، وطالبوا بإقالة وزير الصحة وكتابة الدواء بالأسم العلمي ... عشان نفهم مطالبهم اكتر تعالوا نشوف التقرير اللي جاي، وكالعادة حنشوف التقرير وبعدها فاصل وبعد الفاصل حنناقش مسودة الدستور اللي تم طرحها
من جديد: قراءة في مسودة الدستور الجديد
من جديد اهلا بحضراتكوا .. هنفضل دايما نقول ونذكر حضرتكوا أن الجمعية التأسيسية وكتابة الدستور الجديد هي المعركة الأكبر والأهم للقوى السياسية .. لكن للاسف كل يوم بتظهر مشكلة جديدة متعلقة بالتأسيسية .. تقريبا كل يوم فى أزمة .. في شد وجذب بين التيارين المدني والديني داخل الجمعية.. شوية يقولوا ان المسودة الأولية طُرحت على الرأي العام والناس انقسمت عليها... شويه يقولوا "أصل الصياغة فيها ركيكة" .. "أصل المواد بتعبر عن وجهة نظر التيار الإسلامي بس ".. ويظهر اننا داخلين في جدال لن ينتهي، خاصة وإن فيه مواد مهما حاولوا يقولولنا إنهم متوافقين عليها، إحنا عارفين إن مفيش توافق.. اولها المادة التانية من الدستور .. وصلاحيات الرئيس وباب الحريات والإعلام.. والمواد الانتقالية وبقاء الرئيس لحين إنهاء فترته الرئاسية.. وكمان مرجعة الأزهر .. والمادة 36 .. وغيرها من المواجد الجدلية ..
على اي حال احنا هنحاول نفهم تفاصيل اكتر عن اللي بيحصل داخل الجمعية التأسيسية اليومين دول ، واسئلة تانية كتير هنطرحها على ضيوفنا ، خاصة بعد قرارها الاخير بالتصويت على تصعيد 9 اعضاء جدد من الاحتياطيين بدل المنسحبين واللي ما بيحضروش الاجتماع، واللي البعض شايف انه ممكن يحدث توازن نوعا ما لأن المتصعدين دول منهم 8 محسوبين على التيارات المدنية ..
بنرحب بالدكتور محمد محي الدين مقرر لجنة الدفاع والأمن القومي بالجمعية التأسيسية .. والدكتور عمرو هاشم ربيع مدير وحدة التحول الديمقراطي بمركز الأهرام للدراسات الاستراتيجية والسياسية
ليست هناك تعليقات:
إرسال تعليق