نشاهد اليوم
برنامج من جديد
و الذى يذاع على قناة ONTV
تقديم شريهان أبوحسن
شارك الخبر مع اصدقائك على الفيس بوك و تويتر و جوجل +1 من اعلى الصفحة
مع تمنياتى بمشاهدة ممتعة
و لنبداء
برنامج من جديد تقديم شريهان ابو حسن و حلقة الثلاثاء 12 يونيو 2012 من قناة ONTV يوتيوب كاملة
من جديد: كلنا تايهين ومش عارفين رايحين فين
السلام والتحية على حضراتكو واهلا بيكو معانا .. خلاص كلها اقل من 48 ساعة وتتحسم مسارات كتيرة احنا واقفين قدامها مسار مستقبل البرلمان هل حيكمل ولا لأ .. مسار الجمعية التأسيسية هل حتستمر ولا لأ لان بمجرد بدء تشكيلها وانسحاب القوى المدنية منها ودخولها في نفس السناريو بتاع المره اللي فاتت .. واللي بيشمل كمان الطعن على صحتها قدام محكمة القضاء الادراري .. مسار تالت .. وهو الانتخابات الرئاسية نفسها .. هل حتكمل ولا لأن الانتخابات الرئاسية كلها على المحك سواء من ناحية قانون العزل لان لو اقر بدستوريته حيخرج شفيق من المسار وبالتالي حنخش في مجموعة تساؤلات وحيص بيص .. وإذا تم اقرار دستوريته ..فيه قانون تاني وهو الخاص بتنظيم الانتخابات الرئاسية واللي صدر عن المجلس العسكري قبل ايام من انعقاد البرلمان ولو حضراتكو تتذكروا كان معانا الدكتور جابر نصار وقالنا ان من المتوقع ان يتم اقرارعدم دستورية القانون من اساسه لانه صدر من المجلس العسكري قبل ايام من انعقاد مجلس الشعب وفكرنا بقانون جيهان اللي صدر ايام السادات.. على اية حال احنا تايهين زي ما حضراكوا تايهين ومش عارفين احنا رايحين على فين هل نقطة ومن أول السطر ولا ارجع كما كنت .. بس اللي احنا عارفينه ومتأكدين منه هو ايه اللي حصل في مصر النهاردة فنروح نشوفه ونرجع نبتدي من جديد.
من جديد: انسحابات بالجملة في تشكيل التأسيسية
النهاردة انعقدت الجلسة المشتركة للأعضاء المنتخبين من مجلسي الشعب والشوري لانتخاب أعضاء الجمعية التاسيسة المكونة من 100 عضو المنوط بها كتابة الدستور الجديد من بين نحو1300 مرشح لعضوية الجمعية، و50 عضواً احتياطياً، وسط انقسامات سياسية وانسحاب عدد من الأحزاب والتيارات السياسية المختلفة وعدد من الشخصيات العامة وكمان انسحاب المحكمة الدستورية من عضوية الجمعية التأسيسية
من جديد: الورقة الدوارة في انتخاب التأسيسية
في الحقيقة وزي ما شوفناها قبل كدا فبردوا النهاردة بعض النواب خصوصا نواب الحرية والعدالة والنور استخدموا الورقة الدوارة اللي بتضم 100 شخصية لأختيارها من بين المرشحين لعضوية الجمعية التأسيسية ، عملية الانتخاب كمان شهدت انسحاب عدد من النواب بيمثلوا 10 أحزاب و12 نائبا مستقل إلي جانب 12 نائبا ًعن حزب احتجاجا على غياب التوافق الوطني زي ما المنسحبين شايفيين .. معانا الأستاذ محمود سعد الدين المحرر البرلماني باليوم السابع
من جديد: تأمين إعادة الرئاسة والعبور الثاني
اما بخصوص الانتخابات الرئاسية فأدمن الصفحة الرسمية للمجلس الأعلى للقوات المسلحة أصدر بيان على موقع التواصل الإجتماعي الفيس بوك اعتبر فيه الانتخابات بمثابة العبور التاني للحرية والديمقراطية والكرامة والعدالة الاجتماعية، ووجه رسالة للرئيس القادم قال فيها " مهما كان انتماءك السياسى فقد اختارك الشعب لتحقيق أهدافه وطموحاته، سيؤيدك بكل قوة ويلتف حولك لتحقيق نهضته، فإن صدقت فقد وعدت وأوفيت، وإن لم تصدق فلا صبر عليك، فالبركان المصرى ثائر ولا يهدأ" .. أما عن خطة التأمين فده اللي حنعرفوا من زميلنا محمد حجاج الصحفي في اليوم السابع
من جديد: حركة ٦ أبريل تعلن دعم محمد مرسي
النهاردة حركة 6 أبريل أعلنت عن دعمها للدكتور محمد مرسي مرشح جماعة الإخوان المسلمين في جولة الإعادة لمواجهة الفريق احمد شفيق مقابل إقرار وثيقة الاتفاق الوطنى وطالبت الدكتور أبوالفتوح وحمدين صباحي ومحمد البرادعى بقبول الفريق الرئاسى والحكومة الائتلافية.
من جديد: بلاغ برشاوى انتخابية لدعم محمد مرسي
من ناحية تانية بدأت النهاردة نيابة مدينة نصر التحقيق في بلاغ تقدم به موظف بهيئة الطاقة الذرية و4 آخرين يتهمون فيه صاحبة دار لتحفيظ القرآن بتوزيع أموال علي المواطنين للتصويت لصالح مرشح الرئاسة محمد مرسي، حيث قررت صاحبة الدار خلال التحقيقات أن البلاغ ليس له أي أساس من الصحة وأنها تعطف علي الأسر الفقيرة، لكن مقدمي البلاغ اكدوا في المحضر انها بتوزع الأموال علي بعض المواطنين للتصويت لصالح مرشح الرئاسة محمد مرسي، وقد شاهدوها أثناء قيامها بتوزيع ٢٥٠ جنيهًا علي أكثر من شخص وقاموا بتسجيل تلك المشاهد علي (س دي) إلا أن صاحبة الدار أنكرت ذلك الاتهام، وقررت أنها تعطف علي الفقراء، وأن الـ ٢٥٠ جنيهًا تعد بمثابة إعانة شهرية لكل شخص.. لكن على اية حال دي المشاهد اللي صورها مقدمو البلاغ وقدموها للنيابة ..
من جديد: تجديد حبس فتاة علي ونيس ١٥ يوم
اما عن آخر التطورات بخصوص اتهام النائب السلفي علي ونيس بأرتكاب فعل فاضح في الطريق العام فالنهاردة قاضي المعارضات بمحكمة بنها قرر تجديد الفتاة المتهمة بأرتكاب الفعل الفضاح مع عضو مجلس الشعب 15 يوم على ذمة التحقيق ، كمان أرسلت النيابة للدكتور سعد الكتاتنى رئيس مجلس الشعب ملفا يتضمن تحقيقات النيابة فى الواقعة طلبت النيابة من رئيس المجلس رفع الحصانة عن النائب لسماع أقواله .. معانا الأستاذ خالد حجازي الصحفي باليوم السابع
غداً شهادة البلتاجي وعكاشة وحجازي في موقعة الجمل
محكمة جنايات القاهرة استكملت النهاردة محاكمة المتهمين محاكمة المتهمين في "موقعة الجمل" وقررت التأجيل لجلسة بكرة لشهادة كل من الدكتور محمد البلتاجى، عضو مجلس الشعب، والداعية الإسلامى صفوت حجازى، والإعلامي توفيق عكاشة... كان من المفترض ان يتم سماع شهادة الدكتور البلتاجي لكنه اعتذر بسبب تواجده اثناء انتخاب الجمعية التأسيسية كمان الداعية صفوت حجازي النهاردة أعتذر لأسباب مرضية
من جديد: طلب لرفع الحصانة عن زياد العليمي
من ناحية تانية كشف مصدر قضائي لمن جديد ان النيابة العامة تلقت طلبا من القضاء العسكري برفع الحصانة تمهيدا لاتخاذ الاجراءات القانونية تجاه العليمي، ولو حضراتكو تتذكروا ان الواقعة ديه اللي كانت من كام شهر واللي كان اتقدم فيها مجموعة من المواطنين ببلاغ للنيابة العسكرية ضد العليمي بعد واقعة سبه للمشير طنطاوي.
من جديد: أول مصل مصري لمكافحة انفلونزا الطيور
بعد مرور أكتر من 6 سنوات من ظهور فيروس أنفلونزا الطيور فى مصر النهاردة المركز القومي للبحوث عقد مؤتمر صحفي أعلن فيه عن إنتاج لأول مصل مصرى بيطرى لمكافحة الفيروس وحماية صناعة الدواجن اللي طبعا زي ما حضراتو عارفين تكبدت خسائر فادحة على مدى السنين اللى فاتت .
من جديد: أحكام الدستورية وسيناريوهات الساعات القادمة
اينشتاين قال انه الغباء ان الواحد يعمل نفس الفعل بنفس الطريقة ونستنى نتيجة مختلفة.. مش عارفة إلى أي مدى المقولة ديه بتنطبق على الواقع اللي احنا عايشينه دلقتي وخاصة فيما يتعلق بالجمعية التأسيسية، لان نفس أخطاء الماضي بتتكرر الاستبعاد والاقصاء بيتكرر، بما اننا عايشين في مصر ومحدش عارف اية اللى هيحصل بكرة .. محدش عارف اية اللى ممكن يحصل كمان ساعه ... ودة لاننا باختصار عايشين حالة ارتباك في كل المجالات .. ارتباك تشريعي ارتباكي سياسي وكمان ارتباك دستوري ..
فإحنا هنحاول نشوف اية هي سيناريوهات المرحلة الجاية والمسارات اللي كنا اتكلمنا عنها في أول حلقتنا النهاردة وده حناقشه مع ضيوفنا
.. الدكتور جابر نصار استاذ القانون الدستوري بجامعة القاهرة والنائب عن الثورة مستمرة مصطفى الجندي
ليست هناك تعليقات:
إرسال تعليق